1. ‘Obusinge bwa Ruhanga’ nikyo kiki, kandi tugasirwa tuta obutuba nabwo? (Abafiripi 4:6, 7)

 HAROHO obusinge obw’embaganiza abantu omu nsi obubatamanyire. Bunu nubwo ‘obusinge bwa Ruhanga,’ oburukumanyisa okutekaana okuruga omu kuba n’enkoragana ey’omuhendo na Isiitwe ow’omu iguru. Obutuba twine obusinge bwa Ruhanga twehurra twine obulinzi. (Soma Abafiripi 4:6, 7.) Twegondeza omu kuba n’enkoragana enungi n’abandi abamugonza. Ekindi, twegondeza omu kuba n’enkorangana enungi na “Ruhanga owobusinge.” (1 Bas. 5:23) Obutumanya, tukesiga, kandi tukoorobera Isiitwe, obusinge bwa Ruhanga nibusobora kuleetera omutima gwaitu kuteekana obutuba nituraba omu nyikara ey’egumangaine.

2. Habwaki nitukigumya ngu nikisoboka kutunga obusinge bwa Ruhanga?

² Mali nikisoboka kutunga obusinge bwa Ruhanga obutuba nituraba omu kasumi akagumangaine nk’obuhacwekaho oburwaire, hakabaho ekigwererezi, obutabanguko, rundi okuhinganizibwa? Ebizibu binu byona nibisobora kutuleetera kutiina. Baitu Yesu akatererra abahondezi be ati: “Omutima gwanyu gutalituntura, nobukwakuba okutina.” (Yoh. 14:27) Ekirukusemeza kiri ngu, ab’oruganda na banyaanya itwe bahondiire obuhabuzi bwa Yesu. Habw’obukonyezi bwa Yahwe basoboire kutunga obusinge n’obukiraaba ngu nibagumira ebirengo eby’amaani.

3. Kakuba hacwekaho oburwaire obw’amaani, nibusobora buta kumaraho obusinge bwaitu?

³ Obuhacwekaho oburwaire, nihasobora kubaho empindahinduka ez’amaani omu bwomeezi. Tekerezaaho omulingo oburwaire  bwa Korona bwakwasireho abantu baingi. Omu kuseruliiriza okumu kukooleka ngu, abantu abarukukira obwingi baburwaga oturo omu kasumi ak’oburwaire bwa Korona. Omu kasumi ako ak’oburwaire, hakabaho okweyongera okw’amaani omu kwetuntura, kwenuuba, kunywa amarwa, kukozesa ebitokooza bwongo, obutabanguko omu maka, hamu n’abandi kulengaho kweyita. Kakuba hacwekaho oburwaire omu kicweka nambere orukwikara, nosobora ota kulema okwetuntura kwawe kandi okegondeza omu businge bwa Ruhanga?

4. Habwaki kumanya obunabbi bwa Yesu oburukukwata ha biro ebya ha mpero butuleetera obusinge?

⁴ Yesu akaranga ngu omu kasumi aka ha mpero nihaija kubaho ebiihe, rundi oburwaire oburukujanjaara, “ahandi nahandi.” (Luk. 21:11) Kumanya ekintu kinu, kituleetera kita obusinge? Tikituhuniiriza obuhacwekaho oburwaire, tukyetegereza ngu ebintu binu biriyo nibihikirra nk’oku Yesu yagambire. Nahabweki nitwija kuhondera obuhabuzi Yesu yahaire abo abaliba nibaikara omu kasumi aka ha mpero oburukugamba ngu: “Mwerinde, mutalituntura.”​—Mat. 24:6.

5. (a) Kusigikirra ha Abafiripi 4:8, 9, kiki ekitusemeriire kusaba obuhacwekaho oburwaire? (b) Kuhuliiriza Baibuli ey’ekwasirwe omu maraka nikisobora kita kukugasira?

