1. Obusobozi bwaitu obw’okubaza bukaruga nkaha?

 OBUSOBOZI obw’okubaza kiri kisembo kuruga hali Ruhanga waitu ow’okugonza. Hanyuma ya Adamu kuhangwa, aho na aho akakozesa ebigambo kubaza na Ise ow’omu iguru, kandi yakusoboire n’okuhanga ebigambo ebihyaka. Adamu akakozesa obusobozi obu kuhikiriza obujunanizibwa obwakaba ahairwe obw’okuruka ebisoro amabara. (Kub. 2:19) Kandi akasemererwa muno, obuyabalize n’omuntu ondi​—kandi ogu nuwe mukazi we omurungi, Hawa!​—Kub. 2:22, 23.

2. Ekisembo eky’okubaza kikakozesiibwe kita kubi omu busumi obwa kara n’obusumi obwa hati?

² Ekisembo eky’okubaza kikahika kyakozesebwa kubi. Sitaani akabiiha Hawa, kandi ekisuba eki kikaletera abantu kusiisa n’okutahikirra. (Kub. 3:1-4) Adamu akakozesa kubi ekisembo eky’okubaza obuyajunaine Hawa hamu na Yahwe habw’ensobi ez’akaba akozere (Kub. 3:12) Kaini akabiiha Yahwe hanyuma y’okwita mugenzi we Aberi. (Kub. 4:9) Hanyuma, mwijukuru wa Kaini arukwetwa Lameki, akahandiika ekizina ekirukwoleka nk’oku abantu bakaba baijwire ebikorwa eby’okurwana omu kasumi ke. (Kub. 4:23, 24) Kasumi kanu abantu betwaza omu mulingo ki? Niturora ab’eby’obulemi nibakozesa ebigambo ebibi omu rwijwire rw’abantu. Kandi firimu ezirukukira obwingi kasumi kanu zirumu ebigambo ebibi. Abeegi bahurra ebigambo ebibi omu masomero, kandi n’abakuru nabo bahurra ebigambo ebibi omu biikaro nambere bakorra. Eky’obusaasi, ebigambo ebibi kweyongera kasumi kanu, nikyolekera kimu nk’oku ensi eyeyongiire kusiisikara.

3. Kabi ki akatusemeriire kwegendereza, kandi nitugenda kubazaaho ki omu kicweka kinu?

 ³ Kakuba tutegendesereza, habw’okwikara nituhurra ebigambo ebibi, naitwe nitusobora kutandika kubikozesa. Kyamananu ngu itwe nk’Abakristaayo nitugonza kusemeza Yahwe, nahabweki titwakugondeze kukozesa ebigambo ebibi. Baitu nitugonza n’okukozesa ekigambo eky’okubaza omu mulingo omurungi ogurukuhaisaniza Ruhanga waitu. Omu kicweka kinu nitugonza kubazaaho omulingo tusobora kukikora obuturukuba tuli (1) omu buheereza, (2) omu nsorrokano, kandi (3) obuturukuba nitubaza n’abantu abandi. Baitu katubanze tubazeeho ensonga habwaki ebigambo ebitubaza bikwataho Yahwe.

4. Kusigikirra ha Maraki 3:16, habwaki embaza yaitu ekwataho Yahwe?

⁴ Soma Maraki 3:16. Tekerezaaho ensonga habwaki Yahwe ahandiika amabara g’abantu abarukutiina kandi abarukuteekamu ibara lye ekitiinisa omu ‘kitabu kye eky’okuijukya.’ Ebigambo ebitukozesa byoleka kiki ekiri ha mitima yaitu. Yesu akagamba ati: “Ebiijura omu mutima, akanwa nibyo kagamba.” (Mat. 12:34) Ebintu ebitwikara nitubazaaho byoleka okugonza okutwiniire Yahwe. Kandi Yahwe nagonza abo abarukumugonza kwegondeza omu bwomeezi ebiro n’ebiro omu nsi empyaka.

5. (a) Okuramya kwaitu kwine kakwate ki n’embaza yaitu? (b) Nk’oku kyolekerwe omu kisisani, obuturaaba nitugonza kusemeza Yahwe, biki ebitusemeriire kwetantara omu mbaza yaitu?

⁵ Embaza yaitu n’esobora kwoleka Yahwe obwaraaba asemerererwa obuheereza bwaitu haluwe. (Yak. 1:26) Abantu abamu abatarukugonza Ruhanga, babaza omu mulingo ogw’ekiniga kandi ogw’emyehembo. (2 Tim. 3:1-5) Titwakugondeze kubaza nkabo, oihireho nitugonza kusemeza Yahwe omu mulingo tubazaamu. Baitu Yahwe nasobora kutusemerererwa, kakuba tubaza ebigambo eby’embabazi omu nsorrokano n’omu buheereza kandi kunu nitukozesa ebigambo eby’obukaali kandi ebitali by’okugonza hali ab’omu maka gaitu?​—1 Pet. 3:7.

