Nkazaarwa omu 1927 omu tawuni entaito ey’eri haiha na Chicago, Illinois, U.S.A. Abazaire bange bakaba baine abaana bataano—Jetha, Don, nyowe, Karl, hamu na Joy. Itwena tukaba twehaireyo kuheereza Yahwe n’omutima gwaitu gwona. Munyaanya nyowe Jetha akagenda omu kilaasi eyakabiri ey’Isomero lya Gilead omu 1943. Don, akagenda kuheereza ha Beseeri omu 1944, Karl, omu 1947, kandi Joy, uwe akagenda omu 1951. Ekyokurorraho kyabo hamu n’eky’abazaire bange bikankwataho muno.

Bazaire bange bakaba bali basomi barungi ba Baibuli abaagonzaaga Ruhanga kandi na itwe bakatwegesa kumugonza. Baitu isenyowe, akaleka kutamu amakanisa ekitiinisa hanyuma y’okuheereza nk’omuserikale omu Bulemu bw’Ensi Yoona obw’Okubanza omu Bulaaya. Nyinanyowe akasemererwa muno hanyuma ya isenyowe kugaruka omuka ali mwomeezi, akagamba ati: “Karl, leka tugende ha kanisa nk’oku twakoraga.” Isenyowe akagarukamu ati: “Ninyija kugenda na inywe baitu tindukwija kutaahamu.” Nyinanyowe akamukaguza ati: “Habwaki?” Akamugarukamu ati: “Omu kasumi k’obulemu, abembembezi b’amadiini, baitu abakaba nibahagira embaju ezirukwahukana omu bulemu, bakasabira abaserikale hamu n’eby’okuranisa byabo! Ruhanga akaba naasagika embaju zoona?”

Hanyuma nyinanyowe obu akaba agenzere ha kanisa, Abakaiso ba Yahwe babiri bakaija omuka. Bakaha isenyowe ebitabu bibiri ebirukwetwa Light books, ebikaba nibibazaaho ekitabu ekya Okusuku’rwa. Isenyowe akaba naagonza kumanya ebirukukiraho kandi akaikiriza ebitabu binu. Nyinanyowe obu yabirozere, akatandika kubisoma. Hanyuma, kiro kimu akasoma akacweka kuruga omu makuru akarukuraaliza abarukugonza kwega Baibuli nibakonyerwa ebitabu ebirukwetwa Light books. Akacwamu kugenda. Obu yahikireyo, akatangirirwa omukazi ow’akuzire omu myaka. Obu akwasire kimu ha bitabu, nyinanyowe akakaguza ati, “Kinu nikyo murukusoma hanu?” Omukazi akamugarukamu ata? “Ego, caali taahamu.” Wiiki eyahondiireho, nyinanyowe akatutwara itwena kandi hanyuma, tukatandika kugendayoga butoosa.

Kiro kimu omu rusorrokano, ow’arukwebembera akansaba kusoma Zabuli 144:​15, nambere hagamba ngu abo abaheereza Yahwe baine okusemererwa. Orukarra runu hamu n’enkarra ezindi ibiri zikansemeza muno, kandi ezi nizo; 1 Timoseo 1:​11, NWT nambere harukugamba ngu Yahwe ali “Ruhanga ow’asemeriirwe,” hamu na Abefeso 5:​1, orurukututererra  ‘kwegera hali Ruhanga.’ Nkacwamu ngu nsemeriire kusemerererwa omu kusemeza Omuhangi wange kandi mmusiime habw’omugisa ogu ampaire ogw’okumuheereza. Ebi nibyo ebintu bibiri ebi nyikaire nindengaho kukora omu bwomeezi bwange bwona.

