1. Abantu abamu behurra bata ha kwomeera ebiro n’ebiro?

 ABANTU baingi balengaho kulya ebyokulya ebirungi, bakora ebisasaizi kusobora kwikara baine obwomeezi oburungi. Baitu nabwo tibanihira ngu nibaija kwomeera ebiro n’ebiro. Nibatekereza ngu tikirukusoboka kwomeera ebiro n’ebiro habw’okwetuntura okuleetwa okukura omu myaka. Baitu, Yesu akagamba ngu nikisoboka omuntu kutunga “obwomeezi obutahwaho,” nk’oku kirukwolekwa omu Yohana 3:16 na 5:24.

2. Kiki Yohana esuura 6 eki erukugamba ha bwomeezi obutahwaho? (Yohana 6:​39, 40)

² Kiro kimu, omu mulingo gw’ekyamahano, Yesu akaliisa abantu baingi naakozesa omugaati hamu n’encu. a Eki kikaba nikihuniriza, baitu ekiyabalize ha kiro ekyahondiireho kikaba nikihuniriza muno. Ekitebe ky’abantu kikaba kimuhondiire kugenda Kaperenaumu, haihi n’omusa gw’Enyanja ya Galiraaya kandi oku nuho yabagambiriire ngu nikisoboka abantu kuhuumbuka kandi begondeze omu bwomeezi ebiro n’ebiro. (Soma Yohana 6:​39, 40.) Teekerezaaho abantu baawe abaafiire. Ebigambo bya Yesu nibyoleka ngu abantu baingi abaafiire nibasobora kuhumbuuka kandi begondeze omu bwomeezi obutahwaho! Baitu nabwo, ebigambo bya Yesu ebirukusangwa omu Yohana esuura 6 nibisobora kugumira baingi kubyetegereza. Biki Yesu ebi yagambire.

3. Kusigikirra hali Yohana 6:​51, kiki Yesu eki yayebalizeeho?

³ Ekitebe ky’abantu omu Kaperenaumu bakarora akakwate akali hagati y’emigaati Yesu ei yabaliisize hamu n’emanu  Yahwe ei akaba ahaire baisekurubo. Ebyahandiikirwe bikeeta emanu omugaati gw’okulya “kuruga omu iguru.” (Zab. 105:40; Yoh. 6:31) Yesu akabazaaho ebintu abantu bakaba bamanyire ebirukukwata ha emanu kubegesa isomo erikuru. N’obu kiraaba ngu emanu kikaba kiri kyamahano kuruga hali Ruhanga, abo abaagiriire bakahika bafa. (Yoh. 6:49) Kwahukanaho, Yesu akeyeta “omugaati kuruga omu iguru,” “omugaati gwa Ruhanga,” hamu ‘n’omugaati gw’obwomeezi.’ (Yoh. 6:​32, 33, 35) Yesu akooleka embaganiza enkuru ey’ekaba eri hagati y’emanu na uwe. Akagamba ati: “Ninyowe omugaati ogwomiire kuruga omu iguru. Omuntu weena anyakulya ha mugaati ogu alyomeera ebiro n’ebiro.” (Soma Yohana 6:51.) Abayudaaya abo bakabuzabuzibwa. Yesu akaba naasobora ata kugamba ngu akaba arugire omu iguru ‘nk’omugaati’ ogurukukira emanu ey’akaba ahaire baisenkurubo omu mulingo gw’ekyamahano? Yesu akabagambira ati: “Omugaati ogundukwija kuhayo nugwo omubiri gwange.” Naasobora kuba akaba naamanyisa ki? Kikuru muno kwekaguza ekikaguzo kinu habwokuba eky’okugarukamu nikyoleka omulingo obwomeezi obutahwaho burukusoboka hali itwe hamu n’abo abaturukugonza. Leka turole Yesu eki akaba naamanyisa.

OMUGAATI OGWOMIIRE HAMU N’OMUBIRI GWANGE

4. Habwaki abamu baahuniriire habw’ekintu Yesu yabalize?

⁴ Bamu hali abo abakaba nibahuliiriza Yesu, bakahunirra obu yagambire kuhayo “omubiri [gwe] habw’obwomeezi bw’ensi.” Bakaba nibateekereza ngu naija kubaha omubiri gwe gwonyini kugulya, ekyakubafoire abali bab’abantu? (Yoh. 6:52) Baitu, Yesu akabagambira ekintu ekisobora kuba kyabahuniriize, akagamba ati: “Mananu kwo nimbagambira nti, kakuba mutalya omubiri gw’Omwana w’omuntu kandi mukanywa esagama ye, timwine obwomeezi omuli inywe.”—Yoh. 6:53.

