EKICWEKA KY’OKWEGA 17
EKIZINA 111 Ebituletera Okusemererwa
Otaliruga Omu Rugonjo orw’Eby’Omwoyo
“Musemererwe, mukyanganukirege obutosa eki ekindukuhanga.”—IS. 65:18.
EBITURAYEGA
Nitwija kurora omulingo tugasirwa habwokuba omu rugonjo orw’eby’omwoyo n’omulingo tusobora kukonyera abandi kurwijamu.
1. Orugonjo orw’eby’omwoyo nurwo ruha kandi kiki ekitusemeriire kucweramu kimu kukora?
KASUMI kanu haroho orugonjo orurungi orutarukurorwa, orurumu abantu abarukwekamba kukora ebintu ebirungi. Kandi rurumu obukaikuru n’obukaikuru bw’abantu abarukwegondeza omu businge bwonyini. Abarurumu bacweriiremu kimu kutarurugamu, kandi nibagonza abantu abandi babeteranizeeho. Orugonjo runu nurwo ruha? Nurwo orugonjo orw’eby’omwoyo. a
2. Kiki ekirukuhuniiriza ha rugonjo orw’eby’omwoyo?
2 Omu mulingo ogw’ekyamahano, Yahwe ataireho enyikara nambere abantu be basobora kwegondeza omu businge n’omu bumu n’obukiraaba ngu bali omu nsi ya Sitaani enyakwijwiremu enobi n’ebintu ebibi. (1 Yoh. 5:19; Kus. 12:12) Ruhanga waitu ow’okugonza arora omulingo abantu bakwatwaho ebintu ebibi kandi atuha byona ebiturukwetaaga kugumizaamu nitumuheereza n’okusemererwa. Baibuli ebazaaho orugonjo orw’eby’omwoyo nk’ekiikaro “ekyokwebingamu” kandi “nkomusiri oguitirrwa amaizi.” (Is. 4:6; 58:11) Abo abaikara omu rugonjo runu nibasobora kwikara baine okusemererwa omu biro binu ebya hampero ebigumire.—Is. 54:14; 2 Tim. 3:1.
3. Obunabbi obuli omu Isaya esuura 65 bukahikirra buta omu kasumi akaakara?
3 Kuraba omu nabbi Isaya Yahwe akabazaaho obwomeezi abo abarukwikara omu rugonjo orw’eby’omwoyo obubaakwegondizeemu. Soma Isaya esuura 65 kumanya ebintu ebibaakwegondizeemu. Obunabbi bunu bukabanza kuhikirra omu mwaka 537 Y.A. Omu kasumi ako, Abayudaaya abakaba bali omu bunyagwa bakalekerwa kandi baagaruka Yerusalemu. Yahwe akaha abantu be omugisa kandi yabakonyera kwongera kusemeza orubuga n’okwongera kwombeka yekaru nambere baaramizaaga.—Is. 51:11; Zak. 8:3.
4. Obunabbi obuli omu Isaya esuura 65 nibuhikirra buta kasumi kanu?
4 Obunabbi bwa Isaya bukongera bwahikirra omurundi gw’akabiri omu 1919 Y.A.K. abaheereza ba Yahwe obubalekiirwe kuruga omu Baburooni. Hanyuma, orugonjo orw’eby’omwoyo rukatandika kugaliha omu nsi yoona. Abatebezi abekambi bakatandikaho ebitebe bingi kandi baakurakuraniza emiringo enungi. Abasaija n’abakazi abakaba nibagonza ebikorwa eby’okurwana n’eby’obusiihani bakajwara “omuntu omuhyaka, arukuhangwa Ruhanga omu kuhikirra.” (Bef. 4:24) Ky’amananu ngu emigisa nyingi Isaya eyarukubazaaho niija kuhikirra omu bwijwire omu nsi empyaka. Baitu na kasumi kanu tugasirwa kuba omu rugonjo orurungi orw’eby’omwoyo. Leka tubazeeho omulingo tugasirwa habw’okuba omu rugonjo orw’eby’omwoyo n’ensonga habwaki tutasemeriire kururugamu.
