EKICWEKA KY’OKWEGA 17
Leka Yahwe Akukonyere Kurwanisa Emyoyo Emibi
“[Nitufukaana] . . . nemyoyo eyobubi eyomu biikaro ebyahaiguru.”—BEF. 6:12.
EKIZINA 55 Otabatiina!
EBITURAYEGA *
1. Nk’oku kisoboroliirwe omu Abefeso 6:10-13, ogumu ha miringo Yahwe atwoleka ngu natufaaho nugwo guha? Soborra.
GUMU ha miringo emirungi Yahwe ayoleka ngu natufaaho nk’abaheereza be nukwo kutukonyera kumanya nk’oku tusobora kurwanisa abanyanzigwa baitu. Setani hamu n’abadaimoni be nubo banyanzigwa baitu ab’amaani muno. Yahwe atugambira akabi abanyanzigwa banu basobora kutuhikyaho, kandi atuha byona ebiturukwetaaga kubarwanisa. (Soma Abefeso 6:10-13.) Kakuba twikiriza Yahwe kutukonyera kandi tukamwesigira kimu, nitusobora kusingura omu kurwanisa Setani. Nitwija kusobora kuba bamanzi nk’omukwenda Paulo. Akagamba ati: “Ruhanga obwa[raa]ba ali habwaitu, araha omunyanzigwa waitu?”—Bar. 8:31.
2. Kiki ekiturukwija kurora omu kicweka kinu?
2 Nk’Abakristaayo, tituhaisaniza Setani n’abadaimoni be. Omutima gwaitu tuguta ha kwega hali Yahwe n’okumuheereza. (Zab. 25:5) Baitu tusemeriire kumanya ebintu ebimu Setani eby’akora. Habwaki? Habwokuba nikiija kutukonyera kumanya omulingo gw’okumwetantara. (2 Kol. 2:11) Omu kicweka kinu, nitwija kurora omutego Setani n’abadaimoni be bakira kukozesa kuhabisa abantu. Nitwija n’okurora nk’oku tusobora kubarwanisa.
OMULINGO EMYOYO EMIBI EHABISA ABANTU
3-4. (a) Oburaguzi nikyo kiki? (b) Oburaguzi bujanjaire kwingana nka?
3 Omulingo omukuru Setani n’abadaimoni be bakozesa kuhabisa abantu nugwo ogw’oburaguzi. Abantu abakora ebikorwa eby’oburaguzi bagamba ngu nibamanya rundi ngu nibasora kukora ebintu eby’abantu abandi batasobora kukora. Ekyokurorra, abamu bagamba ngu nibasobora kumanya ebiraabaho omu maiso kurabira omu kuragura okw’okukozesa enyunyuzi. Abandi nibasobora kwefoora nk’abarukubaza n’abantu abaafiire. Kandi abandi bakora ebikorwa by’obufumu rundi eby’amasano hamu n’eby’amarogo. *
4 Kwikiririza omu maani g’oburaguzi kujanjaire kuhika nkaha? Okuseruliiriza okwakozerwe omu mahanga 18 ag’omu Latin America hamu n’ag’omu Caribbean kukooleka ngu kimu kyasatu eky’abantu abaakaguziibwe bakaba nibaikiririza omu masano, omu marogo, obufumu kandi haihi omuhendo nugwo gumu nabo abaali nibaikiriza ngu nikisoboka kubaza n’emyoyo ya bafu. Okuseruliiriza okundi kukakorwa omu mahanga 18 ag’omu Afirika. Kimu kyabiri ky’abantu abaakaguziibwe bakagamba ngu nibaikiririza omu buraguzi. Baitu nabwo hoona nambere turukwikara tusemeriire kwerinda oburaguzi. Ekigendererwa kya Setani nikyo ‘kubihabiha ensi yoona.’—Kus. 12:9.
