1. Habwaki omukwenda Paulo yatereriire Abakristaayo kugarranganamu amaani “kukira muno hati”?

OMU kyasa ky’okubanza, omukwenda Paulo akahabura Abakristaayo nagamba ati: “Kandi buli omu atekerezehoga mugenzi we nukwo twekambisangane okugonzangana n’okukora ebikorwa ebirungi, tutarukuleka kuso’rokana hamu nk’oku engeso y’abamu eri, baitu twekambisangane, kukira muno hati nk’oku murora ekiro kiri haihi.” (Abaheburaniya 10:24, 25, NW) Ab’oruganda nibasobora kuba bayekagwize ensonga habwaki Paulo yabagambire kweyongera kugarranganamu amaani. Emyaka etaano ekaba etakahoireho amazire kubagambira ebigambo binu, bakerorra bonka ensonga y’okubanza habwaki yabagambire kweyongera kugarranganamu amaani. Ekiro kya Yahwe kucwera Yerusalemu omusango kikaba kiri haihi kuhika. Bakarora nikibetagisa kwanguha kuruga omu rubuga oru nk’oku Yesu akaba abagambiire ira. (Luka 21:20-22; Engeso Ezabakwenda 2:19, 20) Ekiro kya Yahwe eki kikahika omu mwaka 70, Abarumi obu bahwerekeriize Yerusalemu.

2. Habwaki ensonga y’okugarranganamu amaani tusemeriire kugifaaho muno?

 ² Naitwe enyikara yaitu omu kasumi kanu, nesisana n’ey’Abakristaayo ab’akasumi ako. “Ekiro kya [Yahwe] ekikuru kandi kyokutinisa” kiri haihi kuhika. (Yoweri 2:11) Naitwe omu kasumi kanu nitukwatwaho ebigambo bya Zefaniya ebirukugamba: “Ekiro ekikuru ekya [Yahwe] kiri haihi, kiri haihi nikyanguha muno!” (Zefaniya 1:14) Enu niyo ensonga habwaki tusemeriire kutekerezahoga abagenzi baitu nukwo twekambisangane kugonzangana n’okukora emirimo emirungi. (Abaheburaniya 10:24) Tusemeriire kufaayo muno kukira muno hali bagenzi baitu nukwo tubagarremu amaani obu barukuba nibetaaga kugarurwamu amaani.

3. Omukwenda Paulo akabazaho ata ensonga y’okugarramu amaani? (Rora ekisisani ekiri ha rupapura 21.)

³ “Obujune obububa omu mutima gwomuntu buguinamya; Baitu ekigambo ekirungi kigusemeza.” (Enfumo 12:25) Obwire obumu n’obumu, buli muntu agonza kugarurwamu amaani. Paulo akakyolekera kimu kurungi ngu naabo abarukujunanizibwa n’okugarramu abandi amaani nabo bonka nibetagisa kugarurwamu amaani. Akahandikira ab’oruganda bagenzi be aba Roma nagamba ati: “Ningonza muno okubarora, mbahe ha kisembo ekimu ekyomwoyo, mugumibwe; nukwo nyowe okuhumuzibwa hamu nainywe itwembi habwokuikiriza, okwanyu nokwange.” (Abarumi 1:11, 12) Obwire obumu omukwenda Paulo nauwe yayetagaga kugarurwamu amaani.​—Soma Abarumi 15:30-32.

4, 5. Nibaha abatusobora kugarramu amaani, kandi habwaki?

⁴ Nitusobora kugarramu amaani abaheereza b’akasumi koona, nk’abapayoniya baitu abesigwa. Baingi berekeseze ebintu ebibagonzaga muno nukwo basobole kuheereza nk’abapayoniya. Nikyo kimu n’abamisaani, Ababeseeri, abaroleerezi b’ebicweka n’abakazi babo, hamu n’abo abaheereza ha ofiisi ez’okuhindurramu ebitabu byaitu. Boona befereza ebintu bingi kusobora kwongera ha buheereza bwabo hali Yahwe. Nahabweki tusemeriire kubagarramu amaani. Haroho n’abandi baingi abakugondeze kuba omu buheereza obw’akasumi koona baitu tibakyasobora. Banu nabo basemererwa obubagarurwamu amaani.

