EKICWEKA KY’OKWEGA 33
Yahwe Arolerra Kandi Alinda Abantu Be
“Eriso lya [Yahwe] liikara hali abo abanyakumutina.”—ZAB. 33:18.
EKIZINA 4 ‘Yahwe Nuwe Muliisa Wange’
EBITURAYEGA *
1. Habwaki Yesu yasabire Yahwe kulinda abahondezi be?
OMU bwire bw’ekiro Yesu atakafiire, akasaba Ise ow’omu iguru ekintu eky’embaganiza. Akasaba Yahwe kulinda abahondezi be. (Yoh. 17:15, 20) Ky’amananu ngu Yahwe aikaire n’ataho omutima abantu be, n’abarolerra, kandi n’abalinda. Baitu Yesu akaba akimanyire ngu abahondezi be bakuhikirweho okuhiganizibwa okw’amaani kuruga hali Sitaani. Ekindi, Yesu akaba akimanyire ngu abahondezi be bakwetaagire obukonyezi bwa Yahwe kurwanisa okutahirra kwa Sitaani.
2. Kusigikirra ha Zabuli 33:18-20, habwaki tutasemeriire kutiina obutuhikwaho ebizibu?
2 Ensi erukulemwa Sitaani eretiire Abakristaayo ab’amananu kasumi kanu ebizibu bingi. Tuhikwaho ebizibu ebitumaramu amaani kandi ebirenga obwesigwa bwaitu hali Yahwe. Baitu nk’oku turarora omu kicweka kinu, busaho kintu kyona ekitusemeriire kutiina. Yahwe atulinda, arora ebizibu ebiturukurabamu, kandi aikara ayetekaniize kutukonyera kubirabamu. Leka tubazeeho ebyokurorraho bibiri kuruga omu Baibuli ebirukwoleka omulingo eriiso lya Yahwe “liikara hali abo abanyakumutina.”—Soma Zabuli 33:18-20.
YAHWE ATUKONYERA OBUTWEHURRA TULI ITWENKA
3. Nidi obutusobora kwehurra tuli itwenka?
3 N’obukiraaba ngu tuli kicweka ky’eka enkooto ey’abaheereza ba Yahwe, obwire obumu nitusobora kwehurra tuli itwenka. Ekyokurorraho, abato nibasobora kwehurra ngu bali bonka obubarukuba nibasoborra abeegi bagenzi baabo ha isomero enyikiriza zaabo rundi obubafuruka bakagenda omu kitebe ekihyaka. Obwire obumu nitusobora kuba nitwehurra twenuubire, rundi tuhoirwemu amaani, kandi nitusobora kuteekereza ngu enyehurra zinu tusemeriire kuzirwanisa itwenka. Nitusobora kutiina kugambira abandi omulingo turukwehurra nituteekereza ngu tibarukwija kutwetegereza. Obwire obumu nitusobora n’okwekaguza obuharaaba haroho omuntu ow’arukutufaaho. Kyona ekituleetera kwehurra tuli itwenka, nikisobora kutumaramu amaani n’okutuleetera kwetuntura. Yahwe tarukugonza twehurre omu mulingo ogu. Habwaki nitugamba tuti?
4. Habwaki nabbi Eriya yagambire ati: ‘Ninyowe nabbi nyenka ow’asigaireho’?
4 Tekerezaaho ekyokurorraho kya omusaija omwesigwa. Omugo Yezeberi akaba arahiire kumwita, nahabweki Eriya akairuka kujuna obwomeezi bwe kumara ebiro ebirukuhingura omu 40. (1 Bakam. 19:1-9) Obwakaba ali wenka omu bwingira, akagambira Yahwe ati: ‘Ninyowe nabbi nyenka ow’asigaireho.’ (1 Bakam. 19:10) Hakaba haroho banabbi abandi omu nsi egi. Ekyokurorraho, Obadiya akaba ajunire banabbi 100 bataitwa Omugo Yezeberi. (1 Bakam. 18:7, 13) Hati, habwaki Eriya yayehuliire ali wenka? Tugambe ngu, akateekereza banabbi boona Obadiya abakaba ajunire omu kasumi ako bakaba bafiire? Tugambe ngu, akehurra ali wenka habwokuba abandi batamweteranizeeho kuheereza Yahwe hanyuma y’okulenga Baali ha Rusozi Karameri? Obundi tugambe, akehurra ngu busaho n’omu akaba amanyire akabi akaakaba arumu, rundi tugambe akekaguza obuharaaba haroho omuntu ow’arukufaayo? Ebyahandiikirwe tibitusoborra omu bwijwire enyehurra za Eriya. Baitu ekitumanyire kiri ngu, Yahwe aketegereza ensonga habwaki Eriya yayehuliire ali wenka, kandi akaba amanyire omulingo gwonyini ogw’okumukonyeramu.
