1. Adam na Hawa obubasiisire, Yahwe akabaza bigambo ki ebirukugarramu amaani kandi ebirukuha kunihira?

YAHWE ali Ruhanga ow’okuhumuza. Kuruga abantu bafoka basiisi, Ruhanga aikaire nabahumuza. Adamu na Hawa obu basisire, aho n’aho Ruhanga akaha obunabbi obukaba nibugenda kuha abaijukuru babo okunihira kandi obukaba nibugenda kubagaramu amaani. Obunabbi bunu nibusangwa omu Okubanza 3:15 kandi, nibuturaganiza ngu Setani n’ebikorwa bye ebibi byona nibiija kuhwerekerezebwa.​—1 Yohana 3:8; Okusuku’rwa 12:9.

2. Yahwe akagarramu ata Nuha amaani?

² Tekerezaho omulingo Yahwe yagarwiremu Nuha amaani. Abantu omu busumi bwa Nuha bakaba barwani kandi basihani, baitu uwe n’eka ye bonka nubo bakaba nibaramya Yahwe. Ebintu binu nibisobora kuba byamaziremu Nuha amaani. (Okubanza 6:4, 5,  11; Yuda 6) Baitu Yahwe akamugambira ebintu ebyamugarwiremu amaani nukwo ayeyongere kumuramya n’okukora ebintu ebihikire. (Okubanza 6:9) Yahwe akamugambira ngu nagenda kuhwerekereza abantu boona ababi, kandi yamugambira ekyakaba asemeriire kukora kurora ngu uwe n’eka ye tibahwerekerezebwa. (Okubanza 6:13-18) Mali Yahwe akagarramu Nuha amaani.

3. Yahwe akagarramu ata Yosuha amaani? (Rora ekisisani ekiri ha rupapura 15.)

³ Hanyuma y’akasumi, Yahwe akagarramu omuheereza we Yosuha amaani habwokuba akaba aine obujunanizibwa bw’amaani obwakaba nagenda kuhikiriza. Yosuha akaba nagenda kwebembera Abaisareri kubatwara omu Nsi Eyali Eraganiziibwe nukwo basingule amahanga agaikaramuga agakaba gaine abarwani ab’amaani. Yahwe akaba akimanyire ngu Yosuha akaba nasobora kutiina, nahabweki akagambira Musa ati: “Oragire Yosuha, omwekambise omugumye: baitu nuwe alyambuka omu maiso gabantu banu, kandi nuwe alibagweta ensi eyolirora.” (Ekyebiragiro 3:28) Hanyuma Yahwe wenka akagarramu Yosuha amaani namugambira ati: “Tininyowe nkuragiire? Foka wamani, ogume omutima; otatina nobukwakuba okwekanga: baitu Mukama Ruhanga wawe ali naiwe nambere ogenda hona.” (Yosuha 1:1, 9) Notekereza ebigambo binu bikaletera Yosuha kwehurra ata?

4, 5. (a) Yahwe akagarramu ata amaani abantu be abakara? (b) Yahwe akagarramu ata Omwana we amaani?

⁴ Yahwe akagarramu amaani abantu be boona hamu nk’ekitebe. Ekyokurorraho, Yahwe akaba akimanyire ngu Abayudaaya bakaba nibaija kwetaaga kugarurwamu amaani hanyuma y’okutwarwa omu Baburoni nk’abanyagwa, nahabweki akabaha obunabbi obwabagarwiremu amaani yabagambira ati: “Leka okutina, baitu nyowe ndi naiwe; otafube’ra, baitu ninyowe Ruhanga wawe: nyowe ndikuha amani; ego ndikukonyera; ego, ndikusagika nomukono gwange ogwobulyo ogwokuhiki’ra.” (Isaya 41:10) Hanyuma y’obwire, Yahwe akagarramu Abakristaayo abakara amaani, kandi naitwe natugarramu amaani.​—Soma 2 Abakolinso 1:3, 4.

⁵ Yahwe akagarramu Omwana we amaani. Hanyuma y’okubatizibwa, Yesu akahurra iraka kuruga omu iguru niligamba: “Ogu nuwe Mwana wange oundukugonza, ounsemeriirwe muno.” (Matayo 3:17) Mali ebigambo binu biine kuba byagarwiremu muno Yesu amaani obwakaba nakora omulimo oguyatumirwe kukora.

