1. Bintu ki Yahwe eby’arora omu bantu be?

YAHWE RUHANGA “nasemere’rwa abantube.” (Zab. 149:4) Mali kinu kanikitusemeza muno! Yahwe arora emiringo yaitu emirungi; arora ngu nitusobora kufooka bantu barungi kandi atukonyera kufooka banywani be. Kakuba twikara tuli besigwa hali uwe, naija kwikara haihi naitwe ebiro n’ebiro!​—Yoh. 6:44.

2. Habwaki abamu kibagumira kwikiriza ngu Yahwe n’abagonza?

² Abamu nibasobora kugamba ngu, ‘Nkimanyire ngu Yahwe agonza abantu be nk’ekitebe, baitu ninsobora nta kukigumya ngu nanyowe angonza nk’omuntu?’ Kiki ekisobora kuletera omuntu kwekaguza ekikaguzo nk’eki? Oksana, * akabonabona muno obwakaba akyali muto, kandi n’agamba ati: “Obunabatiziibwe nkasemererwa muno kandi natandika kuheereza nka payoniya. Baitu hanyuma y’emyaka 15, nkatandika kwijuka ebintu ebibi muno ebyambaireho obunkaba nkyali muto. Nkatandika kuteekereza ngu tinkyasiimwa omu maiso ga Yahwe kandi ngu takyangonza.” Munyaaya itwe arukwetwa Yua, arukuheereza nka payoniya kandi nauwe ayarabire omu bizibu bingi obwakaba akyali muto, n’agamba ati: “Nkehayo hali Yahwe habwokuba nkaba ningonza kumusemeza. Baitu nkaba ninkigumiza kimu ngu talingonza.”

3. Omu kicweka kinu nitwija kubazaaho ki?

³ Kusisanaho na banyaanya itwe babiri abatubalizeeho, naiwe n’osobora kuba n’ogonza muno Yahwe baitu n’ogurukyagurukya obwaraaba n’akugonza. Habwaki osemeriire kukigumya ngu mali n’akufaaho muno? Kandi kiki ekisobora kukukonyera  kakuba oba n’otekereza ngu Yahwe tarukukugonza? Leka tubazeeho eby’okugarukamu by’ebikaguzo binu.

4. Habwaki ky’akabi kugurukyagurukya ngu Yahwe n’atugonza?

⁴ Okugonza kwine amaani maingi muno. Obuturakigumya ngu Yahwe n’atugonza, nitwija kugonza kumuheereza n’omutima gwaitu gwona n’obuturaaba twine ebizibu. Baitu obuturaaba nitugurukyagurukya ngu Yahwe n’atugonza, nitwija kuhwamu amaani. (Nfu. 24:10) Kandi obuturatandika kutekereza ngu Ruhanga tarukutugonza, nikiija kutugumira kwikara tuli besigwa Sitaani obwaratutahirra.​—Bef. 6:16.

5. Kiki ekyahikire hali ab’oruganda na banyaanya itwe abaatekerezaaga ngu Ruhanga tarukubagonza?

⁵ Kasumi kanu, bamu h’Abakristaayo bagenzi baitu, okwikiriza kwabo kucekere habw’okugurukyagurukya ngu Yahwe n’abagonza kandi n’abafaaho. Omugurusi ow’arukwetwa James n’agamba ati: “N’obukiraaba ngu nkaba nimpereza ha Beseeri kandi ninyegondeza omu kutebeza n’ekitebe ekirukubaza orulimi orundi, nkaba ntarukukigumya ngu ebinkaba ninkora nibisemeza Yahwe. Obwire obumu nkatandika n’okwekaguza Yahwe obwaraaba n’ahurra esaara zange.” Eva, anyakuli omu buheereza obw’akasumi koona na uwe n’agamba ati: “Nkega nk’oku kyakabi muno kutekereza ngu Yahwe tarukutugonza habwokuba entekereza egi n’ekwataho buli kimu kyona ekyorukuba n’okora kumuheereza. Kinu kikuletera kuleka kugonza kukora ebintu ebirukusemeza Ruhanga kandi kikumaraho okusemererwa.” Michael, ow’arukuheereza nka payoniya kandi omugurusi omu kitebe n’agamba ati: “Kakuba otekereza ngu Ruhanga tarukukufaaho, noija kuhuguka n’omurugaho.”

