1-2. Kiki ekisobora kuba kyaletiire Yesu kubaza ebigambo ebiri omu Yohana 4:35, 36?

YESU akaba arabire omu misiri, kandi nikizooka ngu ekaba ya sayiri. (Yoh. 4:3-6) Hali hasigaireyo ameezi ana abantu batandike kugesa. Nahabweki kyali nikihuniriza kuhurra Yesu nagamba ati: “Muimukye amaiso ganyu, murole emisiri, emazire okwera okugeswa.” (Soma Yohana 4:35, 36.) Akaba namanyisa ki?

² Nikizooka Yesu akaba n’abazaaho kugesa abantu hatali eby’okulya. Tekerezaaho ekyali ky’akamara kubaho. Nobukiraaba ngu Yesu yakiraga kwetantara Abasamaliya, akaba atebiize omukazi Omusamaliya, kandi omukazi onu akaba amuhuliriize kurungi! Kandi Yesu obw’akaba n’abazaaho emisiri ey’ekaba “emazire okwera okugeswa,” ekitebe ky’Abasamaliya omukazi abaakaba agambiire ebirukukwata hali Yesu bakaba nikiija haliwe. (Yoh. 4:9, 39-42) Ekitabu kimu ekisoborraho Baibuli nikibazaaho ekyahandiikirwe kinu kiti: “Ekihika ekingi abantu bakaba baine . . . kikooleka ngu bakaba nibasisana nk’omusiri oguhikire kugeswa.”

3. Kurora abantu omu mulingo Yesu y’abarozeremu, nikiija kukukonyera kita kweyongera kutebeza kurungi?

³ Iwe orora ota abantu ab’otebeza amakuru amarungi? Obarora nk’omusiri ogwezere kandi oguhikire kugeswa? Obukiraaba nukwo kiri, noija kukora ebintu binu bisatu. Eky’okubanza, noija kutebeza otarukusiisa obwire. Obwire obw’okugesa buba butaito; nahabweki tihabaho obwire obw’okusiisa. Ekyakabiri, noija kusemererwa obworarora abantu nibahuliriza amakuru amarungi. Baibuli neyoleka ngu kugesa kuleetera abantu okusemererwa. (Is. 9:3) Ekyakasatu, noija kurora buli muntu wena nk’omuntu arukusobora kufooka omwegeswa, kandi kinu nikiija  kukuletera kukozesa enyanjura ezisobora kukwata ha mitima y’abantu.

4. Bintu ki ebirukukwata ha mukwenda Paulo ebiturukugenda kubazaaho omu kicweka kinu?

⁴ Yesu akaba atarukusisana n’abahondezi be abamu abatekerezaaga ngu Abasamaliya tibasobora kufooka begeswa be. Baitu akarora Abasamaliya nk’abantu abarukusobora kufooka begeswa be. Naitwe tusemeriire kurora abantu ab’omu kicweka tutebezaamu nk’abarukusobora kufooka begeswa ba Kristo. Omukwenda Paulo akatuteraho ekyokurorraho ekirungi ekitusemeriire kuhondera. Biki ebitusobora kumwegereho? Omu kicweka kinu, nitwija kubazaaho omulingo (1) yamanyaga enyikiriza z’abantu abayatebezaaga, (2) ebintu ebibarukugonza, kandi (3) nk’oku yabaroraga nk’abantu abarukusobora kufooka begeswa ba Yesu.

5. Habwaki Paulo yayetegerezaaga kurungi abantu abayasangaga omu isorrokaniro?

⁵ Paulo yakiraga kutebeza omu masorrokaniro ag’Abayudaaya. Ekyokurorraho, omu isorrokaniro ery’omu Sesalonika, akamara ‘Sabiti isatu n’akahakana [na Abayudaaya] omu Byahandiikirwe.’ (Eng. 17:1, 2) Nikizooka ngu Paulo kyamwanguhiraga kutebeza omu isorrokaniro habwokuba akaba ali Muyudaaya. (Eng. 26:4, 5) Kandi yabatebezaaga atarukutiina habwokuba akaba amanyire enyikiriza zaabo.​—Baf. 3:4, 5.