EBINTU ABALI OMU RUGONJO ORW’EBY’OMWOYO BARUKWEGONDEZAAMU
5. Kusigikirra ha Isaya 65:13, bintu ki ebitwegondezaamu omu rugonjo orw’eby’omwoyo?
5 Nibaliisibwa kurungi. Omu bunabbi, Isaya abazaaho embaganiza enyakuli hagati y’abantu abali omu rugonjo orw’eby’omwoyo n’abo abatarurumu. (Soma Isaya 65:13.) Yahwe aha abantu be ebyokulya eby’omwoyo omu bwijwire. Atuhaire omwoyo gwe ogurukwera, Ekigambo kye Baibuli, n’ebyokulya eby’omwoyo ebirukumara nukwo tusobole ‘kulya, . . . kunywa, . . . kandi tusemererwe.’ (Lengesaniza na Okusuku’rwa 22:17.) Baitu abo abali aheeru y’orugonjo orw’eby’omwoyo ‘barumwa enjara . . . , baine iroho’ kandi baswaire. Tibaine nkoragana yona na Ruhanga.—Am. 8:11.
6. Ekyahandiikirwe ekiri omu Yoweri 2:21-24 nikibazaaho kita ebintu eby’omwoyo Yahwe eby’atuha, kandi bitugasira bita?
6 Omu bunabbi obundi, Yoweri akabaza ebintu nk’engano, amaarwa n’amagita kwoleka omulingo Yahwe aliha abaheereza be ebyetaago byabo otwaliremu n’ebyokulya eby’omwoyo. (Yo. 2:21-24) Akikora kuraba omu Baibuli, ebitabu byaitu ebirukusigikirra ha Baibuli, omukura gwaitu, n’ensorrokano eza buli wiiki hamu n’enkooto. Obutwesomesa kandi tukejumbira omu nsorrokano butoosa, tweyongera kuguma omu by’omwoyo kandi tuhuumuzibwa.
7. Kiki ekituleetera ‘okusemererwa okw’omu mutima’? (Isaya 65:14)
7 Baine okusemererwa n’okumarwa. Abantu ba Ruhanga baine okusemererwa habw’okuba emitima yabo ijwire okusiima. (Soma Isaya 65:14.) Amananu agagumya okwikiriza kwaitu, n’emirago ya Ruhanga erukuhuumuza erukusangwa omu Kigambo kye n’okunihira kwaitu okurukusigikirra ha kicunguro kya Yesu bituleetera ‘okusemererwa okw’omu mutima.’ Obutubazaaho ebintu binu n’aboruganda na banyaanya itwe kituleetera okusemererwa!—Zab 34:8; 133:1-3.
8. Bintu ki bibiri abali omu rugonjo orw’eby’omwoyo ebibegondezaamu?
8 Okugonza n’obumu obuli hagati y’abantu ba Yahwe biri bimu ha bintu ebitwegondezaamu omu rugonjo orw’eby’omwoyo. Okugonza oku kutukonyera kutekerezaaho omulingo obwomeezi buliba omu nsi empyaka nambere abantu ba Yahwe balyongera kugonzangana, n’okuba omu bumu kukira na hati. (Bak. 3:14) Munyaanya itwe omu abazaaho ekintu ekiyabandize kurora omu Bakaiso ba Yahwe omurundi gw’okubanza. N’agamba ati: “Nkaba ntaine kusemererwa omu bwomeezi bwange n’omu ka yaitu. Omurundi gw’okubanza kurora abantu niboolekangana okugonza, nkakirorra omu Bakaiso ba Yahwe.” Omuntu wena ow’arukugonza kuba n’okusemererwa n’okumarwa asemeriire kutweteranizaaho omu rugonjo orw’eby’omwoyo. Omu nsi yoona abantu ba Yahwe bamanyirwe nk’abaine engeso enungi kandi abarukutekamungana ekitiinisa.—Is. 65:15.
