EKICWEKA KY’OKWEGA 31
EKIZINA 12 Yahwe Ruhanga, ow’Amaani
Yahwe Eki Akozere Kusobora Kutujuna Kuruga omu Kibi n’Okufa
“Baitu Ruhanga nukwo yagondeze ati Ensi, nahayo Omwanawe ayazairwe omu wenka.”—YOH. 3:16.
EBI TURAYEGA
Omulingo Yahwe aikaire naatukonyera kurwanisa ekibi n’omulingo ataireho enteekaniza nukwo tusobole kwegondeza omu bwomeezi obutahwaho obutarumu ekibi omu kasumi ak’omumaiso.
1-2. (a) Ekibi nikyo kiki, kandi nitusobora tuta kukirwanisa? (Rora ‘n’Amakuru g’Ebigambo Ebimu.’) (b) Biki ebi turukwija kubazaaho omu kicweka kinu hamu n’ebicweka ebindi ebirukusangwa omu magaziini enu eya Omunaara gw’Omulinzi? (Rora na “Hali Omusomi Waitu Omugonzaebwa” ekirukusangwa omu magaziini enu.)
WAKUGONDEZE kumanya omulingo Yahwe arukukugonzaamu? Hanu haroho omulingo omurungi ogusobora kukukonyera kumanya eky’okugarukamu: Wesomeseeho ekintu eki akozere kutujuna kuruga omu kibi n’okufa. Ekibi a kiri munyanzigwa ow’amaani muno, ou tutasobora kusingura habwaitu itwenka. Buli kiro tusiisa kandi tufa, habw’ekibi. (Bar. 5:12) Baitu haroho amakuru amarungi. Nitusobora kusingura ekibi habw’obukonyezi bwa Yahwe. Kandi amananu gali, nitukigumiza kimu ngu nitwija kusingura!
2 Yahwe aikaire naakonyera abantu kurwanisa ekibi kumara emyaka nka 6,000. Habwaki? Habwokuba naatugonza muno. Akagonza abantu kurugira kimu ha kutandika, nahabweki akozere ebintu bingi muno kubakonyera obu basiisa. Ruhanga amanyire ngu ekibi kirugamu okufa, kandi tarukugonza tufe. Naagonza twomeere ebiro n’ebiro. (Bar. 6:23) Naiwe nikyo arukukugondeza. Omu kicweka kinu, nitwija kubazaaho ebikaguzo bisatu: (1) Kunihira ki Yahwe oku yahaire abasiisi? (2) Kiki abantu abatahikiriire abarukubazibwaho omu Baibuli eki baakozere kusemeza Yahwe? (3) Kiki Yesu eki yakozere kujuna abantu kuruga omu kibi n’okufa?
KUNIHIRA KI YAHWE OKUYAHAIRE ABANTU ABASIISI?
3. Abazaire baitu ab’okubanza, bakafooka bata abasiisi?
3 Yahwe obu yahangire omusaija n’omukazi ab’okubanza, akaba naagonza batunge okusemererwa. Akabaha eka enungi, ekisembo eky’obuswere, hamu n’obujunaanizibwa oburungi. Bakaba basemeriire kwijuza ensi n’abaijukuru baabo, kandi bafoole ensi yoona orugonjo orurungi nk’oku omusiri gwa Adeni gukaba guli. Akabaha ekiragiro kimu ekyanguhire. Kandi akabahabura ngu kakuba bacwa ekiragiro eki kuraba omu kumujeemera bakigenderiire, ekibi kyabo kyakurugiremu okufa. Nitumanya ekyabaireho. Ekyahangirwe eky’omwoyo ekitarukurorwa, ekikaba kitarukugonza Ruhanga rundi bo, kikaija kandi kyaboohya kukora ekibi. Adamu na Hawa bakakora ekintu malaika ogu omubi Sitaani eki akaba naagonza. Bateesige Isebo ayaboolekere okugonza okwingi, kandi baasiisa. Yahwe eki akaba abalize, kikahikirra. Kuruga kasumi ako, bakatandika kugurusa kandi hanyuma baafa.—Kub. 1:28, 29; 2:8, 9, 16-18; 3:1-6, 17-19, 24; 5:5.
