1-2. Nikisoboka kita kuhondera ebigere bya Yesu? Bazaaho ekyokurorraho.

TERAMU akasisani oli omu guruupu ey’abantu abarukuraba omu kiikaro ekirumu bbomu eziziikirwe omwitaka. Omuntu ow’aine obukugu n’abebembera kubooleka omuhanda. Obwaba narubata, ebigere bye bisigara nibirorwa ha itaka nambere arabire. Akaire kahika oleka kumurora. Baitu torukwetaaga kweralikirra. Oihireho iwe, n’abantu ab’orukurubata nabo muhondera ebigere bye kurungi nk’oku murukusobora!

² Nk’Abakristaayo ab’amananu, nituraba omu nsi enu embi erukusisana n’ekicweka ekirumu bbomu ez’omu itaka. Ekirungi, Yahwe atuhaire omuntu arukukirayo obukugu kutwoleka omuhanda kandi ogu nuwe Omwana we Yesu Kristo. Kandi nitusobora kuhondera ebigere bye kurungi. (1 Pet. 2:21) Kusigikirra ha kitabu kimu ekirukusoborra Baibuli, Petero alengesaniza Yesu n’omuntu arukwoleka omuhanda. Nk’oku omuntu arukwebembera abandi kubooleka omuhanda asiga ebigere bye nambere arabire, Yesu akatusigira ebigere ebitusemeriire kuhondera. Leka tubazeeho ebikaguzo bisatu ebirukukwata ha kuhondera ebigere bye. Nikimanyisa ki kuhondera ebigere bya Yesu? Habwaki tusemeriire kubihondera? Kandi eki nitusobora kukikora tuta?

3. Nikimanyisa ki kuhondera ebigere by’omuntu?

³ Nikimanyisa ki kuhondera ebigere by’omuntu? Omu Baibuli, ebigambo “kurubata” hamu ‘n’ebigere’ obwire obumu bikozesebwa kumanyisa omulingo omuntu atwazaamu obwomeezi bwe. (Kub. 6:9, NW; Nfu. 4:26) Ekyokurorraho ky’omuntu nikisobora kulengesanizibwa n’ebigere ebyasiga ha itaka obw’aba n’arubata. Nahabweki kuhondera ebigere by’omuntu nikimanyisa kuhondera ekyokurorraho kye n’okumwegeraho.

4. Nikimanyisa ki kuhondera ebigere bya Yesu?

 ⁴ Hati nikimanyisa ki kuhondera ebigere bya Yesu? Omu bugufu, nikimanyisa kwegera ha kyokurorraho kye. Omu kyahandiikirwe ekyebembiire ekicweka kinu, omukwenda Petero n’abazaaho ekyokurorraho ekirungi Yesu Kristo ekiyatuteriireho kurabira omu kugumiisiriza okubonabonesebwa. Baitu haroho ebintu ebindi bingi Yesu ebiyakozere ebitusobora kumwegeraho. (1 Pet. 2:18-25) Amananu gali, omu bwomeezi bwe bwona, Yesu, akatuteraho ekyokurorraho ekirungi omu biyabalize n’ebiyakozere.

5. Nikisoboka abantu abatahikiriire kuhondera ekyokurorraho kya Yesu ow’akaba ahikiriire? Soborra.

⁵ Nk’abantu abatahikiriire, mali nitusobora kuhondera ekyokurorraho kya Yesu? Ego nitusobora. Titurukusobora kuhondera ebigere bya Yesu kikumi ha kikumi. Baitu kakuba tuhondera ebigere bye n’obwegendereza, ekirukumanyisa kukora kyona ekiturukusobora nk’abantu abatahikiriire, nitwija kuba nituhondera ebigambo eby’omukwenda Yohana ebirukugamba ngu: ‘Kituhikiriire okugendaga [nka Yesu] okuyagendaga.’​—1 Yoh. 2:6.

6-7. Habwaki kukuratira ebigere bya Yesu kituletera kweyongera kwirra haihi na Yahwe?

⁶ Kukuratira ebigere bya Yesu nikiija kutukonyera kwirra haihi na Yahwe. Habwaki nitugamba tuti? Eky’okubanza, Yesu akatuteraho ekyokurorraho ekirungi ekirukwoleka omulingo tusobora kusemeza Ruhanga omu bwomeezi bwaitu. (Yoh. 8:29) Nahabweki, kukuratira ebigere bya Yesu nitwija kisemeza Yahwe. Kandi nitukigumya ngu Isiitwe ow’omu iguru naija kwirra haihi, abo boona abalengaho muno kufooka banywani be.​—Yak. 4:8.