6. Abantu Paulo yatebiize omu katale ak’omu Asene bakaba nibahukana bata nabo abayatebiize omu isorrokaniro?

⁶ Hanyuma y’abahiganizi kubinga omukwenda Paulo kuruga omu Sesalonika kandi n’omu Beroya, akagenda omu Asene. Obuyahikireyo, “yahakana omu iso’rokaniro hamu Nabayudaya nabantu abekengi.” (Eng. 17:17) Baitu Paulo obwakaba n’atebeza omu katale akatangatangana abantu ab’embaganiza. Omu bantu abo hali harumu Abafirisofo kandi n’Abamahanga abakaba nibarora obutumwa bwe ‘nk’okwegesa okuhyaka.’ Bakamugambira ngu: “Noleta ebigambo ebihyaka omu matu gaitu.”​—Eng. 17:18-20.

7. Kusigikirra ha Engeso Ezabakwenda 17:22, 23, Paulo akahinduramu ata omulingo akaba n’atebezaamu?

⁷ Soma Engeso Ezabakwenda 17:22, 23. Paulo atatebeze Abamahanga ab’omu Asene omulingo yatebiize Abayudaaya omu isorrokaniro. Nikizooka Paulo akabanza kutekerezaaho ebintu abantu banu ab’omu Asene ebibaikiririzamuga. Aketegereza ebintu ebikaba bimwetoroire n’omulingo abantu baramyamuga. Ekyayongireho, Paulo akakozesa ebintu ebibaikirizaaga kandi ebyali nibikiranganiza n’Ebyahandikirwe. Omukugu omu ha Baibuli  nagamba ati: “Nk’oku [Paulo] akaba ali Mukristaayo Omuyudaaya, akakyetegereza ngu Abayonaani tibaramya Ruhanga ‘ow’amananu’ ow’Abayudaaya n’Abakristaayo baitu alengaho kwoleka ngu Ruhanga ow’akaba n’atebezaaho Abasene bakaba bamumanyire.” Nahabweki Paulo akaikiriza kuhinduramu omulingo akaba natebeza. Akagambira Abasene ngu obutumwa bwe bukaba niburuga hali “Ruhanga atarukumanywa” ou baali nibalengaho kuramya. Nobukiraaba ngu Abamahanga baali batamanyire Ebyahandiikirwe, Paulo atatekereze ngu tibasobora kufooka Bakristaayo. Baitu akabarora nk’omusiri oguhikire okugeswa, kandi yahinduramu enyanjura ey’akaba n’akozesa kutebeza amakuru amarungi.

8. (a) Kiki ekisobora kukukonyera kumanya ediini ez’abantu ab’omu kiikaro nambere mutebeza? (b) Nosobora ota kugarukamu omuntu ow’akugambiire ngu aine ediini ye?

⁸ Nka Paulo, wetegereze ebikwetoroire. Wetegereze ebintu ebisobora kukukonyera kumanya kiki abantu ab’omu kiikaro ekimutebezaamu baikiriza. Omuntu ogu atimbire ata enju ye rundi motoka ye? Ibara lye, omulingo ajwaire, rundi omulingo arukubazaamu nibyoleka ediini ye? Obundi uweakugambiire ngu, aine ediini ye. Omuntu obw’agambira munyaanya itwe omu arukuheereza nka payoniya ow’embaganiza ebigambo ebi, amugarukamu ati: “Tinyizire kuhindura ediini yaawe, baitu kubazaaho ensonga enu . . . ”

9. Bintu ki ebitusobora kuba nitwikiranganiza n’omuntu omunyadiini?

⁹ Masomo ki agosobora kubazaaho obworukuba n’otebeza omuntu omunyadiini? Lengaho kuserra ebintu ebimurukwikiranganiza. Nasobora kuba nauwe aramya Ruhanga omu, amanyire ngu Yesu nuwe Omujuni w’abantu, rundi n’aikiriza ngu okubonabona kuli haihi kuhwaho. Kozesa ebintu binu kumutebeza amakuru amarungi kuruga omu Baibuli omu mulingo oguramukonyera kugagonza.

