Nosobora kugarukamu ebikaguzo binu nosigikirra ha magaziini Omunaara gw’Omulinzi eza 2019?

Omurago gwa Ruhanga ogurukugamba ngu: “Ekyokurwanisa ekirukukorwa okurwanisa iwe tikiribona omugisa na kake” nigumanyisa ki? (Is. 54:17)

Nitukigumya ngu Yahwe ali tulinda hali “okuhirra okwabatinwa.” (Is. 25:4, 5) Abanyanzigwa baitu tibasobora kutuhikyaho akabi akalituhwerekereza ebiro n’ebiro.​—w19.01, rup. 6-7.

Omulingo Ruhanga yatwaizeemu abantu Bakanani hamu n’Abaisaleri abamujemeraga gukooleka guta obwinganiza?

Yahwe akacwera omusango abo boona ababonabonesaga abantu abatarukwesobora nk’abakazi n’abaana. Baitu yahaga abantu be omugisa obubalindaga obwesigwa bwabo haluwe kandi obubatwazanganaga omu mulingo gw’obwinganiza.​—w19.02, rup. 22-23.

Nitusobora kukora ki kakuba omuntu atali muheereza wa Yahwe atandika kusabisa kandi naitwe turoho?

Nitusobora kuculeera tuketwaza omu mulingo ogurukuhaisa ekitiinisa. Baitu tutagamba “amiina;” kandi tutakwatangana emikono n’abandi, esaara obweraaba negenda omu maiso. Nitusobora kusaba esaara eyaitu habwaitu omu mutima.​—w19.03, rup. 31

Habwaki kusobyaho omwana kiri kibi eky’amaani?

Omuntu obwasobyaho omwana, abasobiize omwana, ekitebe, ebiragiro bya gavumenti, n’omu maiso ga Ruhanga. Omu biikaro nambere baine ebiragiro ebirukwata ha kunyegerra omuntu anyakusobezeeho omwana, abagurusi bekamba kworobera ebiragiro ebi ebya gavumenti.​—w19.05, rup. 9-10.

N’osobora ota kuhindura entekereza yaawe?

Eky’osemeriire kukora: Saba Yahwe. Wecumitirize n’ekigendererwa eky’okwekebera. Kozesa amagezi obwaraaba noserra abanywani.​—w19.06, rup. 11.

Kiki ekitusemeriire kukora hati kwetekaniriza okuhiganizibwa?

Tusemeriire kugumya enkoragana yaitu na Yahwe. Kigumize kimu ngu Yahwe nakugonza kandi talikuhemukira. Soma Baibuli buli kiro, kandi osabe obutoosa. Kigumize kimu ngu emirago yoona erukukwata ha Obukama bwa Ruhanga niija kuhikirra. Kwata omu mutwe ebyahandiikirwe n’ebizina ebirukuhaisaniza Yahwe.​—w19.07, rup. 2-4.

Nitusobora tuta kukonyera abanyabuzaale baitu kujunwa?

Kikuru muno kubooleka ngu n’obafaaho, leka ngeso zaawe nizo zibatebeze, bamugumisiriza kandi okozese amagezi.​—w19.08, rup. 15-17.

Kusigikirra ha murago gwa Yesu oguli omu Matayo 11:28, tuhumuzibwa tuta?

Twine abaroleerezi Abakristaayo abarungi, abanywani abarungi, n’omulimo ogurukukirayo oburungi.​—w19.09, rup. 23.

Yahwe nasobora ata kutuha okugonza n’amaani ag’okukora? (Baf. 2:13)

Kakuba tusoma Ekigambo kya Ruhanga tukakyecumitirizaaho, atuha okugonza okuturukwetaaga kusobora kukora ekitutekerizeeho n’amaani ag’okukikora. Nasobora n’okutuha omwoyo gwe ogurukwera gukatuletera kweyongera kuba bakugu.​—w19.10, rup. 21.

Bintu ki eby’osemeriire kukora otakakozere encwamu ey’amaani?

Ebintu bitaano eby’osobora kukora: Seruliiriza kurungi. Saba Yahwe amagezi. Tekerezaaho ebigendererwa byawe. Manya ebirakukonyera kuhikiriza encwamu zaawe. Kora encwamu ez’orukusobora kuhikiriza.​—w19.11, rup. 27-29.

Enyegesa erukugamba ngu omwoyo tigufa ekatandikira ha bigambo bya Sitaani yagambiire Hawa?

Nikizooka tinukwo kiri. Sitaani atagambire Hawa ngu obwaralya ekijuma Ruhanga yabatangire ngu akaba nagenda kufa omubiri gwonka kandi ngu ekicweka ekitarukurorwa kigumizeemu kyomiire. Busaho nyegesa yoona ey’ebisuba ey’asigaireho hanyuma y’okusandaara okw’amaizi. Nikizooka ngu okwikiririza omu mwoyo ogutafa kikatandika hanyuma ya Ruhanga kurarangya abantu abaali nibombeka omunaara gwa Baberi.​—w19.12, rup. 15.