⁷ Ekyakabiri, Yesu akegera hali Ise kikumi ha kikumi. Egi niyo ensonga habwaki akaba n’asobora kugamba ati: “Anyakundozire nyowe, buli arozire Isenyowe.” (Yoh. 14:9) Nitusobora  kwegera ha miringo ya Yesu, hamu n’omulingo yatwaizeemu abandi. Ekyokurorraho, akakwatirwa embabazi omugenge, akasalirirwa omukazi ow’akaba aine oburwaire obw’amaani, kandi akaganyira abo abakaba baferiirwe abantu baabo. Obutwegera hali Yesu, tuba nitwegera hali Yahwe. (Mar. 1:40, 41; 5:25-34; Yoh. 11:33-35) Obutweyongera kwegera hali Yahwe, tweyongera kumwirra haihi.

8. Habwaki kukuratira ebigere bya Yesu nikiija kutukonyera ‘kusingura’? soborra.

⁸ Kukuratira ebigere bya Yesu, kitukonyera kutahugurwa ensi enu embi. Omu itumbi ery’okumalirra Yesu atakafiire, akagamba ati: “Nyowe nsinguire ensi.” (Yoh. 16:33) Akaba namanyisa ngu ataikirize kuhabisibwa entekereza, ebigendererwa, hamu n’ebikorwa eby’ensi enu. Yesu ateebwe ensonga habwaki akaba atumirwe omu nsi​—ey’okweza ibara lya Yahwe. Kinu nikitukwataho kita? Omu nsi, harumu ebintu bingi muno ebisobora kutuhugura. Baitu kusisanaho na Yesu, kakuba naitwe omutima twikara tugutaire ha kukora Yahwe eby’agonza, nitwija ‘kusingura’ ensi.​—1 Yoh. 5:5.

9. Bintu ki ebitusemeriire kukora kwikara omu muhanda ogw’obwomeezi obutahwaho?

⁹ Kukuratira ebigere bya Yesu nikihikya omu bwomeezi obutahwaho. Omusaija omuto ow’akaba ali muguuda, obuyakagwize eky’asemeriire kukora kutunga obwomeezi obutahwaho, Yesu akamugarukamu ati: “Oije, onkuratire.” (Mat. 19:16-21) Yesu akagambira Abayudaaya abamu abaali batarukwikiriza ngu nuwe Kristo ati: “Entama zange . . . zinkuratira. Kandi nziha obwomezi obutahwaho.” (Yoh. 10:24-29) Yesu akagambira Nikodemo, omu hali abo abaikarraga omu rukurato ow’akaba nagonza kumanya bingi ha nyegesa ze ngu abo “abamwikiriza” bakutungire “obwomezi obutahwaho.” (Yoh. 3:16) Twoleka ngu nitwikiririza omuli Yesu, obutukuteeka omu nkora ebiyayegeseze hamu n’okwegera ha bikorwa bye. Obuturakora ebi, nitwija kwikara omu muhanda ogw’obwomeezi obutahwaho.​—Mat. 7:14.

10. Kiki ekitusemeriire kukora kusobora “okumanya” Yesu kurungi? (Yohana 17:3)

¹⁰ Tutakatandikire kukuratira ebigere bya Yesu, tusemeriire kubanza kumumanya. (Soma Yohana 17:3.) “Okumanya” Yesu, kintu ekitusemeriire kwikara nitukora. Tusemeriire kwikara nitweyongera kumumanya kurabira omu kwegaho emiringo ye, entekereza ye, hamu n’endengo eziyahonderaga. Obwire obutumazire omu mananu tikiri kikuru, itwena tusemeriire kugumizaamu nitwekamba “okumanya” Yahwe hamu n’Omwana we.

11. Ebitabu bbina eby’Enjiri birumu ki?

¹¹ Habw’okugonza kutukonyera kumanya Omwana we, Yahwe, akateeka ebitabu bbina eby’Enjiri omu Baibuli. Ebitabu binu, birumu ebyafaayo ebirukukwata ha bwomeezi hamu n’obuheereza bwa Yesu. Nibitugambira Yesu  ebiyabalize, ebiyakozere, hamu n’omulingo yayehurramuga. Ebitabu binu bbina nibitukonyera ‘kutekerezaaho’ ekyokurorraho kya Yesu. (Baheb. 12:3) Nitusobora kugamba ngu, birumu ebigere Yesu ebiyasigire. Nahabweki, obuturayesomesa ebitabu eby’Enjiri, nitwija kweyongera kumanya Yesu kurungi. Ekirarugamu, nitwija kusobora kuhondera ebigere bye kurungi.

