1-2. Kiki ekyaletiire Yesu kwetuntura muno?

YESU akaba ayetuntwire ha kiro ky’okumalirra atakafiire. Akaba nagenda kubonabonesebwa kandi aitwe enkozi z’ebibi. Kufa kwe tinukwo kwonka okukaba kumweralikiriize. Akaba nagonza muno Ise kandi akaba nagonza kumusemeza. Yesu akaba akimanyire ngu kakuba asigara ali mwesigwa omu kulengesebwa okwakaba nagenda kurabamu, akaba naija kweza ibara lya Yahwe. Ekintu ekindi, Yesu yagonzaaga abantu kandi akaba akimanyire ngu kusigara ali mwesigwa kuhikira kimu ha kufa kikaba nikigenda kuletera abantu okunihira kw’okutunga obwomeezi obutahwaho.

² N’obikiraaba ngu Yesu akaba ayetuntwire, akaba aine obusinge. Akagambira abegeswa be ati: “Obusinge bwange nimbubaha.” (Yoh. 14:27) Akaba aine ‘obusinge bwa Ruhanga,’ oku nukwo okutekaana omuntu okwatunga habwokuba n’enkoragana enungi na Yahwe. Obusinge bunu bukaletera Yesu kutekaana omu bitekerezo n’omu mutima.​—Baf. 4:6, 7.

3. Nitwija kubazaaho ki omu kicweka kinu?

³ Ky’amananu ngu abahondezi ba Yesu batunga ebizibu, baitu busaho omuntu asobora kutunga ebizibu nk’ebya Yesu yatungire. (Mat. 16:24, 25; Yoh. 15:20) Kandi nka Yesu, naitwe haroho obutwetuntura. Nitusobora kukora ki kurora okwetuntura tikwatumaraho obusinge mu bitekerezo byaitu? Leka twecumitirizeeho ebintu bisatu Yesu ebiyakozere omu buheereza bwe obw’omu nsi kandi turole nk’oku tusobora kumwegeraho obuturatangatangana okulengwa.

4. Ha ebyokurorraho ebirukwoleka ngu Yesu akata omu nkora ekyahandiikirwe eky’omu 1 Abasesalonika 5:17 ha kiro ky’okumalirra eky’obwomeezi bwe omu nsi.

⁴ Soma 1 Abasesalonika 5:17. Yesu akasaba muno omu biro bye eby’okumalirra omu nsi. Obuyayolekere abegeswa be omulingo gw’okwijukamu okufa kwe, akasabira omugati hamu n’eviini. (1 Kol. 11:23-25) Obubakaba batakarugire nambere baali baijukiire Okuhingurwaho, akasaba n’abegeswa be. (Yoh. 17:1-26) Uwe n’abegeswa be obubagenzere ha Rusozi Zeituni, akeyongera kusaba atarukulekerra. (Mat. 26:36-39, 42, 44) Kandi ebigambo Yesu yamaliriire kubaza atakafiire bikaba omu mulingo gw’esaara. (Luk. 23:46) Kurabira omu kusaba, Yesu akagambira Yahwe buli kimu ekiyarabiremu ha kiro kye eky’okumalirra.

5. Habwaki obumanzi bw’abakwenda bwacekere?

⁵ Ensonga emu habwaki Yesu yagumisiriize okulengwa eri ngu akesiga Ise kandi yamusabaga muno. Baitu abakwenda ubo bataikale nibasaba ha kiro eki. Ekyarugiremu, akaire ak’okulengwa obukahikire bakaba batakyaine obumanzi bwona. (Mat. 26:40, 41, 43, 45, 56) Obuturahikwaho ebizibu, ekintu kimu ekiratukonyera kwikara tuli besigwa nukwo kuhondera ekyokurorraho kya Yesu ‘tukaikara nitusaba.’ Nitusobora kusaba ki?