9. Kusigikirra ha Isaya 65:16, 17 kiki ekirihika ha bintu ebituleetera okubonabona?
9 Baikara batekaine. Omu Isaya 65:14 niholeka ngu abo abagonza kwikara aheru y’orugonjo orw’eby’omwoyo barra “habwokuganya kwomutima” kandi ‘baamuza habw’okubihirwa okw’omwoyo.’ Kiki ekirihika ha bintu ebiretiire abantu ba Ruhanga kubonabona? Ebintu ebi biriba ‘byebere baitu biriba biserekerwe hali amaiso’ ga Ruhanga. (Soma Isaya 65:16, 17.) Yahwe alimaraho ebizibu byaitu byona kandi akasumi nikaija kuhika obusaasi bwaitu bwona tubweberwe kimu.
10. Habwaki guli mugisa gw’amaani kuba n’ab’oruganda na banyanya itwe omu rugonjo orw’eby’omwoyo? (Rora ekisisani.)
10 N’omu kasumi kanu ensorrokano zaitu zitukonyera kwehurra tuteekaine kandi tutarukuteeka omutima ha bizibu n’okwetuntura okw’omu nsi. Ekindi, tukonyera ab’oruganda na banyaanya itwe kwikara bateekaine obutwoleka emiringo ey’eretwa omwoyo ogurukwera nk’okugonza, okusemererwa, obusinge, embabazi, n’obuculeezi. (Bag. 5:22, 23) Mali kamugisa gw’amaani kuba omu rugonjo runu orw’eby’omwoyo! Abo abarwikaramu nibaija kurora omurago gwa Ruhanga ogw’okuleetaho “iguru erihyaka nensi empyaka,” niguhikirra omu bwijwire.
Guli mugisa gw’amaani kuba kicweka ky’eka ya Yahwe omu rugonjo orw’eby’omwoyo (Rora akacweka 10) c
11. Kusigikirra ha Isaya 65:18, 19, orugonjo orw’eby’omwoyo Yahwe orwataireho rusemeriire kutuleetera kwehurra tuta?
11 Nibasiima kandi basemeriirwe. Isaya ayongera atugambira ensonga habwaki tusemererwa kandi tukyanganuka habw’okuba omu rugonjo orw’eby’omwoyo. Yahwe nuwe ataireho orugonjo runu. (Soma Isaya 65:18, 19.) Enu niyo ensonga habwaki natukozesa kukonyera abantu kuruga omu bitebe eby’ensi ebitarukwegesa amananu agarukukwata hali Ruhanga kwija omu rugonjo orw’eby’omwoyo! Twine okusemererwa habw’emigisa eitwegondezaamu habw’okuba omu mananu kandi kitwekambisa kugagambiraho abandi.—Yer. 31:12.
12. Emirago ey’eri omu Isaya 65:20-24 ekuleetera kwehurra ota, kandi habwaki?
12 Ekindi, twine okusemererwa habwokuba twine okunihira kandi twine n’enkorangana enungi na Ruhanga. Tekerezaaho ebintu byona ebiturukwija kurora kandi tukakora omu nsi empyaka! Baibuli negamba eti: “Tihaliba omu obundi owenkerembe . . . nobwakuba omugurusi atahikize ebirobye.” Tulyombeka ‘enju tulizataahamu; tulibyara emisiri ey’emizabibu, tulilyaho ebyana.’ ‘Titulitabanira busa’ habwokuba tuliba ‘tuhairwe omugisa kuruga hali Yahwe.’ Aturaganiize kutuha obulinzi n’obwomeezi oburumu okumarwa kandi obwine ekigendererwa. Naturaganiza ati: ‘Tutakankungire,’ aliba amazire kumanya buli omu ekyarukwetaaga kandi aliigusa “ekintu kyona ekyomiire ekikigonza.”—Is. 65:20-24; Zab. 145:16.