Ekitebe ekikaba kiri haihi, kikaba kiri omu Chicago kilomita 32 (mita 20). Baitu nabwo twagendaga omu nsororrokano kandi nayeyongera kumanya kurungi Baibuli. Ninyijuka, kiro kimu ow’arukwebembera akakoma Jetha kuhayo eky’okugarukamu. Obu nahuliire eky’okugarukamu kye, nkagamba ngu: ‘Nanyowe mbaire nkimanyire kakuba hakire mpanikire omukono gwange. Nkatandika kutekanizaaga kurungi n’okuhayo eby’okugarukamu byange. Ekirukukira obukuru nkakurakurana omu by’omwoyo hamu n’abagenzi bange. Nkabatizibwa omu 1941.

Kukira muno ninyijuka orusorrokano orukooto orw’omwaka 1942 orwabaire omu Cleveland, Ohio. Abantu kuruga omu biikaro ebirukuhingura 50 omu United States bakaba ha rusorrokano runu kuraba ha simu. Eka yaitu hamu n’abandi tukaikara omu heema ezikaba ziri haihi n’ekiikaro nambere orusorrokano rukaba ruli. Omu kasumi ako, Obulemu Obwakabiri obw’Ensi yoona bukaba nibukyagenda omumaiso, kandi okuhiiganizibwa hali Abakaiso ba Yahwe kukaba nikweyongera muno. Omu bwire bwa rwebagyo, nkarora ab’oruganda bapakingire motoka zaabo obu amataara nigarora aheeru y’enkambi. Boona baali baikiranganiize ngu buli motoka habemu omuntu omu ow’araikara ali bulindaara ekiro kyona. Kakuba habaho akabi ab’oruganda bakaba basemeriire kutaho amataara nukwo baite abanyanzigwa amaiso kandi bateere n’engombe. Abandi bakaba nibaija kwanguha kukonyera. Nkagamba nti, ‘abantu ba Yahwe baikara betekaniize omu buli kimu!’ Busaho kabi koona akaabaireho, kandi habwokuba nkaba nyine obulinzi nkabyama kurungi.

Hanyuma y’emyaka, obu nintekerezaaho orusorrokano oru, nkakyetegereza ngu nyinanyowe atooleke akokurorraho koona ak’okweralikirra rundi kutiina. Yayesigiraga kimu Yahwe n’ekitebe kye. Tindyebwa ekyokurorraho kye ekirungi.

Omu kaire kake orusorrokano rutakabaireho, nyinanyowe akatandika kuheereza nka payoniya ow’akasumi koona. Akateeka muno omutima ha mbazo ezikaba nizibazaaho obuheereza obw’akasumi koona. Obu tukaba nitugaruka omuka, nyinanyowe akagamba ati, “Naakugondeze kugumizaamu nimpeereza nka payoniya baitu tinsobora kukikora kandi ha murundi nugwo gumu nkarolerra eka yaitu.” Hanyuma akatukaguza obu turaaba nitusobora kukonyera. Tukaikiriza, kandi buli omu akamuha obujunanizibwa obw’okuyonja ekisiika kimu rundi bibiri tutakaliire ekya nyenkyakara. Obu twagendaga ha isomero, yaijaga naakebera kurora enju obu eraaba n’ezooka kurungi nukwo agende omu buheereza. Akaba ali mukazi ow’aine bingi eby’okukora baitu atanagiirize abaana be. Obu twagarukaga omuka kulya ekyamusana hanyuma y’okuruga ha isomero, yabaga aroho kutukonyera. Ebiro ebimu obu twarugaga ha isomero twagendaga na uwe omu buheereza, ekyatukonyiire kumanya omulimo bapayoniya bakora.

Nkatandika kuheereza nka payoniya nyine emyaka 16. N’obukiraaba ngu isenyowe akaba atakafookere omu h’Abakaiso ba Yahwe, akaba naagonza kumanya nk’oku nkaba ninkora omu buheereza. Rwebagyo rumu, nkamugambira ngu n’obukiraaba ngu nintamu amaani, nkaba ntakatungire omuntu weena ow’arukugonza kwega Baibuli. Hanyuma y’okuculeeramu  kake nkamukaguza nti, “wakugondeze kwega na nyowe Baibuli?” Akaculeeramu kake kandi yangarukamu ati, “Tindukurora nsonga yoona habwaki ntasemeriire kwega naiwe.” Ego, omwegi wange wa Baibuli ow’okubanza akaba isenyowe. Mali ogu gukaba mugisa gw’amaani!