5. Yahwe arora ata oburaguzi?
5 Yahwe ali “Ruhanga owamananu.” (Zab. 31:5) Hati, arora ata oburaguzi? Abunobera kimu! Yahwe akagambira Abaisareri ati: “Hatalizoka naiwe omuntu wena arukurabya omu murro omwanawe omwojo nobwakuba omwisiki, nobwakuba omuntu atera engisa, nobwakuba omuntu aragura ebiriija, nobwakuba omurogo, nobwakuba owamasano, nobwakuba omufumo, nobwakuba arukubandwa omuzimu, nobwekuba embandwa mali, nobwakuba akaguza abafire. Baitu omuntu wena anyakukora ebigambo ebi nikyo kinugwa hali Mukama.” (Bir. 18:10-12) Abakristaayo tibali hansi y’ebiragiro Yahwe ebiyahaire Abaisareri. Baitu nitumanya ngu omulingo aroramu oburaguzi tugukahindukaga.—Mara. 3:6.
6. (a) Setani akozesa ata oburaguzi kukora kubi abantu? (b) Omugambizi 9:5 neyoleka mananu ki agarukukwata ha bafu?
6 Yahwe natutererra kwetantara oburaguzi habwokuba Setani abukozesa kukora kubi abantu. Setani akozesa oburaguzi kukurakuraniza ebisuba—kimu ha bisuba nikyo ngu abaafiire beyongera kwomeera omu kiikaro nambere haikara emyoyo. (Soma Omugambizi 9:5) Ekintu ekindi, Setani akozesa oburaguzi kutiinisa abantu n’okubaiha hali Yahwe. Nagonza abantu abarukwetaba omu bikorwa by’oburaguzi kwesiga emyoyo emibi omu kiikaro ky’okwesiga Yahwe.
OMULINGO TURWANISA EMYOYO EMIBI
7. Yahwe natugambira ki?
7 Nk’oku tusangirwe turozere, Yahwe natugambira ebitusemeriire kumanya nukwo twetantale kuhabisibwa Setani n’abadaimoni be. Leka turole ebintu ebitusobora kukora kurwanisa Setani n’abadaimoni be.
8. (a) Omulingo omukuru ogutukonyera kurwanisa emyoyo emibi nugwo guha? (b) Zabuli 146:4 eyanika eta ekisuba kya Setani ekirukuwata ha bafu?
8 Soma Ekigambo kya Ruhanga kandi okyecumitirizeho. Gunu nugo omulingo ogurukukirayo ogutukonyera kwanga ebisuba eby’abadaimoni bakurakuraniza. Ekigambo kya Ruhanga nikisisana empirima ey’obwogi ey’erukusobora kwanika ebisuba Setani akurakuraniza. (Bef. 6:17) Ekyokurorraho, Ekigambo kya Ruhanga kyanika ekisuba ekirugamba ngu abaafire nibasobora kubaza n’abomeezi. (Soma Zabuli 146:4) Kandi kyongera kitugambira ngu Yahwe wenka nuwe aine obusobozi bw’okumanya kurungi ebiraabaho omu busumi bw’omu maiso. (Is. 45:21; 46:10) Obuturasoma Ekigambo kya Ruhanga kandi tukakyecumitirizaho buli kiro, nitwija kwikara twetekaniize kwanga n’okunoba ebisuba ebiretwa emyoyo emibi.
9. Bikorwa bya mulingo ki ebiine akakwate n’oburaguzi ebitwetantara?
9 Yangira kimu kukora ekintu kyona ekiine akakwate n’oburaguzi. Habwokuba tuli Abakristaayo ab’amananu, titwetaba omu kikorwa kyona ekiine akakwate n’oburaguzi. Ekyokurorraho, titugenda omu bafumu, kandi titubaza n’abafu omu mulingo gwona. Nk’oku ekicweka ekihoire kyayolekere, twetantara kwetaba omu migenzo eyekorwa ha rufu ey’erukusagika enyikiriza erukugamba ngu abaafire bali omu bwomeezi obundi. Ekintu ekindi, titukozesa enyunyuzi kandi titugenda omu barangi kusobora kumanya ebiraabaho omu maiso. (Is. 8:19) Tukimanyire ngu ebintu binu byona byakabi haliitwe kandi nibisobora kutuletera kubaza na Setani hamu nabadaimoni be.