10. Kiki ekitusemeriire kulengaho kukora, kandi habwaki?

¹⁰ Baitu oikale ekimanyire ngu abantu abamu tibaikiriza ebintu byona ediini zaabo zegesa. Nahabweki n’obw’oramanya ediini y’omuntu, osemeriire kulengaho kumanya eby’arukwikiriza. Ow’oruganda David arukuheereza nka payoniya ow’embaganiza omu Australia nagamba ati: “Abantu baingi hati nibatabura enyikiriza zaabo n’enyegesa ezitali z’ediini.” Munyaanya itwe Donalta kuruga omu Albania, nagamba ati, “Abantu abamu abatutangatangana omu buhereeza bagamba ngu baina ediini zabu, baitu hanyuma bagamba ngu tibarukwikwiririza omuli Ruhanga.” Kandi ow’oruganda omumisani anyakuli omu Argentina akakyetegereza nk’oku abantu abamu nibagamba ngu baikiririza omu busatu baitu batarukwikiriza nk’oku  Isiitwe, Omwana, n’omwoyo ogurukwera bali Ruhanga omu. Nagamba ati: “Kinu obunkimanya kinkonyera kwetegereza ekintu ekindukwikiranganiza n’omuntu ogu.” Nahabweki lengaho kumanya kiki kyonyini abantu barukwikiririzamu. Hanyuma noija kuba nka Paulo ayafookere byona hali boona.​—1 Kol. 9:19-23.

11. Nk’oku kyolekerwe omu Engeso Ezabakwenda 14:14-17, Paulo akatebeza ata abantu Barusitura omu mulingo ogw’abaletiire kugonza kumuhuliiriza?

¹¹ Soma Engeso Ezabakwenda 14:14-17. Paulo akahindura enyanjura ye obuyayetegeriize ebintu abahuliiriza be bakaba nibagonza. Ekyokurorraho, ekitebe ky’abantu yatebiize omu Rusitura kikaba kitamanyire rundi kimanyire bike muno ha Byahandiikirwe. Nahabweki Paulo akabazaaho ebintu ebibakaba nibasobora kwetegereza, nk’amagesa amarungi n’ebituletera kwegondeza omu bwomeezi. Akakozesa ebigambo n’ebyokurorraho ebikaba byanguhire kwetegereza.

12. Nosobora ota kumanya ebintu omuntu agonza nukwo okakozesa enyanjura ey’esemeriire?

¹² Kozesa amagezi kumanya kiki abantu omu kiikaro eky’otebezaamu bagonza nukwo omanye enyanjura ey’orakozesa. Nosobora ota kumanya ebintu omuntu arukugonza obworukuba otakamuhikireho rundi otakahikire omu ka ye? Nahati, osemeriire kwetegereza ebintu ebikwetoroire. Nasobora kuba nalima, nasoma ekitabu, nakanika motoka, rundi nakora ekintu ekindi. Obukiraaba kitali kibi, nosobora kubaza nauwe nosigikirra ha kintu eky’aliyo nakora. (Yoh. 4:7) N’engoye omuntu ajwaire nizisobora kukukonyera kumanya ebintu ebirukumukwataho nk’ihanga lye, omulimo gwe, rundi tiimu ey’emizaano ey’agonza. Ow’oruganda Gustavo nagamba ati: “Nkabaza n’omusigazi ow’emyaka 19 ow’akaba ajwaire tishaati ey’eroho ekisisani eky’omuzini ruranganwa. Nkamukaguza habwaki agijwaire, yangarukamu ngu omuzini ogu amugonza muno. Habw’okubaza nauwe kikarugamu kwega nauwe Baibuli kandi hati w’oruganda.”

