Nikizooka ngu tinukwo kiri. Sitaani atagambire Hawa ngu obwaralya ekijuma Ruhanga yabatangire ngu akaba nagenda kufa omubiri gwonka kandi ngu ekicweka ekitarukurorwa (abantu baingi ekibeeta omwoyo) kigumizeemu kyomiire. Sitaani akabaliza omu njoka nagambira Hawa ngu kakuba alya ha muti, ‘tiyakufiire’ nakake. Akamanyisa ngu Hawa akaba nagenda kugumizaamu ali mwomeezi kandi ayegondeze omu bwomeezi oburukukira oburungi omu nsi, atali hansi y’obusobozi bwa Ruhanga.​—Kub. 2:17; 3:3-5.

Enyegesa enu ey’ebisuba ey’eroho kasumi kanu, ey’erukugamba ngu omwoyo tigufa, obweraaba etaratandikiire omu Adeni, ekatandika ddi? Titumanyire. Baitu ekitumanyire kiri ngu okuramya kwona okw’ebisuba okw’akasumi ako kukahwaho omu bwire bwa Nuha omu kusandaara okw’amaizi. Busaho nyegesa yoona ey’ebisuba eyasigaireho hanyuma y’okusandaara okw’amaizi habwokuba Nuha n’eka ye nubo bonka abasigaireho kandi boona baramyaga omu mulingo oguhikire.

Nahabweki enyegesa enu ey’erukugamba ngu omwoyo tigufa, eine kuba yatandikire hanyuma y’okusandaara okw’amaizi. Ruhanga obuyaburanganiize endimi z’abantu ha munaara ogwa Baberi kandi bararaanga “okuhika omu nsi zona,” nikizooka ngu, bakagenda n’entekereza erukugamba ngu omwoyo gw’omuntu tigufa. (Kub. 11:8, 9) Akasumi enyegesa enu yatandikiiremu tikiri kikuru, baitu ekiturukugumya kiri ngu Sitaani “ise ebisuba” nuwe ndugirro y’enyegesa enu kandi akasemererwa obuyajanjaire hoona.​—Yoh. 8:44.