5. Habwaki nitukigumya ngu Yesu atamanyise ngu abantu baakunywire esagama ye yonyini?

⁵ Omu kasumi ka Nuha, Ruhanga akatanga abantu kulya esagama. (Kub. 9:​3, 4) Yahwe akongera yabazaaho ekintu eki omu Biragiro yahaire Abaisaleri. Omuntu weena ayalyaga esagama akaba ‘asemeriire kwitwa.’ (Lev. 7:27) Yesu akegesa Abayudaaya kworobera ebiragiro byona Ruhanga ebi akaba abahaire. (Mat. 5:​17-19) Nahabweki akaba atasobora kugambira Abayudaaya kulya omubiri gwe n’okunywa esagama ye. Baitu, kuraba omu bigambo ebi, Yesu akaba naayegesa abantu omulingo basobora kutunga—“obwomeezi obutahwaho.”—Yoh. 6:54.

6. Ebigambo bya Yesu ebirukukwata ha kulya omubiri hamu n’okunywa esagama ye, tusemeriire kubyetegereza tuta?

⁶ Kiki Yesu eki akaba naamanyisa? Nikyeyolekera kimu ngu Yesu akaba naabaza omu mulingo gwakokurorraho, nk’oku akaba akozere obu akaba naabaza n’omukazi Omusamaliya, akamugambira ati: “Baitu ogu weena ow’anywa amaizi aga ndaamuha, talyongera kukwatwa iroho, baitu nigaija kufooka omuli uwe ensoro ey’amaizi agarukuha obwomeezi obutahwaho.” (Yoh. 4:​7, 14) b Yesu akaba atarukumanyisa ngu omukazi Omusamaliya yakutungire obwomeezi obutahwaho kuraba omu kunywa amaizi gonyini. Omu mulingo nugwo gumu, akaba atarukumanyisa ngu ekitebe ky’abantu, abakaba naabaliza omu Kaperenaumu, baakutungire obwomeezi obutahwaho kuraba omu kulya omubiri gwe gwonyini n’omu kunywa esagama ye.

 EMBAGANIZA HAGATI Y’EMIKORO EBIRI

7. Kiki abantu abamu eki barukugamba ha bigambo bya Yesu ebirukusangwa omu Yohana 6:53?

⁷ Abamu nibasobora kugamba ngu omu Yohana 6:​53, Yesu akaba naasoborra ekintu abantu ekibasemeriire kukora ha Kiihuro kya Mukama Waitu Ekya Rwebagyo habwokuba ha mukoro ogu akakozesa ebigambo nibyo bimu. (Mat. 26:​26-28) Abamu nibagamba ngu, buli omu ow’abaho ha Kiihuro kya Mukama Waitu Ekya Rwebagyo asemeriire kunywa ha mugaati kandi akanywa ha viini ebi barabyamu. Mali eki kihikire? Tusemeriire kumanya obu baaraba bahikire rundi bagwire habwokuba obukaikuru n’obukaikuru bw’abantu batweteranizaaho buli mwaka ha mukoro ogu. Leka turole embaganiza enyakuli hagati y’ebigambo ebirukusangwa omu Yohana 6:53 hamu n’ebi Yesu ebi yabalize ha Kiihuro kya Mukama Waitu Ekya Rwebagyo.