13. Nosobora ota kuletera omuntu kugonza kwega Baibuli?

 ¹³ Obworaaba nosobororra omuntu omulingo twegesaamu Baibuli mwoleke nk’oku aragasirwa nukwo kimuletere kugonza kugyega. (Yoh. 4:13-15) Ekyokurorraho munyaanya itwe omu obuyataahire omu nju y’omukazi ow’akaba ayolekere okugonza, akarora satifiketi ha kisiika erukwoleka ngu omukazi onu akaba ali purofesa omu by’enyegesa. Akamusobororra nk’oku naitwe twegesa abantu nitukozesa Baibuli hamu n’ensorrokano zaitu. Omukazi onu akaikiriza kwegesebwa Baibuli, yagenda omu rusorrokano ekiro ekyahondiireho, kandi hanyuma y’akasumi kake akabaho ha rusorrokano orukooto. Hanyuma y’omwaka gumu akabatizibwa. Wekaguze: ‘Bintu ki abantu abangarukayo kubungira bagonza? Ninsobora kubasoborra omu mulingo ogurukusikiriza nk’oku twegesaamu Baibuli?’

14. Nosobora ota kuhinduramu omulingo oyegesaamu buli mwegi owa Baibuli?

¹⁴ Hanyuma y’okutandika kwega n’omuntu Baibuli, tekaniza kurungi buli murundi oraaba nogenda kumwegesa, kandi oyecumitirizeeho ebintu ebirukumukwataho n’ebyagonza. Obw’oraaba notekaniza ebimurayega, komamu ebyahandiikirwe eby’oramusomera, vidiyo ez’oramwoleka, n’ebyokurorraho eby’orakozesa kumusoborra kurungi amananu agali omu Baibuli. Wekaguze, ‘Bintu ki ebirakira kusemeza omwegi kandi bikamuhika ha mutima?’ (Nfu. 16:23) Omukazi ow’akaba nasoma Baibuli na payoniya arukwetwa Flora omu ihanga lya Albania akagamba ati: “Tinsobora kwikiriza enyegesa ey’okuhumbuuka.” Flora atalengeho kuhambiriza omukazi ogu kwikiriza enyegesa egi aho naaho. Nagamba ati: “Nkatekereza ngu omukazi onu atakaikirize enyegesa ey’okuhumbuuka asemeriire kubanza kumanya Ruhanga ayatuhaire omurago ogw’okuhumbuuka.” Kuruga obu, Flora akatandika kwikara n’abazaaho emiringo ya Yahwe nk’okugonza, amagezi, n’amaani obu babaga nibeega. Hanyuma y’akasumi omwegi we akatandika kwikiririza omu kuhumbuuka. Kandi hati muheereza wa Yahwe omwekambi.

15. Kusigikirra ha Engeso Ezabakwenda 17:16-18, ngeso ki embi omu Buyonaani eyakara ezabiihize Paulo, baitu habwaki y’agumizeemu n’atebeza abantu Basene?

¹⁵ Soma Engeso Ezabakwenda 17:16-18. Nobukiraaba ngu Abantu Basene bakajuma Paulo kumumaramu amaani kandi orubuga rwabo rukaba rwijwiremu ebisisani, ebikorwa by’obusihani, n’enyegesa ez’ekifirosofa ez’ekikafiiri, ataleke okubatebeza. Paulo akafooka Mukristaayo nobwaraaba akaba ali ‘mujumi, muhiganizi, kandi mwekuniki.’ (1 Tim. 1:13) Nk’oku Yesu yarozere ngu Paulo nasobora kufooka omwegeswa, Paulo nauwe akarora abantu Abasene ngu nibasobora kufooka abegeswa. Kandi nukwo kyabaire.​—Eng. 9:13-15; 17:34.