Obutwehurra tuli itwenka, isomo ki erikuhuumuza eritusobora kwega kuruga omu mulingo Yahwe yakonyiremu Eriya? (Rora akacweka 5-6)
5. Yahwe akagumya ata Eriya ngu akaba atali wenka?
5 Yahwe akakonyera Eriya omu miringo nyingi. Akamwekambisa kubaza. Akakaguza Eriya emirundi ebiri ati: “Nokora ki hanu?” (1 Bakam. 19:9, 13) Buli murundi, Yahwe yahuliirizaaga Eriya obuyamugambiraga omulingo arukwehurramu. Yahwe akagarukamu Eriya kuraba omu kumwoleka ngu aroho kandi w’amaani muno. Ekindi, akagumya Eriya ngu hakaba hakyaroho Abaisaleri baingi abakaba nibakyamuramya. (1 Bakam. 19:11, 12, 18) Hataroho kugurukyagurukya, Eriya akahumuzibwa hanyuma y’okugambira Yahwe buli kimu kyona ekiri ha mutima gwe n’omulingo Yahwe yamugarukiremu. Yahwe akaheereza Eriya obujunanizibwa obundi obukuru. Akamusaba kugenda kuseesaho Hazaeri amagita kufooka mukama wa Asura, kuseesaho Yehu kufooka mukama wa Isaleri, kandi n’okugenda kufoora Erisa nabbi. (1 Bakam. 19:15, 16) Yahwe akaha Eriya obujunanizibwa bunu habwokuba akaba nagonza kumukonyera kuteeka omutima ha bintu ebirungi. Ekindi Ruhanga akamuha omunywani omurungi Erisa. N’osobora ota kutunga obukonyezi bwa Yahwe obwoyehurra oli wenka?
6. Bintu ki eby’osobora kusaba obworukuba noyehurra oli wenka? (Zab. 62:8)
6 Yahwe naturaaliza kumusaba. Narora ebizibu ebiturukurabamu kandi natugumya ngu obwire bwona naija kuhuliiriza esaara zaitu. (1 Bas. 5:17) Kandi kimusemeza muno kuhuliiriza esaara ez’abaheereza be. (Nfu. 15:8) Kiki eky’osobora kusaba obworukuba n’oyehurra oli wenka? Seesa omutima gwawe gwona hali Yahwe nk’oku Eriya yakozere. (Soma Zabuli 62:8.) Mugambire byona ebirukukweraliikiriza hamu n’omulingo birukukuleetera kwehurra. Saba Yahwe akukonyere kugumira enyehurra zaawe. Ekyokurorraho, obworukwehurra oli wenka kandi otiinire obworukuba noha obwakaiso ha isomero, saba Yahwe akuhe obumanzi obworukwetaaga kusobora kusoborra kurungi enyikiriza zaawe. N’osobora n’okumusaba kukuha amagezi nukwo osoborre enyikiriza zaawe omu mulingo gw’amagezi. (Luk. 21:14, 15) Obworaaba norwanisa enyehurra embi, saba Yahwe akukonyere obaze n’Omukristaayo ow’akuzire omu by’omwoyo ha nsonga egi. Nosobora kusaba Yahwe akonyere ogu ow’orukugenda kubaliza ayetegereze omulingo orukwehurramu. Seesera Yahwe omutima gwawe gwona orole omulingo aragarukamu esaara zaawe, kandi oikirize obukonyezi kuruga h’abantu abandi obworaaba noyehurra oli wenka.
