1. Habwaki tugarukamu omu nsorrokano?

 HABWAKI twija omu nsorrokano? Ensonga enkuru, nukwo kukugiza Yahwe. (Zab. 26:12; 111:1) Ekindi, twija omu nsorrokano nukwo tusobole kugarranganamu amaani omu biro binu ebigumire. (1 Bas. 5:11) Obutugarukamu omu nsorrokano, tuba nituhikiiriza ebintu binu bibiri.

2. Migisa ki eitwine ey’okugarukamu omu nsorrokano zaitu?

² Buli wiiki, tuba n’emigisa ey’okugarukamu omu nsorrokano zaitu. Ekyokurrorraho, omu nsorrokano eza ha wiikendi, nitusobora kugarukamu omu kicweka eky’okwega Omunaara gw’Omulinzi. Kandi omu za hagati omu wiiki, nitusobora kugarukamu omu kicweka eky’eby’omuhendo kuruga omu Baibuli, okwega Baibuli nk’ekitebe hamu n’ebicweka ebindi ebirumu kukaguza ebikaguzo.

3. Bintu ki ebisobora kutulemesa kugarukamu kandi Abaheburaniya 10:24, 25 n’etukonyera eta?

³ Itwena tugonza kukugiza Yahwe kandi tugarremu ab’oruganda na banyaanya itwe amaani. Baitu, haroho ebintu ebisobora kutulemesa kugarukamu. Nitusobora kuhurra nitutiina kugarukamu rundi nitusobora kuba nitugonza kugarukamu, baitu batarukutukoma nk’oku twakugondeze. Kiki ekisobora kutukonyera? Nitutunga eky’okugarukamu omu bbaruha omukwenda Paulo yahandikiire Abaheburaniya. Obwakaba n’abazaaho ensonga habwaki kikuru kusorrokana hamu, akagamba ngu tusemeriire kuteeka omutima ha kwekambisangana.  (Soma Abaheburaniya 10:24, 25.) Obuturakyetegereza ngu ebigambo bike ebirukwoleka okwikiriza kwaitu nibiija kugarramu ab’oruganda amaani, nikiija kutukonyera kuleka kutiina kugarukamu. Kandi kakuba batatukoma nk’oku twakugondeze nitusobora kusemererewa habwokuba abandi batungire omugisa ogw’okuhayo eky’okugarukamu kyabo.—1 Pet. 3:8.

4. Bintu ki bisatu ebiturabazaaho omu kicweka kinu?

⁴ Omu kicweka kinu, nitwija kubanza tubazeeho omulingo tusobora kugarramu abandi amaani omu kitebe ekitaito nambere abarukugarukamu bali bake. Ekindi, nitwija kubazaaho omulingo tusobora kugarramu abandi amaani omu kitebe ekikooto nambere abantu baingi bahanika emikono kugarukamu. Hanyuma, nitwija kubazaaho omulingo tusobora kuhayo eby’okugarukamu ebirukugarramu abandi amaani.

5. Nitusobora tuta kugarranganamu amaani obuturukuba tuli bataito omu nsorrokano?

⁵ Omu kitebe ekitaito rundi guruupu, tihabamu bantu baingi ow’arukwebembera abasobora kukoma kuhayo eby’okugarukamu. Obwire obumu, n’asobora kulindaho hataine ayahanika omukono. Omu nsorrokano nihasobora kubamu okuceleera kwingi kandi kinu nikiba kitarukugarramu amaani. Kiki eky’osobora kukora? Ikara oyetekaniize kuhanika omukono. Obworakora eki, n’osobora kwekambisa abandi nabo kuhanika.

6-7. Nitusobora tuta kukehya ha butiini obw’okuhayo eky’okugarukamu?

⁶ Kiki eky’osobora kukora obworaaba n’otiina kugarukamu? Baingi nukwo behurra bati. Baitu, habwokuba n’ogonza kugarramu ab’oruganda na banyaanya itwe amaani, n’osobora kuserra omulingo orakehya ha kutiina kwawe. Eki n’osobora kukikora ota?

⁷ N’osobora kweyijukyamu amagezi agaahairwe omu bicweka ebya Omunaara gw’Omulinzi ogw’enyuma. b Ekyokurorraho, tekaniza kurungi. (Nfu. 21:5) Nk’oku orayeyongera kumanya ebiri omu kicweka eki, nukwo orayeyongera kwanguhirwa kugarukamu. Ekindi, eby’okugarukamu byawe bibe bigufu. (Nfu. 15:23; 17:27) Eky’okugarukamu ekigufu tikirukweraliikiriza muno. Obukiba kigufu, kirumu ensonga emu rundi ibiri nikisobora kwanguhira ab’oruganda na banyaanya itwe kukyetegereza kukira ekiraihire kandi ekirumu ensonga nyingi. Obwohayo eky’okugarukamu ekigufu omu bigambo byawe, kyoleka ngu otekaniize kurungi kandi oyetegeriize kurungi ebirukubazibwaho omu kicweka eki.