⁵ Obuhacwekaho oburwaire, nikisobora kutuleetera kutiina n’okweralikirra. Eki nikyo kyahikire hali munyaanya itwe Desi. b Hanyuma ya isento, mugenzi we, hamu na dakitaali boona kufa habw’oburwaire bwa Korona, akatiina muno ngu na uwe naija kugitunga kandi agitulize nyina ow’akuzire omu myaka. Habw’okucwekaho kw’oburwaire bunu, akeralikirra ngu akaba naija kufeerwa omulimo gwe. Nahabweki akekaguza omulingo araasobora kugura ebyokulya, n’okusasurra enju. Ebintu binu bikamweralikiriza muno, kandi byamuletera n’okuburwa oturo. Baitu Desi akongera yatunga obusinge. Omu mulingo ki? Akasaba Yahwe kumukonyera kutekaana n’okwongera kutunga entekereza enungi. (Soma Abafiripi 4:8, 9.) Akahuliiriza Yahwe “namubaliza” kuraba omu Baibuli ey’ekwasirwe omu maraka. Desi nagamba ati, “amaraka g’abasomi agahehiire gakandetera kutekaana kandi ganyijukya embabazi za Yahwe.”​—Zab. 94:19.

6. Kwesomesa n’okugenda omu nsorrokano z’ekitebe nibiija kukugasira bita?

⁶ Obuhacwekaho oburwaire, emirundi ey’erukukira obwingi, kiba kitakyasoboka kukora ebintu byona nk’oku wabikoraga kara, baitu otaikiriza okucwekaho kw’oburwaire kutahirra entekaniza yaawe ey’okwesomesa n’okugenda omu nsorrokano. Ebyokurorraho eby’ab’oruganda na banyaanya itwe ebirukusangwa omu bitabu byaitu na vidiyo, nibiija kukwijukya ngu nibalinda obwesigwa bwabo hali Yahwe n’obukiraaba ngu nibaraba omu bizibu nibyo bimu. (1 Pet. 5:9) Ensorrokano niziija kukukonyera  kutekerezaaho ebintu ebirukugarramu amaani ebiri omu Baibuli. Niziija kukuha n’omugisa ogw’okugarramu abandi amaani kandi naiwe ogarurwemu amaani. (Bar. 1:11, 12) Obworatekerezaaho omulingo Yahwe asagikiremu abaheereza be obubaba barwaire, batiinire, rundi baine amasu, okwikiriza kwawe nikwija kweyongera kuguma kandi noija kukigumiza kimu ngu naiwe naija kukusagika.

7. Isomo ki eritusobora kwegera ha mukwenda Yohana?

⁷ Tekamu amaani kwikara n’obaza n’Abakristaayo bagenzi baawe. Obuhacwekaho oburwaire, nitusobora kutairra haihi Abakristaayo bagenzi baitu n’obutuba tuli nabo. Omu bwire nk’obu n’osobora kwehurra nk’omukwenda Yohana. Akaba nagonza kurora munywani we Gayo maiso h’amaiso. (3 Yoh. 13, 14) Baitu Yohana akakyetegereza ngu yakumazire akasumi atarukurora Gayo. Nahabweki Yohana akakora ekyarukusobora, akahandiikira Gayo ebbaruha. Kakuba kiba kitarukusoboka kubungira ab’oruganda na banyaanya itwe maiso h’amaiso, lengaho kubaterra nokozesa esimu, kubaterra nokozesa vidiyo, rundi kubasindikira obutumwa. Obworaikara nohikirra Abakristaayo bagenzi baawe, torukwija kuhurra amasu kandi noija kuhurra otekaine. Hikirra abagurusi kukira muno kakuba ohurra oyetuntwire kandi oikirize obuhabuzi obubarakuha.​—Is. 32:1, 2.

8. Ekigwererezi nikisobora kita kumaraho obusinge bwawe?

⁸ Obworaaba wahikirweho okusandaara kw’amaizi, omusisa, rundi omurro byasiisa ebintu byawe, nosobora kuba wayetuntwire muno kumara akasumi akaraihire. Obworaaba waferiirwe abantu baawe ab’orukugonza rundi ebintu byawe, nosobora kuba watungire okuganya, wayehurra otaine kunihira, rundi watunga n’ekiniga. Kinu tikirukumanyisa ngu nogonza muno itungo, rundi ngu toine kwikiriza. Okaraba omu kirengo ekigumire kandi abandi nibasobora kuba bakunihiiremu kwetwaza omu mulingo ogutahikire. (Yob. 1:11) Baitu nosobora kutunga obusinge n’obukiraaba ngu noraba omu nyikara ezigumire. Omu mulingo ki?