4. Habwaki Yahwe anoba ekibi kandi atukonyera kukirwanisa? (Abarumi 8:20, 21)
4 Yahwe akahandiikisa ebintu binu omu Baibuli nukwo tusobole kwetegereza ekintu ekikuru. Kinu nikitukonyera kwetegereza habwaki anobera kimu ekibi. Ekibi kitwahukaniza hali Isiitwe kandi kirugamu okufa. (Is. 59:2) Egi niyo nsonga habwaki Sitaani omujeemu ayatandikireho okubonabona kunu agonza ekibi kandi akikurakuraniza. Nahabweki, Adamu na Hawa obu baasiisire, Sitaani naasobora kuba yatekeriize ngu ekigendererwa kya Yahwe hali abantu, akiremeseze. Baitu atetegereze nk’oku Yahwe ali Ruhanga ow’okugonza. Ruhanga takahinduraga ekigendererwa kye hali abaijukuru ba Adamu na Hawa. Habwokuba naagonza abantu, ahonaaho, akabaha okunihira. (Soma Abarumi 8:20, 21.) Yahwe akaba akimanyire ngu bamu h’abaijukuru baabo, bakaba nibaija kumugonza kandi baserre obukonyezi bwe omu kurwanisa ekibi. Kandi nka Isebo kandi Omuhangi wabo, yakubateriireho omulingo ogw’okulekerwa kuruga omu kibi kandi bairre haihi na uwe. Kiki Yahwe eki yakukozere kusobozesa binu byona kubaho?
5. Kunihira ki Yahwe oku yahaire abantu ahonaaho Adamu na Hawa bamazire okusiisa? Soborra. (Okubanza 3:15)
5 Soma Okubanza 3:15. Kuraba omu bunabbi bunu, Yahwe akaha abantu okunihira. Akabagambira ekikaba nikiija kuhika hali Sitaani. Ruhanga akaranga ngu ‘oruzaaro’ nurwo rwakujunire abantu. Oruzaaro runu rwakuhikire ruhwerekereza Sitaani kandi rumaraho obubi bwona obu yaleesereho omu Adeni. (1 Yoh. 3:8) Baitu Sitaani yakubandize kuhutaaza oruzaaro runu rundi aruleetere kufa. Eki kyakusaaliize muno Yahwe. Baitu Yahwe akaba ayehaireyo kusaalizibwa n’okwikiriza oruzaaro runu kubonabonesebwa nukwo ajune abantu kuruga omu kibi n’okufa.
ABANTU ABASIISI ABARUKUBAZIBWAHO OMU BAIBULI BAKATUNGA BATA ENKORAGANA ENUNGI NA YAHWE?
6. Abasaija ab’okwikiriza nka Aberi na Nuha bakakora ki kusobora kwirra haihi na Yahwe?
6 Omu byasa ebyahondiireho, mpora mpora Yahwe akooleka kurungi omulingo abantu abasiisi basobora kwirra haihi na uwe. Aberi, mutabani wa Adamu na Hawa owakabiri, akaba muntu ow’okubanza kwoleka okwikiriza omuli Yahwe hanyuma y’obujeemu obwabaireho omu Adeni. Habwokuba Aberi akaba naagonza Yahwe kandi naagonza okumusemeza n’okumwirra haihi, akahayo ekihongwa. Aberi akaba muliisa, nahabweki, akatwara zimu ha mizigaijo y’entaama ze yazibaaga kandi yazihayo nk’ekihongwa hali Yahwe. Ekihongwa kinu, kikakwataho kita Yahwe? “[Yahwe akaikiriza] Aberi nekiyahongere.” (Kub. 4:4) Yahwe akaikiriza ebihongwa eby’abantu abandi abaamugonzaaga kandi abaamwesigaga—nka Nuha. (Kub. 8:20, 21) Yahwe obu yaikiriize ebihongwa nk’ebi, akooleka ngu abantu abasiisi nibasobora kusiimwa omu maiso ge kandi bairre haihi na uwe. b
7. Kiki eki turukwegera ha kintu Iburahimu akaba ayehaireyo kukora?
7 Yahwe akasaba Iburahimu omusaija ow’okwikiriza okw’amaani, kukora ekintu ekikaba kigumire muno—kuhayo omwana we Isaka nk’ekihongwa. Eki nikisobora kuba kyatuntwize muno Iburahimu. Baitu nabwo, akoorobera Yahwe. Baitu ha kumalirra, Ruhanga akamutanga. Baitu nabwo, ekyokurorraho eki nikyegesa abantu boona ab’okwikiriza isomo erikuru muno kandi eri niryo ngu Yahwe akaba naija kuhayo Omwana we omugonzebwa nk’ekihongwa. Mali Yahwe naagonza muno abantu.—Kub. 22:1-18.