8. Yahwe arora ata amaani turukuteekamu kukora ekiturukusobora?

⁸ Kiki eky’osemeriire kukora kakuba olengaho amagezi ganu, baitu okaikara n’otiina? Kigumye ngu Yahwe naija kusiima amaani ag’orateekamu kukora kyona eky’orukusobora kugarukamu. (Luk. 21:1-4) Yahwe tatusaba kukora ekitutarukusobora. (Baf. 4:5) Cwamu eky’osobora kukora, wetereho ekigendererwa kukikora, kandi hanyuma osabe Yahwe akuhe omutima ogutekaine. Hakubanza n’osobora kweteraho ekigendererwa eky’okuhayo eky’okugarukamu kimu ekigufu.

9. Kiki ekisobora kutulemesa kuha eky’okugarukamu omu kitebe ekikooto?

⁹ Ekitebe kyanyu obukiraaba kirumu abatebezi baingi, nabwo n’osobora kutunga  okulemesebwa. Obundi ab’oruganda na banyaanya itwe baingi bahanika emikono, kandi iwe tibakira kukukoma. Ekyokurorraho, Danielle aikaire nayegondeza omu kugarukamu. c Akurora nk’ekicweka eky’okuramya, nka gumu ha mulingo ogw’okwekambisa ab’oruganda, n’okugumya okwikiriza kwe omu Baibuli eby’eyegesa. Baitu obuyagenzere omu kitebe ekikooto, tibakiraga kumukoma kandi obwire obumu orusorrokano rwahwaga atagarukiremu. N’agamba ati: “Nayehurraga kubi muno, nisisana nk’ow’aferiirwe omugisa ogw’amaani. Obukiikara nikibaho, otandika kutekereza ngu obundi bakugenderiire.”

10. Kiki ekitusobora kukora kurora twakomwa kuhayo eky’okugarukamu?

¹⁰ Wakehurraga nka Danielle? Obukiraaba nukwo kiri, n’osobora kuhwamu amaani kandi ocwemu kwikarra kwonka ohuliirize. Baitu otaleka kwikara n’olengaho kugarukamu. Kiki eky’osobora kukora? Nikisobora kukukonyera kakuba buli murundi otekaniza eby’okugarukamu bingi. Nukwo obubaraaba batakukomere hakutandika, n’osobora kugarukamu obwire obundi. Obworaaba n’otekaniza Omunaara gw’Omulinzi, tekerezaaho omulingo buli kacweka karukukwatagana n’omutwe gw’ekicweka eki. Obworakikora, noija kusobora kutunga eby’okugarukamu ebirungi. Ekindi, n’osobora kutekaniza kugarukamu obucweka oburukubazaaho enyegesa ezigumire kusoborra. (1 Kol. 2:10) Habwaki? Habwokuba abantu bake nibasobora kuhanika emikono ha bucweka obu. Kiki eky’osemeriire kukora kakuba olengaho amagezi ganu, baitu hakarabaho ensorrokano nke batakukomere? Ensorrokano zitakatandikire, n’osobora kuhikirra ow’arukwebembera okamugambira ekikaguzo ekiwakugondeze kugarukamu.

11. Abafiripi 2:4 nihatwekambisa kukora ki?

¹¹ Soma Abafiripi 2:4. Naterekerezebwa omwoyo ogurukwera, Paulo akekambisa Abakristaayo kutekerezaaho ebyetaago by’abandi. Nitusobora tuta kuteeka omu nkora obuhabuzi bunu obuturukuba tuli omu nsorrokano? Tusemeriire kwijuka ngu abandi nabo nibagonza kuhayo eky’okugarukamu.  

12. Mulingo ki ogumu ogutusobora kwekambisaamu abandi? (Rora ekisisani.)

 ¹² Tekerezaaho kinu. Kakuba oba oliyo n’obaza n’abanywani baawe, wakugondeze kubaza muno otabahaire omugisa ogw’okubaza? Amananu gali nangwa! N’ogonza nabo bagire ekibaabaza. Nikyo kimu n’omu nsorrokano, nitugonza abantu baingi bagarukemu. Gumu ha mulingo ogw’okugarramu ab’oruganda na banyaanya itwe amaani nugwo ogw’okubaha omugisa ogw’okubazaaho okwikiriza kwabo. (1 Kol. 10:24) Leka turole omulingo eki tusobora kukikoramu.

13. Nitusobora tuta kuha abandi omugisa ogw’okugarukamu?

¹³ Eky’okubanza, tusemeriire kuha eby’okugarukamu ebigufu, nukwo n’abandi batunge omugisa ogw’okugarukamu. Abagurusi n’abatebezi abamazire akasumi nibaheereza Yahwe, nibasobora kutekaho ekyokurorraho. N’obworaaba n’ohayo eky’okugarukamu ekigufu, wetantale kubazaaho ensonga nyingi. Kakuba obazaaho ensonga zoona eziri omu kacweka, abandi tibarukwija kutunga eky’okubazaaho. Ekyokurorraho, omu kacweka kanu harumu ensonga ibiri—kuha eby’okugarukamu ebigufu n’okwetantara kubazaaho ensonga nyingi. Obubarabanza kukukoma kubazaaho akacweka kanu, n’osobora kubazaaho emu ha nsonga zinu.