9. Biki Yesu ebiyagambire, kututekaniza hali ebigwererezi?

⁹ Ijuka Yesu ekiyagambire. Kwahukanaho n’abantu abamu omu nsi abatekereza ngu tibasobora kuhikwaho ekigwererezi, itwe nitunihira ebigwererezi kweyongera kandi bimu halibyo nibisobora kutukwataho. Yesu akagambira abahondezi be ngu, halibaho “emisisa emikoto” n’ebigwererezi ebindi empero etakahikire. (Luk. 21:11) Akongera yaranga ngu hakubaireho ‘obwemi bwingi,’ kandi kinu nikyeyolekera kimu omu bikorwa eby’obucwi bw’ebiragiro, obutabanguko, hamu n’ebikorwa byabankagunaga. (Mat. 24:12) Yesu atagambe ngu ebintu binu byakuhikire hali abo bonka abatarukuramya Yahwe. Amananu gali, baingi h’abaheereza ba Yahwe abesigwa bahikirweho ebigwererezi binu. (Is. 57:1; 2 Kol. 11:25) Yahwe nasobora kutatulinda omu mulingo ogw’ekyamahano hali ebigwererezi byona, baitu naija kutuha kyona ekiturukwetaaga kusobora kwikara tutekaine kandi tuli b’obusinge.

10. Kwetekaniriza ekigwererezi kasumi kanu, kyoleka kita ngu twine okwikiriza? (Enfumo 22:3)

¹⁰ Kwetekaniriza ekigwererezi kitakabaireho, nikiija kutwanguhira kwikara tutekaine kakuba kibaho. Baitu kukyetekaniriza kara nikimanyisa ngu titurukwesiga Yahwe? Nangwa. Amananu gali, kwetekaniriza kara ekigwererezi nikyoleka ngu nitwikiririza omu busobozi bwe obw’okuturolerra. Omu mulingo ki? Ekigambo kya Ruhanga kitutererra kwetekaniriza kara ebigwererezi ebisobora kubaho. (Soma Enfumo 22:3.) Ekitebe kya Yahwe kikaire nikitutererra kwetekaniriza kara ebigwererezi kuraba omu bicweka ebiizira omu magaziini, ensorrokano z’ekitebe  hamu n’omu birango. c Obuturaaba nitwesiga Yahwe, nitwija kuhondera oburagirizi obu kasumi kanu ekigwererezi kitakabaireho.

11. Ekyokurorraho kya Margaret nikikwegesa ki?

¹¹ Tekerezaaho ekyokurorraho kya munyaanya itwe Margaret. Bakamuragira kuruga omu ka ye hanyuma y’omurro kucwekaho omu kiikaro kye. Habwokuba abantu baingi bakaba nibalengaho kwiruka ha murundi gumu, enguudo zikaijuramu motoka nyingi kandi abantu bakaba batakyasobora kweyongerayo. Omu mwanya hakaijuramu ekiika kingi ekirukwiragura, kandi Margaret akaba aikaliire omu motoka ye ataine ah’okugenda. Baitu Margaret akakira habwokuba akaba ayetekaniize kara. Akaba ayahwire maapu omu kasaho ke ak’omu ngaro, ey’ekaba n’esobora kumukonyera kutunga omuhanda ogundi kuruga omu kiikaro eky’akaba arumu. Akasangwa aguvugiiremu kara nukwo kisobole kumwanguhira kugumanyirra kakuba habaho ekigwererezi. Habwokuba akaba ayetekaniize kara, akasobora kukiraho ekigwererezi eki.