8. Ebihongwa eby’ebisoro ebyaheebwayoga hansi y’Ebiragiro ebikaba bihairwe Abaisaleri, bikaba nibikikirra ki? (Ebyabalevi 4:27-29; 17:11)
8 Hanyuma y’ebyasa kurabaho, Ruhanga akaha Abaisaleri ebiragiro ebyabetaagisaaga kuhayo ebihongwa by’ebisoro nukwo basobole kuganyirwa ebibi byabo. (Soma Ebyabalevi 4:27-29; 17:11.) Ebihongwa ebi byakikirraga ekihongwa ekikaba nikikirrayo kimu ekikaba nikiija kujunira kimu abantu kuruga omu kibi. Banabbi ba Ruhanga bakaterekerezebwa omwoyo ogurukwera kusoborra ngu oruzaaro orukaba ruraganiziibwe, kandi ogu nuwe Omwana wa Ruhanga ow’embaganiza yakubonabonesiibwe kandi aitwe. Yakusisaine nk’entaama ey’ekihongwa. (Is. 53:1-12) Kitekerezeeho: Yahwe akaba naija kukora enteekaniza nukwo Omwana we omu wenka omugonzebwa aheebweyo nk’ekihongwa kusobora kucungura abantu—otwaliiremu naiwe—kuruga omu kibi n’okufa!
KIKI YESU EKI YAKOZERE KUJUNA ABANTU KURUGA OMU KIBI?
9. Kiki Yohana Omubatizi eki yagambire hali Yesu? (Abaheburaniya 9:22; 10:1-4, 12)
9 Omu kyasa eky’okubanza Y.A.K., omuheereza wa Ruhanga Yohana Omubatizi, akabazaaho Yesu Omunyanazaleesi ati: “Dora, Omwana gw’Entaama owa Ruhanga anyakwihaho ebibi by’ensi!” (Yoh. 1:29) Ebigambo binu bikooleka ngu Yesu nuwe oruzaaro orukaba rurangirwe emyaka nyingi enyuma. Yesu yakuhaireyo obwomeezi bwe. Ha kumalirra, oruzaaro rwa Yahwe rukaija orwakujunire abantu kuruga omu kibi.—Soma Abaheburaniya 9:22; 10:1-4, 12.
10. Yesu akakyoleka ata ngu ‘akaija kweta’ abasiisi?
10 Yesu akateeka omutima ha kukonyera abantu abaayehurraga kubi habwokuba basiisi kandi yabaraaliza kufooka bahondezi be. Akaba akimanyire kurungi ngu ensonga enkuru ey’eretera abantu okubonabona nikyo ekibi. Nahabweki, akakonyera abasaija n’abakazi abakaba bamanyirwe nk’abasiisi. Obu naakozesa ekyokurorraho, akasoborra ati: “Abomeezi tibetaaga dakitaali, baitu abarwaire nubo bamwetaaga.” Akongeraho ati: “Ntaije kweta abantu abahikiriire, baitu abasiisi.” (Mat. 9:12, 13) Kandi eki nikyo Yesu yakozere. Akabaliza omukazi ayanabiisize ebigere bye n’amaziga omu mulingo gw’embabazi kandi yamuganyira ebibi bye. (Luk. 7:37-50) Yesu akeegesa omukazi Omusamaliya amananu n’obu kiraaba ngu akaba akimanyire ngu akaba naikara n’omusaija ow’akaba atagaisirwe na uwe. (Yoh. 4:7, 17-19, 25, 26) Ekindi, Ruhanga akaha Yesu amaani kwihaho ekintu ekyaleeserweho ekibi kandi oku nukwo okufa. Omu mulingo ki? Yesu akahumbuura abantu—abasaija n’abakazi, abato n’abakuru.—Mat. 11:5.
11. Habwaki abantu abasiisi kyabanguhiraga kuhikirra Yesu?
11 Nitusobora kukyetegereza habwaki abantu abaakoraga ebintu ebibi baayehurraga kurungi obu baabaga na Yesu. Yabasaalirirwaga kandi yaboolekaga embabazi. Kyabanguhiraga kumuhikirra. (Luk. 15:1, 2) Kandi Yesu yasiimaga abantu nk’abo, habw’okumwikiririzaamu. (Luk. 19:1-10) Yesu akaba muntu w’embabazi nka Ise. (Yoh. 14:9) Kuraba omu bigambo n’omu bikorwa, akooleka ngu Ise ow’embabazi naagonza abantu kandi naagonza kukonyera buli omu hali bo kusingura ekibi. Yesu akakonyera abantu abasiisi kugonza kuhinduramu engeso zaabo kandi bamuhondere.—Luk. 5:27, 28.
