EKICWEKA KY’OKWEGA 19
Nitusobora Tuta Kugumya Okwikiriza Kwaitu omu Murago gwa Yahwe ogw’Ensi Empyaka?
“[Yahwe] akagamba, talikikora?”—KUBAR. 23:19.
EKIZINA 142 Kugumira ha Kunihira Kwaitu
EBITURAYEGA a
1-2. Kiki ekitusemeriire kukora obutulindiriire ensi empyaka?
NITUSIIMA muno habw’omurago gwa Yahwe ogw’okumaraho obusinge bunu obubi kandi aleeteho ensi empyaka ey’erumu okuhikirra. (2 Pet. 3:13) N’obukiraaba ngu titumanyire nidi omurago gunu gurahikirra, ebirukubaho omu nsi nibyoleka ngu guli haihi kuhikirra.—Mat. 24:32-34, 36; Eng. 1:7.
2 Katube tumazire emyaka nyingi omu mananu rundi nangwa, itwena tusemeriire kugumya okwiriza kwaitu omu murago ogu. Habwaki? Habwokuba n’okwiriza okugumire nikusobora kuceka. Kinu omukwenda Paulo akakyeta “ekibi ekyanguha kutwezingaho.” (Baheb. 12:1, NWT) Kusobora kwikaza okwikiriza kwaitu kugumire, tusemeriire kwikara nitusomaho obwakaiso oburukugumya ngu ensi empyaka eri haihi kwija.—Baheb. 11:1.
3. Nitwija kubazaaho ki omu kicweka kinu?
3 Omu kicweka kinu nitwija kubazaaho emiringo esatu eitusobora kugumya okwikiriza kwaitu omu murago gwa Yahwe ogw’ensi empyaka: (1) kwecumiitirizaaho ekicunguro, (2) kutekerezaaho amaani ga Yahwe, (3) n’okukwejumbira omu bintu eby’omwoyo. Hanyuma nitwija kubazaaho omulingo obutumwa Yahwe yahaire Habakuki burukugumya okwikiriza kwaitu kasumi kanu. Hati, leka tubazeeho enyikara ezitusobora kuba niturabamu ezirukutwetaagisa kuba n’okwikiriza okugumire omu murago ogw’ensi empyaka.
ENYIKARA EZITWETAAGISA KUBA N’OKWIKIRIZA OKW’AMAANI
4. Ncwamu ki ezirukwetaagisa kuba n’okwikiriza okw’amaani?
4 Buli kiro, tukora encwamu ezirukutwetaagisa kuba n’okwikiriza okw’amaani. Ekyokurorraho, tukora encwamu ezirukuwata ha banywani, eby’okwesemeza, eby’obwegese, obuswere, abaana, n’emirimo. Tusemeriire kwekaguza, ‘Encwamu zange nizooleka ngu ninkigumya ngu businge bunu buli haihi kuhwaho kandi ngu Yahwe ali haihi kuleetaho ensi empyaka? Rundi nanyowe ninyetwaza nk’abo abataine okunihira okw’okwomeera ebiro byona?’ (Mat. 6:19, 20; Luk. 12:16-21) Nitwija kukora encwamu enungi obutaragumya okwikiriza kwaitu ngu ensi empyaka eri haihi kwija.
5-6. Habwaki nitwetaaga okwikiriza okugumire omu bwire bw’ebizibu? Bazaaho ekyokurorraho.
5 Tutunga ebirengo ebirukutwetaagisa kuba n’okwikira okw’amaani. Nitusobora kuhiiganizibwa, kutunga oburwaire obw’amaani, rundi ebintu ebindi ebisobora kutuleetera kuhwamu amaani. Hakubanza nitusobora kulengaho kubigumira. Baitu kakuba biikaraho kumara akasumi akaraihire, nikyetaagisa okwikiriza okw’amaani kusobora kubigumiisiriza n’okugumizaamu nituheereza Yahwe n’okusemererwa.—Bar. 12:12; 1 Pet. 1:6, 7.
6 Obutuba nituraba omu kirengo kyona, nitusobora kutandika kwehurra ngu ensi empyaka teriija. Baitu kinu kiba nikimanyisa ngu okwikiriza kwaitu kuceke? Nangwa. Tekerezaaho ekyokurorraho kinu. Kakuba hagwa enjura ey’amaani, nitusobora kutandika kutekereza ngu izooba tirilyongera kujwa. Baitu hanyuma izooba limara lijwa. Nikyo kimu obutuba tuhoiremu amaani, nitusobora kwehurra ngu ensi empyaka teriija. Baitu okwikiriza kwaitu obukuba kugumire, tuba nitukimanya ngu emirago ya Yahwe yoona niija kuhikirra. (Zab. 94:3, 14, 15; Baheb. 6:17-19) Kandi eki kitukonyera kwikara nitwebembeza kuramya Yahwe omu bwomeezi bwaitu.