6. Okwikiriza nikwija kutukonyera kuta kwikara twine obusinge?

⁶ Nitusobora kusaba Yahwe nukwo atwongere “okuikiriza.” (Luk. 17:5; Yoh. 14:1) Nikitwetagisa kuba n’okwikiriza habw’okuba Setani nagenda kulenga abahondezi ba Yesu boona. (Luk. 22:31) Okwikiriza kutukonyera kuta kwikara twine obusinge n’obutuhikwaho ebizibu ebihonderaine? Obutarakora kyona ekiturukusobora kumaraho ekizibu, okwikiriza nikwija  kutuletera kuleka kweralikirra habwokuba tumanyire ngu Yahwe naija kwihaho ekizibu omu bwire obuhikire. Kwesiga ngu Yahwe amanyire eky’okukora kutukira kitukonyera kuba n’obusinge omu bitekerezo n’omu mutima.​—1 Pet. 5:6, 7.

7. Ebigambo by’ow’oruganda Robert nibikwegesa ki?

⁷ Okusaba kutukonyera kwikara twine obusinge omu bitekerezo n’obututunga ebizibu bingi. Tekerezaaho ekyokurorraho kya Robert, omugurusi w’ekitebe kandi anyakwine emyaka nka 80. Nagamba ati: “Obuhabuzi obuli omu Abafiripi 4:6, 7 bunkonyire kugumisiriza ebizibu bingi omu bwomeezi bwange. Nkaba nyine ebizibu omu by’entahya. Kandi haroho n’akasumi obunaihirweho obujunanizibwa bwange obw’okuheereza nk’omugurusi w’ekitebe.” Kiki ekikonyire Robert kwikara aine obusinge omu bitekerezo? Nagamba ati: “Obumpurra natandika kwetuntura, aho naho ntandika kusaba, kandi obunyeyongera kusaba, nkasaba muno, nyeyongera kutunga obusinge.”

8. Nk’oku kyolekerwe omu Yohana 8:29, nsonga ki endi habwaki Yesu akaba aine obusinge omu bitekerezo?

⁸ Soma Yohana 8:29. N’obwakaba nahiganizibwa, Yesu akaba aine obusinge omu bitekerezo habwokuba akaba akimanyire ngu nasemeza Ise. Akaikara ali mwebundaazi, n’omu bwire kyali kitanguhire. Akaba nagonza Ise kandi omu bwomeezi bwe bwona yayebembezaaga kuheereza Yahwe. Obwakaba atakaizire omu nsi, akaba ali ‘mukozi omukuru’ wa Ruhanga. (Nfu. 8:30) Kandi obwakaba akyaali omu nsi, akekamba kugambiraho abandi ebirukukwata hali Ise. (Mat. 6:9; Yoh. 5:17) Omulimo ogu gukaletera  Yesu okusemererwa kwingi.​—Yoh. 4:34-36.

9. Habwaki tuba n’obusinge omu bitekerezo obutwekamba kutebeza?

⁹ Nitusobora kuhondera ekyokurorraho kya Yesu kakuba tworobera Yahwe kandi ‘tukekamba obutoosa omu mirimo ya Mukama.’ (1 Kol. 15:58) Kakuba twemarra ha kukora omulimo gw’okutebeza, nikiija kutukonyera kuba n’entekereza ehikire ha bizibu ebitutunga. (Eng. 18:5) Ekyokurorraho, obutuba omu buheereza, tutangaana abantu abaine ebizibu ebirukukira n’ebyaitu. Baitu obubeega hali Yahwe kandi bakata omu nkora ebibegere, obwomeezi bwabo buba kurungi kandi batunga okusemererwa. Buli murundi turora ekintu kinu nikibaho, tuhurra tugumire ngu Yahwe naija kwikara naturolerra. Kandi kitukonyera kulinda obusinge bwaitu obw’omu mutima. Munyaanya itwe anyakumazire obwomeezi bwe bwona narwanisa ekizibu eky’okwenuuba n’okwehurra nkataine omugaso akasanga ekintu kinu kiri ky’amananu. Nagamba ati: “Obumba ndi omu buheereza, ntunga okutekaana omu bitekerezo kandi ntunga okusemererwa. Nintekereza ensonga eri habwokuba obumba ndi omu buheereza, nyehurra ndi haihi na Yahwe.”