12. Kiki Yesu eki yayegeseze obukirukuhika ha kufa kwe?
12 Yesu akaba amanyire ekirukwija kumuhikaho omu kasumi ak’omumaiso. Emirundi nyingi, Yesu akagambira abahondezi be ngu naija kugobezebwa kandi aitirwe ha muti. (Mat. 17:22; 20:18, 19) Akaba amanyire ngu ekihongwa kye, kyakwihireho ekibi ky’ensi, nk’oku Yohana n’abanabbi abandi bakaba barangire. Ekindi, Yesu akeegesa ngu hanyuma y’okuhayo obwomeezi bwe, “[alicunda] abantu aba buli mulingo” abairize nambere ali. (Yoh. 12:32) Abantu abasiisi baakusoboire kusemeza Yahwe kuraba omu kumwikiriza nk’Omukama wabo n’okurubatira omu bigere bye. Obu baakukozere eki, “[baakuhairwe] obugabe okuruga omu kibi.” (Bar. 6:14, 18, 22; Yoh. 8:32) Nahabweki, n’obumanzi Yesu akaba ayehaireyo kwitwa omu mulingo ogw’obusaasi kusobora kutujuna.—Yoh. 10:17, 18.
13. Yesu akafa omu mulingo ki, kandi okufa kwe kukatwegesa ki hali Yahwe Ruhanga? (Rora n’ekisisani.)
13 Yesu akagobezebwa, yakwatwa, yajumwa, kandi yabonabonesebwa. Abaserikale bakamutwara nambere akaba naagenda kwitirwa kandi bamuterra ha muti n’emisumaali. Obu akaba naagumira obusaasi obu bwona, haroho omuntu ondi ayahuliire obusaasi oburukukiraho. Omuntu ogu ni Yahwe. Akanga kukozesa amaani ge amaingi kutangira Omwana we kubonabona. Habwaki? Kiki ekisobora kuba kyaletiire Taata ow’engonzi kwetwaza omu mulingo ogu? Habwokuba naatugonza muno. Yesu akagamba ati: “Baitu Ruhanga nukwo yagondeze ati Ensi, nahayo Omwanawe ayazairwe omu wenka, omuntu wena anyakumuikiriza aleke okubura, baitu atunge obwomeezi obutahwaho.”—Yoh. 3:16.
Yahwe akaraba omu busaasi obw’amaani, obu yaikiriize Omwana we kwitwa, nukwo atujune kuruga omu kibi n’okufa (Rora akacweka 13)
14. Ekihongwa kya Yesu, nikikwegesa ki?
14 Ekihongwa kya Yesu, kali kokurorraho akarukwoleka omulingo Yahwe agonza abaijukuru ba Adamu na Hawa. Nikyoleka omulingo Yahwe akugonza muno. Akahika na ha rulengo orw’okwehikyaho obusaasi obw’amaani muno kusobora kukujuna kuruga omu kibi n’okufa. (1 Yoh. 4:9, 10) Mali, naagonza kukonyera buli omu hali itwe kurwanisa ekibi—n’okukisingura!
15. Kiki eki tusemeriire kukora kusobora kugasirwa omu kisembo kya Ruhanga eky’ekicunguro?
15 Ekisembo kya Ruhanga kandi eki nikyo ekihongwa eky’Omwana we omu wenka, kitusobozesa kuganyirwa ebibi byaitu. Baitu Ruhanga kusobora kutuganyira, haroho eki tusemeriire kukora. Kintu ki eki? Yohana Omubatizi hamu na Yesu wenyini, bakatuha eky’okugarukamu: “Mwegarukemu; baitu obukama obwomu iguru bumalize okuhika.” (Mat. 3:1, 2; 4:17) Nahabweki, kikuru muno kwegarukamu obu turaaba nitugonza kurwanisa ekibi, kwirra haihi na Isiitwe ow’engonzi n’okuganyirwa ebibi byaitu. Baitu kwegarukamu nikitwarramu ki kandi kitukonyera kita kusemeza Yahwe n’obu kiraaba ngu tuli basiisi? Ekicweka ekirukuhonderaho nikiija kugarukamu ekikaguzo eki.
EKIZINA 18 Nitusiima habw’Ekicunguro
a AMAKURU G’EBIGAMBO EBIMU: Omu Baibuli, ekigambo “ekibi” nikisobora kumanyisa ebikorwa ebibi, omuntu ebi akora obu alemwa kuhondera endengo za Yahwe ezirukukwata ha ngeso. Baitu ekigambo “ekibi” nikisobora n’okumanyisa obutahikirra abantu boona obu baijukwire kuruga hali Adamu. Itwena tufa habw’ekibi eki twagwetiirwe.
b Yahwe yaikirizaaga ebihongwa by’abantu be abesigwa habwokuba akaba akimanyire ngu omu kasumi ak’omumaiso, Yesu Kristo akaba naija kuhayo obwomeezi bwe nk’ekihongwa kandi ajunire kimu abantu boona.—Bar. 3:25.