6. Kiki ekitusemeriire kukora kakuba tutandika kutekereza ngu Ruhanga tarukutugonza?

⁶ Ebyokurorraho binu nibyoleka akabi akaruga omu kutekereza ngu Yahwe tarukutugonza. Baitu kiki ekitusemeriire kukora kakuba tutandika kutekereza ngu Yahwe tarukutugonza? Aho naaho tusemeriire kweihamu entekereza ya mulingo ogu! Tusabe Yahwe atukonyere kugyeyihamu kandi omu kiikaro kyayo tagarremu ‘obusinge bwa Ruhanga oburalinda emitima yaitu n’ebitekerezo byaitu.’ (Baf. 4:6, 7) Kandi oijuke ngu toli wenka. Ab’oruganda na  banyaanya itwe abandi kandi abesigwa nabo nibarwanisa enyehurra ezitahikire. Abaheereza ba Yahwe aba kara nabo bakaba baine kurwanisa enyehurra ezitahikire. Wetegereze ekitusobora kwegera hali omukwenda Paulo.

7. Paulo akaba aine bizibu ki?

⁷ Obwire obumu oyehurra ngu oine obujunanizibwa bwingi kandi nikikugumira kuhikiriza buli kimu? Obukiraaba nukwo kiri, n’osobora kwetegereza enyikara ya Paulo. Akaba ayetuntwire hatali habw’ekitebe kimu kyonka, baitu “habwebitebe byona.” (2 Kol. 11:23-28) Oine oburwaire obutarukukira oburukukumaraho okusemererwa? Paulo akaba aine ekizibu ekyamuletiire kubonabona muno. Kandi nibusobora kuba bwali buli burwaire kandi akaba n’agonza bumurugeho. (2 Kol. 12:7-10) Haroho obw’ohurra ohoirwemu amaani habw’obutahikirra bwawe? Haroho na Paulo obuyayehurraga ati. Akagamba ngu akaba ali “muntu wobujune” habwokuba yaikaraga n’arwana kukora ekihikire.​—Bar. 7:21-24.

8. Kiki ekyakonyire Paulo kugumira ebizibu bye?

⁸ N’obukiraaba ngu Paulo akaba aine kugumira ebizibu binu byona, akaikara n’aheereza Yahwe. Kiki ekyamukonyire kubigumira? N’obukiraaba ngu akaba amanyire kurungi obutahikirra bwe, akaba aine okwikiriza okugumire omu kicunguro. Ekindi akaba amanyire kurungi omurago gwa Yesu ogurukugamba ngu ‘omuntu wena anyakumwikiriza [Yesu] . . . atunge obwomezi obutahwaho.’ (Yoh. 3:16; Bar. 6:23) Paulo akaba ali omu h’abantu abaikiririzaaga omu kicunguro. Akaba n’akigumiza kimu ngu Yahwe agonza muno kuganyira naabo boona abakozere ebibi by’amaani kakuba begarukamu.​—Zab. 86:5.

9. Isomo ki eriturukwegera ha bigambo bya Paulo ebirukusangwa omu Abagaratiya 2:20?

⁹ Paulo akaba naikiriza ngu Ruhanga n’amugonza muno habwokuba akasindika Yasu kumufeera. (Soma Abagaratiya 2:20) Wetegereze ebigambo ebirukugarramu amaani ha kumalirra kw’orukarra oru. Paulo akagamba ati: ‘Omwana wa Ruhanga, ayangondeze, ayayehaireyo wenka habwange.’ Paulo atatekereze ngu akaba ali muntu mubi muno kuhika ha rulengo ngu Ruhanga tarukumugonza. Atagambe ngu, ‘Nindora ensonga habwaki Yahwe n’asobora kuba n’agonza ab’oruganda abandi baitu nyowe atarukungonza.’ Paulo akaijukya Abarooma n’agamba ati: ‘Obutukaba tukyali abasiisi, Kristo akatufeera.’ (Bar. 5:8) Okugonza kwa Ruhanga tikwine bugarukiro!