10. Ebigambo bya Brenda nibitwegesa ki?

¹⁰ Tekerezaaho ekyokurorraho kya munyaanya itwe arukwetwa Brenda. Uwe na muhara we baine oburwaire bw’amaani. Brenda tasobora kurubata, aikara omu kagaali kandi ayehurra ataine maani. Obwire obumu atebeza nju ha nju obwaba asoboire, baitu akira muno kutebeza kurabira omu kuhandiika amabbaruha. Nagamba ati: “Obunakyetegeriize ngu oburwaire bwange tiburukwija kukira omu businge bunu, omutima gwange nkacwamu kuguteeka ha buheereza. Amananu gali, obumba nintebeza, tintekerezaaho ebizibu byange. Oihireho nyikara nintekereza ha kukonyera abantu abali omu kicweka kyaitu eky’okutebezaamu. Kandi kutebeza kunkonyera kwikara ninyijuka ebintu ebirungi ebiraabaho omu busumi bw’omu maiso.”

11-13. (a) Abakwenda hamu n’abandi bakooleka bata ngu bakaba bali banywani ba Yesu nfe na nfe? (b) Banywani ba Yesu bakamuletera kwehurra ata?

¹¹ Obusumi bwona Yesu yamazire natebeza, abakwenda be abesigwa bakaba bali banywani be nfe na nfe. Bakaba bali banywani Baibuli aberukubazaaho eti: “Baitu haroho enganjani ayehikya muno okukira mwene wabu.” (Nfu. 18:24) Abanywani nka banu bakaba bali b’omuhendo hali Yesu. Omu buheereza bwe bwona, busaho n’omu ha bagenzi be abayazairwe nabo ayamwikiriize. (Yoh. 7:3-5) Abanyabuzaale be bakahika n’okutekereza ngu akaba agwire iraro. (Mar. 3:21) Baitu Yesu akagambira abegeswa be omu kiro eky’okumalirra atakafiire ati: “Ninywe mwaikaraga nanyowe omu kwohebwa kwange.”​—Luk. 22:28.

¹² Abakwenda baikaraga nibabihiza Yesu, baitu atafeeho ensobi zaabo oihireho akarora ngu bakaba baine okwikiriza. (Mat. 26:40; Mar. 10:13, 14; Yoh. 6:66-69) Ha kiro ky’okumalirra atakafiire, Yesu akagambira ati abasaija banu abesigwa: “Mbesere enganjani; baitu byona ebinahuliire hali Isenyowe mbibagambiire inywe.” (Yoh. 15:15) Hataroho kugurukyagurukya, banywani ba Yesu bakamugarramu muno amaani. Obukonyezi bwabo bukaletera Yesu kusemererwa muno.​—Luk. 10:17, 21.

¹³ Oihireho Abakwenda, Yesu akaba aine abanywani abandi, abasaija n’abakazi abamukonyeraga omu mulimo gw’okutebeza n’omu bintu ebindi. Abamu bakamuraliza omu maka gabo nukwo balye nauwe ekiihuro. (Luk. 10:38-42; Yoh. 12:1, 2) Abamu bagendaga nauwe omu ngendo kandi babaganaga nauwe ebintu byabo. (Luk. 8:3) Yesu akaba aine abanywani  abakaba betegekere kumukonyera habwokuba nauwe akaba ali munywani murungi. Akabakorra ebintu ebirungi kandi tiyabanihirramuga kukora ebibatarukusobora. Yesu akaba ahikiriire, baitu akasiima obukonyezi abanywani be abatahikiriire bamuhaga. Kandi nitusobora kukigumya ngu, nabo bakamukonyera kwikara n’obusinge omu bitekerezo.

14-15. Nitusobora tuta kutunga abanywani abarungi kandi nibasobora kutukonyera bata?

