Yahwe akatererra Abaisaleri kuba bantu abarukwera. Kubakonyera kuba abarukwera, akabagambira ati: “Otaligendagenda nogeya omu bantu bowanyu: kunu otaliimukirra esagama eyomutahi wawe [rundi obwomeezi bwe]: nyowe ndi [Yahwe].”​—Lev. 19:2, 16.

Ekigambo “otaliimukirra” kihindwirwe kurungi kuruga omu rulimi Oruheburaniya, baitu kyo nikimanyisa ki? Ekitabu kimu eky’Abayudaaya ekirukukwata ha kitabu eky’Ebyabalevi nikigamba kiti: “Ekicweka kinu eky’orukarra . . . kigumire kwetegereza habwokuba kigumire kumanya amakuru gonyini ag’ekigambo kinu eky’Oruheburaniya habwokuba nikisobora kumanyisa ‘otemerra eruguru, ha rubaju, rundi haihi.’”

Abakugu abamu nibatekereza ngu ekigambo kinu kiine akakwate n’orukarra orwa 15, orukugamba: “Mutalikora ebyokutahikirra obumucwa emisango: otalisorora omunaku omu bantu, kunu otalitaho ekitinisa ha bamani: baitu omu kuhikirra olicwera omusango omutahi wawe.” (Lev. 19:15) Ago obugaraaba gali mananu, nikimanyisa ngu ekiragiro ekirukusangwa omu rukarra orwa 16 ekirukutanga ‘kwimukirra’ omuntu ondi, kyakubaire nikimanyisa bakaba batasemeriire kwoleka obutali bwinganiza omu misango, omu bizineesi, omu nsonga z’amaka, rundi kukora ekintu kyona ekitali ky’obwesigwa kusobora kwegasira. Ky’amananu ngu, titusemeriire kukora ebintu ebi, baitu haroho omulingo ogundi ogwanguhire ogutusobora kwetegereza ekigambo kinu ekiri omu rukarra rwa 16.

Tekerezaaho ebigambo eby’okubanza omu rukarra oru. Ruhanga n’aragira abantu be kwerinda kugendagenda nibageya rundi nibahangirra bangezi baabo. Ikara nokiijuka ngu kuhangirra kw’amaani muno kukira orugambo, n’obukiraaba ngu orugambo narwo nirusobora kurugamu ebizibu. (Nfu. 10:19; Mug. 10:12-14; 1 Tim. 5:13-15; Yak. 3:6) Omuhangirizi akira kubaza ebisuba akigenderiire, n’ekigendererwa ky’okusiisa ibara ly’omuntu. Omuhangirizi n’asobora kuha obwakaiso obw’ebisuba ha muntu ondi, n’obukiraaba ngu nikisobora kurugirramu omuntu ogu kufa. Ijuka ngu abasaija abahangirizi bakaha obwakaiso obw’ebisuba hali Nabosi, eky’amuletiire kuteerwa amabale akaitwa. (1 Ki. 21:8-13) Nahabweki nk’oku kibaziibweho omu kicweka ekyakabiri eky’Ebyabalevi 19:16, omuhangirizi akaba nasobora kwimukirra obwomeezi bw’omuntu ondi kurabira omu kumuletera kufa.

Kwongerraho omuntu nasobora kuhangirra omuntu ondi, habwokuba akamunoba. Omu 1 Yohana 3:15, nihagamba hati: “Wena anyakunoba mugenziwe nuwe muisi: kandi mumanyire ngu musaho muisi ayina obwomezi obutahwaho nubuikara omuluwe.” Ekindi Ruhanga obuyamazire kubaza ebigambo ebiri omu rukarra orwa 16 akongeraho ati: “Otalinoba mwene wanyu omu mutima gwawe.”​—Lev. 19:17.

Nahabweki ekiragiro eky’embaganiza ekirukusangwa omu Ebyabalevi 19:16 nikiha Abakristaayo obuhabuzi obw’amaani. Tusemeriire kwetantarra kimu ebitekerezo ebibi n’okuhangirra omuntu ondi. Nahabweki kakuba “twimukirra” omuntu ondi kurabira omu kumuhangirra habwokuba titurukumugonza rundi tumukwatiirwe ihali, bunu nibusobora kuba bwakaiso oburukwoleka ngu tumunobere. Abakristaayo basemeriire kwetantarra kimu kunoba omuntu wena.​—Mat. 12:36, 37.