6. Oruganikyo rwa Yesu orukukwata hali taranta nirusobora kutugarramu ruta amaani?

⁶ Yesu akahondera ekyokurorraho kya Ise eky’okwekambisa abandi kusigara bali besigwa. Ekintu kinu akakikora omu ruganikyo rwe orwa taranta nambere omukama w’abairu yagambiire buli omu ha bairu be ngu: “Okozire, iwe omuiru rubale omurungi, owokwesiga: Okaboli wokwesiga omu bike, ndakusigira bingi: Taha omu kusemererwa okwomukama wawe.” (Matayo 25:21, 23) Ebigambo ebi bikagarramu abegeswa be amaani byabaletera kweyongera kuheereza Yahwe n’obwesigwa.

7. Yesu akagarramu ata abegeswa be amaani, kukira muno Petero?

⁷ N’obukiraaba ngu emirundi nyingi abegeswa ba Yesu baikaraga nibakunganira obukuru, Yesu yabagumisirizaga muno. Akabatererra kwebundaaza nukwo baheereze abantu abandi, hatali bo kunihira ngu abandi nibaija kubaheereza. (Luka 22:24-26) Emirundi nyingi Petero akakora ensobi hamu n’ebintu ebitarasemiize Yesu. (Matayo 16:21-23; 26:31-35,  75) Baitu Yesu atange Petero, oihireho akamwekambisa kandi yamuha n’obujunanizibwa bw’okwekambisa abandi.​—Yohana 21:16.

8. Hezekiya akagarramu ata amaani abakuru b’amahe n’abantu ba Yuda?

⁸ Abaheereza ba Yahwe aba kara bakaba bakimanyire ngu kikuru kugarramu abandi amaani n’obu kiraba ngu Yesu akaba atakaizire kubateraho ekyokurorraho ekirungi. Tekerezaho Omukama Hezekiya. Ihe ly’Abasura obu likaba nirigonza kurwanisa abantu ba Yerusalemu, Hezekiya akasorooza abakuru b’amahe n’abantu nukwo abagarremu amaani kandi maali ‘abantu bakahumura habw’ebigambo bya Hezekiya.’​—Soma 2 Ekyebyomubusinge 32:6-8.

9. Ekyokurorraho kya Yobu nikitwegesa ki ha nsonga y’okugarramu abandi amaani?

⁹ Ekyokurorraho kya Yobu nakyo nikisobora kutukonyera kumanya omulingo gw’okugarramu abandi amaani. N’obukiraaba ngu nauwe wenka akaba nayetagisa kugarurwamu amaani, akegesa abandi omulingo gw’okugarramu abandi amaani. Yobu akagambira abasaija abaizire kumuhumuza ngu kakuba nuwe akaba nabagarramu amaani, akubaire akozeseze ebigambo ebirukubombeka hatali by’okubasaaliza. (Yobu 16:1-5) Baitu hakumalirra Yobu akatunga okuhumuzibwa kuruga hali Erihu na hali Yahwe.​—Yobu 33:24, 25; 36:1, 11; 42:7, 10.

10, 11. (a) Habwaki muhara wa Yefuta akaba nayetagisa kugarurwamu amaani? (b) Nibaha abasemeriire kugarurwamu amaani omu kasumi kanu?

¹⁰ Muhara wa Yefuta nauwe akaba nayetaaga kugarurwamu amaani. Ise akaba nagenda kurwanisa abantu ba Amoni. Akaraganiza ngu kakuba Yahwe yakumukonyire kusingura obulemu, omuntu wena ow’akaba nagenda kubanza kuruga omu ka ye kumutangirra akaba nagenda kumuhayo kugenda kuheereza Yahwe ha heema. Abaisareri bakasingura obulemu, kandi omuntu ayabandize kurugayo kutangirra Yefuta akaba muhara we kandi omwana omu wenka ow’akaba aine. Yefuta akahurra ahoirwemu amaani. Baitu akahikiriza ekyakaba araganiize, yasindika muhara we kugenda ha heema kuheereza Yahwe obwomeezi bwe bwona.​—Ekyabacwi 11:30-35.