12. Nitusobora kukora ki kugasirwa omu ebitabu eby’Enjiri?

¹² Kusobora kugasirwa muno omu bitabu eby’Enjiri, titusemeriire kugarukira ha kubisoma kwonka. Tusemeriire kutunga obwire obw’okubyetegereza kurungi kandi n’okubyecumiitirizaaho. (Lengesaniza na Yosuha 1:8) Leka tubazeeho ebintu bibiri ebisobora kutukonyera kwecumiitirizaaho ebintu ebiri omu bitabu eby’Enjiri kandi n’omulingo tusobora kuteeka omu nkora ebitusomere.

13. N’osobora ota kwetegereza kurungi ebintu ebyorukusoma omu bitabu eby’Enjiri?

¹³ Eky’okubanza, obworaaba n’osoma ebitabu by’Enjiri lengaho kwetegereza kurungi ekirukubazibwaho. Teramu akasisani orole, kandi ohurre ekirukugenda omu maiso. Kukukonyera kukora eki, kora okuseruliiriza n’okozesa ebitabu ebituhairwe ekitebe kya Yahwe. Wetegereze enkarra ezetoroire ekintu ekyorukwesomesaaho. Seruliirizaaho abantu hamu n’ebiikaro ebyorukusomaho. Lengesaniza ebyorukusomaho n’ebyo ebiri omu kitabu ekindi eky’Enjiri ekirukubazaaho ensonga niyo emu. Obwire obumu omuhandiiki omu ow’Enjiri abazaaho ekintu omuhandiiki ondi ekyatarabalizeeho.

14-15. Kiki ekitusemeriire kukora kusobora kuteeka omu nkora ebiturukwega kuruga omu bitabu eby’Enjiri?

¹⁴ Ekyakabiri, teeka omu nkora ebyogere omu bitabu by’Enjiri. (Yohana 13:17) Hanyuma y’okwetegereza kurungi ekintu eky’oyegere omu kitabu eky’Enjiri, wekaguze: ‘Haroho isomo lyona erinyegere omu kyahandiikirwe kinu erinsobora kuteeka omu nkora omu bwomeezi bwange? Ninsobora nta kukozesa ebinsomere kukonyera omuntu ondi?’ Lengaho kutekerezaaho omuntu ow’omanyire, kandi hanyuma  omu mulingo ogw’okugonza kandi ogw’amagezi mugambire eby’oyegere.

¹⁵ Leka tukozese ekyokurorraho kurora omulingo tusobora kuteeka omu nkora amagezi ganu. Nitwija kubazaaho ekyokurorraho eky’omufaakati ow’amaseege Yesu ouyarozere omu yekaru.

16. Soborra ekyabaireho omu Marako 12:41.

¹⁶ Lengaho kwetegereza kurungi ekirukubazibwaho. (Soma Marako 12:41.) Teramu akasisani orole ekirukugenda omu maiso. Ebiro by’okwezi biri 11 Nisani, 33 C.E.​—kandi nihaburayo ebiro bike Yesu aitwe. Yesu amazire haihi ekiro kyona n’ayegesa omu yekaru. Baitu abebembezi b’ediini baikaire nibamuhakaniza. Enyumaho, abamu bamukagwize nambere arukwiha obusobozi. Abandi balengereho kumukaguza ebikaguzo ebibarukutekereza ngu tasobora kugarukamu. (Mar. 11:27-33; 12:13-34) Hati, Yesu agenda omu kicweka kindi ekya yekaru. Habwokuba n’asobora kuba ali omu kiikaro ekirukwetwa Kooti ey’Abakazi nasobora kurora obusanduuko obw’eryahurro obutairwe ha kisiika. Aikarra hansi kandi atandika kwetegereza abantu abarukuteeka sente omu busanduuko obw’eryahurro. Arora abaguuda baingi nibanagamu ebinusu bingi. Obundi ali haihi n’akasanduuko kandi n’ahurra etoko ey’ebinusu ebirukugwa omu lyahurro.

17. Omufaakati ow’amaseege arukubazibwaho omu Marako 12:42 akakoraki?

¹⁷ Soma Marako 12:42. Hanyuma y’akaire kake, Yesu ayetegereza omukazi omu. Mukazi ‘Mufakati . . . owamasege.’ (Luk. 21:2) Obwomeezi bwe bugumire; kandi nikizooka ngu nikimugumira n’okutunga ebyetaago bye. Baitu, agenda ha kamu ha busanduuko bw’elyahurro kandi omu mulingo ogw’amagezi atekamu obunusu bubiri, obundi obunusu bunu tibuhulirwa n’akake obububa nibugwa omu kasanduuko. Yesu amanyire omukazi onu eky’ataire omu lyahurro. Anagiremu obunusu bubiri obwa leputa, obunusu oburukukirayo omuhendo muke omu kasumi ako. Sente zinu zaali zitarukumara n’okugura ekisirya kimu, kandi obu ebisirya nibyo byali nibikirayo omuhendo muke omu binyonyi ebibaalyaga.