8. Mbaganiza ki ezimu eziri hagati y’ebintu binu bibiri? (Rora n’ekisisani.)

⁸ Leka turole emiringo ebiri ebintu binu birukwahukanamu. Ekyokubanza, nidi Yesu obu yabalize ebigambo ebirukusangwa omu Yohana 6:​53-56 kandi akabibaliza nkaha? Akabibaliza ekitebe ky’abantu omu Galiraaya omu mwaka gwa 32 Y.A.K. Kandi ebi akabibaza nk’omwaka gumu enyuma atakatandikireho omukoro gw’Ekiihuro kya Mukama Waitu Ekya Rwebagyo omu Yerusalemu. Ekyakabiri, ebigambo ebi akabibaliza baha? Ebigambo  ebi akabibaliza abantu abakaba bataire omutima ha kutunga ebyokulya eby’omubiri Yesu ebi akaba naabaha kukira kwega hali Yahwe n’Obukama bwe. (Yoh. 6:26) Kandi Yesu obu yabagambire ekintu ekyabagumiire kwetegereza, ahonaaho bakaleka kumwikiririzaamu. Kandi na bamu ha begeswa be bakaleka kumuhondera. (Yoh. 6:​14, 36, 42, 60, 64, 66) Abantu abo bakaba nibahukanira kimu hali abakwenda 11 abakaba baroho ha mukoro ogw’Ekiihuro kya Mukama Waitu Ekya Rwebagyo omu mwaka 33 Y.A.K. hanyuma y’okurabaho nk’omwaka gumu. Ha mukoro ogu abakwenda be 11 abesigwa bakaba bali na uwe n’obu kiraaba ngu bakaba batarukwetegereza buli kimu eki akaba naabegesa. Baitu nabwo, kwahukanaho n’abantu abarukukira obwingi aba Galiraaya, abakwenda ba Yesu abesigwa bakaba nibakigumiza kimu ngu Yesu akaba ali Omwana wa Ruhanga ow’akaba arugire omu iguru. (Mat. 16:16) Akabagambira ati: “Niinywe mungumiireeho omu kulengwa kwange.” (Luk. 22:28) Embaganiza zinu ibiri nizooleka ngu omu Yohana 6:​53, Yesu akaba atarukulengaho kusoborra ekyakubaireho ha mukoro gw’Ekiihuro kya Mukama Waitu Ekya Rwebagyo. Baitu haroho n’embaganiza ezindi hagati y’ebintu binu bibiri.

EBIGAMBO BYA YESU EKI BIRIKUMANYISA HALI IWE

9. Ebigambo Yesu ebi yabalize ha Kiihuro kya Mukama Waitu Ekya Rwebagyo nibikwataho baha?

⁹ Ha mukoro gw’Ekiihuro kya Mukama Waitu Ekya Rwebagyo, Yesu akaha abakwenda be omugaati ogutatumbisibwe kandi yabagambira ngu gukaba nigukikirra omubiri gwe. Hanyuma akabaha eviini kandi yagamba ngu ekaba n’ekikirra ‘esagama ye ey’ekiragaano.’ (Mar. 14:​22-25; Luk. 22:20; 1 Kol. 11:24) Yesu eki yabalize ha kiragaano kikuru muno. Ekiragaano ekihyaka nikitwarramu ‘enju ya Isaleri ey’eby’omwoyo’ abaliba ‘omu Bukama bwa Ruhanga,’ hatali abantu boona. (Baheb. 8:​6, 10; 9:15) Abakwenda be batetegereze buli kimu ekirukukwata ha kiragaano, bakaba bali haihi kuseswaho omwoyo ogurukwera nukwo bataahe omu kiragaano ekihyaka ekyakubasobozeseze kuba na Yesu omu iguru.—Yoh. 14:​2, 3.

10. Mbaganiza ki enyakuli hagati y’ekintu Yesu yabalize ha Kiihuro kya Mukama Waitu Ekya Rwebagyo hamu n’ebi ebi yagambiire ekitebe ky’abantu omu Galiraaya? (Rora n’ekisisani.)

¹⁰ Wetegereze ngu ha mukoro gw’Ekiihuro kya Mukama Waitu Ekya Rwebagyo, Yesu akateeka omutima ha “igana erike.” Guruupu egi ekatandika n’abakwenda be abesigwa abakaba bali na uwe omu kisiika. (Luk. 12:32) Bo n’abantu abandi abakaba nibaija kuba omu guruupu egi nubo basemeriire kulya ha mugaati kandi bakanywa ha viini. Kandi banu nubo barukwija kuba na Yesu omu iguru. Ekintu eki yabaliize abakwenda be ha mukoro gunu nikyahukanira kimu n’eki eki yagambiire ekitebe ky’abantu omu Galiraaya. Yesu eki yabalize ha Kiihuro kya Mukama Waitu Ekya Rwebagyo, kikaba nikikwataho guruupu entaito ey’abantu, baitu eki ekiyabaliize omu Galiraaya kikaba nikwataho abantu baingi.

11. Kiki Yesu eki yabalizeeho obw’akaba ali omu Galiraaya ekirukwoleka ngu akaba atarukubazaaho guruupu y’abantu entaito?

¹¹ Yesu obu akaba ali omu Galiraaya omu mwaka gwa 32 Y.A.K., akaba naagambira Abayudaaya abakaba nibagonza ebyokulya eby’omubiri byonka. Baitu Yesu akalengaho kubakonyera kwetegereza ngu hakaba haroho ekintu ekirukukirayo obukuru ekikaba nikikira  ebyokulya eby’omubiri. Akooleka ekintu ekyakubasobozeseze kutunga obwomeezi obutahwaho. Kandi Yesu akongera yagamba ngu abo abaafiire nibaija kuhumbuuka ha kiro ekya ha mpero kandi bomeere ebiro n’ebiro. Akaba atarukumanyisa bake abakomerwemu, nk’oku yakozere ha mukoro gw’Ekiihuro kya Mukama Waitu Ekya Rwebagyo. Oihireho, omu Galiraaya akabazaaho omugisa ogw’obwomeezi obutahwaho oguratungwa abantu boona. Egi niyo nsonga habwaki yagambire: “Omuntu weena anyakulya ha mugaati gunu alyomeera ebiro n’ebiro; . . . Omugaati ogundukwija kuhayo nugwo omubiri gwange ogundukwija kuhayo habw’obwomeezi bw’ensi.”—Yoh. 6:51. c