10. Kiki ekiturukwega kuruga omu Abarumi 8:38, 39?

 ¹⁰ Soma Abarumi 8:38, 39. Paulo akaba nakigumiza kimu ngu okugonza kwa Ruhanga kwine amaani. Akahandiika n’agamba ngu busaho kintu kyona ‘ekirisobora okubaganiza itwe omu kugonza kwa Ruhanga.’ Paulo akaba n’amanya omulingo Yahwe yagumiisirizeemu ihanga lya Isaleri. Ekindi akaba amanyire omulingo Yahwe yamwolekeremu embabazi. Paulo akaba namanyisa ngu ‘Nk’oku Yahwe yasindikire Omwana we kunfeera, tinsemeriire kugurukyagurukya okugonza okwanyiniire.’​—Bar. 8:32.

11. N’obukiraaba ngu Paulo akakora ensobi z’amaani nk’ezirukubazibwaho omu 1 Timoseo 1:12-15, habwaki akaba nakigumya ngu Ruhanga n’amugonza?

¹¹ Soma 1 Timoseo 1:12-15. Paulo n’asobora kuba yayehuliire kubi obuyatekerizeeho ebintu ebibi ebiyakozere obwakaba atakafookere Omukristaayo. Tikirukutuhuniiriza ngu akebazaaho nk’omusiisi “owokubanza”! Paulo obwakaba atakegere amananu, akahiiganiza muno Abakristaayo rubuga ha rubuga n’ateeka abamu omu nkomo, kandi n’asagika encwamu ezaabaga zikozerwe kwita Abakristaayo. (Eng. 26:10, 11) Hataroho kugurukyagurukya Paulo yayehurraga kubi obuyaroraga Abakristaayo abato abakaba bali nfuuzi habwokuba akasagika encwamu ey’okwita abazaire baabo. Paulo akehurra kubi habw’ensobi ez’akaba akozere kara, baitu akaba ataine eky’asobora kuhindura. Akaikiriza ngu Kristo akaba amuferiire kandi n’obumanzi akahandiika n’agamba ati: “Obwembabazi za Ruhanga nkokundi nukwo ndi.” (1 Kol. 15:3, 10) Eki nikitwegesa ki? Osemeriire kukigumiza kimu ngu Yesu akakufeera, ekirukukusobozesa kuba n’enkoragana enungi na Yahwe. (Eng. 3:19) Ebintu ebikuru hali Ruhanga nibyo ebiturukukora kasumi kanu n’ebyo ebiturakora omu kasumi ak’omu maiso hatali ensobi ezitwakozere kara katube twali  tumazire kufooka Bakaiso ba Yahwe, rundi tutakafokere​—Is. 1:18.

12. Ebigambo ebiri omu 1 Yohana 3:19, 20 nibisobora kutukonyera bita kakuba twehurra nk’abataine mugaso rundi abatasobora kugonzebwa?

¹² Obworukutekerezaaho omulingo Yesu yafiire habw’ebibi byawe, n’osobora kugamba oti, ‘Tindukunihira ngu nsemeriire kutunga ekisembo kinu eky’omuhendo.’ Kiki ekisobora kukuletera kwehurra oti? Omutima gwaitu ogutahikiriire nigusobora kutubiihabiiha gukatuletera kwehurra nk’abantu abataine mugaso rundi abatarukugonzebwa. (Soma 1 Yohana 3:19, 20.) Kakuba tutandika kutekereza tuti, tusemeriire kwijuka ngu “Ruhanga nakira obukuru omutima gwaitu.” N’obuturaaba nitwehurra ngu Yahwe tarukutugonza rundi ngu tarukwija kutuganyira, Isiitwe ow’omu Iguru nakyatugonza kandi naija kutuganyira. Tusemeriire kwega kwikiriza ngu Yahwe nakyatugonza. Kusobora kukora eki, tusemeriire kwesomesa Ekigambo kye buli kiro, tumusabe butoosa, kandi tumale obwire n’abantu abarukumuramya. Habwaki kikuru kukora ebintu binu?

13. Kwesomesa Baibuli nikisobora kutukonyera kita? (Rora n’akasanduuko “ Omulingo Ekigambo kya Ruhanga Kibakonyera.”)

¹³ Wesomese Ekigambo kya Ruhanga buli kiro, kandi noija kweyongera kurora emiringo ya Yahwe emirungi muno. Noija kukyetegereza ngu mali n’akugonza muno. Kwecumiitirizaaho Baibuli buli kiro, nikisobora kukukonyera kuba n’entekereza enungi, kandi kikuterekereze omu bitekerezo hamu n’omu mutima. (2 Tim. 3:16) Omugurusi arukwetwa Kevin ow’akaba n’ayehurra nk’ow’ataine mugaso n’agamba ati: “Kusoma Zabuli 103 hamu n’okugyecumiitirizaho kinkonyire kuterekereza entekereza yange hamu n’okumanya entekereza ya Yahwe hali nyowe.” Eva, outusangirwe tubalizeeho n’agamba ati: “Hakumalirra kw’ekiro ntunga obwire kuteekerezaaho omulingo Yahwe ayehurra. Kinkonyera kutunga obusinge kandi kyombeka okwikiriza kwange.”