14. Kiki ekisobora kutukonyera kumanya emirundi eyiturahanika emikono? (Rora ekisisani.)

¹⁴ Kozesa amagezi obworaaba n’ocwamu emirundi oragarukamu. Kakuba tuhanika muno omukono gwaitu, nitusobora kuleetera ow’arukwebembera kuhambirizibwa kwikara natukoma, n’obukiraaba ngu abandi tibakahaire eby’okugarukamu. Kinu nikisobora kumaramu abandi amaani nibaleka kuhanika emikono.—Mug. 3:7.

15. (a) Tusemeriire kwetwaza tuta kakuba batatukoma kugarukamu? (b) Abarukwebembera nibasobora bata kwoleka ngu nibafaaho buli omu? (Rora akasanduuko “ Obworaaba n’Oyebembera.”)

¹⁵ Abatebezi baingi obubaikara nibahanika emikono, nitusobora kutatunga omugisa  ogw’okugarukamu emirundi nyingi nk’oku twakugondeze. Obwire obumu, arukwebembera n’asobora kutatukoma kandi nitusobora kusaasamu kake. Baitu tusemeriire kwetantara kubiihirwa.—Mug. 7:9.

16. Nitusobora tuta kugarramu amaani abo abagarukiremu?

¹⁶ Obworaaba otasoboire kugarukamu nk’oku wakugondeze, habwaki otahuliiriza kurungi eby’okugarukamu by’abandi nukwo hanyuma y’orusorrokano obasiime? Kusiima ab’oruganda na banyaanya itwe nikisobora kubagarramu amaani nk’eky’okugarukamu eky’obaire n’ogonza kuha. (Nfu. 10:21) Kusiima abandi guli mulingo ogundi ogw’okubagarramu amaani.

17. (a) Abazaire nibasobora bata kukonyera baana baabo kutekaniza eby’okugarukamu ebisemeriire? (b) Kusigikirra ha vidiyo, bintu ki bbina ebisobora kutukonyera kutekaniza eky’okugarukamu? (Rora obugambo obuli hansi.)

¹⁷ Bintu ki ebindi ebitusobora kukora kugarramu abandi amaani obuturukuba tuli omu nsorrokano? Obworaaba oli muzaire, konyera abaana baawe kutekaniza eby’okugarukamu ebirukuhikaana n’emyaka yabo. (Mat. 21:16) Obwire obumu, ekicweka nikisobora kuba nikibazaaho ensonga ez‘amaani nk’ebizibu eby’omu buswere rundi ebirukukwata ha ngeso, baitu nabwo n’osobora kusanga harumu akacweka kamu rundi bubiri abaana akabasobora  kubazaaho. Ekindi soborra abaana baawe ensonga habwaki obwire obumu batarukwija kubakoma, kinu nikiija kubakonyera kutehurra kubi kakuba bakoma omuntu ondi omu kiikaro kyabo.—1 Tim. 6:18. d

18. Nitusobora tuta kwetantara kuleetera abandi kututaho omutima obutuba nitugarukamu? (Enfumo 27:2)

¹⁸ Itwena nitusobora kutekaniza eby’okugarukamu ebirukuhaisa Yahwe ekitiinisa kandi ebirukwekambisa Abakristaayo bagenzi baitu. (Nfu. 25:11) N’obukiraaba ngu obwire obumu nitusobora kubazaaho ebiturabiremu, tusemeriire kwetantara kwebazaaho muno. (Soma Enfumo 27:2; 2 Kol. 10:18) Baitu tukole kyona ekirukusoboka kubazaaho Yahwe, Ekigambo kye, hamu n’abantu be boona. (Kus. 4:11) Kakuba ekikaguzo eky’akacweka kiba nikitwekambisa kubazaaho ebirukutukwataho, tusemeriire kukikora. Leka turole ekyokurorraho omu kacweka akarukuhonderaho.

19. (a) Kiki ekirarugamu obuturayoleka ngu nitufaaho abandi omu nsorrokano? (Abarumi 1:11, 12) (b) Kiki eky’okira kugonza obukirukuhika ha kugarukamu omu nsorrokano?

¹⁹ N’obukiraaba ngu busaho biragiro ebirukukwata ha mulingo tusemeriire kugarukamu, itwena nitusobora kuhayo eby’okugarukamu ebirukwekambisa. Kinu nikisobora kutwetaagisa kwongera ha mirundi tugarukamu. Rundi nikisobora kutwetaagisa kumarwa emirundi eyitusoboire kugarukamu, n’okusemererwa habw’okukimanya ngu abandi nabo batungire omugisa ogw’okugarukamu. Obutwoleka ngu nitufaaho abandi omu nsorrokano, itwena nitusobora kwegondeza omu kugarranganamu amaani.—Soma Abarumi 1:11, 12.