Hondera ekyokurorraho ky’Abakristaayo aba kara, obu n’oyeihaho ekintu kyona ekiine akakwate n’amaani agatali ga buli kiro kandi oyangire kimu eby’okwesemeza byona ebirumu ebikorwa by’oburaguzi (Rora akacweka 10-12)
10-11. (a) Abamu omu kyasa ky’okubanza bakakora ki hanyuma y’okwega amananu? (b) Kusigikirra ha 1 Abakolinso 10:21, habwaki tusemeriire kuhondera ekyokurorraho ky’Abakristaayo ba kara, kandi nitusobora kukikora tuta?
10 Weyiheho ekintu kyona ekine akakwate n’amaani agatali ga buli kiro. Omu kyasa ky’okubanza, abantu abamu abaikaraga omu Efeso baakoraga ebikorwa ebiine akakwate n’oburaguzi. Baitu obubayegere amananu, haroho ekintu ekibakozere. “Kandi baingi hali abo [abakoraga] ebyokuragura bakasoroza ahamu ebitabu byabu, babyokeza omu maiso gabantu bona.” (Eng. 19:19) Abantu banu bakaba bacweriiremu kimu kurwanisa emyoyo emibi. Ebitabu byabo ebirukubazaaho oburaguzi bikaba bya sente nyingi muno. Baitu omu kiikaro ky’okubigaba rundi kubiguza abantu abandi, bakabihwerekereza. Bakagonza muno kusemeza Yahwe kukira sente ezakurugire omu kutunda ebitabu ebi.
11 Nitusobora tuta kwegera ha kyokurorraho ky’Abakristaayo banu ab’omu kyasa ky’okubanza? Ky’amagezi kweyihaho ekintu kyona ekiine akakwate n’oburaguzi. Kinu nikitwarramu ebintu nka ehirizi, hamu n’ebintu ebindi eby’abantu bajwara rundi ebibaba nabyo nukwo bibalinde hali emyoyo emibi.—Soma 1 Abakolinso 10:21.
12. Bikaguzo ki ebitusemeriire kwekaguza obukirukuhika ha by’okwesemeza byaitu?
12 Wekebiije kurungi eby’okwesemeza eby’oyetabamu. Wekaguze: ‘Nsoma ebitabu, magaziini rundi ebintu ebiri ha mikura ebiine akakwate n’oburaguzi? Kandi obukirukuhika ha bizina ebimpuliiriza, filimu hamu na puroguramu za ha tivi, rundi emizaano ya ha byoma ebya kalimagezi eyinzaana? Ebinyesemeza nabyo birumu ebintu ebiine akakwate n’oburaguzi? Bibamu ebintu nka za vampaya, emizimu rundi ebintu ebirukwoleka amaani agatali ga buli kiro? Byoleka amasano, amarogo, n’emikyeno nk’ebitaine akabi?’ Baitu nabwo tikurukumanyisa ngu eby’okwesemeza byona ebirumu enganikyo rundi ebirukubaza ha bintu ebitasobora kubaho biine akakwate n’eby’oburaguzi. Obworaaba n’oyekebiija eby’okwesemeza byawe, kora kyona ekirukusoboka kukora encwamu ezirakukonyera kwetantara ebintu byona Yahwe eby’anoba. Nitugonza kukora kyona ekirukusoboka “okwikara nomutima ogutaloho omusango hali Ruhanga.”—Eng. 24:16. *
13. Kiki ekitusemeriire kwetantara kukora?
13 Wetantale kubazaaho badaimoni. Obukirukuhika ha nsonga enu, tusemeriire kuhondera ekyokurorraho kya Yesu. (1 Pet. 2:21) Obwakaba atakaizire omu nsi, Yesu yaikaraga omu iguru kandi akaba amanyire biingi ebirukukwata hali Setani n’abadaimoni. Baitu atabazeeho ebintu emyoyo emibi enu ebiyakozere. Yesu akaba nagonza kwegesa abantu ebirukukwata hali Yahwe, hatali kuba kagambigambi wa Setani. Naitwe nitwija kuba twegiire hali Yesu obuturayetantara kujanjaaza engambo ezirukukwata ha badaimoni. Nahabweki katwoleka kurabira omu bigambo byaitu ngu omutima gwaitu “gwijuire nokusaga ekigambo ekirungi,” obu ago nugo amananu.—Zab. 45:1.
