Omukwenda Paulo akahandiikira Abakristaayo omu Sesalonika naagamba ati: “Omuntu wena araba atarukuhurra ekigambo kyaitu ekyomu baruha enu, ogu mumukenge.” (2 Bas. 3:14) Kara, twagambaga ngu bunu bwabaga buragirizi hali abagurusi. Omuntu obu yagumizaamuga naacwa emisingi ya Baibuli na hanyuma y’okuhaburwa emirundi nyingi, abagurusi baahaga orubazo orurukuhabura ekitebe hali omuntu ogu. Nahabweki, abatebezi tibaamaraga na uwe obwire omu bintu ebitali by’omwoyo.

Baitu, nikyetaagisa kuhinduramu. Obuhabuzi bwa Paulo nibumanyisa encwamu buli Mukristaayo omu kitebe asemeriire kwekorra omu nyikara ezimu. Nahabweki tikirukwetaagisa abagurusi kuha orubazo orurukuhabura ekitebe hali omuntu ogu. Habwaki tuhindwire omulingo tubaire nitwetegereza 2 Abasesalonika 3:14? Tekerezaaho Paulo eki akaba naabazaaho obu yahaire obuhabuzi bunu.

Paulo akagamba ngu abamu omu kitebe bakaba ‘batarukugenda kurungi.’ Bakaba batarukuhondera oburagirizi obu akaba abahaire obukaba buterekereziibwe omwoyo ogurukwera. Omu rubungo rwe orw’enyumaho, akabaragira ati: “Omuntu wena obwaraba atarukugonza okukora, aleke nokulya.” Baitu nabwo, abamu bakaba bangire kukora kusobora kwerolerra, n’obu kiraaba ngu bakaba baine obusobozi. Ekindi, baayetahyaga omu nsonga ez’abandi ezitarukubakwataho. Abakristaayo bakaba basemeriire kutwaza bata abantu nk’abo abatarukugenda kurungi?—2 Bas. 3:​6, 10-12.

Paulo akagamba ngu: “Ogu mumukenge.” Ekigambo eky’Oruyonaani nikimanyisa kumanyirra omuntu kandi okegendereza kurora ngu tiwatwalirizibwa engeso ze. Oburagirizi bunu Paulo akabuha ekitebe kyona hatali abagurusi bonka. (2 Bas. 1:1; 3:6) Nahabweki, buli Mukristaayo ayaroraga Omukristaayo mugenzi we atarukworobera obuhabuzi obuterekereziibwe omwoyo ogurukwera yayecweramuga ‘kutakoragana’ n’omuntu ow’atarukugenda kurungi.

Kinu kyamanyisaaga ngu omuntu ogu yatwazibwaga nk’ow’aihirwe omu kitebe? Nangwa, habwokuba Paulo akongera yagamba ati: “Mumuhane nka mwene wanyu.” Nahabweki, Abakristaayo bakaba nibasobora kumara na uwe obwire omu nsorrokano n’omu buheereza, baitu bakaba nibasobora kucwamu kutamara na uwe obwire omu by’okwesemeza. Habwaki? Paulo akagamba ati: “Nukwo akwatwe ensoni.” Eki nikisobora kuleetera Omukristaayo ow’atarukugenda kurungi kukwatwa ensoni habw’enyetwaza ye kandi akacwamu kuhinduramu engeso ze.—2 Bas. 3:​14, 15.

Abakristaayo nibasobora bata kuteeka omu nkora obuhabuzi bunu? Eky’okubanza, tusemeriire kukigumya ngu ekintu eki omuntu aliyo naakora tikiri kirungi nk’oku Paulo yasoboroire. Akaba atarukubazaaho abantu abarukwahukana hali itwe omu nsonga ezirukukwata ha muntu waitu ow’omunda, rundi abantu abarukukora ebintu ebirukwahukana n’ebi tugonza baitu ebitarukucwa emisingi ya Baibuli. Kandi akaba atarukumanyisa abantu abatubiihiize. Oihireho, akaba naabazaaho abantu abacwamu bakigenderiire kutoorobera obuhabuzi bwa Ruhanga oburukwetegerezebwa kurungi.

Kasumi kanu, kakuba tukyetegereza ngu Omukristaayo naayoleka omutima gw’obujeemu, a nitusobora kucwamu kutamara na uwe obwire omu bintu eby’okwesemeza. Nk’oku enu eri ncwamu ya buli muntu, titusemeriire kugibazaaho n’abantu abandi abatali b’omu ka yaitu. Baitu nitusobora kugumizaamu nitukoragana n’omuntu ogu omu nsorrokano n’omu buheereza. Kakuba ahinduramu engeso ze, nitusobora kwongera tukakoragana na uwe omu nyikara zoona.