Oserra emiringo ey’okwongera ha buheereza bwawe kandi n’okukorra hamu n’abandi? (Rora akacweka 7)
7. Kiki ekyorukwega kuruga omu kyokurorraho kya Mauricio?
7 Itwena Yahwe atuhaire omulimo omurungi ogw’okukora. Okigumye ngu Yahwe narora kandi nasiima byona ebyorukukora kuhikiiriza obujunanizibwa bwawe omu kitebe hamu n’obuheereza. (Zab. 110:3) Obworukuba oine bingi eby’okukora omu mulimo gunu, nikisobora kukonyera kita obworukuba noyehurra oli wenka? Tekerezaaho ekyokurorraho eky’ow’oruganda omuto arukwetwa Mauricio. * Omu kaire kake Mauricio amazire kubatizibwa, munywani we nfenanfe akatandika kuruga omu mananu mpora mpora. Mauricio nagamba ati: “Obunamurozere naruga hali Yahwe, nkaleka kweikiririzaamu. Nkekaguza obundasobora kuhikiiriza okweraga kwange hali Yahwe n’okwikara ndi kicweka ky’eka ye. Nkehurra ndi nyenka kandi nateekereza ngu busaho omuntu wena ow’asobora kwetegereza enyehurra zange.” Kiki ekyakonyire Mauricio? Nagamba ati: “Nkongera ha buheereza bwange. Kinu kikankonyera kuleka kwetekerezaaho n’okuleka kuteeka omutima ha nyehurra zange embi. Nkehurra nsemeriirwe kandi ntali nyenka habw’okukora n’abandi omu buheereza.” Ky’amananu, n’obutuba tutarukusobora kutebeza n’Abakristaayo bagenzi baitu maiso h’amaiso, tugarurwamu muno amaani obutwejumbira nabo omu kutebeza nitukozesa amasimu rundi omu kuhandiika amabbaruha. Kintu ki ekindi ekyakonyire Mauricio? Nayongeraho ati: “Ekindi nkaikara nyine bingi eby’okukora omu kitebe. Omutima nkaguteeka ha kuteekaniza hamu n’okuha ebicweka eby’abeegi omu nsorrokano. Obujunanizibwa bunu bukandetera kwehurra ngu ninsiimwa Yahwe hamu n’abandi.”
YAHWE ATUKONYERA OBUTWEHURRA NGU EBIZIBU BITUHINGURAINEHO
8. Ebirengo eby’amaani nibisobora kutuleetera kwehurra tuta?
8 Nitunihira kuhikwaho ebirengo omu biro binu ebya ha mpero. (2 Tim. 3:1) Baitu akasumi, rundi ekika ky’ekirengo nambere kituhikiraho, nitusobora kuba tutarukukinihira. Nitusobora kutunga ekizibu omu by’entaahya eky’aho naaho, rundi bakatusangamu oburwaire obw’amaani, rundi tukafeerwa omugonzebwa waitu. Omu kaire ako, nitusobora kwehurra twenuubire, kandi twetuntwire muno, kukira muno kakuba twehurra ngu ebirengo binu nibiija bihonderaine rundi nibiija bingi ha murundi gumu. Baitu ijuka ngu Yahwe amanyire ebiturukurabamu kandi habw’obukonyezi bwe nitusobora kugumira buli kirengo kyona tutarukutiina.
9. Bazaaho ebirengo ebimu Yobu ebiyarabiremu.
9 Tekerezaaho ekyokurorraho eky’omusaija omwesigwa Yobu. Akahikwaho ebirengo eby’amaani muno omu kaire kake. Omu kiro kimu, Yobu akagambirwa ngu ebisoro bye bikaba biisirwe, ebindi biibirwe, kandi ngu abaheereza be n’abaana be bakaba baisirwe. (Yob. 1:13-19) Omu kaire kake, Yobu obwakaba nakyaganya, akarwarwa oburwaire oburukusaasa muno. (Yob. 2:7) Enyikara ye ekaba mbi muno yagonza n’okufa, ekyamuletiire kugamba ati: “Ninuga obwomezi bwange.”—Yob. 7:16.
Yahwe agambira Yobu omulingo afaaho ebihangwa bye byona, kumukonyera kwikiriza ngu namugonza kandi ngu naija kumufaaho (Rora akacweka 10)