12. Habwaki kuhondera oburagirizi obutuheebwa kitulinda kutahikwaho akabi?

¹² Kusobora kutulinda tutahikwaho akabi, ab’obusobozi nibasobora kuturagira kwikara omu maka gaitu, kulekaho amaka gaitu, rundi kuhondera oburagirizi obundi. Abantu abamu tibagonza kuhondera ebiragiro habwokuba baba batarukugonza kulekaho ebintu byabo. Baitu Abakristaayo basemeriire kwetwaza bata? Baibuli n’etugambira eti: “Mworoberege ekiragiro kyona ekyabantu habwa Mukama: rundi hali omukama, baitu nakira bona; rundi hali abalemi, baitu batumirwe ogu.” (1 Pet. 2:13, 14) N’ekitebe kya Yahwe kituha oburagirizi kutulinda tutahikwaho akabi. Kandi twikara nitwijukibwa kuha abarugusi ebibarukwetaaga kumanya nukwo basobole kutuhikirra bwangu obuhabaho ekigwererezi. Omazire ira kukikora? Nitusobora n’okutunga oburagirizi obw’okwikara omu kicweka kimu, rundi kugenda ahandi, rundi oburagirizi oburukukwata ha mulingo tusobora kutunga obukonyezi, kandi nk’oku tusobora kukonyera abandi. Kakuba tulemwa kuhondera oburagirizi nitusobora kuteeka obwomeezi bwaitu n’obw’abagurusi omu kabi. Ijuka ngu abasaija banu abesigwa baikara nibaturolerra. (Baheb. 13:17) Margaret akagamba ati: “Ninkigumya ngu kuhondera oburagirizi obutuheebwa abagurusi hamu n’ekitebe kikajuna obwomeezi bwange.”

13. Kiki ekikonyiire Abakristaayo baingi abaalekereho amaka gaabo kutunga okusemererwa n’obusinge?

 ¹³ Ab’oruganda na banyaanya itwe baingi abaalekereho amaka gabo habw’obulemu rundi obutabanguko, bakozere kyona ekibarukusobora kumanyiira enyikara yabo empyaka n’okurahuka kwejumbira omu bintu eby’omwoyo. Nk’Abakristaayo abaakara abaalekereho amaka gaabo habw’okuhiganizibwa, ab’oruganda na banyaanya itwe banu bagumizaamu “nibatebeza Ekigambo.” (Eng. 8:4) Okutebeza kubakonyera kuta omutima ha Bukama hatali ha nyikara zaabo ezigumire. Ekirugiremu, basoboire kwikara baine okusemererwa hamu n’obusinge.

14. Okuhiganizibwa nikusobora kuta kumaraho obusinge bwaitu?

¹⁴ Okuhinganizibwa nikusobora kutumaraho ebintu bingi ebikira kutuletera obusinge. Tutunga okusemererwa obutusorrokana hamu, tukejumbira omu kutebeza omu rwijwire n’okukora emirimo yaitu eya buli kiro tutarukutiina ngu nibaija kutukwata. Kakuba obugabe bwaitu obu babutwihaho, nitusobora kwetuntura kandi tukatiina kiki ekirahonderaho. Tikiri kibi kwehurra tuti. Baitu nabwo tusemeriire kwegendereza. Yesu akagamba ngu okuhiganizibwa nikusobora kuletera abahondezi be kutabaijuka. (Yoh. 16:1, 2) Nahabweki, nitusobora tuta kwikara twine obusinge nobuturukuba nituhiganizibwa?

