1. Omu kyasa eky’okubanza abantu ba Yahwe baali batekaniziibwe bata?

 YAHWE obw’aha abantu be obujunanizibwa, aba n’abanihirramu kubuhikiiriza omu mulingo ogutekaniziibwe kurungi. (1 Kol. 14:33) Ekyokurorraho, Yahwe n’agonza amakuru amarungi gatebezebwe omu nsi yoona. (Mat. 24:14) Kandi ahaire Yesu obujunanizibwa obw’okwebembera omulimo ogu. Yesu akigumya ngu gwakorwa omu mulingo ogutekaniziibwe kurungi. Omu kyasa eky’okubanza, ebitebe obubyatandikwahoga omu biikaro ebirukwahukana, abagurusi baakomwaga kubyebembera n’okuha oburagirizi. (Eng. 14:23) Omu Yerusalemu, akatebe akalemi akakaba nikatwarramu abakwenda n’abagurusi abamu abaali bamazire akasumi, baakoraga encwamu enkuru kandi ebitebe byona byanihirwaga kuzihondera. (Eng. 15:2; 16:4) Habwokuba Abakristaayo bakahondera oburagirizi obubaheebwaga, ‘ebitebe bikaguma omu kwikiriza kandi byakanyaga omuhendo obukyabukya.’—Eng. 16:5.

2. Kuruga 1919, Yahwe aikaire naaha ata abantu be oburagirizi n’ebyokulya eby’omwoyo?

² N’omu kasumi kanu, Yahwe nakyagumizaamu kutekaniza abantu be. Kuruga 1919, Yesu aikaire nakozesa guruupu entaito ey’abasaija abaseserweho amagita kutekaniza omulimo ogw’okutebeza n’okuha abantu be ebyokulya eby’omwoyo. a (Luk. 12:42) Kandi mali Yahwe naaha omugisa omulimo ogubarukukora.—Is. 60:22; 65:​13, 14.

3-4. (a) Bazaaho ekyokurorraho ekirukwoleka omulingo tugasirwa habw’okutekanizibwa kurungi. (b) Nitwija kubazaaho ki omu kicweka kinu?

 ³ Obutwakubaire tutatekaniziibwe kurungi, titwakusoboire kuhikiiriza omulimo Yesu oguyatuhaire. (Mat. 28:​19, 20) Ekyokurorraho, kakuba ab’oruganda batatekaniza kurungi ebiikaro eby’okutebezaamu, buli omu yakutebiize nambere arukugonza. Abatebezi baakutebiize muno omu biikaro ebimu kukira ebindi. N’osobora kutekerezaaho emiringo endi eitugasirwamu habwokuba tutekaniziibwe kurungi?

⁴ Nk’oku Yesu yatekaniize abahondezi be obwakaba ali omu nsi, n’akasumi kanu nakyagumizaamu kutekaniza abantu ba Ruhanga. Omu kicweka kinu, nitwija kubazaaho ekyokurorraho Yesu ekiyatuterireeho n’omulingo ekitebe kyaitu kihondera ekyokurorraho kye. Ekindi, nitwija kubazaaho omulingo tusobora kwoleka ngu nitusiima ekitebe kya Yahwe.

EKITEBE KYAITU KIHONDERA EKYOKURORRAHO KYA YESU

5. Mulingo ki ogumu ekitebe kya Yahwe kihondera ekyokurorraho kya Yesu? (Yohana 8:28)

⁵ Yesu ebiyakozere n’ebiyabalize akabyegera hali Ise ow’omu iguru. Omulingo nugwo gumu, enyegesa n’oburagirizi kuruga omu kitebe kya Yahwe bisigikirra ha Kigambo kya Ruhanga. (Soma Yohana 8:28; 2 Tim. 3:​16, 17) Butoosa twikara nitwijukibwa kusoma Ekigambo kya Ruhanga n’okuteeka omu nkora ebiturukwega. Tugasirwa tuta obutuhondera oburagirizi obu?