⁵ Bantu ki abandi abatusemeriire kugarramu amaani? Nitusobora kugarramu amaani ab’oruganda n’abanyaanya itwe abacwiremu kutataaha obuswere habwokuba nibagonza kworobera Yahwe nukwo bataahe obuswere “omu Mukama waitu” honka. (1 Abakolinso 7:39) Abanyineka obubagambira banyinabwenge babo ngu nibabagonza kandi ngu nibasiima habwa byona barukukora kibagarramu amaani. (Enfumo 31:28, 31) Abakristaayo abagumisiriza omu bwire bw’oburwaire rundi omu bwire bw’okuhiganizibwa nabo nibetagisa kugarurwamu amaani. (2 Abasesalonika 1:3-5) Yahwe na Yesu bagarramu abantu banu boona amaani.​—Soma 2 Abasesalonika 2:16, 17.

6. Isaya 32:1, 2 nirutwegesa ki ha bujunanizibwa obw’abagurusi?

⁶ Soma Isaya 32:1, 2. Habw’obwire obuturumu kuba bugumire, kyanguhire kukwatwa enaku rundi kuhwamu amaani. Yesu Kristo akozesa abagenzi be abaseserweho amagita hamu “nabakuru” kuruga omu ntaama zindi kutugarramu amaani. Abagurusi banu ab’ekitebe tibaroho ‘kulema’ okwikiriza kwaitu baitu ‘bakozi batahi baitu’ habw’okusemererwa  kwaitu. Nibagonza kutukonyera kutunga okusemererwa n’okwikara tuli besigwa.​—2 Abakolinso 1:24.

7, 8. Abagurusi b’ekitebe nibasobora kugarramu bata abandi amaani omu bigambo byabo n’ebikorwa byabo?

⁷ Abagurusi b’ekitebe nibasobora kuhondera ekyokurorraho ky’omukwenda Paulo ayaikaraga n’agarramu bagenzi be amaani. Akahandikira Abakristaayo abakaba nibahiganizibwa ab’omu Sesalonika yabagambira ngu: “Obutwabaganzire muno tukasemererwa okutabaha enjiri ya Ruhanga yonka, baitu nobwomezi bwaitu itwenka, baitu mukaba nimugonzebwa itwe.”​—1 Abasesalonika 2:8.

⁸ Abagurusi nibasobora kugarramu abandi amaani omu bigambo byabo. Baitu eki nikimara? Paulo akagambira Abakristaayo ab’omu Efeso ngu: “Mukonyerege [abaceke], nokuijukaga ebigambo bya Mukama waitu Yesu okuyagambire wenka ati Okugaba kwomugisa okukira okuhebwa.” (Engeso Ezabakwenda 20:35) Paulo akaba ayetegekere ‘kuhayo n’okwehayo’ habw’obwomeezi bw’abaheereza bagenzi be. Ebikorwa bye bikoleka ngu akaba ayetegekere kutamu amaani ge goona habwabo. (2 Abakolinso 12:15) Nikyo kimu n’abagurusi, basemeriire kuhumuza abaheereza bagenzi babo n’okubagarramu amaani hatali omu bigambo kwonka baitu n’omu bikorwa. Kinu kyoleka ngu mali nibatufaho.​—1 Abakolinso 14:3.

9. Kiki ekisobora kukonyera abagurusi kuha obuhabuzi omu mulingo ogurukugarramu amaani?

⁹ Obwire obumu kusobora kugarramu abaheereza bagenzi babo amaani, nikisobora kwetagisa abagurusi kuha obuhabuzi. Baibuli nesobora kukonyera abagurusi kumanya omulingo omurungi ogw’okuha obuhabuzi. Yesu akataho ekyokurorraho kirungi ekirukwoleka omulingo gw’okuhamu obuhabuzi. Hanyuma y’okufa n’okuhumbuuka, akasindikira ebitebe by’omu Asia obutumwa obukaba burumu okuhabura. Haroho obuhabuzi bw’amaani obuyahaire ekitebe kya Efeso, Peregamo, hamu na Suatira. Baitu obwakaba atakabahaire obuhabuzi, akabanza kubasiima habw’ebintu ebirungi ebibakaba nibakora. (Okusuku’rwa 2:1-5, 12, 13, 18, 19) Yesu akagambira ekitebe ky’omu Laodikiya ati: “Bona abangonza mbahana, kandi [mbafubira]: Nukwo wekambe oyegarukemu.” (Okusuku’rwa 3:19) Abagurusi baitu omu kitebe bahondera ekyokurorraho kya Kristo obubaba nibaha obuhabuzi.