10. Yahwe akaha ata Yobu ebyarukwetaaga kusobora kugumira ebirengo bye? (Rora ekisisani ekya ha kyesweko.)
10 Yahwe akaba narora Yobu ebyarukurabamu. Habwokuba Yahwe akaba nagonza muno, akamuha ebyarukwetaaga kusobora kugumira ebirengo bye kandi n’okwikara ali mwesigwa. Yahwe akabaza na Yobu, yamwijukya amagezi ge agataine bugarukiro kandi nk’oku agonza kandi afaaho ebihangirwe bye. Akabazaaho ebisoro bingi ebirukuhuniriiza. (Yob. 38:1, 2; 39:9, 13, 19, 27; 40:15; 41:1, 2) Ekindi, Yahwe akakozesa omusaija omwesigwa omuto Erihu kugumya hamu n’okuhuumuza Yobu. Erihu akamwijukya ngu Yahwe aikara naha empeera abaheereza be habw’obwesigwa bwabo. Baitu Yahwe akongera yakozesa Erihu kuha Yobu obuhabuzi oburungi. Erihu akakonyera Yobu kuleka kwetekerezaaho ekihinguraine kuraba omu kumwijukya ngu tuli bataito muno obworukutulengesaniza na Yahwe Omuhangi w’ensi n’iguru. (Yob. 37:14) Ekindi, Yahwe akaha Yobu obujunanizibwa obw’okuhikiiriza; akamugambira kusabira banywani be basatu abakaba basiisire. (Yob. 42:8-10) Yahwe atusagika ata kasumi kanu obutuhikwaho ebirengo ebigumire muno?
11. Baibuli etukonyera eta obutuhikwaho ebirengo?
11 Yahwe tabaza naitwe bbwa nk’oku yabalize na Yobu, baitu abaza naitwe kuraba omu Kigambo kye Baibuli. (Bar. 15:4) Natuhuumuza kuraba omu kutuha okunihira okw’omu kasumi ak’omu maiso. Tekerezaaho ebigambo ebimu kuruga omu Baibuli ebisobora kutuhuumuza kakuba tuhikwaho ebirengo. Omu Byahandiikirwe, Yahwe natugumya ngu busaho kintu kyona, otwaliiremu ebirengo eby’amaani “[ekirisobora] okubaganiza itwe omu kugonza kwa Ruhanga.” (Bar. 8:38, 39) Nayongera natugumya ngu “ali haihi na bona abamukunga” omu kusaba. (Zab. 145:18) Yahwe natugambira ngu kakuba tumwesiga nitusobora kugumira ekirengo kyona kandi tutunge okusemererwa n’obukiraaba ngu nitubonabona. (1 Kol. 10:13; Yak. 1:2, 12) Ekindi, Ekigambo kya Ruhanga nikitwijukya ngu ebirengo byaitu by’akacu kake obworukubirengesaniza n’ekisembo eky’obwomeezi obutahwaho ekyarukuturaganiize. (2 Kol. 4:16-18) Yahwe natugumiza kimu ngu, naija kuhwerekereza abo abarukutuleetera ebizibu byona kandi abo nubo Sitaani hamu n’abantu abali nka uwe. (Zab. 37:10) Haroho Ebyahandiikirwe eby’okwasire omu mutwe ebirakukonyera kugumira ebirengo eby’omu kasumi ak’omu maiso?
12. Kiki Yahwe ekyarukutunihirramu kukora obuturaaba tuli b’okugasirwa muno omu Kigambo kye?
12 Yahwe natunihirramu kweteraho obwire obw’okusoma Baibuli butoosa n’okwecumitirizaaho muno ebitusomere. Obututeeka omu nkora ebiturukwega, okwikiriza kwaitu kweyongera kuguma kandi tweyongera kwirra haihi na Isiitwe ow’omu iguru. Ekirugamu, kitukonyera kuguma obutuba nitugumiisiriza ebirengo. Yahwe aha omwoyo ogurukwera abo abesiga Ekigambo kye. Kandi omwoyo ogu nigusobora kutuha “amani agali amaingi muno” kugumira ekirengo kyona.—2 Kol. 4:7-10.