6. Mulingo ki omukuru ogusobora kutukonyera kugasirwa omu kwesomesa Baibuli?

⁶ Tugasirwa muno obutwesomesa Baibuli nitukonyerwa ebitabu byaitu ebirukusigikirra ha Baibuli. Eki kitukonyera kurora omulingo oburagirizi kuruga omu kitebe kya Yahwe burukwikiranganiza na Baibuli eky’egamba. Obuturora ngu oburagirizi obutuhairwe nibusigikirra ha Byahandiikirwe, tweyongera kwesiga ekitebe kya Yahwe.—Bar. 12:2.

7. Butumwa ki Yesu obuyatebiize, kandi ekitebe kya Yahwe kihondera kita ekyokurorraho kye?

⁷ Yesu akatebeza ‘amakuru amarungi ag’Obukama bwa Ruhanga.’ (Luk. 4:​43, 44) Ekindi, akaragira abegeswa be kutebeza ha Bukama bwa Ruhanga. (Luk. 9:​1, 2; 10:​8, 9) Kasumi kanu, boona abali omu kitebe kya Yahwe batebeza ha Bukama bwa Ruhanga kababe nibaikara nkaha rundi baine obujunanizibwa bwa mulingo ki.

8. Mugisa ki ogw’amaani ogutwine?

⁸ Kugambiraho abandi ha Bukama bwa Ruhanga tugutwara nk’omugisa ogw’amaani. Tibali boona abatunga omugisa ogu. Ekyokurorraho, Yesu obwakaba ali omu nsi, ataikirize emyoyo emibi kumubazaaho hali abantu abandi. (Luk. 4:41) Kasumi kanu, omuntu atakatandikire kutebeza amakuru amarungi, asemeriire kuba nayetwaza omu mulingo ogurukusemeza Yahwe. Omugisa ogw’okutebeza amakuru amarungi tugutwara nk’ogw’omuhendo obutukora kyona ekiturukusobora kugambiraho abandi amakuru amarungi. Nka Yesu, ekigendererwa kyaitu kiri eky’okutebeza abantu n’okubegesa amananu.—Mat. 13:​3, 23; 1 Kol. 3:6.

9. Ekitebe kimanyisize kita abantu ibara lya Ruhanga?

⁹ Yesu akamanyisa abantu ibara lya Ruhanga. Obwakaba nasaba Ise ow’omu iguru, akagamba ati: “Nkabamanyisa ibara lyawe.” (Yoh. 17:26) Ekitebe kya Yahwe kyegera ha kyokurorraho kya Yesu kuraba omu kukonyera abantu kumanya ibara lya Ruhanga. Gumu ha miringo ekitebe kikozere eki nukwo kuraba omu mpindura ya Baibuli eya New World Translation of the Holy Scriptures. Empindura  ya Baibuli enu egarwire ibara lya Ruhanga omu biikaro nambere likaba lisemeriire kuba. Empindura enu yoona rundi ekicweka kyayo biri omu ndimi ezirukuhingura omu 270. Omu Appendix A4 na A5 ez’empindura enu, harumu ensonga habwaki ibara lya Ruhanga lyagarwirwe omu Baibuli enu. Omu Appendix C, ey’erukusangwa omu Study Bible harumu obwakaiso oburukwoleka ngu ibara lya Ruhanga lisemeriire kuba omu bitabu eby’Oruyonaani emirundi 237.

10. Ebigambo eby’omukazi kuruga Myanmar nibikwegesa ki?

¹⁰ Nka Yesu, nitugonza kukonyera abantu baingi nk’oku turukusobora kumanya ibara lya Ruhanga. Omukazi ow’aine emyaka 67 kuruga Myanmar akatandika kurra obuyayegere ibara lya Ruhanga. N’agamba ati: “Gunu murundi gw’okubanza omu bwomeezi bwange kukimanya ngu Ruhanga aine ibara kandi niryo Yahwe. . . . Munyegeseze ekintu ekirukukirayo obukuru omu bwomeezi bwange.” Ekyokurorraho kinu nikyoleka ngu kwega ibara lya Ruhanga nikisobora kukwataho abantu abaine emitima enungi.