12. Kiki ekirukwetaagisa kusobora kutunga obwomeezi obutahwaho?

¹² Yesu atagambnire Abayudaaya omu Galiraaya ngu omugisa gunu gwakuhikire ha buli muntu ayabaireho rundi ayakuzairwe. Abo bonka abalya ‘ha mugaati gunu’ kandi abo nubo abarukwiririza omuli Yesu, nubo bagasirwa. Abantu baingi kasumi kanu bagamba ngu ‘nibaikiririza omuli Yesu’ kandi bamweta omujuni wabo. Baitu haroho ekirukukira hali eki, ekibasemeriire kukora. (Yoh. 6:29) Haroho abantu baingi omu Galiraaya abakaba nibaikiririza omuli Yesu baitu bakaleka kumwikiririzaamu. Habwaki?

13. Nikyetaagisa ki kusobora kuba omwegeswa wa Yesu ow’amananu?

¹³ Abantu baingi baahonderaga Yesu habwokuba, yabahaga ebi ebibakaba nibetaaga. Bakaba nibagonza abakize omu mulingo  gw’ekyamahano. Abahe ebyokulya ebya busa, rundi abegese omu mulingo ogubakaba nibagonza. Baitu, Yesu akabooleka ngu hakaba haroho ekintu ekikuru ekibakaba basemeriire kukora. Akagamba ngu ataije omu nsi kuhikiriza ebyetaago eby’omubiri kyonka. Bakaba basemeriire kwikiriza okuraarizibwa kwe okwokumuhondera kuraba omu kuhondera buli kimu eki yayegeseze.—Yoh. 5:40; 6:44.

14. Kiki eki tusemeriire kukora kusobora kugasirwa omu mubiri gwa Yesu n’esagama ye?

¹⁴ Yesu akegesa abantu ngu kuraba omu kuhayo omubiri gwe n’esagama kyakubasobozeseze kwomeera ebiro n’ebiro. Nahabweki, bakaba basemeriire kwikiririza omu mananu ago. (John 6:40) Ego, kusobora kugasirwa omu mubiri gwe n’esagama ye, nk’oku kyolekerwe Yohana 6:​53, tusemeriire kwikiririza omu kicunguro. Eki nikisoboka hali abantu boona.—Bef. 1:7.

15-16. Bintu ebikuru ebi twegere kuruga omu Yohana esuura 6?

¹⁵ Twegere abintu bingi muno omu Yohana esuura 6 ebikuru muno kandi ebirukutugarramu amaani. Esuura enu neyoleka kurungi enyehurra za Yesu hali abantu. Obu akaba ali omu Galiraaya, akakiza abarwaire, yayegesa abantu ha Bukama kandi yabaha n’ebyokulya eby’omubiri. (Luk. 9:11; Yoh. 6:​2, 11, 12) Kandi ekirukukirayo obukuru, akabegesa ngu nuwe “omugaati ogw’obwomeezi.”—Yoh. 6:​35, 48.

¹⁶ Abo, Yesu abayabalizeeho ‘nk’entaama ezindi’ tibasemeriire kulya omugaati kandi bakanywa ha viini ha mukoro ogw’Ekiihuro Kya Mukama Waitu ogubaho buli mwaka. (Yoh. 10:16) Baitu, nabo nibagasirwa omu mubiri n’esagama bya Yesu Kristo. Eki nibakikora kuraba omu kwikiririza omu kicunguro kya Yesu Kristo. (Yoh. 6:53) Kwahukanaho, abo abasemeriire kulya ha mugaati kandi bakanywa ha viini, booleka ngu batairwe omu kiragaano ekihyaka nk’abagwetwa b’Obukama bwa Ruhanga obw’omu iguru. Nahabweki, kakuba tuseserweho amagita rundi tuli ab’entaama ezindi, Ebintu ebirukubazibwaho omu Yohana esuura 6 bikuru muno hali itwe. Nibibazaaho habwaki kikuru kwoleka okwikiriza okuratusobozesa kutunga obwomeezi obutahwaho.