Titusemeriire kutiina emyoyo emibi. Yahwe, Yesu, hamu n’abamaraika nubo barukukirayo amaani (Rora akacweka 14-15) *
14-15. (a) Habwaki tutasemeriire kutiina emyoyo emibi ekihinguraine? (b) Bwakaiso ki oburukwoleka ngu Yahwe alinda abantu be?
14 Otatiinisibwa emyoyo emibi. Omu nsi embi, ebintu ebibi nibisobora kutuhikaho. Ebigwererezi, oburwaire, rundi okufa nibisobora kutuhikaho tutabyetekaniriize. Baitu titusemeriire kutekereza ngu biretwa emyoyo emibi. Baibuli negamba ngu “obusumi nobutandu” nibisobora kuhikaho buli omu. (Mug. 9:11) Yahwe akyolekere ngu aine amaani agarukukirra hara ag’abadaimoni. Ekyokurorraho, Yahwe ataikirize Setani kwita Yobu. (Yob 2:6) Omu kasumi ka Musa, Yahwe akooleka ngu aine amaani agarukukira abafumu ba Misiri abakozesaaga oburogo. (Kurug. 8:18; 9:11) Hanyuma, Yesu obuyagarukire omu iguru, Yahwe akamuha amaani kandi akagakozesa kurwanisa Setani n’abadaimoni be yababiinga omu iguru yabanaga omu nsi. Omu kasumi akatali ka hara, Setani n’abadaimoni be nibaija kunagwa omu kiina ekitaine h’okugarukira, kandi baliba batakyasobora kukora kubi omuntu wena.—Kus. 12:9; 20:2, 3.
15 Mali n’omu kasumi kanu haroho obwakaiso bwingi oburukwoleka ngu Yahwe nalinda abantu be. Tekerezaho ekintu kinu: Nitutebeza kandi nitwegesa amananu omu bicweka byona eby’ensi. (Mat. 28:19, 20) Obutuba nitutebeza, tuba nitwanika ebisuba bya Setani. Nitukigumya ngu, kakuba Setani yali nasobora, yakubaire ayemeriize omulimo gwaitu, baitu tasobora. Nahabweki titusemeriire kutiina emyoyo emibi ekihinguraine. Nitukimanya ngu “amaiso ga Mukama nigagendagenda hona omu nsi yona, ayeyoleke wamani habwabo omutima gwabo oguli guhikiriire nambera ali.” (2 Byom. 16:9) Obuturaaba tuli besigwa hali Yahwe, tukigumye ngu abadaimoni tibasobora kutuhikyaho akabi akasobora kutuhwerekereza ebiro byona.
ABAIKIRIZA OBUKONYEZI BWA YAHWE BATUNGA MIGISA KI?
16-17. Ha ekyokurorraho ekirukwoleka ngu nikyetaaga obumanzi kusobora kurwanisa emyoyo emibi.
16 Kyetagisa kuba n’obumanzi kusobora kurwanisa emyoyo emibi, kukira muno abanywani rundi abanyabuzaale obubatuhakaniza habwokuba nibatekereza ngu ekintu ekibi nikiija kutubaho kakuba tutabeteranizaho. Baitu Yahwe aha emigisa boona aboleka obumanzi. Katubazeeho ekyokurorraho kya munyaanya itwe kuruga omu ihanga lya Ghana arukwetwa Erica. Erica akatandika kwega Baibuli obwakaba ane emyaka 21. Habwokuba ise akaba ali mufumu ayakozesaga oburogo, akaba nanihirwa kwetaba omu migenzo ey’oburaguzi ey’ekaba netwarramu kulya enyama enyakuhongiirwe baruhanga ba ise. Erica obuyayangire, ab’omu ka y’owabu bakakitwara ngu ajumire baruhanga. Ab’omu ka y’owabu baikirizaaga ngu baruhanga bakaba nibagenda kubafura n’endwaire rundi babanage iraro.
