NDI muntu agonza kusiima? Buli omu asemeriire kwekaguza ekikaguzo eki. Baibuli ekaranga ngu omu kasumi kanu, abantu abarukukira obwingi, baija kuba ‘abatarukusiima.’ (2 Tim. 3:2) Nosobora kuba orarozere abantu abarukutekereza ngu abantu abandi basemeriire kubakorra buli kimu kyona kandi ngu nibateekwa kukibakorra. Kandi nikizooka ngu tibagonza n’okusiima habw’ebintu babakoliire. Ogonza kuba n’abantu abamulingo ogu?

Kwahukanaho n’abantu abo, abaheereza ba Yahwe nibaterererwa ngu: “Musimege.” Kandi basemeriire kusiimaga omu byona. (Bak. 3:15; 1 Bas. 5:18) Tugasirwa obutukurakuraniza omutima ogw’okusiima. Haroho ensonga nyingi ezirukwoleka ngu kusiima kutugasira.

Ensonga emu enkuru habwaki tusemeriire kwikara nitusiima eri ngu kitukonyera kwehurra kurungi. Omuntu obwasiima ayehurra kurungi kandi n’omuntu ou basiimire nauwe ayehurra kurungi. Habwaki omuntu owasiimire n’ogu ou basiimire behurra kurungi? Tekerezaaho ekyokurorraho kinu: Omuntu obwayefereza obwire bwe akakukorra ekintu ekirungi, kiba nikyoleka ngu n’akurora nk’ow’omugaso kandi n’akufaaho. Obw’okyetegereza ngu abantu abandi nibakufaaho, kikuletera kwehurra kurungi. Kandi kinu nikyo kyahikire hali Rusi. Boazi akooleka Rusi embabazi. Hataroho kugurukyagurukya kwona, Rusi akasemererwa muno kukimanya ngu haroho omuntu arukumufaaho.​—Rus. 2:10-13.

Kikuru muno kusiima Ruhanga. Naiwe oine kuba otekerezaaho ebintu byona ebirungi eby’akukoliire eby’omubiri hamu n’eby’omwoyo kandi n’eby’arukugumizaamu kukukorra. (Bir. 8:17, 18; Eng. 14:17) Omu kiikaro ky’okukozesa akaire kake kutekerezaaho ebintu byona Ruhanga eby’akukoliire, kirungi otunge obwire oburukumara kwecumitirizaaho emigisa yoona Ruhanga ey’akuhaire hamu n’ey’ahaire abantu baawe. Kwecumitirizaaho ebintu byona Ruhanga eby’akukoliire nikiija kukukonyera kwongera kumusiima kandi n’okukyetegereza nk’oku na kugonza muno.​—1 Yoh. 4:9.

Tusemeriire kwecumitirizaaho emigisa Yahwe ey’atuhaire, kandi tusemeriire n’okumusiima habw’ebintu byona eby’atukoliire. (Zab. 100:4, 5) Nikigambwa ngu “kusiima kikonyera muno abantu kutunga okusemererwa.”

Ensonga endi habwaki okusiima kw’omugaso halitwe eri ngu kugumya enkoragana yaitu n’abantu abandi. Itwena tugonza kusiimwa. Obwosiima omuntu habw’ekintu ekirungi eky’akukoliire, kigumya enkoragana yanyu. (Bar. 16:3, 4) Ekintu ekindi, abantu abakira kusiima bakira kukonyera abantu abandi. Barora omulingo baba bolekerwemu embabazi kandi kinu kibakonyera nabo kugonza kwoleka abandi embabazi. Amananu gali, kukonyera abandi kirugamu okusemererwa. Kiri nk’oku Yesu yagambire ati: “Okugaba kwomugisa okukira okuhebwa.”​—Eng. 20:35.

Robert Emmons, omu h’abebembezi b’ekitongole ekiseruliiriza ha kusiima omu University of California akagamba ati: “Kusobora kusiima tusemeriire kukyetegereza ngu itwena nitwetaaga obukonyezi obw’abantu abandi. Obwire obumu tugaba baitu kandi obundi batugabira.” Amananu gali ngu, kusobora kwomeera n’okutunga okusemererwa omu bwomeezi nitwetaaga obukonyezi obw’abantu abandi. Ekyokurorraho, nibasobora kutuha eby’okulya rundi obujanjabi. (1 Kol. 12:21) Omuntu ow’aine omutima ogw’okusiima, asiima buli kimu kyona abantu abandi bamukorra. Naiwe, ogifoire ngeso yaawe kusiima abantu habw’ebintu bakukorra?