GUMIZAAMU N’OYOLEKA OKUSIIMA HABW’EKITEBE KYA YAHWE

11. Abagurusi nibasobora bata kwoleka ngu nibasiima ekitebe kya Yahwe? (Rora ekisisani.)

¹¹ Abagurusi booleka bata ngu nibasiima ekitebe kya Yahwe? Obubatunga oburagirizi, basemeriire kubusoma n’okubwetegereza kurungi kandi bakole kyona ekibarukusobora kubuteeka omu nkora. Ekyokurorraho, tibagarukira ha kutunga oburagirizi ha mulingo basemeriire kuha ebicweka omu nsorrrokano kyonka, baitu n’omulingo basobora kusaba omu nsorrokano, n’omulingo basemeriire kurolerramu entaama za Kristo. Obubahondera oburagirizi bunu kuruga omu kitebe, kikonyera ab’oruganda na banyaanya itwe kwehurra baine obulinzi n’okwehurra ngu Ruhanga n’abagonza.

12. (a) Habwaki tusemeriire kukorra hamu naabo abarukutwebembera? (Abaheburaniya 13:​7, 17) (b) Habwaki tusemeriire kuteeka omutima ha miringo enungi ey’abo abarukutwebembera?

¹² Obututunga oburagirizi kuruga omu bagurusi, tusemeriire kubuhondera. Obutukora eki, nikiija kubanguhira kuhikiriza obujunanizibwa Yahwe obw’abahaire. Baibuli etutererra kworobera n’okuteekamu ekitiinisa abo abarukutwebembera. (Soma Abaheburaniya 13:​7, 17.) Baitu obwire obumu, eki nikisobora kutugumira. Habwaki? Habwokuba bali bantu abatahikiriire. Baitu kakuba tuteeka omutima ha butahikirra bwabo omu kiikaro ky’okuguteeka ha miringo yabo enungi, nitwija kuba nitukonyera abanyanzigwa baitu. Omu mulingo ki? Abanyanzigwa baitu nibagonza kutuleetera kugurukyagurukya Ruhanga obwaraba nakozesa ekitebe kye kutwebembera. Nahabweki, kiki ekitusobora kukora kumanyirra n’okwetantara ebisuba by’abanyanzigwa baitu?

OTAIKIRIZA ABANDI KUKULEETERA KULEKA KWESIGA EKITEBE KYA YAHWE

13. Abahakaniza Ruhanga babazaaho bata ekitebe kye?

¹³ Abarukuhakaniza Ruhanga balengaho kubazaaho kubi ekitebe kye. Ekyokurorraho, twegere kuruga omu Byahandiikirwe ngu Yahwe nanihirramu abaheereza be kuba becumi omu mubiri, omu ngeso, n’omu by’omwoyo. Agamba ngu ogu wena ow’akora ebintu ebibi kandi akanga kwegarukamu, asemeriire kubingwa omu kitebe. (1 Kol. 5:​11-13; 6:​9, 10) Tworobera ekiragiro eki. Baitu abarukutuhakaniza balengaho kukikozesa kutujunaana ngu tutanga abantu kukora ebibarukugonza, tubacwera omusango, kandi tutwine embabazi.

14. Nooha ali enyuma y’ebisuba ebibazibwaho ekitebe kya Yahwe?

 ¹⁴ Manya nooha arukuhakaniza ekitebe kya Yahwe. Sitaani Diabolo nuwe aleetera abantu kutubazaaho ebisuba. Nuwe “ise ebisuba.” (Yoh. 8:44; Kub. 3:​1-5) Nahabweki, tusemeriire kunihira ngu Sitaani naija kukozesa abasagiki be kubazaaho ekitebe kya Yahwe ebisuba. Eki nikyo kyabaireho omu kyasa eky’okubanza.