¹¹ N’obukiraba ngu ekintu kinu Yefuta kitamwanguhire, omuhara we nauwe kiine kuba kitaramwanguhiire. Baitu omwisiki onu akaba ayetegekere kukora ise ekyakaba araganiize. (Ekyabacwi 11:36, 37) Kinu kikaba nikimanyisa ngu akaba atarukugenda kuswerwa rundi kuzaara abaana. Ekika kya Yefuta hanu nuho kikaba nikigenda kugarukira. Omuhara akaba nayetagisa muno kuhumuzibwa n’okugarurwamu amaani. Baibuli egamba: “Kandi yaba engeso omu Isareri, abaisiki bomu Isareri bagendaga omwaka nomwaka okute’ra empamo omuhara wa Yefuta Omugireadi, ebiro bina omwaka gwona.” (Ekyabacwi 11:39, 40) Ekyokurorraho kya muhara wa Yefuta nikituletera kutekerezaho Abakristaayo omu kasumi kanu abasigara batatahire obuswere kusobora kwongera ha buheereza bwabo hali Yahwe. Mali nabo titusemeriire  kubasiima n’okubagarramu amaani?​—1 Abakolinso 7:32-35.

12, 13. Petero akagarramu ata amaani Abakristaayo bagenzi be?

¹² Ha kiro ky’okumalirra Yesu atakafiire, akagambira omukwenda Petero ati: “Simoni, Simoni, dora, Setani akabasaba, abasegese nkoburo: baitu nyowe nkesengereza habwawe, okuikiriza kwawe kutahwaho; naiwe obwolikagaruka okuhinduka, oligumya bene banyu.”​—Luka 22:31, 32.

¹³ Petero akaba ali omu ha bantu abayebemberaga ekitebe Ekikristaayo eky’okubanza. (Abagaratiya 2:9) Ebiyakozere ha kiro kya Pentekote n’obusumi obwahondireho bikagarramu ab’oruganda bagenzi be amaani. Hanyuma y’okumara emyaka nyingi naheereza, Petero akahandikira ab’oruganda nagamba ati: “Mbahandikiire ebigambo bike, nimbagambirra nimbamanyisa ngu ezi nizo embabazi ezamananu eza Ruhanga: Numwo mugumiremuga.” (1 Petero 5:12) Ebbaruha za Petero zikagarramu amaani Abakristaayo ab’omu kasumi ako. Kandi naitwe nizitugarramu amaani obutulindiriire kurora emirago ya Yahwe nehikirizibwa omu bwijwire.​—2 Petero 3:13.

14, 15. Ebitabu bya Baibuli ebyahandikirwe omukwenda Yohana nibitugarramu bita amaani?

¹⁴ Omukwenda Yohana nauwe akaba omu hali abo abayebembiire ekitebe Ekikristaayo omu busumi bwa kara. Nuwe yahandikire Enjiri ya Yohana erukubaza ha buheereza  bwa Yesu. Kumara emyaka nyingi, ekitabu kinu kigarwiremu Abakristaayo amaani kandi na hati nikitugarramu amaani. Nk’ekyokurorraho, ekitabu kya Yohana nikyo kyonka ekibazaho ebigambo bya Yesu ebirukwoleka ngu okugonza nugwo mulingo ogurukwoleka Abakristaayo ab’amananu.​—Soma Yohana 13:34, 35.

¹⁵ Ebbaruha za Yohana isatu nazo zirumu amananu ag’omuhendo. Obutwehurra tuhoirwemu amaani habw’ensobi ezitukozere, kusoma ebigambo ebirukwoleka ngu esagama ya Yesu “etwogyaho ebibi byona” kitugarramu amaani. (1 Yohana 1:7) Kandi obutwikara nitwejunaana habw’ekibi ekitwakozere, kusoma ebigambo ebirukwoleka ngu “Ruhanga nakira obukuru omutima gwaitu” nikiija kutugarramu amaani. (1 Yohana 3:20) Omu bahandiiki boona aba Baibuli, Yohana wenka nuwe yagambire ngu “Ruhanga nukwo kugonza.” (1 Yohana 4:8, 16) Ebbaruha ye eyakabiri n’eyakasatu zirumu okusiima hali Abakristaayo ‘abarukugendera omu mazima.​—2 Yohana 4; 3 Yohana 3, 4.

16, 17. Omukwenda Paulo akagarramu ata amaani Abakristaayo ab’omu busumi bwa kara?

¹⁶ Omukwenda Paulo nauwe akatuteraho ekyokurorraho kirungi obu kirukuhika ha kugarramu abandi amaani. Hanyuma y’obwire buke Yesu afiire, abakwenda abarukukira obwingi bakasigara omu Yerusalemu, ekiikaro nambere akatebe akalemi kakaba kali. (Engeso Ezabakwenda 8:14; 15:2) Abakristaayo abaikaraga omu Buyudaaya bakatebeza ebintu ebirukukwata hali Kristo h’abantu abakaba nibaikiriza ngu haroho Ruhanga  omu wenka. Baitu omwoyo ogurukwera gukaletera Paulo kugenda kutebeza Abayonaani, Abaroma, hamu n’abandi abaramyaga baruhanga ab’ebisuba.​—Abagaratiya 2:7-9; 1 Timoseo 2:7.