10. Itwena nitusobora kugarranganamu tuta amaani?

¹⁰ Tibali bagurusi bonka abasemeriire kugarramu abandi amaani. Paulo akatererra Abakristaayo boona kubaza “ekirungi kyona ekirabahoga obwokwombeka nkomuntu [okwayetaga], kiretere kiti embabazi abanyakuhu’ra.” (Abefeso 4:29) Itwena tusemeriire kumanya ebyetago by’abandi nukwo tusobole kubakonyera. Paulo akahandikira Abakristaayo Abaheburaniya nagamba ati: “Mugo’re [emikono] erukulengiija, namaju agazingamire; kandi muhendere ebigere byanyu empenda eziterekeriire, anyakusenjura aleke okuhabisibwa, baitu hakire akizibwe.” (Abaheburaniya 12:12, 13) Itwena nitusobora kugumyangana n’okugarranganamu amaani omu bigambo byaitu, nobuturaaba tuli bato.

11. Kiki ekyakonyire Marthe obwakaba ayenubire?

¹¹ Munyaanya itwe arukwetwa Marthe akamara akasumi kaingi ayenubire. * (Rora obugambo obuli hansi.) Akahandika yagamba ati: “Kiro kimu hanyuma y’okusaba Yahwe angumye, nkatangatangana munyaanya itwe  ondi anyakukuzire omu myaka ayanyolekere okugonza n’embabazi byonyini ebinkaba ningonza ha kaire ako. Kandi akangambiraho ebyakaba narabamu ebikaba nibisisanira kimu n’ebyange, kyandetera kwehurra ngu tindi nyenka.” Munyaanya itwe ogu nasobora kuba atarakimanyire ngu ebigambo bye bikagarramu Marthe amaani.

12, 13. Nitusobora kuta tuta omu nkora obuhabuzi obw’omu Abafiripi 2:1-4?

¹² Paulo akahandikira Abakristaayo ab’omu Firipi nagamba ati: “Nukwo haraba haroho okuiruki’rwa kwona, omu Kristo, haraba haroho okusemeza kwona okwokugonza, haraba haroho okuterana kwona kwomwoyo, haraba haaroho okuganyira nembabazi, muhikirize okusemererwa kwange, kandi inywe mutekereze ekigambo kimu, munyina okugonza kumu, omutima gumu, nimutekereza ebimu; kandi mutakora kintu kyona obwokukungana nekitinisa ekitarumu, baitu omu buculezi omuntu wena omulinywe atekereze mutahi we okumukira; kunu mutarora omu omu ha bigambo byanyu inywenka, baitu inywena murole nebyabandi.”​—Abafiripi 2:1-4.

¹³ Itwena tusemeriire kuserra omulingo tusobora kukonyera bagenzi baitu. Nitusobora kubaha “okusemeza kwona okwokugonza,” “okuterana kwona kwomwoyo,” hamu “okuganyira nembabazi” kusobora kubagarramu amaani.

14. Ogumu ha miringo tusobora kugarramu abandi amaani nugwo guha?

¹⁴ Kitusemeza obutuhurra ngu omuntu ou twakonyire omu busumi bwa kara na hati akyali mwesigwa hali Yahwe. Omukwenda Yohana akagamba ati: “Tinyina okusemererwa  kwingi okukira kunu, okuhu’ra ebyabana bange ngu nibagendera omu mazima.” (3 Yohana 4) Abapayoniya baingi basemererwa obubahurra ngu omuntu ou bakonyire ira muno okwega amananu na hati naheereza Yahwe n’obwesigwa rundi nakora nka payoniya. Nahabweki kakuba abapayoniya bahwamu amaani, nitusobora kubaijukya ebirungi byona ebibakozere kusobora kukonyera abandi.