Tukatandika kwega nitukozesa akatabu “The Truth Shall Make You Free.” Obu twagumiizeemu nitwega, nkakyetegereza ngu isenyowe akaba nankonyera kuba omwegi omurungi n’okuba omwegesa omurungi. Ekyokurorraho, rwebagyo rumu obu twamazire kusoma akacweka, akankaguza ati: “Nindora ekitabu eki kirukugamba. Baitu nomanya ota ngu kihikire?” Eki nkaba ntakyetekaniriize, nahabweki nkamugarukamu nti, “Kaire kanu tinyine ky’okugarukamu ky’ekikaguzo eki, baitu nambere turayongera kutangatanganira kwega ninyija kuba ntungire ekyokugarukamu.” Kandi nukwo kyabaire. Nkatunga enkarra ezikaba nizisagika eki tukaba nitubazaaho. Kuruga obu nkatandika kutekaniriza kurungi okwega kwaitu, kandi nayega kukora okuseruliiriza. Eki kikaleetera nyowe na isenyowe kukurakurana omu by’omwoyo. Akateeka omu nkora ebi akaba naayega kandi yabatizibwa omu 1952.

Nkaruga omu ka nyine emyaka 17. Jetha a akafooka omumiisani, kandi Don, akafooka Omubeseeri. Boona bagonzaaga obuheereza bwabo kandi na nyowe kikanyekambisa muno. Nahabweki nkaijuza foomu y’okugenda ha Beseeri n’ey’isomero lya Gilead kandi ensonga nazireka omu mikono ya Yahwe. Ekyarugiremu? Nkaralizibwa ha Beseeri omu 1946.

Kumara emyaka nyingi, ntungire obujunanizibwa oburukwahukana ha Beseeri, kandi kinu kikankonyera kwega ebintu bingi ebihyaka. Emyaka 75 ei namazire ha Beseeri, nkegesebwa omulingo gw’okuteera ebitabu n’ebyembalirra. Nkega kugura ebintu ebirukwetagisibwa ha Beseeri n’omulingo gw’okusindika ebintu ebindi omu biikaro ebindi. Baitu ekirukukirayo obukuru, nkegondeza omu kwegesebwa okw’eby’omwoyo okuba ha Beseeri kuraba omu kuramya okwa nyenkyakara hamu n’embazo ezirukusigikirra ha Baibuli.

Ekindi, nkegera hali mugenzi wange omuto, Karl, ayaizire ha Beseeri omu 1947. Akaba ali mwegi omurungi kandi omwegesa omurungi owa Baibuli. Kiro kimu nkamusaba kunkonyeraho ha rubazo oru nkaba ningenda kuha. Nkamusoborra ngu nkaba ntekaniize ebintu bingi baitu kikaba nikingumira kumanya omulingo ndabibazaamu. Kusobora kunkonyera, akankaguza ati, “Joel, omutwe gw’orubazo rwawe nugwo guha?” Ahonaano nketegereza ensonga—eki nkaba nyine kukora nukwo kukozesa ebintu ebirankonyera kusoborra omutwe gw’orubazo rwange kandi ebindi nkabireka. Tinkebwaga isomo eri.