16-17. Kiki ekirukwoleka ngu abantu aba buli mulingo nibasobora kufooka begeswa ba Kristo? Bazaaho ekyokurorraho.

¹⁶ Omu kyasa ky’okubanza, abantu kuruga omu nyikara ezirukwahukana bakafooka abegeswa ba Yesu. Paulo obuyandiikire Abakristaayo abaali nibaikara omu rubuga rwa Buyonaani orukwetwa Kolinso, akagamba ngu abamu omu kitebe bakaba bali bacwi b’ebiragiro rundi abasiihani. Akongera yagamba ati: “Kandi abamu omulinywe nukwo mwasisaine muti: baitu mukoga, baitu mukezebwa.” (1 Kol. 6:9-11) Naiwe abantu abo w’akubarozere nk’abarahinduka bakafooka begeswa?

¹⁷ Kasumi kanu, baingi nibaikiriza kukora empindahinduka nukwo bafooke abegeswa ba Yesu. Ekyokurorraho, payoniya ow’embaganiza omu Australia arukwetwa Yukina, akakyetegereza ngu abantu aba buli mulingo nibasobora kwega amananu. Yukina nagamba ati: “Kiro kimu obunkaba ngenzere omu ofiisi emu, nkarora omwisiki ow’akaba ayetiire tatu nyingi ha  mubiri gwe kandi ajwaire engoye ezimukizire. Nkabanza natiina kubaza nauwe, baitu obunabalize nauwe nkakyetegereza ngu akaba nagonza muno Baibuli kandi tatu ezimu zaali nkarra kuruga omu kitabu kya Zabuli!” Omwisiki onu akatandika kwega Baibuli hamu n’okwija omu nsorrokano. *

18. Habwaki tutasemeriire kucwera abantu omusango?

¹⁸ Tugambe ngu Yesu obuyagambire ngu emisiri eyezere, akaba nanihira ngu abantu baingi bakaba nibagenda kumukuratira? Nangwa. Ebyahandiikirwe bikaba byolekere ngu bake muno abakumwikiririzeemu. (Yoh. 12:37, 38) Kandi Yesu akaba aine obusobozi obw’okumanya ekiri omu mitima y’abantu. (Mat. 9:4) Baitu akateeka mutima hali abo abake abakumwikiririzeemu kandi akekamba kutebeza abantu aba buli mulingo. Titusobora kumanya ebiri ha mitima y’abantu nahabweki titusemeriire kucwera abantu omusango rundi ebicweka ebitutebezamu! Baitu tubarole nk’abo abasobora kufooka abegeswa. Omu misani arukwetwa Marc arukuhereza omu Burkina Faso, akagamba ati: “Abantu abantekereza ngu nabaija kukurakurana nubo bakira kuleka kwega. Baitu abo abantekereza ngu tibarukwija kukurakurana nubo bahika bakurakurana kurungi. Nahabweki nk’akyetegereza ngu kirungi kwikiriza omwoyo gwa Yahwe nugwo gutwebembere.”

19. Abantu ab’omu kiikaro ekitutebezaamu tusemeriire kubarora tuta?

¹⁹ Ha kubanza nikisobora kuzooka ngu omu kiikaro ekiturukugenda kutebezaamu busamu bantu abali nk’omusiri oguhikire kugeswa. Baitu ijuka Yesu ekiyagambiire abegeswa be. Emisiri eyezere ekirukumanyisa ngu ehikire kugeswa. Abantu nibasobora kuhinduka bafooke begeswa ba Yesu. Yahwe arora abantu banu abasobora kufooka abegeswa ‘nk’ebintu ebirikwendwa.’ (Hag. 2:7) Kakuba turora abantu omu mulingo Yahwe na Yesu babaroramu, nikiija kutukonyera kumanya ebirukukwata ha nyikara zabu n’ebintu ebibakira kugonza. Kandi nitwija kubarora nk’abantu abarafooka ab’oruganda n’abanyaanya itwe.