6. Birungi ki ebyarugiremu habwa Kimberly kubaza kurungi?

⁶ Obutukozesa kurungi ekisembo eky’okubaza, twoleka abantu abandi ngu nituheereza  Yahwe. Tukonyera abantu abatwetoroire kurorra kimu embaganiza enyakuli hagati y’ogu “arukukorra Ruhanga, nogu atarukumukorra.” (Mara. 3:18) Kinu nikyo kyahikire hali munyaanya itwe Kimberly. * Haroho obujunanizibwa obuyahairwe kuhikiiriza n’omwegi mutaahi we. Hanyuma y’okukora nauwe, akakyetegereza nk’oku Kimberly ali w’embaganiza h’abeegi abandi. Tiyabazaahoga kubi abantu, yabazaaga omu mulingo ogw’embabazi, kandi tiyakozesaaga ebigambo ebibi. Omwegi onu ow’akaba nakora na Kimberly akakwatwaho muno kandi yaikiriza kwega Baibuli. Yahwe asemererwa muno obutubaza omu mulingo oguletera abantu kugonza kwega amananu!

7. Tusemeriire kukozesa tuta ekisembo ky’okubaza Yahwe ekyatuhaire?

⁷ Itwena nitugonza kubaza omu mulingo ogurahaisa Yahwe ekitiinisa kandi oguraletera ab’oruganda kugonza kutwirra haihi. Nahabweki, leka tubazeeho emiringo eyitusobora kugumizaamu kuba “ekyokurorraho [ekirungi] . . . omukubaza.”

8. Omu buheereza bwe, kyokurorraho ki ekirungi eky’okubaza Yesu ekiyatuteriireho?

⁸ Baza omu mulingo ogw’embabazi kandi ogw’ekitiinisa, abantu abandi n’obubarakubiihiza. Omu buheereza bwe, Yesu bakamweta omutamiizi, ow’omururu, omuheereza wa Sitaani, arakucwa Sabbiti kandi owarukujuma Ruhanga. (Mat. 11:19; 26:65; Luk. 11:15; Yoh. 9:16) Baitu Yesu atabagarukemu omu mulingo ogw’ekiniga. Kusisanaho na Yesu, naitwe titusemeriire kugarukamu abandi omu mulingo gw’ekiniga abandi n’obubatubaliza kubi. (1 Pet. 2:21-23) Baitu amananu gali tikyanguhire kwetanga. (Yak. 3:2) Kiki ekisobora kutukonyera?

9. Kiki ekisobora kutukonyera kwetanga omu mbaza yaitu obuturukuba tuli omu buheereza?

⁹ Lengaho kutateeka omutima ha mulingo omubi omuntu ow’orukutebeza ogw’akugarukiremu. Ow’oruganda arukwetwa Sam nagamba ati, “ndengaho kutekerezaaho muno, nk’oku omuntu oundukutebeza arukwetaaga kumanya amananu agarukukwata hali Ruhanga n’okwijuka ngu nasobora kuhinduka.” Obwire obumu omuntu outurukutebeza nasobora kukwatwa ekiniga habwokuba tugenzereyo omu bwire obutali burungi. Munyaanya itwe Lucia obwabaza n’omuntu aw’abiihirwe, asaba esaara engufu nayesengereza Yahwe kumukonyera kwikara atekaine n’okwerinda kubaza ekigambo kyona ekitali ky’embabazi rundi ekitali ky’ekitiinisa. Naitwe nitusobora kwegera ha kyokurorraho kye obuturukuba nitubaza n’omuntu ow’abihiirwe.

10. Kusigikirra ha 1 Timoseo 4:13, Kigendererwa ki ekitusemeriire kuba nakyo?

 ¹⁰ Weyongere kufooka omutebezi omurungi. Timoseo akaba ali mutebezi omurungi baitu nabwo akaba nayetaaga kusemezaamu omulingo arukwegesa. (Soma 1 Timoseo 4:13.) Nitusobora tuta kweyongera kufooka abegesa abarungi omu buheereza? Tusemeriire kutekaniza kurungi. Eky’omugisa omurungi, twine ebikwato ebirukwahukana ebisobora kutukonyera kufooka abegesa abarungi. Noija kutunga obuhabuzi oburungi kuruga omu burocuwa Wekambire Okusoma n’Okwegesa hamu n’omu kicweka “Wekambire Obuheereza” ekiizira omu Akatabu k’Enso’rokano ak’Obwomeezi n’Obuheereza Bwaitu nk’Abakristaayo. Naiwe okozesa ebikwato binu? Obututekaniza kurungi, titutiina ekihinguraine kandi tubaza n’obumanzi.