13. Ebyokulya eby’omwoyo ebitutunga kuruga ha mwiru omwesigwa kandi ow’amagezi, bitukonyera bita kugumiisiriza ebirengo?
13 Habw’obukonyezi bwa Yahwe, omwiru omwesigwa kandi ow’amagezi naturukya ebitabu bingi, vidiyo hamu n’ebizina ebisobora kutukonyera kwombeka okwikiriza okugumire kandi tukaikara tuli bulindaara omu by’omwoyo. (Mat. 24:45) Tusemeriire kukozesa kurungi buli kimu kyona Yahwe ekyarukutuha. Munyaanya itwe kuruga omu Amerika akooleka okusiima kwe habw’ebyokulya byona eby’omwoyo Yahwe ebyarukutuha. Akagamba ati: “Omu myaka 40 eimazire nimpeereza Yahwe, obwesigwa bwange bwikaire nibulengwa emirundi nyingi muno.” Akahikwaho ebirengo bingi—isenkuru akafa hanyuma y’okutomerwa omuvugi wa motoka ow’akaba atamiire, bazaire be bakaitwa oburwaire obw’amaani, kandi na uwe akatunga ekookoro emirundi ebiri. Kiki ekyamukonyire kugumiisiriza? Akasoborra ati: “Yahwe aikaire nandolerra. Ebyokulya eby’omwoyo ebyatuha kuraba omu mwiru omwesigwa kandi ow’amagezi binkonyiire kugumiisiriza. Habw’ebyokulya binu eby’omwoyo, ninsobora kugamba nka Yobu, ayagambire ati: ‘Okuhikya okufa kwange tindyeyihaho obwesigwa bwange.’”—Yob. 27:5.
Nitusobora tuta kukonyera abandi omu kitebe? (Rora akacweka 14)
14. Yahwe akozesa ata ab’oruganda na banyaanya itwe kutusagika omu kasumi ak’ebirengo? (1 Abasesalonika 4:9)
14 Yahwe atendekere abantu be kugonza kandi n’okuhuumuzangana omu bwire bw’ebizibu. (2 Kol. 1:3, 4; soma 1 Abasesalonika 4:9.) Kusisanaho na Erihu, ab’oruganda na banyaanya itwe baine ekihika eky’okutukonyera kwikara tuli besigwa obutuhikwaho ebizibu. (Eng. 14:22) Ekyokurorraho, tekerezaaho omulingo ekitebe kya Diane kyamugarwiremu amaani kandi kyamukonyera kwikara agumire omu by’omwoyo hanyuma ya iba kurwara oburwaire obw’amaani muno. Akagamba ati: “Kikaba kitanguhire. Baitu tukahurra emikono ya Yahwe ey’amaani kandi ey’okugonza etwetoroire omu myezi egi ey’egumangaine. Ekitebe kyaitu kikakora ebintu bingi kutusagika. Bakatubungira, batuterra amasimu, batugwa omu bifuba kandi binu nibyo ebintu ebitukaba nitwetaaga kugumiisiriza. Nk’oku ntamanyire kuvuga motoka, ab’oruganda na banyaanya itwe bankonyeraga kurora ngu nagenda omu nsorrokano n’omu buheereza obunabaga nsoboire.” Kamugisa gw’amaani kuba kicweka ky’eka enu ey’okugonza!
SIIMA YAHWE HABWOMULINGO ATUFAAHO
15. Habwaki nitukigumiza kimu ngu nitusobora kugumira ebirengo?
15 Itwena nitwija kuhikwaho ebirengo ebitali bimu na bimu. Baitu nk’oku twegere ebirengo ebi titurukwija kubiramu itwenka. Nka taata ow’okugonza, Yahwe aikara natufaaho. Ali haihi naitwe kandi ayetekaniize kwikara n’atuhuliiriza obutumusaba obukonyezi kandi aine ekihika eky’okutusagika. (Is. 43:2) Nitukigumiza kimu ngu nitusobora kugumira buli kizibu kyona habwokuba atuha buli kimu kyona ekiturukwetaaga kugumiisiriza. Atuhaire ekisembo eky’okusaba, Baibuli, ebyokulya bingi eby’omwoyo, hamu n’ekitebe eky’ab’oruganda abaine okugonza abaraatukonyera omu bwire obw’obwetaago.
16. Nitusobora tuta kwikara hansi y’obulinzi bwa Ruhanga?
16 Nitusiima muno habwokuba twine Isiitwe ow’omu iguru ow’aturolerra kandi ow’atulinda! Emitima yaitu esemerererwa omuli Yahwe. (Zab. 33:21) Nitusobora kwoleka Yahwe ngu nitumusiima habw’omulingo ogw’okugonza ogw’aturolerramu kuraba omu kukozesa kurungi ebintu byona ebyarukutaha kutukonyera. Naitwe nitwetaaga kuhikiiriza obujunanizibwa bwaitu obw’okwikara hansi y’obulinzi bwa Ruhanga. Ekirukumanyisa ngu, kakuba tugumizaamu nitukora kyona ekiturukusobora kworobera Yahwe kandi n’okukora ebirukusiimwa omu maiso ge, naija kuturolerra ebiro n’ebiro!—1 Pet. 3:12.
EKIZINA 30 Ise Nyowe, Ruhanga Wange, Kandi Enganjani Yange