¹⁴ Abanywani abarungi nibaija kutukonyera kwikara tuli besigwa hali Yahwe. Omulingo omurungi ogw’okutunga abanywani abarungi nukwo kuba munywani omurungi. (Mat. 7:12) Ekyokurorraho, Baibuli n’etwekambisa kukozesa obwire bwaitu hamu n’amaani gaitu kukonyera abandi, kukira muno abo abali omu bwetaago. (Bef. 4:28) Nosobora kutekerezaaho omuntu omu kitebe kyanyu ow’osobora kukonyera? Nosobora kukonyera ow’oruganda rundi munyaanya itwe ow’atasobora kuruga omu nju habw’okukura omu myaka rundi habw’oburwaire? Nosobora kumugendera omu katale rundi ha duuka kumugurra ebintu? Nosobora kuha eby’okulya eka etali kurungi omu bya sente? Obworaaba n’omanya kukozesa omukura gwaitu ogwa jw.org^® hamu na JW Library^® eya ha masimu rundi tabuleti, n’osobora kukonyera abandi omu kitebe kyawe nabo kwega kubikozesa? Omutima gwaitu obuturaguteeka ha kukonyera abandi, nitwija kweyongera kutunga okusemererwa.​—Eng. 20:35.

¹⁵ Abanywani abarungi nibaija kutusagika kandi batukonyere kwikara twine obusinge omu bitekerezo. Nk’oku Erihu yahuliriize Yobu obwakaba namusoborra ebizibu bye, abanywani baitu batuhuliiriza obutuba nitubasoborra  nk’oku turukwehurra. (Yob. 32:4) Titusemeriire kunihira ngu banywani baitu baratukorra encwamu, baitu ky’amagezi kuhondera obuhabuzi obubarukutuha kuruga omu Baibuli. (Nfu. 15:22) Kandi nk’oku Omukama Daudi yaikiriize n’obw’ebundaazi obukonyezi banywani be bamuhaire, naitwe tutaikiriza emyehembo kutulemesa kwikiriza obukonyezi banywani baitu barukutuha obuturukuba tuli omu bwetaago. (2 Sam. 17:27-29) Mali, abanywani nk’abo kisembo kuruga hali Yahwe.​—Yak. 1:17.

16. Kusigikirra ha Abafiripi 4:6, 7, omulingo gumu gwonka ogutusobora kutungiramu obusinge nugwo guha? Soborra.

¹⁶ Soma Abafiripi 4:6, 7. Habwaki Yahwe natugambira ngu nitwija kutunga obusinge bwe kurabira “omu Kristo Yesu”? Habwokuba ekintu kimu kyonka ekiratusobozesa kutunga n’okwikara twine obusinge omu bitekerezo n’omu mitima yaitu, nukwo kwetegereza ekiikaro kya Yesu omu kuhikirizibwa kw’ekigenderewa kya Ruhanga. Ekyokurorraho, kurabira omu kicunguro kya Yesu, ebibi byaitu nibisobora kuganyirwa. (1 Yoh. 2:12) Kumanya ekintu kinu kituhumuza muno. Nk’Omukama w’Obukama bwa Ruhanga, Yesu naija kumaraho okubonabona kwona okuleserwe Setani n’ensi ye. (Is. 65:17; 1 Yoh. 3:8; Kus. 21:3, 4) Mali eki nikituha okunihira okurungi! N’obukiraaba ngu Yesu atuhaire omulimo ogutanguhire, ali naitwe, natusagika omu biro binu ebya ha mpero. (Mat. 28:19, 20) Eki kitwongera obumanzi. Okuhumura, okunihira, n’obumanzi​—nibyo bintu ebikuru ebiturukwetaaga kusobora kutunga obusinge obw’omu bitekerezo.

17. (a) Omukristaayo nasobora ata kwikara aine obusinge omu bitekerezo? (b) Nk’oku kyolekerwe omu Yohana 16:33, kiki ekiturukwija kusobora kukora?

¹⁷ Hati, kakuba otunga okulengesebwa, n’osobora ota kwikara oine obusinge? Kinu n’osobora kukikora kakuba naiwe okora ebintu nk’ebi Yesu yakozere. Eky’okubanza, ikara n’osaba muno. Ekyakabiri, yorobera Yahwe kandi oyekambe kutebeza enyikara eyetanguhire. Kandi ekyasatu, saba banywani baawe bakukonyere kuraba omu bizibu. Obu nubwo obusinge bwa Ruhanga buraliinda omutima gwawe n’ebitekerezo byawe. Kandi nk’oku Yesu yakozere, naiwe noija kusobora kusingura ekizibu kyona.​—Soma Yohana 16:33.