11. Abakristaayo abamu bafokere bata abegesa abarungi?

¹¹ Nitusobora n’okwegera ha mulingo abandi omu kitebe begesaamu. Sam, outusangirwe tubalizeeho akira kwekaguza, kiki ekifoora Abakristaayo abamu abegesa abarungi. Ahuliiriza kurungi obubaba nibegesa kandi hanyuma ayegera ha kyokurorraho kyabo. Munyaanya itwe Talia ahuliiriza kurungi omulingo abahi b’embazo abarungi bahamu embazo zaabo. Habw’okukora eki, ayegere omulingo asobora kugarukamu ebikaguzo abantu bakira kukaguza omu buheereza.

12. Bizibu ki abamu ebibarabamu?

¹² Itwena nitusobora kwejumbira omu nsorrokano zaitu kurabira omu kuzinira haiguru n’abandi n’okuha eby’okugarukamu ebitutekaniize kurungi. (Zab. 22:22) Abamu kibagumira kuzina rundi kuha eky’okugarukamu omu nsorrokano. Naiwe nukwo oyehurra oti? Obukiraaba nukwo kiri, nosobora kugasirwa kurabira omu kwega ebikonyiire abandi kuleka kutiina.

13. Kiki ekisobora kukukonyera kuzina kuruga ha mutima obworukuba oli omu nsorrokano?

¹³ Zina kuruga ha mutima. Ensonga erukukira obukuru eyetuletera kuzina omu nsorrokano zaitu nukwo kukugiza Yahwe. Munyaanya itwe arukwetwa Sara atekereza ngu tamanyire kuzina kurungi. Baitu agonza kukugiza Yahwe kurabira omu kuzina. Nahabweki obwaba natekaniza ensorrokano, atekaniza n’ebizina. Azina ebizina ebi kandi alengaho kurora omulingo ebigambo ebirumu birukukwatagana n’isomo erirukugenda kubazibwaho. Sarah nagamba ati: “Kinu kinkonyera kuteeka omutima ha bigambo ebiri omu bizina omu kiikaro kyokuguteeka ha mulingo ndukuzinamu.”

14. Obworaaba oine ensoni, kiki ekisobora kukukonyera kugarukamu omu nsorrokano otarukutiina?

¹⁴ Garukamu obutoosa. Amananu gali, kinu nikisobora kugumira muno abamu. Talia outasangirwe tubalizeeho nagamba ati:  “Nyetuntura muno obumba nyine kubaliza omu bantu baingi n’obukiraaba ngu abamu tibakyetegereza habwokuba nkira kubaza n’iraka eritekaine. Nahabweki kugarukamu omu nsorrokano kingumira muno.” Baitu kinu tikiremesa Talia kuha eby’okugarukamu. Obwaba natekaniza ensorrokano, akiijuka ngu eky’okugarukamu eky’okubanza kisemeriire kuba kigufu kandi ekirukuhikira ha nsonga. Nagamba ati: “Kinu nikimanyisa ngu tikiine nsonga kakuba eky’okugarukamu kyange kiba kigufu, kyanguhire kwetegereza kandi nikihikira ha nsonga habwokuba owarukwebembera nikyo arukuba nagonza.”

15. Kiki ekitusemeriire kwijuka ha kuha eby’okugarukamu omu nsorrokano?

¹⁵ N’Abakristaayo abataine nsoni obwire obumu tibagarukamu. Habwaki? Munyaanya itwe Juliet nasoborra ati: “Obwire obumu tingarukamu habwokuba ntiina ngu eky’okugarukamu kyange kyanguhire muno kandi ngu tikiri kirungi ekirukumara.” Ijuka ngu Yahwe nagonza tuheyo eby’okugarukamu ebirukukira oburungi ebiturukusobora. * Yahwe asemererwa muno obutukora kyona ekiturukusobora kuhayo eky’okugarukamu omu nsorrokano n’obukiraaba ngu obwire obumu tuba tutiinire.  