15. Habwaki tutasemeriire kutiina okuhiganizibwa? (Yoh. 15:20; 16:33)

¹⁵ Ekigambo kya Ruhanga nikitugambira kiti: ‘Bona abarukwenda okukwata engeso ezokutina Ruhanga omu Kristo Yesu balihiganizibwa.’ (2 Tim. 3:12) Ow’oruganda Andrei kikamugumira muno kwikiriza amananu ago hanyuma y’omulimo gw’okutebeza kutangwa omu ihanga lye. Akagamba ati: ‘Omu ihanga lyaitu harumu Abakaiso ba Yahwe baingi. Ab’obusobozi nibasobora bata kutukwata itwena?’ Omu kiikaro ky’ekintu kinu kuletera Andrei obusinge, kikamuletera kwetuntura buli kaire. Ab’oruganda abandi bakaleka ensonga omu mikono ya Yahwe, tibalengaho kutekereza ngu tibarukwija kukwatwa. Bakakimanya ngu nibasobora kukwatwa baitu batetuntule muno nka Andrei. Nahabweki akacwamu kuba n’entekereza nk’eyabo kandi yayesigira kimu Yahwe. Omu kaire kake akatunga obusinge kandi hati aine okusemererwa n’obwaraaba naraba omu bizibu bingi. Ekintu nk’eki naitwe nikisobora kutuhikaho. Yesu  obuyatugambiire kwikara nitunihira kuhiganizibwa, akongera yatugumya ngu nitusobora kwikara tuli besigwa.​—Soma Yohana 15:20; 16:33.

16. Buragirizi ki obutusemeriire kworobera obuturukuba nituhiganizibwa?

¹⁶ Omulimo gwaitu obugutangwa, rundi gukatekwaho ebiragiro eby’amaani, nitusobora kutunga oburagirizi kuruga ha ofiisi y’itaagi hamu n’abagurusi. Ekigendererwa ky’oburagirizi bunu kiba ky’okutulinda, kukigumya ngu twaikara nitutunga ebyokulya eby’omwoyo, n’okutukonyera kugumizaamu nitutebeza nk’oku kirukusoboka. Kora kyona ekyorukusobora kworobera oburagirizi bwona obw’otunga n’obukiraaba ngu torukwetegereza kurungi habwaki bukuhairwe. (Yak. 3:17) Ekindi, otalibazaaho ebirukukwata h’ab’oruganda na banyaanya itwe rundi emirimo y’ekitebe hali abo abatasemeriire kuzimanya.​—Mug. 3:7.

17. Kusisanaho n’abakwenda ab’omu kyasa eky’okubanza, kiki ekitusemeriire kukora?

¹⁷ Emu ha nsonga enkuru habwaki Sitaani atahirra abantu ba Ruhanga niyo ngu baine omulimo ogw’okuha obwakaiso hali Yesu. (Kus. 12:17) Otaikiriza Sitaani n’ensi ye kukutiinisiriza. Obutugumizaamu nitutebeza kandi nitwegesa n’obukiraaba ngu nibatuhakaniza, kituleetera okusemererwa n’obusinge. Ab’obusobozi Abayudaaya omu kyasa ky’okubanza obubaragiire abakwenda kuleka kutebeza, abasaija banu abesigwa bakacwamu kworobera Ruhanga. Bakagumizaamu nibatebeza, eky’abaletiire okusemererwa. (Eng. 5:27-29, 41, 42) Amananu gali, omulimo gwaitu obugutekwaho ebiragiro eby’amaani, tusemeriire kutebeza omu mulingo ogw’amagezi. (Mat. 10:16) Baitu obutukora kyona ekiturukusobora, nitwija kutunga obusinge oburuga omu kusemeza Yahwe hamu nokugambiraho abandi obutumwa oburukujuna obwomeezi.

18. Noha asobora kutuha obusinge bwonyini?

¹⁸ Nitukigumiza kimu ngu n’omu busumi obugumangaine muno nitusobora kuba n’obusinge. Omu busumi nk’obu tusemeriire kukiijuka ngu obusinge obuturukwetaaga nubwo obusinge bwa Ruhanga, obu nubwo obusinge Yahwe wenka obw’asobora kutuha. Mwesige obuhacwekaho oburwaire, obuhabuzi ekigwererezi, rundi okuhiganizibwa. Ikara haihi n’ekitebe kye. Omutima guteeke h’akasumi ak’omu maiso akarungi akarukwija. Obworakora ebi, “Ruhanga owobusinge araikaraga [naiwe].” (Baf. 4:9) Omu kicweka ekirukuhonderaho, nitwija kurora omulingo tusobora kukonyeramu Abakristaayo bagenzi baitu abarukuraba omu bizibu, kusobora kutunga obusinge bwa Ruhanga.