7. Ntekereza ya mulingo ki eyitusemeriire kwetantara?
7 Nitwetaaga okwikiriza okugumire kusobora kukora omulimo ogw’okutebeza. Abantu baingi abaturukutebeza batekereza ngu ebintu ebirungi ebiraaba omu nsi empyaka tibirukusoboka. (Mat. 24:14; Ez. 33:32) Titwakugondeze kuba n’entekereza ya mulingo ogu. Tusemeriire kwikara nitugumya okwikiriza kwaitu kwetantara entekereza ya mulingo ogu. Leka tubazeeho ebintu bisatu ebitusobora kukora.
WECUMIITIRIZEEHO EKICUNGURO
8-9. Kwecumiitirizaaho ekicunguro nikisobora kita kugumya okwikiriza kwaitu?
8 Omulingo gumu tusobora kugumya okwikiriza kwaitu nukwo kwecumiitirizaaho ekicunguro. Ekicunguro kitugumya ngu emirago ya Ruhanga niija kuhikirra. Obutwecumiitirizaaho muno ensonga habwaki kyahairweyo n’okwefeereza Yahwe yakozere kusobora kukihayo, kigumya okwikiriza kwaitu ngu omurago gwa Ruhanga ogw’okutuha obwomeezi obutahwaho omu nsi empyaka nigwija kuhikirra. Habwaki nitugamba tuti?
9 Kyali nikitwarramu ki kuhayo ekicunguro? Yahwe akasindika Omwana we omu ow’arukukirayo kugonza kandi ow’akaba amazire nauwe emyaka nyingi kwija omu nsi kuzaarwa nk’omuntu ow’ahikiriire. Yesu obwakaba ali omu nsi akagumira ebizibu ebya buli mulingo. Akabonabona kandi hanyuma yafa omu busaalizi obw’amaani. Mali Yahwe kakefeereza muno! Ruhanga waitu ow’okugonza akaba atasobora kuleka Omwana we kufa, kandi ngu hanyuma tutunge obwomeezi oburungi habw’akacu kake. (Yoh. 3:16; 1 Pet. 1:18, 19) Habw’okwefeereza Yahwe okuyakozere, naija kuhikiiriza omurago gunu ogw’obwomeezi obutahwaho omu nsi empyaka.
TEKEREZAAHO AMAANI GA YAHWE
10. Kusigikirra ha Abefeso 3:20, kiki Yahwe eky’asobora kukora?
10 Omulingo ogwakabiri ogutusobora kugumya okwikiriza kwaitu nukwo kutekerezaaho amaani ga Yahwe. Aine amaani g’okuhikiiriza byona ebyaraganiza. Ky’amananu ngu abantu abamu behurra ngu omurago gw’obwomeezi obutahwaho omu nsi empyaka tigusobora kuhikirra. Baitu Yahwe aikaire n’araganiza ebintu bingi abantu ebibatasobora kuhikiiriza. Eki akikora habwokuba nuwe Ruhanga Ow’obusobozi bwona. (Yob. 42:2; Mar. 10:27) Nahabweki tikirukutuhuniiriza obw’aturaganiza ebintu ebirukuzooka nk’ebitarukusoboka.—Soma Abefeso 3:20.
11. Bazaaho bimu ha byokurorraho ebirukwoleka ebintu Yahwe yaraganiize ebyali nibizooka nk’ebitasobora kuhikirra. (Rora akasanduuko “ Emu ha Mirago Erukuhuniiriza Eyahikiriziibwe.”)
11 Tekerezaaho ebintu ebikaba nibizooka nk’ebitarukusoboka Yahwe ebiyaraganiize abantu be. Akagambira Iburahimu na Sara ngu baakuzaire omwana omwojo omu myaka yabo ey’obukuru. (Kub. 17:15-17) Ekindi, akaraganiza Iburahimu ngu oruzaaro rwe rwakwikaire omu nsi ya Kanaani. Abaisaleri abakaba bali baijukuru ba Iburahimu, bakamara emyaka nyingi omu nsi ya Misiri nk’abairu. Kikaba nikizooka ngu omurago ogu tigulihikirra, baitu gukamara gwahikirra. Hanyuma, Yahwe akaranga ngu Erisabesi ow’akaba akuzire omu myaka akaba naija kuzaara. Ekindi, akagambira Malyamu ow’akaba atamanyire musaija ngu naija kuzaara Omwana wa Ruhanga. Kinu kyakuhikiriize obunabbi Yahwe obuyarangire emyaka nyingi muno omu rugonjo rwa Adeni.—Kub. 3:15.