¹⁷ Paulo akagenda omu kiikaro ekitumanyire omu kasumi kanu nka Turkey, kandi akagenda omu Greece hamu na Italy. Akatebeza abantu abakaba batali Bayudaaya abaikaraga omu biikaro ebi, kandi akatandikaho ebitebe bingi. Obwomeezi bukaba butanguhire hali Abakristaayo banu abahyaka. Bakatunga okuhiganizibwa kuruga omu bantu b’amahanga gabo gonyini, nahabweki bakaba nibetaga kugarurwamu amaani. (1 Abasesalonika 2:14) Omu mwaka nka 50, Paulo akahandikira ekitebe eky’omu Sesalonika ebbaruha erukugarramu amaani. Akagamba: “Tusima Ruhanga habwanyu inywena ebiro byona, nitubagambaho omu kusaba kwaitu; nitwijuka obutosa emirimo yanyu eyokuikiriza, nokukora okwokugonza, nokugumisiriza.” (1 Abasesalonika 1:2, 3) Kandi akongera yabasaba kugarranganamu amaani obuyabahandikiire nagamba ati: “Nukwo muhumuzanganege inywenka, kandi mwombekege inywena, omuntu wena omutahiwe.”​—1 Abasesalonika 5:11.

18. Akatebe akalemi ak’omu kyasa ky’okubanza kakagarramu kata Firipo amaani?

¹⁸ Omu kyasa ky’okubanza, Yahwe akakozesa akatebe akalemi kugarramu Abakristaayo boona amaani, otwaliremu na boona abayembeberaga ebitebe. Firipo obuyatebiize Abasamaliya ebigambo ebirukukwata hali Kristo, akatebe akalemi kakamusagika. Ab’oruganda ha katebe kanu bakamusindikira Petero na Yohana abakaba nabo nibaheereza ha katebe akalemi kugenda kusabira Abakristaayo abahyaka nukwo batunge omwoyo ogurukwera. (Engeso Ezabakwenda 8:5, 14-17) Firipo hamu n’Abakristaayo abahyaka bakahurra bagarwirwemu muno amaani habw’obusagiki obubatungire kuruga hali akatebe akalemi!

19. Abakristaayo omu kyasa ky’okubanza bakehurra bata obubasomere ebbaruha kuruga ha katebe akalemi?

¹⁹ Hanyuma y’akasumi, haroho encwamu enkuru muno ekaba esemeriire kukorwa akatebe akalemi. Kikaba nikyetagisa Abakristaayo abatali Bayudaaya okusarwa nk’oku Abayudaaya bakoraga kusigikirra ha Kiragiro kya Musa? (Engeso Ezabakwenda 15:1, 2) Ab’oruganda ha katebe akalemi obubamazire kusaba Ruhanga kubaha omwoyo ogurukwera, kandi baseruliiriza muno omu Byahandikirwe, bakacwamu ngu ekintu kinu kikaba kitakyayetagisa. Bakahandiika ebbaruha ekaba n’esoborra ha ncwamu yabo kandi batuma ab’oruganda kugitwara omu bitebe ebirukwahukana. Abakristaayo obubasomere ebbaruha enu, ‘bakasemererwa obw’okuhumuzibwa oku.’​—Engeso Ezabakwenda 15:27-32.

20. (a) Omu kasumi kanu, Akatebe Akalemi katugarramu kata amaani? (b) Nitwija kugarukamu kikaguzo ki omu kicweka ekirukuhonderaho?

²⁰ Biro binu, Akatebe Akalemi ak’Abakaiso ba Yahwe kagarramu amaani Ababeseri, abaheereza ab’akasumi koona abarukukora omulimo gw’okutebeza, hamu naitwe itwena. Naitwe obutugarurwamu amaani, tusemererwa nk’oku Abakristaayo ab’omu kyasa ky’okubanza basemeriirwe! Kandi omu mwaka 2015, Akatebe Akalemi kakaturukya akatabu Return to Jehovah kusobora kwekambisa abo abarugire omu mananu kugaruka. Baitu nikimanyisa ngu ab’oruganda abarukwebembera bonka nubo basemeriire kugarramu abandi amaani, rundi itwena tusemeriire kugarranganamu amaani? Nitwija kugarukamu ekikaguzo kinu omu kicweka ekirukuhonderaho.