Yesu obw’akaba ali haihi kufa, habwaki yajuliize ebigambo bya Daudi ebirukusangwa omu Zabuli 22:1?

Bimu ha bigambo Yesu yabalize atakafiire nibyo ebirukusangwa omu Matayo 27:46 ebirukugamba ngu: “Ruhanga wange, Ruhanga wange, kikyekikunsigisize?” Yesu obuyabalize ebigambo binu, akaba nahikiriza ebigambo by’omuhandiiki wa Zabuli Daudi ebirukusangwa omu Zabuli 22:1. (Mar. 15:34) Tikihikire kugamba ngu Yesu akajuliza ebigambo binu ngu habwokuba akaba abihiriirwe Yahwe, rundi ngu okwikiriza kwe kukaba kucekere habw’akacu kake. Yesu akaba amanyire kurungi ensonga habwaki kikaba nikimwetaagisa kufa, kandi akaba ayetegekere kufa. (Mat. 16:21; 20:28) Akaba akimanyire kurungi ngu omu kasumi k’okufa kwe, Yahwe akaba naija kumwihaho “orugo,” kandi n’aleka kumulinda. (Yob 1:10) Nahabweki, Yahwe akaleka kulinda Yesu, nukwo Yesu asobole kukyoleka ngu n’asobora kwikara ali mwesigwa kuhika ha kufa n’obuyakubonabonesebwa kuhika ha rulengo ki.​—Mar. 14:35, 36.

Hati habwaki Yesu yabalize ebigambo ebiri omu zabuli enu? N’obukiraaba ngu titumanyire kurungi ensonga habwaki, leka tubazeeho ensonga ezimu ezisobora kuba zamuletiire kubaza ebigambo ebi. *

Yesu obuyabalize ebigambo binu, n’asobora kuba akaba n’ayoleka ngu Ise tarukwija kumutanga kufa. Yesu akaba n’ayetagisibwa  kusasura ekicunguro ataine bukonyezi bwa Yahwe. Akaba ali muntu kandi akaba aine kufa nukwo “aroze ha kufa habwabantu bona.”​—Baheb. 2:9.

Yesu obuyajuliize ebigambo ebimu omu Zabulli egi, nikisobora kuba ngu akaba n’agonza abandi batekerezeeho Zabuli egi yoona. Omu busumi bw’Abayudaaya, kikaba kiri kintu kya buli kiro abantu kukwata zabuli nyingi omu mitwe yabo. Obubahurraga orukarra rumu, kyabaleteraga kwijuka zabuli yoona. Kinu obukiraaba ngu nikyo Yesu akaba n’amanyisa, yakukonyire abahondezi be Abayudaaya kwijuka obunabbi bwingi obuli omu zabuli enu oburukukwata ha kufa kwe. (Zab. 22:7, 8, 15, 16, 18, 24) Ekindi, enkarra ez’okumalirra eza zabuli enu nizikugiza Yahwe, kandi nizimubazaaho nk’Omukama w’ebintu byona.​—Zab. 22:27-31.

Yesu obuyabalize ebigambo binu n’asobora kuba akaba n’ayoleka ngu taine musango gwona ogw’akozere. Yesu obwakaba atakaisirwe, orukurato rukaikarra kandi rwamucwera omusango ngu akaba ajumire Ruhanga. (Mat. 26:65, 66) Ab’orukurato bakesorooza hamu omu itumbi kandi bamucwera omusango bwangubwangu batahondiire biragiro. (Mat. 26:59; Mar. 14:56-59) Yesu obuyabalize ebigambo binu omu mulingo gw’okukaguza, n’asobora kuba akaba namanyisa ngu akaba ataine kibi kyona eky’akozere, kandi ngu akaba atasemeriire kwitwa.

Ekindi Yesu n’asobora kuba akaba naijukya abandi nk’oku Daudi ayahandiikire zabuli enu nauwe akabonabona kandi eki kikaba kitarukumanyisa ngu Yahwe takyamusiima. Ekikaguzo Daudi ekiyakagwize kikaba kitarukumanyisa ngu taine kwikiriza. Hanyuma y’okukaguza ekikaguzo kinu, akooleka ngu n’ayesiga Yahwe, kandi ngu naija kugumizaamu n’amuha emigisa. (Zab. 22:23, 24, 27) Nikyo kimu na Yesu, “Omwana wa Daudi,” obuyabonabonesiibwe ha muti, kikaba kitarukumanyisa ngu Yahwe takyamusiima.​—Mat. 21:9.

Yesu n’asobora kuba akaba n’ayoleka okuganya kw’amaani habwokuba Yahwe akaba amwihireho obulinzi bwe nukwo ayolekere kimu ngu mwesigwa. Kurugira kimu ha kubanza, kikaba kitali kigendererwa kya Yahwe ngu Omwana we abonabone kandi afe. Eki kiketaagisa hanyuma ya Adamu na Hawa kujeema. Yesu akaba ataine kibi eky’akozere, baitu kikaba nikimwetaagisa kubonabona hamu n’okufa nukwo asobole kugonjoora ensonga Sitaani ez’akaba alesere n’okuhayo ekicunguro ekikaba nikyetagisa kugura ekintu abantu baali baferiirwe. (Mar 8:31; 1 Pet. 2:21-24) Kinu kikaba nikisobora kuhikirizibwa Yahwe obuyakwihireho Yesu obulinzi habw’akacu kake kandi habw’omurundi ogw’okubanza omu bwomeezi bwe.

Yesu akaba n’alengaho kukonyera abahondezi be kuteeka omutima ha nsonga habwaki Yahwe yaikiriize afe omu mulingo gunu. * Yesu akaba akimanyire ngu kufeera ha muti nk’omucwi w’ebiragiro kikaba nikiija kutabaijura baingi. (1 Kol. 1:23) Abahondezi be obubakutaire omutima ha nsonga yonyini habwaki yafiire, baakweteegeriize amakuru g’okufa kwe. (Bag. 3:13, 14) Hanyuma baakumurozere nk’omujuni wabo hatali nk’omucwi w’ebiragiro.

Ensonga yoona ey’esobora kuba yaletiire Yesu kujuliza ebigambo binu, akaba akimanyire ngu kufeera ha muti, akaba n’ahikiiriza ekigendererwa kya Ruhanga. Hanyuma y’okujuliza zabuli enu, Yesu akagamba ati: “Kihoire!” (Yoh. 19:30; Luk. 22:37) Habwokuba Yahwe akaihaho Yesu obulinzi habw’akacu kake, kinu kikaletera Yesu kuhikiriza buli kimu eky’akaba asindikirwe kukora omu nsi. Kikamuletera n’okuhikiiriza ebintu byona ebikaba bimuhandiikirweho “omu biragiro bya Musa, nomu banabi, nomu Zabuli.”​—Luk. 24:44.