15. Nitusobora kukora ki kugarramu amaani abo abarukuheereza Yahwe n’obwesigwa?

¹⁵ Abaroleerezi baingi ab’ebicweka bagambire ngu ubo n’abakazi babo bagarukwamu amaani obubatunga akabbaruha akarukwoleka okusiima kuruga omu kitebe ekibabungiire. Nikyo kimu n’abagurusi ab’ekitebe, abamisaani, abapayoniya, hamu n’Ababeseeri abarukuheereza Yahwe n’obwesigwa. Kubasiima nikisobora kubagarramu amaani omu mulingo tubaire tutarukunihira.

16. Bintu ki ebya buli kiro ebitusobora kukora kugarramu abandi amaani?

¹⁶ Baitu kakuba oyesanga kitarukukwanguhira kugambira abandi omulingo orukwehurramu habwabo? Twijuke ngu tikigumire muno kugarramu abandi amaani. Banza omwegerre. Kakuba omuntu ogu uwe atamwegerra, nikisoboka kuba ngu omuntu ogu aine ekizibu kandi nagonza omuntu ow’okukibazaho nauwe. Kumuhuliiriza kyonka nikisobora kumuhumuza.​—Yakobo 1:19.

17. Kiki ekyagarwiremu ow’oruganda omu omuto amaani?

¹⁷ Ow’oruganda omuto arukwetwa Henri akabihirwa muno abamu ha banyabuzaale be obubarugire omu mananu. Omu halubo akaba ise ow’akaba naheereza nk’omugurusi omu kitebe. Omuroleerezi w’ekicweka akarora ngu  Henri akaba aine enaku nahabweki akacwamu kutwara Henri bagenda banywe hamu kaawa. Ow’oruganda onu akahuliiriza muno Henri obwakaba nasoborra omulingo akaba nayehurramu. Henri akakyetegereza ngu omulingo gumu gwonka ogwakaba nasobora kukonyera ab’eka ye kugaruka omu mananau nugwo ogw’okusigara ali mwesigwa hali Yahwe. Kandi kikamugarramu amaani obuyasomere Zabuli 46, Zefaniya 3:17, hamu na Marako 10:29, 30.

18. (a) Omukama Sulemani akabazaho ata ensonga y’okugarramu abandi amaani? (b) Omukwenda Paulo akaha magezi ki?

¹⁸ Ekyokurorraho kya Marthe na Henri nikitwegesa ki? Buli omu halitwe nasobora kugarramu amaani ow’oruganda rundi munyaanya itwe ow’arukwetaga kugarurwamu amaani. Omukama Suleman akahandika nagamba ati: ‘Ekigambo ekihika omu mpiko yakyo ka kirungi!’ Omusana ogwamaiso gusemeza omutima: nebigambo ebirungi bigomora amagufa.” (Enfumo 15:23, 30) Haroho omuntu ow’omanyire anyakwine enaku rundi anyakuhoirwemu amaani? Habwaki otamukorra akantu kataito nk’okumusomera ekicweka kuruga omu Omunaara rundi omukura gwaitu? Ekintu ekindi, omukwenda Paulo akagamba ngu kuzina hamu ebizina eby’Obukama nikisobora kutuletera kwehurra kurungi. Akagamba ati: “Nimwegesangana nimugamibi’rangana inywenka omu zabuli, nebizina, nebizina ebyomwoyo, nimuzina nembabazi omu mitima yanyu hali Ruhanga.”​—Abakolosai 3:16; Engeso Ezabakwenda 16:25.

19. Habwaki obwetago bw’okugarranganamu amaani nibwija kweyongera, kandi tusemeriire kukora ki?

¹⁹ Kusigikirra nk’oku ekiro kya Yahwe kirukweyongera kwirra haihi, kugarranganamu amaani nikiija kuba nikyetagisa muno. (Abaheburaniya 10:25) Nikiija kutusemeza obu turagarranganamu amaani nk’oku omukwenda Paulo yagambire ngu: “Nukwo muhumuzanganege inywenka, kandi mwombekege inywena, omuntu wena omutahiwe, nkokumurukukora.”​—1 Abasesalonika 5:11.