Omukwenda Paulo akahandiikira omugurusi mutaahi we Timoseo ati: “Ninkutererra omu maiso ga Ruhanga na Kristo Yesu nabamaraika abakome, olindege ebi hatali okucwererra omusango.”—1 Tim. 5:21.

Eky’okubanza leka tubazeeho bamalaika abasobora kuba batarukubazibwaho hanu. Amananu gali bamalaika banu tibasobora kuba 144,000. Nambere Paulo yahandikiire Timoseo, okuhumbuuka okw’abaseserweho amagita kugenda omu iguru kukaba kutakatandikire. Abakwenda hamu n’abaseserweho amagita abandi bakaba batakafookere bihangwa eby’omwoyo, nahabweki ‘bamalaika abakomerwemu’ bakaba batarukumanyisa bo.—1 Kol. 15:​50-54; 1 Bas. 4:​13-17; 1 Yoh. 3:2.

Ekindi, ‘bamalaika abakome’ bakaba batasobora kumanyisa bamalaika abaajeemere omu kasumi ak’Okusandaara kw’Amaizi. Bamalaika abo bakasagika Sitaani kandi baafooka badaimooni kandi bakaba bali banyanzigwa ba Yesu. (Kub. 6:2; Luk. 8:​30, 31; 2 Pet. 2:4) Omu kasumi ak’omumaiso, nibaija kunagwa omu kiina ekitaine bugarukiro kumara emyaka 1,000, kandi hanyuma bahwerekerezebwe hamu na Sitaani.—Yud. 6; Kus. 20:​1-3, 10.

‘Bamalaika abakome’ Paulo abayabalizeeho, baine kuba bakaba bali bamalaika ab’omu iguru abasagika “Ruhanga na Kristo Yesu” abarukubazibwaho omu rukarra nurwo rumu.

Haroho enkumi n’enkumi za bamalaika abesigwa. (Baheb. 12:​22, 23) Titusemeriire kutekereza ngu boona baine obujunanizibwa nubwo bumu omu kaire nuko kamu. (Kus. 14:​17, 18) Ijuka ngu kiro kimu, malaika omu akaheebwa obujunanizibwa obw’okuhwerekereza ihe ly’Abasura erikaba lirumu abaserikale 185,000 abaine eby’okurwanisa. (2 Bakam. 19:35) Bamalaika baingi nibasobora kuba baahairwe obujunanizibwa ‘kusorooza kuruga omu Bukama bwa Yesu ebintu byona ebirukuleetaho kutabaijuka hamu n’abantu boona abarukukora ebibi.’ (Mat. 13:​39-41) Abandi nibasobora ‘kusorooza abakomerwemu be’ kubatwara omu iguru. (Mat. 24:31) Kandi abandi nibaragirwa ‘kutulindaga omu mihanda yaitu yoona.’—Zab. 91:11; Mat. 18:10; lengesaniza na Matayo 4:11; Luka 22:43.

‘Bamalaika abakome’ abarukubazibwaho omu 1 Timoseo 5:21 nibasobora kuba bakaba bali bamalaika abaahairwe obujunanizibwa obw’embaganiza obu kirukuhika ha kukonyera abantu ba Ruhanga omu kitebe. Omu bigambo ebyetoroire orukarra oru, Paulo akaha obuhabuzi obw’amagezi oburukukwata ha mulingo abagurusi basemeriire kuhikirizaamu obujunanizibwa bwabo kandi ngu n’ab’omu kitebe basemeriire kubatekamu ekitiinisa. Paulo akagamba ngu abagurusi tibasemeriire “kusoroora rundi kugwera orubaju” kandi ngu tibasemeriire kwanguhiriza kukora encwamu rundi kucwera abandi omusango. Ensonga enkuru ey’esemeriire kubekambisa kuteeka omu nkora obuhabuzi bwa Paulo niyo ngu nibaheereza “omu maiso ga Ruhanga na Kristo Yesu nabamaraika abakome.” Nahabweki, nikyeyoleka kurungi ngu bamu ha bamalaika bahairwe obujunanizibwa omu kitebe nk’okukirinda, kuroleera omulimo gw’okutebeza n’okugambira Yahwe ebibarukurora.—Mat. 18:10; Kus. 14:6.