13. Kusigikirra ha Isaya 65:25 abantu bakora mpindahinduka ki obubatandika kuheereza Yahwe?
13 Baine obusinge n’obulinzi. Habw’obukonyezi bw’omwoyo ogurukwera, baingi abaakoraga ebikorwa ebibi bakozere empindahinduka ez’amaani omu bwomeezi bwabo. (Soma Isaya 65:25.) Batairemu amaani kwecwaho engeso zinu embi. (Bar. 12:2; Bef. 4:22-24) Baitu nabwo abantu ba Ruhanga bakyali bantu abatahikiriire, nahabweki nibaija kugumizaamu nibakora ensobi. Baitu Yahwe ateraniize hamu abantu boona abarukumugonza kandi abarukugonzangana. Kandi ekirugiremu, nibegondeza omu businge n’obumu. (Tit. 2:11) Yahwe nuwe wenka asobora kukora ekintu kinu!
14. Ekyahandiikirwe ekiri omu Isaya 65:25 kikahikirra kita omu bwomeezi obw’ow’oruganda omu?
14 Mali abantu nibasobora kukora empindahinduka zinu? Tekerezaaho ekyokurorraho. Haroho omusigazi ayatairwe omu nkomo emirundi nyingi atakahikize emyaka 20 kandi yayejumibiraga omu bikorwa eby’obusiihani n’okurwana. Akateekwa omu nkomo habw’okwiba motoka, kucwa amaju g’abantu, kurwana, hamu n’emisango endi ey’amaani. Obuyatandikire kwega Baibuli kandi yagenda omu nsorrokano, akakigumya ngu akaba atungire ekigendererwa omu bwomeezi kandi eki nikyo kuramya Yahwe omu rugonjo orw’eby’omwoyo. Hanyuma y’okubatizibwa nk’omu h’Abakaiso ba Yahwe, yaikaraga natekerezaaho omulingo ekyahandiikirwe ekiri omu Isaya 65:25 kikaba nikimukwataho. Kara akaba ali nk’entale baitu hati akaba afookere ow’obusinge nk’entaama.
15. Habwaki tugonza kuraaliza abandi kutweteranizaaho omu rugonjo orw’eby’omwoyo, kandi eki tukikora tuta?
15 Omu Isaya 65:13 hatandika n’ebigambo binu: “Nikyo [Yahwe] Ruhanga agambiire ati.” Orukara orwa 25 rumalirra n’ebigambo “agambire [Yahwe].” Yahwe ahikiriza ebyaba araganiize. (Is. 55:10, 11) Kandi eki nitukirorra ha rugonjo orw’eby’omwoyo oruroho kasumi kanu. Yahwe atuhaire oruganda orw’ensi yoona. Kandi habw’okuba tuli kicweka ky’eka ye twine obusinge n’obulinzi omu nsi enu enyakwijwiremu ebintu ebibi. (Zab. 72:7) Nahabweki nitugonza kukonyera abantu baingi kutweteranizaaho omu ruganda runu orw’ensi yoona. Kandi eki tukikora obututeeka omutima ha kufoora abantu abegeswa.—Mat. 28:19, 20.
OMULINGO TUSOBORA KUSIKIRIZA ABANDI KWIJA OMU RUGONJO ORW’EBY’OMWOYO
16. Kiki ekisikiiriza abantu kwija omu rugonjo orw’eby’omwoyo?
16 Itwena twine ekitusobora kukora kusikiiriza abandi kwija omu rugonjo orw’eby’omwoyo. Eki nitusobora kukikora kakuba twegera hali Yahwe. Tahambiriza abantu kwija omu rugonjo orw’eby’omwoyo. Oihireho, omu mulingo gw’embabazi ‘abacunda’ nabaleeta nambere ali. (Yoh. 6:44; Yer. 31:3) Abantu abaine emitima enungi abeega ha kugonza kwa Yahwe n’emiringo ye enungi beyongera kumwirra haihi. Kuba n’engeso enungi hamu n’emiringo enungi nibisobora kusikiiriza abantu kutweteranizaaho omu rugonjo runu orurungi.