16. Mbaza ya mulingo ki eyitusemeriire kwetantara?

¹⁶ Wetantale ‘okujuma kwona.’ (Bef. 4:31) Nk’oku tusangirwe turozere, Omukristaayo tasemeriire na kake kukozesa ebigambo ebibi. Baitu haroho n’emiringo ey’okujuma eyetanguhire kwetegereza eitusemeriire kwetantara. Ekyokurorraho, tusemeriire kwetantara kubazaaho kubi abantu ab’enganda ezindi rundi abamahanga agandi. Ekindi, titwakugondeze na kake kusaliza abandi kurabira omu kukozesa ebigambo ebirukucumita. Ow’oruganda omu akagamba ati: “Obwire obumu nabazaaga ebigambo ebirukusaaliza rundi eby’okusekereza ebinatekerezaaga ngu nibisekesa kandi ngu tibiine kabi, baitu amananu gali nabaga nsaliize omuntu ondi. Kumara emyaka nyingi, mukazi wange ankonyiire muno kurabira omu kungambira obutuba tuli itwenka ebigambo byange obubiba bimusaliize kandi bisaliize n’abantu abandi.”

17. Kusigikirra ha Abefeso 4:29, nitusobora tuta kwombeka abandi?

¹⁷ Baza omu mulingo ogurukwombeka abandi. Ba muntu arukwanguha kusiima omu kiikaro kyokujumirra rundi kutontorroma. (Soma Abefeso 4:29.) Abaisaleeri bakaba baine bingi ebyakubaletiire kusiima baitu baikaraga nibatontorroma. Obutwikara nitutontorroma, nitusobora kuletera n’abandi kutandika kutontorroma.  Ijuka ngu ripooti embi kuruga ha ntasi ikumi ekaletera ‘abaana ba Isareri boona kuhyemera Musa.’ (Kubar. 13:31–14:4) Ha rubaju orundi, obutusiima abandi kikonyera buli omu kutunga okusemererwa. Nitukigumya ngu banywani ba muhara wa Yefuta, kwikara “nibamusiima” kikamukonyera kwikara omu buheereza bwe. (Bac. 11:40, NWT) Sara, outusangirwe tubalizeeho nagamba ati: “Obutusiima abandi kibaletera kwehurra ngu Yahwe nabagonza kandi ngu n’abandi omu kitebe nibabagonza.” Nahabweki serra emiringo ey’okusiimamu Abakristaayo bagenzi baawe kuruga ha mutima.

18. Kusigikirra ha Zabuli 15:1, 2, habwaki tusemeriire kubaza amananu kandi eki nikitwarramu ki?

¹⁸ Baza amananu. Titusobora kusemeza Yahwe kakuba tuba tutarukubaza amananu. Anoba ebisuba ebya buli mulingo. (Nfu. 6:16, 17) N’obukiraaba ngu abantu baingi kasumi kanu barora kubaza ebisuba nk’ekintu ekya buli kiro, itwe tugumira ha ntekereza ya Yahwe ha nsonga enu. (Soma Zabuli 15:1, 2.) Ky’amananu ngu twerinda kubaza ebisuba, baitu tusemeriire n’okwerinda kuleteera abantu kwikiriza ebintu ebitahikire.

19. Kiki ekindi ekitusemeriire kwetantara?

¹⁹ Wetantale kurarangya orugambo. (Nfu. 25:23; 2 Bas. 3:11) Juliet, outusangirwe tubalizeeho, nasoborra omulingo orugambo rumukora kubi. Nagamba ati: “Kuhuliiriza orugambo kimaramu amaani, kandi kindetera kuleka kwesiga omuntu owarungambiire. Nimanya nta ngu tarukwija kumbazaaho kubi obwaraaba ali n’omuntu ondi?” Kakuba okyetegereza ngu ebimurukubaza bitandikire kufooka rugambo, omu kiikaro ky’okugumizaamu, tandika kubazaaho ebintu ebirukwombeka.​—Bak. 4:6.

20. Kiki eky’ocwiremu kukora?

²⁰ Nk’oku turukwikara omu nsi enyakwijwiremu kubaza kubi, tusemeriire kwekamba nukwo tusobole kubaza omu mulingo ogurukusemeza Yahwe. Ijuka ngu, kubaza kisembo kuruga hali Yahwe kandi afaaho omulingo tukikozesaamu. Naija kutuha emigisa obuturabaza omu mulingo ogurukumuhaisa ekitiinisa omu buheereza, omu nsorrokano, n’obuturukuba nitubaza n’abandi. Yahwe obwarahwerekereza ensi enu embi, nikiija kutwanguhira kumuhaisa ekitiinisa kurabira omu mulingo tubazaamu. (Yud. 15) Baitu omu kasumi kanu, cweramu kimu kusemeza Yahwe ‘n’ebigambo ebya kanwa kaawe.’​—Zab. 19:14.