12. Yosuha 23:14 na Isaya 55:10, 11 bitwegesa ki h’amaani ga Yahwe?
12 Tugumya okwikiriza kwaitu ngu Yahwe aine amaani ag’okuleetaho ensi empyaka obutwecumiitirizaaho ebintu ebiyaraganiize kandi yabihikiiriza. (Soma Yosuha 23:14; Isaya 55:10, 11.) Eki kitukonyera kwetekaniza kurungi kukonyera abandi kukimanya ngu omurago ogw’ensi empyaka tikiri kirooto burooto baitu nigwija kuhikirra. Yahwe obwakaba nabazaaho iguru erihyaka n’ensi empyaka akagamba ati: “Ebigambo binu byokwesiga, byamazima.”—Kus. 21:1, 5.
WEJUMBIRE OMU BINTU EBY’OMWOYO
ENSORROKANO
Ebintu binu eby’omwoyo nibisobora bita kugumya okwikiriza kwawe? (Rora akacweka 13)
13. Ensorrokano nizisobora zita kugumya okwikiriza kwaitu? Soborra.
13 Omulingo ogwakasatu tusobora kugumya okwikiriza kwaitu nukwo kwejumbira omu bintu eby’omwoyo. Ekyokurorraho, tekerezaaho omulingo tugasirwa omu nsorrokano. Anna, ow’amazire emyaka nyingi nayejumbira omu buheereza obw’akasumi koona oburukwahukana n’agamba ati: “Ensorrokano zinkonyera kwikaza okwikiriza kwange kugumire. N’obukiraaba ngu ow’arukuha orubazo taine bukugu omu kwegesa rundi taine kihyaka ekyabalize, ndengaho kuserra ekirankonyera kweyongera kwetegereza Baibuli kandi eki kigumya okwikiriza kwange.” b Ekindi, okwikiriza kwaitu kweyongera kuguma obutuhuliiriza eby’okugarukamu by’ab’oruganda na banyaanya itwe omu nsorrokano.—Bar. 1:11, 12; 10:17.
OBUHEEREZA
Ebintu binu eby’omwoyo nibisobora bita kugumya okwikiriza kwawe? (Rora akacweka 14)
14. Kutebeza kugumya kuta okwikiriza kwaitu?
14 Tugumya okwikiriza kwaitu obutwejumbira omu buheereza. (Baheb. 10:23) Barbara, ow’amazire emyaka erukuhingura omu 70 naheereza Yahwe n’agamba ati: “Nkirozere ngu kutebeza kugumya okwikiriza kwaitu. Obunyeyongera kugambiraho abandi emirago ya Yahwe enungi, okwikiriza kwange kweyongera kuguma.”
KWESOMESA
Ebintu binu eby’omwoyo nibisobora bita kugumya okwikiriza kwawe? (Rora akacweka 15)
15. Kwesomesa kigumya kita okwikiriza kwaitu? (Rora ekisisani.)
15 Ekintu ekindi ekigumya okwikiriza kwaitu, nukwo okwesomesa. Susan n’agamba ngu kimukonyera muno obw’ayeteraho obwire bw’okwesomesa. N’agamba ati: “Buli Sande ntekaniza Omunaara gw’Omulinzi ogwa wiiki erukuhonderaho. Bbalaza na Kyakabiri ntekaniza ensorrokano eza hagati omu wiiki. Ebiro ebisigaire nyesomesaaho ebintu ebindi.” Habw’okwikara nahondera entekaniza ye ey’okwesomesa, Susan aikara nagumya okwikiriza kwe. Irene, ow’amazire emyaka nyingi naheereza ha kitebe kyaitu ekikuru, akizoire ngu kwesomesaaho obunabbi kigumya okwikiriza kwe. N’agamba ati: “Kimpuniiriza kukirora ngu Yahwe ahikiiriza byona ebyaba araganiize.” c
‘GULIIJA MAZIMA, TIGULIIKARAHO’
16. Habwaki ebigambo Yahwe yakozeseze kugumya Habakuki nibitukwataho kasumi kanu? (Abaheburaniya 10:36, 37)
16 Bamu h’abaheereza ba Yahwe baikaire balindiriire empero y’obusinge bunu kumara akasumi karaihire. Abantu baingi batekereza ngu empero ikaireho muno kwija. Eki Yahwe akakibazaaho obuyagambiire nabbi Habakuki ati: “Baitu okwolekwa kuikaire habwakasumi akatairweho, kandi nukurahuka empero, tukulibiha: nobukuliba nukuikaraho, okulinde; baitu kuliija mazima, tikuliikaraho.” (Hab. 2:3) Ruhanga akabaza ebigambo binu kugumya Habakuki wenka? Rundi naitwe ebigambo ebi nibitukwataho? Yahwe akaterekereza omukwenda Paulo kukozesa ebigambo binu nabazaaho Abakristaayo abalindiriire ensi empyaka. (Soma Abaheburaniya 10:36, 37.) Nahabweki n’obuturaaba nitutekereza ngu omurago gwa Yahwe ogw’okutujuna gwikaireho kuhikirra, ‘guliija mazima, tiguliikaraho.’