17 Ab’omu ka ya Erica bakalengaho kumuhambiriza kwetaba omu migenzo enu baitu uwe yayangira kimu, n’obukiraaba ngu kikamwetagisa kuruga omu ka egi. Haroho Abakaiso ba Yahwe abamwesere omu ka yabo nukwo atandike kwikara nabo. Omu mulingo gunu Yahwe akaha munyaanya itwe onu eka endi—ab’oruganda n’abanyaanya itwe abaafokere nk’abanyabuzaale be. (Mar. 10:29, 30) N’obukiraaba ngu bakamwehakana kandi bayokya ebintu bye, Erica akaikara ali mwesigwa hali Yahwe kandi hati naheereza nka payoniya ow’akasumi koona. Tarukutiina abadaimoni. Erica akabazaaho eka ye ati, “Buli kiro nsaba ngu abanyabuzaale bange nabo batunge omugisa gw’okumanya Yahwe n’okutunga obugabe oburuga omu kuheereza Ruhanga ow’engonzi.”
18. Migisa ki eyeruga omu kwesiga Yahwe?
18 Abamu haliitwe tusobora kutahikwaho okulengwa nka kunu. Baitu itwena tusemeriire kurwanisa emyoyo emibi kandi twesige Yahwe. Obuturakora tuti nitwija kutunga emigisa nyingi, kandi nitwija kwetantara kubihabihibwa ebisuba bya Setani. Kandi titurukwija kuleka kuheereza Yahwe ngu habwokuba nitutiina badaimoni. Kukira byona, enkoragana yaitu na Yahwe niija kweyongera kuguma. Omwegeswa Yakobo akahandika nagamba ati: “Muculerre Ruhanga, baitu murwane na Setani, kandi alibairuka. Muirre haihi Ruhanga, nauwe alibairra haihi.”—Yak. 4:7, 8.
EKIZINA 150 Serra Ruhanga Nuwe Akujune.
^ kac. 5 Yahwe atutereriire kwerinda emyoyo emibi kandi atumanyisize akabi akesobora kutuhikyaho. Emyoyo emibi erengaho eta kuhabisa abantu? Bintu ki ebitusobora kukora kurora twarwanisa emyoyo emibi? Omu kicweka kinu nitwija kubazaaho omulingo Yahwe atukonyera kwerinda emyoyo emibi.
^ kac. 3 AMAKURU AG’EBIGAMBA EBIMU: Oburaguzi nibutwarramu enyikiriza hamu n’ebikorwa byona ebiine akakwate n’abadaimoni. Kandi nibutwarramu n’enyikiriza erukugamba ngu emyoyo y’abantu abaafiire ikara eri nyomeezi kandi ngu ebaza n’abantu abomeezi, kurabira omu muntu ondi. Oburaguzi nibutwarramu ebikorwa eby’obufumu hamu n’okutera engisa. Omu kicweka kinu, ekigambo amasano nikimanyisa ebikorwa ebiine akakwate n’amaani agatali ga buli kiro. Nibisobora kutwarramu kukyena n’okuroga rundi kurogorra. Baitu kinu tikirukutwarramu obukodyo nambere abantu bamu bazaanisa emikono, nibagihindahindura bwangu bwangu habw’okugonza kusemeza abantu abandi.
^ kac. 12 Abagurusi b’ekitebe tibaine obusobozi bw’okuteraho abantu ebiragiro by’okuhondera obukirukuhika ha by’okwesemeza. Oihireho, buli Mukristaayo asemeriire kukozesa omuntu we w’omunda anyakutendekerwe Baibuli obwarukuba nakomamu ebintu by’okusoma, kurora, kuhuliriza rundi kuzaana. Abanyineka ab’amagezi balengaho muno kurora ngu amaka gaabo gaba n’eby’okwesemeza ebirukwikiraniza n’emisingi ya Baibuli.—Genda ha jw.org® hansi y’ekacweka “Do Jehovah’s Witnesses Ban Certain Movies, Books, or Songs?” rora nambere hali ABOUT US > FREQUENTLY ASKED QUESTIONS.
^ kac. 54 KUSOBORRA EBISISANI: Ekisisani ekirukwoleka Yesu nk’Omukama waitu ow’amaani ali omu iguru nayebembera ihe ly’abamalaika. Ekitebe kya Yahwe eky’obukama kiri haiguru yabo.