14. Okusaba nikusobora kutukonyera kuta?

¹⁴ Saba butoosa. (1 Bas. 5:17) Obworukuba n’ogonza kufooka munywani w’omuntu, osemeriire kubaza nauwe buli kiro kandi okamugambira nk’oku orukwehurra. Nikyo kimu n’obunywani bwaitu na Yahwe. Obutumugambira enyehurra yaitu, entekereza yaitu, hamu n’ebyetaago byaitu kurabira omu kusaba, twoleka ngu nitumwesiga kandi tukimanyire ngu n’atugonza. (Zab. 94:17-19; 1 Yoh. 5:14, 15) Yua, outusangirwe tubalizeeho n’agamba ati: “Obumba ninsaba, tingambira Yahwe ebintu ebibaireho omu kiro eki byonka. Mugambira kiki kyonyini ekindukutekereza n’omulingo ndukwehurra. Mpora mpora, nsoboire kurora Yahwe hatali nka nyampara owa kampuni  enkooto, baitu nka taata ow’arukugonza abaana be.”​—Rora akasanduuko “ Wakakasomere?”

15. Yahwe ayoleka ata ngu n’atufaaho?

¹⁵ Mara obwire n’abanywani abesigwa; bali kisembo kuruga hali Yahwe. (Yak. 1:17) Isiitwe ow’omu iguru ayoleka ngu n’atufaaho kurabira omu kutuha ab’oruganda na banyaanya itwe omu kitebe abanyakwoleka “okugonza obusumi bwona.” (Nfu. 17:17) Omu bbaruha ye eiyahandiikiire Abakolosai, Paulo akabazaaho Abakristaayo abamu abamusagikire kandi akagamba ngu bakamuhumuza muno. (Bak. 4:10, 11) Yesu Kristo nauwe akaba n’ayetaaga obusagiki kuruga hali banywani be, abantu hamu n’abamalaika kandi akasiima obubabumuhaire.​—Luk. 22:28, 43.

16. Abanywani abesigwa nibasobora bata kutukonyera kwirra haihi na Yahwe?

¹⁶ Oserra abanywani omu kitebe kandi oikiriza obukonyezi bwabo? Obutugambiraho munywani waitu anyakukuzire omu by’omwoyo ebizibu byaitu, tikimanyisa ngu twine okwikiriza kuke; baitu nikisobora kutulinda. Tekerezaaho James outusangirwe tubalizeeho ekiyagambire: “Kuba munywani w’Abakristaayo abakuzire omu by’omwoyo kinkonyire muno. Obumba mpoirwemu amaani, abanywani banu ab’omuhendo n’okugumiisiriza, bampuliiriza kandi banyijukya ngu nibangonza. Kurabira omuli bo kindetera kumanya ngu Yahwe n’angonza kandi n’anfaaho.” Mali kakikuru muno kuba banywani nfe nanfe ab’ab’oruganda na bayaanya itwe ab’eby’omwoyo!

17-18. N’oha outusemeriire kuhuliiriza kandi habwaki?

¹⁷ Sitaani n’agonza tuleke kukora ekihikire. N’agonza twikirize ngu Yahwe tasobora kutujuna habwokuba tituli b’omugaso muno. Baitu nk’oku tusangirwe turozere ago tigali mananu.

¹⁸ Yahwe n’akugonza. Oli w’omuhendo omu maiso ge. Kakuba omworobera, noija ‘kwikara omu kugonza kwe’ ebiro n’ebiro nka Yesu. (Yoh. 15:10) Nahabweki otaikiriza Sitaani rundi omutima gwawe kukuletera kutekereza ngu Yahwe tarukukugonza. Baitu ohuliirize Yahwe anyakurora ebirungi bya buli omu haliitwe. Kigumye ngu “nasemere’rwa abantube,” otwaliremu naiwe!