17. Munyaanya itwe omu akateeka ata omu nkora obuhabuzi Yahwe yahaire Habakuki?
17 Abaheereza ba Yahwe baingi bataire omu nkora obuhabuzi bwe, obwokwikara balindiriire kumara emyaka nyingi. Ekyokurorraho Louise, akatandika kuheereza Yahwe omu 1939. N’agamba ati: “Kasumi ako nkaba nintekereza ngu Haramagedoni ekaba n’egenda kwija ntakamazire siniya. Baitu eki tinukwo kyabaire. Kumara emyaka kinkonyiire muno kwesomesaaho ebyokurorraho eby’abantu nka Nuha, Iburahimu na Yusufu, abaalinzire kumara akasumi batakatungire empeera eyabaraganiziibwe kuruga hali Yahwe. Kukimanya ngu emirago ya Yahwe yoona niija kuhikirra kikonyiire nyowe hamu n’abandi kwikara tulindiriire ensi empyaka.” Baingi abamazire akasumi nibaheereza Yahwe nibaikiranganiza na munyaanya itwe onu.
18. Kurora ebyahangirwe nikigumya kita okwikiriza kwaitu omu murago ogw’ensi empyaka?
18 Ky’amananu ngu ensi empyaka tekaizire. Baitu tekerezaaho ebintu ebyorukurora nk’enyunyuuzi, emiti, ebisoro n’abantu. Busaho asobora kugurukyagurukya ngu ebintu binu tibiroho, n’obukiraaba ngu haroho akasumi obubikaba bitaroho. Biroho habwokuba Yahwe nuwe yabihangire. (Kub. 1:1, 26, 27) Ruhanga waitu aine ekigendererwa eky’okuleetaho ensi empyaka. Kandi naija kukihikiiriza. Omu nsi empyaka abantu nibaija kwegondeza omu bwomeezi obutahwaho nambere hatali burwaire. Akasumi Ruhanga akataireho obukaraahika, naija kuhindura ensi yoona agifoole empyaka.—Is. 65:17; Kus. 21:3, 4.
19. N’osobora ota kugumya okwikiriza kwawe?
19 Obutukyalinzire, leka tukozese omugisa gwona oguturatunga kugumya okwikiriza kwaitu. Ikara n’osiima habw’ekicunguro. Tekerezaaho amaani ga Yahwe. Kandi ikara n’oyejumbira omu bintu eby’omwoyo. Obworakora oti, noija kuba omu hali abo “abagwetwa emirago obwokuikiriza nokuguma.”—Baheb. 6:11, 12; Bar. 5:5.
EKIZINA 139 Werole Oli omu Nsi Empyaka
a Kasumi kanu baingi tibaikiririza omu murago gwa Yahwe ogw’ensi empyaka. Batekereza ngu kirooto burooto kandi ngu tikisobora kuhikirra. Baitu itwe nitukugumya ngu emirago ya Yahwe yoona niija kuhikirra. N’obukiraaba nukwo kiri, tusemeriire kwikara nituteekamu amaani kwikaza okwikiriza kwaitu kugumire. Kinu nitusobora kukikora tuta? Ekicweka kinu nikiija kugarukamu ekikaguzo eki.
b Amabara agamu gahindwirwe.
c Ebicweka ebirukukwata ha bunabbi bwa Baibuli n’osobora kubisanga hansi y’omutwe “Prophecy” omu Watch Tower Publications Index. Ekyokurorraho, rora ekicweka “Yahwe Ebyaraganiza Bihikirra” omu Watchtower eya Janwali 1, 2008.