17. Nitusobora tuta kusikiiriza abantu kwija omu rugonjo orw’eby’omwoyo?
17 Gumu ha miringo tusobora kusikiriza abandi kutweteranizaaho omu rugonjo orw’eby’omwoyo nukwo kutwaza ab’oruganda na banyaanya itwe omu mulingo ogw’okugonza kandi ogw’embabazi. Abahyaka obubaraija omu nsorrokano zaitu nitugonza behurre nk’abantu ab’omu Kolinso abagendaga omu nsorrokano baitu abaali batali baheereza ba Yahwe. Bakagamba ngu: “Ruhanga ali omulinywe.” (1 Kol. 14:24, 25; Zak. 8:23) Nahabweki tusemeriire kuhondera oburagirizi oburukututererra ‘kwikaraga n’obusinge omuli itwe itwenka.’—1 Bas. 5:13.
18. Kiki ekisobora kusikiriza abantu kwija omu kitebe kyaitu?
18 Tusemeriire kwikara niturora ab’oruganda na banyaanya itwe nkoku Yahwe abarora. Eki tukikora obututeeka omutima ha miringo yabo enungi hatali ha butahikirra bwabo. Kandi nitusobora kumaraho obutetegerezangana omu mulingo ogw’okugonza kakuba ‘tukorrangana kurungi n’emitima y’embabazi, nituganyirangana.’ (Bef. 4:32) Eki nikiija kusikiriza abantu abarukugonza kutwazibwa omu mulingo ogw’okugonza kwija omu rugonjo orw’eby’omwoyo. b
IKARA OMU RUGONJO ORW’EBY’OMWOYO
19. (a) Nk’oku kyolekerwe omu kasanduuko, “ Bakaruga Omu Mananu Baagaruka,” abaagarukire omu rugonjo orw’eby’omwoyo bakagamba ki? (b) Kiki ekitusemeriire kucweramu kimu kukora? (Rora ekisisani.)
19 Mali nitusiima muno habw’okuba omu rugonjo orw’eby’omwoyo! Nirweyongera kuba rurungi kukira na kara, kandi rweyongiire kubamu abantu baingi abarukuramya Yahwe kukira na kara. Leka twikale nitwoleka okusiima habw’orugonjo runu orw’atuteriireho. Omuntu wena arukugonza kuba n’okuhuumuzibwa, kusemererwa, kumarwa, kutekaana n’okuba n’obulinzi asemeriire kwija omu rugonjo orw’eby’omwoyo kandi atarurugamu! Baitu tusemeriire kwikara tuli bulindaara habwokuba Sitaani alengeho kutubiihabiiha nukwo tururugemu. (1 Pet. 5:8; Kus. 12:9) Tusemeriire kumwagirra. Leka tuteekemu amaani kwikaza orugonjo orw’eby’omwoyo ruli rurungi kandi nirwera.
Abo abaikara omu rugonjo orw’eby’omwoyo nibaija n’okwegondeza omu nsi empyaka omu kasumi k’omu maiso (Rora akacweka 19)
WAKUGARUKIREMU OTA?
-
Orugonjo orw’eby’omwoyo nurwo ruha?
-
Bintu ki ebitwegondezaamu omu rugonjo orw’eby’omwoyo?
-
Nitusobora tuta kisikiiriza abandi kwija omu rugonjo runu?
EKIZINA 144 Amaiso Gaawe Gaikaze ha Mpeera!
a KUSOBORRA AMAKURU G’EKIGAMBO: “Orugonjo orw’eby’omwoyo” nirumanyisa enyikara nambere turamiza Yahwe omu businge n’omu bumu. Omu rugonjo runu twegondeza omu kuba n’enkoragana enungi na Yahwe, kandi twikara omu businge n’Abakristaayo bagenzi baitu.
c KUSOBORRA EKISISANI: Ab’oruganda abandi baliyo nibabaza hamu ha Kyombeko ky’Obukama baitu ow’oruganda omu ayesoroire.