15. Abebembezi b’amadiini bakakora ki hali Yesu n’abahondezi be?

¹⁵ N’obukiraaba ngu Omwana wa Ruhanga Yesu akaba ahikiriire kandi akakora ebyamahano bingi, Sitaani akakozesa abantu abamu kubazaaho Yesu ebisuba. Ekyokurorraho, abebembezi b’amadiini bakagambira abantu ngu amaani Yesu yakozesaaga kubinga emyoyo emibi garugaga ‘hali mukuru w’emizimu.’ (Mar. 3:22) Yesu obw’akaba nacwerwa omusango, abebembezi b’amadiini bakamujunaana ngu n’ajuma Ruhanga kandi baragira abantu kusaba ngu aitwe. (Mat. 27:20) Hanyuma, abahondezi ba Kristo obubaali nibatebeza amakuru amarungi, abaali nibabahakaniza ‘bakaimukiriza emitima yabamahanga nibabahindura’ nukwo bahiiganize Abakristaayo. (Eng. 14:​2, 19) Watchtower eya Desemba 1, 1998, ekabazaaho Engeso Ezabakwenda 14:2 eti: “Abaali nibahakaniza Abakristaayo batagarukire ha kwanga amakuru amarungi, baitu bakababazaaho ebisuba nukwo abantu bange kubahuliiriza kandi babanobe.”

16. Kiki ekitusemeriire kwijuka kakuba tuhurra nibatubazaaho ebisuba?

¹⁶ Ebisuba bya Sitaani bitagarukire omu kyasa eky’okubanza honka. Na kasumi kanu, ‘nakyabiihabiiha ensi zoona.’ (Kus. 12:9) Obworahurra ebintu ebitahikire ebirukukwata  ha kitebe kya Yahwe rundi h’ab’oruganda abarukwebembera, ijuka omulingo abanyanzigwa ba Ruhanga batwaizeemu Yesu n’abahondezi be ab’omu kyasa eky’okubanza. Nk’oku Baibuli yarangire, abantu ba Yahwe nibahiiganizibwa kasumi kanu. (Mat. 5:​11, 12) Kakuba tumanya nambere ebisuba ebibatubazaaho biruga, nitwija kubyetantara. Nitusobora tuta kubyetantara?

17. Nitusobora tuta kwetantara akabi akaruga omu bisuba ebibatubazaaho? (2 Timoseo 1:13) (Rora akasanduuko “ Omulingo Tusemeriire Kwetwaza Obubatubazaaho Ebisuba.”)

¹⁷ Wetantale ebisuba. Omukwenda Paulo akooleka ekitusemeriire kukora kakuba tuhurra ebisuba. Akagambira Timoseo kutererra “abamu baleke . . . okuhurra enganikyo” kandi bange “enganikyo ezitali zedini ezobutami.” (1 Tim. 1:​3, 4; 4:7) Tekerezaaho kinu. Omwana omuto nasobora kukoma ekintu ekirofu nakiteeka omu kanwa, baitu omuntu omukuru tasobora kukikora habwokuba namanya akabi akasobora kurugamu. Omulingo nugwo gumu, twetantara ebisuba ebibatubazaaho habwokuba nitumanya endugirro yabyo. Oihireho, tuhuliiriza ‘ebigambo ebyomiire’ eby’amananu.—Soma 2 Timoseo 1:13.

18. Nitusobora tuta kwoleka ngu nitusiima ekitebe kya Yahwe?

¹⁸ Turozere omulingo ekitebe kya Ruhanga kihondera ekyokurorraho kya Yesu omu miringo esatu. Obworaababa n’oyesomesa Baibuli, lengaho kuserra emiringo endi ekitebe kya Yahwe kihondera ekyokurorraho kya Yesu. Konyera abandi omu kitebe kyawe kweyongera kwesiga ekitebe kya Yahwe. Gumizaamu n’oyoleka okusiima kuraba omu kuheereza Yahwe n’obwesigwa n’okwikara omu kitebe kye ekyarukukozesa kuhikiriza eby’agonza. (Zab. 37:28) Leka itwena tugumizeemu nitwoleka okusiima kwaitu habw’omugisa ogw’okuba kicweka ky’ekitebe kya Yahwe ekirumu abantu abesigwa kandi abaine okugonza.