18. Kusigikirra ha Marako 12:43, 44, kiki Yesu ekiyabalize ha sente omufaakati ezi y’ahaireyo?

¹⁸ Soma Marako 12:43, 44. Yesu akakwatwaho muno habw’omufaakati onu. Nahabweki akeeta abegeswa be, yabooleka omufaakati, kandi y’abagambira ati: “Omufakati onu owamasege anagiremu bingi okukira bona.” Hanyuma akabasoborra ati: “Bona [kukira muno abaguuda] banagiremu ebibasagiriire, baitu ogu omu masegege anagiremu byona ebyanyinabyo, niryo itungolye lyona.” Omufaakati onu omwesigwa obuyahaireyo akasente ke akaakaba asigaize kiro eki, akaba nayesiga ngu Yahwe naija kumurolerra.​—Zab. 26:3.

19. Isomo ki erikuru eriturukwegera ha mufaakati ow’amasege?

¹⁹ Teka omu nkora ekyokurorraho kinu omu bwomeezi bwawe. Wekaguze, ‘Isomo ki erinsobora kwegera ha bigambo bya Yesu ebirukukwata ha mufaakati ow’amaseege?’ Tekerezaaho omufaakati ogu. Hataroho kugurukyagurukya omufaakati onu, n’asobora kuba akaba nagonza kuhayo hali Yahwe bingi kukiraho. Baitu, akakora eky’arukusobora, kandi yaha Yahwe ekirukukirayo oburungi. Kandi Yesu akaba akimanyire ngu ebiyahaireyo by’omuhendo omu maiso ga Ise. Linu niryo isomo erikuru eriturukwega: Yahwe asemererwa muno obutumuha ekirukukirayo oburungi. Kinu tukikora obutumuheereza n’omutima gwaitu gwona hamu n’obwomeezi bwaitu bwona. (Mat. 22:37; Bak. 3:23) Yahwe asemererwa obw’arora nitukora kyona ekiturukusobora! Omusingi gunu nigukwataho obwire hamu n’amaani ebitukozesa omu kuramya, ekyokurorraho  kutebeza hamu n’okugenda omu nsorrokano.

20. N’osobora ota kuteeka omu nkora isomo ery’oyegere ha mufaakati? Bazaaho ekyokurorraho.

²⁰ N’osobora ota kuteeka omu nkora isomo ery’oyegere omu kyokurorraho eky’omufaakati? Lengaho kutekerezaaho abantu abasobora kugarukwamu amaani kakuba obaijukya ngu Yahwe asemererwa obw’arora nibamuheereza kyona ekibarukusobora. Ekyokurorraho, haroho munyaanya itwe anyakukaikwire ow’omanyire ow’asobora kuba nayehurra ngu taine mugaso habwokuba takyasobora kutebeza nk’oku yatebezaaga kara habw’oburwaire rundi habw’obuceke? Rundi n’osobora kutekerezaaho ow’oruganda ow’aine oburwaire obutarukukira, obumuletera kusaasa muno kandi obumuletera kuhwamu amaani habwokuba tasobora kugenda omu buli rusorrokano ha Kyombeko ky’Obukama? Konyera abantu nk’abo obu n’obagambira ebigambo ebirukwombeka. (Bef. 4:29) Baganaho nabo isomo eritwegere kuruga omu kyokurorraho eky’omufaakati ow’amaseege. Ebigambo byawe ebirukugarramu amaani nibisobora kubaijukya ngu Yahwe asiima obutumuha ekiturukusobora. (Nfu. 15:23; 1 Bas. 5:11) Obutusiima abandi habwokuha Yahwe ekirukukirayo oburungi n’obukiraaba ngu nikisobora kuzooka nk’ekitaito, tuba nitukuratira kurungi ebigere bya Yesu.

21. Kiki eky’ocwiremu kukora?

²¹ Ka nitusiima muno habw’ebyahandiikirwe eby’Enjiri ebirukutugambira bingi ha bwomeezi bwa Yesu, ekitusobozesa kurubatira omu bigere bye kurabira omu kumwegeraho! Habwaki omu kwesomesa kwawe rundi omu kuramya kwanyu okw’eka mutegaho ebitabu eby’Enjiri? Twijuke ngu kusobora kugasirwa omu kwesomesa nk’oku, ebyahandiikirwe tusemeriire kubyetegereza kurungi, kandi turole n’omulingo tusobora kubiteeka omu nkora omu bwomeezi bwaitu. Oihireho kwegera ha bintu Yesu yakozere, nitwetaaga n’okuhuliriiza ebiyagambire. Omu kicweka ekirukuhonderaho, nitwija kubazaaho kiki ekitusobora kwegera omu bigambo bya Yesu eby’okumalirra obw’akaba atakafiire.