Ensonga endi habwaki tusemeriire kwega kusiima eri ngu kitukonyera kuteeka omutima ha bintu ebirungi hatali ebibi. Obwongo bwaitu nibusisana nk’akasengiijo. Butukonyera kuteeka omutima ha bintu ebimu kandi bukingira ebintu ebindi ebitarukugasa. Kinu kitukonyera kuteeka omutima ha bintu ebirungi hatali ha bizibu byaitu byonka. Obwoyeyongera kusiima, oyeyongera kurora n’ebintu ebindi ebirungi. Kakuba omutima oguteeka ha birungi ebyoine, nikiija kukukonyera kukora ekintu omukwenda Paulo yagambire: “Musemererwege omu Mukama waitu ebiro byona.”​—Baf. 4:4.

Kuba muntu arukusiima kikukonyera kweriinda kutekerezaaho ebintu ebirukumara amaani buli kaire. Tikyanguhire kusanga omuntu ow’agonza kusiima kukwatwa ihali n’ekiniga. Abantu abagonza kusiima tibakira kuba n’omutima ogw’okugonza muno itungo. Bamarwa ebintu ebibaine kandi omutima gwabo tibaguteeka ha kutunga ebirukukiraho.​—Baf. 4:12.

Nk’Omukristaayo, okimanye ngu Sitaani nagonza ebizibu eby’orukutunga omu biro binu ebya ha mpero kukweralikiriza n’okukumaramu amaani. Kandi naija kusemererwa kakuba otunga omutima mubi ogw’okwikara notontorroma. Omutima ogu nigusobora kukulemesa kutebeza kurungi amakuru amarungi. Amananu gali ngu, okusiima kuletwa ekyana eky’omwoyo ogurukwera. Ekyokurorraho, tutunga okusemererwa habw’ebintu ebirungi Ruhanga eby’atuhaire kandi nitwikiririza omu mirago ye ey’omu busumi obw’omu maiso.​—Bag. 5:22, 23.

Nk’oku oli omu h’abaheereza ba Ruhanga, nosobora kuba n’oikirraniza n’ebintu ebibaziibweho omu kicweka kinu ebirukukwata ha kusiima. Baitu nosobora kuba okimanyire ngu kusiima n’okuba n’entekereza ey’ehikire tituzaarwa nabyo. Baitu eki kitakumaramu amaani. Nosobora kukurakuraniza kandi okaikara n’omutima ogw’okusiima. Omu mulingo ki? Tunga obwire buli kiro kwecumitirizaaho ebintu ebimu ebirungi ebyotungire omu bwomeezi bwawe ebisemeriire kukuletera kusiima. Obwoyeyongera kukora ekintu kinu, noija kusanga ngu kusiima yafooka ngeso yaawe. Eki nikiija kukuletera kuba n’okusemererwa okurukukira okwabo abateeka omutima ha bizibu byabo byonka. Tekerezaaho ebintu ebirungi Ruhanga, n’abantu abandi ebibakukoliire ebikugarramu amaani kandi ebikuletera kusemererwa. N’osobora n’okubihandiika omu katabu. Omu bintu eby’orahandiika, nosobora kuhandiika ebintu bibiri rundi bisatu ebikusemiize kiro eki.

Abamu abakozere okuseruliiriza ha nsonga enu nibagamba ngu “kwemanyiza kusiima, nikisobora kuletera obwongo bwawe kukuletera kwehurra kurungi.” Omuntu anyakwine omutima ogw’okusiima, aikara asemeriirwe. Nahabweki, tekerezaaho ebintu ebirungi eby’otungire, obyegondezeemu kandi oikale nosiima! Omu kiikaro eky’okurora ebintu eby’oine nk’ebitaine omugaso, ‘siima Yahwe habwokuba murungi.’ Kandi, “omu byona musimege.”​—1 Byom. 16:34; 1 Bas. 5:18.