Kusobora kwegondeza ha Beseeri, tusemeriire kwegondeza omu buheereza kandi eki nikisobora kurugamu  ebintu bingi ebirukugarramu amaani. Ekyokurorraho kimu eki ndukwijuka kurungi nikyo ekyabaireho rwebagyo rumu obu nkaba ndi omu Bronx, omu rubuga rwa New York. Nyowe n’ow’oruganda tukaba tubungiire omukazi ow’akaba aikiriize magaziini ya Watchtower na Awake! Tukeyanjura nitugamba tuti: “Rwebagyo runu, nitukonyera abantu kwetegereza ebintu ebirabakonyera ebirukusangwa omu Baibuli.” Akatugarukamu ati, “Obu biraaba nibikwataho Baibuli, mutaahemu.” Tukasoma kandi twabazaaho ebyahandiikire bingi ebirukukwata ha Bukama bwa Ruhanga hamu n’ensi empyaka ey’erukwija. Eki mali kikamusemeza habwokuba akaraaliza banywani be baingi kutweteranizaaho wiiki eyahondiireho. Hanyuma uwe na musaija we bakafooka baheereza ba Yahwe abesigwa.

Ntakatungire mukazi wange, nkaba mmazire emyaka 10 ninserra ow’okutaaha na uwe obuswere. Kiki ekyankonyiire kutunga omukazi omurungi? Nasabaga Yahwe nintekerezaaho ekikaguzo kinu, ‘Kiki eki ndukugonza kukora hanyuma y’okutaaha obuswere?’

Obu nagenzere ha rusorrokano orukooto orukaba ruli omu Yankee Stadium omu 1953, nkatangatangana munyaanya itwe ow’arukwetwa Mary Aniol. Uwe na Jetha bakaba hamu omu kilaasi eyakabiri ey’Isomero erya Gilead, kandi bakaba nibaheereza hamu omu kiikaro kimu nk’abamiisani. N’obutagasi, Mary akangambiraho ebirukukwata ha buheereza bwe omu Caribbean n’abeegi ba Baibuli abaakaba ayegeseze kumara emyaka nyingi. Obu twayeyongiire kumanyangana, tukakyetegereza ngu twine ebigendererwa eby’omwoyo ebirukusisana. Tukeyongera kugonzangana kandi tukataaha obuswere omu Apuli 1955. Mary akaba ali kisembo kuruga hali Yahwe kandi ekyokurorraho eky’okwegeraho. Yayegondezaaga omu buheereza bwona obu yaheebwaga. Yakoraga n’amaani, afaaho abandi kandi yayebembezaaga Yahwe n’Obukama bwe. (Mat. 6:33) Tukaheereza hamu omu mulimo gw’okubungira ebitebe kumara emyaka esatu kandi omu 1958, tukaraalizibwa kuheereza ha Beseeri.

Mary nkamwegeraho ebintu bingi. Ekyokurorraho, obutukaba tukyataahire obuswere, tukacwamu kusomaga hamu Baibuli obu nitusoma enkarra nka 15 buli kiro. Hanyuma y’omu hali itwe kusoma enkarra, twazibazaahoga kandi turora omulingo tusobora kuzita omu nkora omu bwomeezi bwaitu. Mary yakiraga kungambira ebintu ebi akaba ayegere omu Isomero lya Gilead, hamu n’omu buheereza bwe nka omumiisani. Ebintu ebi twabazaahoga byankonyeraga kurora omulingo nsobora kusemezaamu embazo zange, n’okumanya omulingo nsobora kugarramu banyaanya itwe amaani.—Nfu. 25:11.

Mukazi wange omugonzebwa Mary akafa omu 2013. Mali ndindiriire kwongera kumurora omu nsi empyaka! Baitu omu kasumi kanu, ncweriiremu kimu kugumizaamu ninyesiga Yahwe n’omutima gwange gwona. (Nfu. 3:​5, 6) Ntunga okuhuumuzibwa n’okusemererwa kuraba omu kuteekerezaaho ebintu abantu ba Yahwe balikora omu nsi empyaka. Eki nikiija kutwarramu kwega ebintu bingi muno kuruga hali Omwegesa waitu omukuru! Ego, nimmusiima muno ntaine h’okugarukira habw’ebintu bingi muno ebyanyegeseze na ha bw’embabazi ze ezitansemeriire ezi anyolekere.