Yahwe obuyaragiire abantu ‘kwijuza ensi, bakagirya,’ akaba namanyisa ngu akasumi kakuhikire ensi yoona efooke Orugonjo Orurungi. (Kub. 1:28) Naabo abarukwija kwomeera ebiro n’ebiro nibaija kworobera ekiragiro nikyo kimu. Ensi terukwija kuba eri rugonjo orurungi ha kubanza, habwokuba orugonjo rwa Adeni tirukyaroho. Halibaho bingi eby’okukora kurugira kimu ha kubanza kusobora kusemeza ebicweka by’ensi ebiriba omu matongo. Hataroho kugurukyagurukya ogu nigwija kuba mulimo ogw’amaani!

Kinu nikitwija omulimo Abaisaleri baali baine kukora bagarukire kuruga omu Baburoni. Ensi yabo ekaba emazire emyaka 70 etarukwikarwamu. Baitu Isaya akaranga ngu habw’obukonyezi bwa Yahwe bakwongiire kufoora ensi yabo nungi. Obunabbi bukagamba buti: “Yafora irungu lyayo okusisana Adeni, nibuga lyayo okuba nkoruharo rwa [Yahwe].” (Is. 51:3) Yahwe akakonyera Abaisaleri kufoora ensi yabo nungi. Omu mulingo nugwo gumu, abo abaragwetwa ensi, nibaija kusobora kugifoora orugonjo orurungi. Kandi na hati n’osobora kwoleka ngu nogonza kwejumbira omu mulimo ogu.

 Omulingo gumu osobora kukoramu eki, nukwo kwikaza eka yaawe, ebiikaro ebikwetoroire biri byecumi kandi bitekaniziibwe kurungi. N’osobora kukikora abataahi baawe kababe batali becumi. N’osobora n’okukonyera omu kuyonja n’okudabiriza Ekyombeko kyanyu eky’Obukama hamu n’eky’orusorrokano orukooto. Enyikara yaawe obweraaba n’ekusobozesa, n’osobora kwehandiikisa nukwo osobole kukonyera omu mulimo ogw’okukonyera abahikirweho ebigwererezi. Eki nikiija kwoleka ngu nogonza kukonyera Abakristaayo bagenzi baawe. Wekaguze, ‘Ninsobora kwega obukugu obundakozesa kakuba Yahwe anyikiriza kugwetwa ensi empyaka?’

Yesu obuyahumbwire muhara wa Yairo, ahonaaho akagamba ngu bamuhe ebyokulya. (Mar. 5:42, 43) Nigusobora kuba gutarabaire mulimo gw’amaani kurolerra omwisiki omuto ow’emyaka 12. Baitu tekerezaaho omulimo ogulyetaagisibwa kukorwa, Yesu obwalihikiriza omurago ogurukugamba ngu: “Akasumi nikaija, bona abali omu bituro akabalihulirramu irakalye, kandi balirugamu.” (Yoh. 5:28, 29) N’obukiraaba ngu Baibuli tetugambira ebirukukiraho, nitusobora kuteekerezaaho abo abaliba bahumbuukire ebibalyetaaga nk’ebyokulya, ahokuraara, hamu n’eby’okujwara. Nahati n’osobora kwoleka ngu oyetekaniize kukonyera. Tekerezaaho ebikaguzo binu.

Obubaranga ngu omuroleerezi w’ekicweka nagenda kubungira ekitebe kyanyu, oyehayo kumuraaliza ha kiihuro? Abaheereza ab’akasumi koona ab’embaganiza obubaruga ha Beseri bakasindikwa omu mulimo ogw’okutebeza, rundi omuroleerezi w’ekicweka obwaba atakyaheereza omu mulimo ogw’okubungira ebitebe, n’osobora kubakonyera okabatungira ah’okwikara? Orusorrokano orukooto orw’ebiro bisatu, rundi orusorrokano orukooto orw’embaganiza obururaaba nirugenda kuba omu kicweka kyanyu, n’osobora kwehayo kukonyera rutakatandikire, rundi hanyuma yarwo, rundi okehayo kutangirra abagenyi?

Kusigikirra ha Engeso Ezabakwenda 24:15, nitunihira ngu obuhumbe n’obuhumbe bw’abantu nibaija  kuhumbuuka. Baingi omulibo nubo abataratungire omugisa ogw’okwegaho Yahwe. Omugisa ogu nabaija kugutunga hanyuma y’okuhumbuuka. a Abaheereza ba Yahwe abesigwa nibaija kwejumbira omu mulimo ogu ogw’okwegesa. (Is. 11:9) Munyaanya itwe Charlotte, ow’atebiize omu Bulaaya, South America, hamu na Afrika, alindiriire akasumi ako n’ekihika kingi. N’okusemererwa kwingi nagamba ati: “Ndindiriire n’ekihika kwegesa abantu abarahumbuuka. Obunsomaho omuntu ow’akaba aroho omu busumi obwakara, nkira kuteekereza nti: ‘Omuntu onu kakuba akaba amanyire Yahwe, obwomeezi bwe bwakubaire bw’embaganiza.’ Ndindiriire n’ekihika kingi kugambira abo abaliba bahumbuukire ebirukukwata hali Yahwe n’omulingo obwomeezi bwabo nibwija kuba burungi obubaramuheereza.”

N’abaheereza ba Yahwe abesigwa abaabaireho Yesu atakaizire omu nsi, nibaija kuba nabingi eby’okwega. Tekerezaaho nk’oku guliba mugisa gw’amaani, kandi kirituleetera okusemererwa kusoborra Danieri ngu obunabbi obuyahandiikire baitu obwatarayetegeriize nk’oku bwahikiriziibwe. (Dan. 12:8) Rundi tekerezaaho nk’oku kiriba kukonyera Rusi na Naome kukimanya ngu Masiya akaba ali mwijukuru wabo? Kanikiija kutusemeza muno kwejumbira omu mulimo ogw’ensi yoona ogw’okwegesa tutarukweralikirra kusindikirizibwa hamu n’okuhugurwa, ebiroho omu nsi ya Sitaani kasumi kanu!

Kiki eky’osobora kukora hati kwoleka ngu oyetekaniize kwegesa abo abaraaba bahumbuukire? Omulingo gumu osobora kukikoramu, nugwo ogw’okukora kyona ekyorukusobora kufooka omwegesa omurungi n’okwejumbira omu mulimo gw’okutebeza butoosa. (Mat. 24:14) N’obukiraaba ngu habw’emyaka rundi enyikara ezindi nibikulemesa kwejumbira omu mulimo ogw’okutebeza hati nk’oku wakugondeze, n’osobora kwoleka ngu oine ekihika eky’okugonza kwegesa abaliba bahumbuukire, kuraba omu kukora kyona ekyorukusobora hati kutebeza amakuru amarungi.

Mali olindiriire n’ekihika kugwetwa ensi? Oyetekaniize kwikara omu nsi ebiro n’ebiro otwaliiremu kukonyera abaliba bahumbuukire hamu n’okubegesa? N’osobora kwoleka ngu oyetekaniize kwikara omu nsi ebiro n’ebiro, kuraba omu kukozesa buli mugisa gwona ogw’orukutunga kasumi kanu, kukora ebintu ebirukusisana n’ebi ebyolikora obwoligwetwa ensi!