1. Munyaanya itwe obwaraaba natekerezaaho ow’okutaaha na uwe obuswere, bikaguzo ki ebimu eby’asemeriire kwekaguza?

ABAKRISTAAYO boona bali hansi y’obusobozi bwa Yesu Kristo omwebembezi ow’ahikiriire. Baitu omukazi Omukristaayo obw’aswerwa, agenda hansi y’obwebembezi obw’omusaija ow’atahikiriire. Eki tikikira kwanguha. Nahabweki, obwaraaba aine ow’oruganda ow’arukwenda kutaaha na uwe obuswere, asemeriire kwekaguza ati: ‘Kiki ekirukwoleka ngu ow’oruganda onu naija kuba omutwe gw’eka omurungi? Ayebembeza kuheereza Yahwe omu bwomeezi bwe? Eki obwaraaba atakikora, kiki ekirukundetera kutekereza ngu naija kuba omutwe gw’eka ow’eby’omwoyo hanyuma y’okutaaha na uwe obuswere?’ Kandi kirungi munyaanya itwe na uwe kwekaguza ati: ‘Miringo enungi ei nyine eratugasira omu buswere bwaitu? Ndi muntu arukugumisiriza kandi omugabi? Nyine enkoragana ey’egumire na Yahwe?’ (Mug. 4:9, 12) Okusemererwa nyinabwenge okw’aratunga omu buswere, nikwija kusigikirra ha zimu ha ncwamu ez’arakora atakataahire obuswere.

2. Nitwija kubazaaho ki omu kicweka kinu?

² Obukaikuru n’obukaikuru obw’abakazi Abakristaayo, bataireho ekyokurorraho ekirungi eky’okworobera baiba bo. Mali basemeriire kusiimwa! Kandi nikitusemeza muno kuheerereza hamu Yahwe n’abakazi banu abesigwa! Omu kicweka kinu nitwija kugarukamu ebikaguzo binu bisatu: (1) Bizibu ki ebimu banyinabwenge ebi basobora kurabamu? (2) Habwaki nyinabwenge acwamu kworobera iba? (3) Kiki banyineeka Abakristaayo hamu na banyinabwenge ekibasobora kwega ha busobozi kuruga ha kyokurorraho kya Yesu, Abigairi, hamu na Malyamu nyina Yesu?

3. Habwaki abaswerangaine boona baraba omu bizibu?

³ Obuswere kisembo ekihikiriire kuruga hali Ruhanga, baitu  kandi abantu tibahikiriire. (1 Yoh. 1:8) Egi niyo nsonga habwaki Ekigambo kya Ruhanga kigambira abali omu buswere ngu nibaija kutunga ebizibu ebirukubazibwaho ‘nk’obujune omu mubiri.’ (1 Kol. 7:28) Wetegereze ebimu ha bizibu nyinabwenge eby’asobora kurabamu.

4. Habwaki nyinabwenge asobora kwehurra ngu kworobera iba nikimumaramu ekitiinisa?

⁴ Obwire obumu, omulingo nyinabwenge yakuziibwemu nigusobora kumuletera kwehurra ngu kworobera iba nikimumaramu ekitiinisa. Munyaanya itwe Marisol arukwikara omu Amerika nagamba ati: “Nambere nakuliire, abakazi baikaraga nibagambirwa ngu basemeriire kwinganangana n’abasaija omu buli kimu. Nkimanyire ngu Yahwe ahaire banyineeka obusobozi kandi akacwamu ngu banyinabwenge basemeriire kuborobera, kandi ngu banyinabwenge nabo basemeriire kutekebwamu ekitiinisa. Baitu tikyanguhire kwikara n’entekereza ehikire ha busobozi Yahwe ahaire banyineeka.”

5. Ntekereza ki ezitahikire abasaija abamu ezibaine hali abakazi?

⁵ Baitu omukazi nasobora kuba aswirwe omusaija arukutekereza ngu abasaija b’omugaso muno kukira abakazi. Munyaanya itwe Ivon arukwikara omu South America, nagamba ati: “Omu kicweka kyaitu, abasaija nubo babanza kulya kandi abakazi balya hanyuma. Kandi abaisiki nubo basemeriire kucumba hamu n’okuyonja, baitu aboojo basemeriire kuheerezebwa banyina bo hamu n’abagenzi baabo abaisiki kandi bagambirwa ngu nubo ‘bakama omu ka.’” Munyaanya itwe Yingling arukwikara omu Asia, nagamba ati: “Omu rulimi rwange, twine orufumu orwine amakuru agarukugamba ngu abakazi tibarukwetaaga kuba abagezi rundi abakugu. Obujunanizibwa bwabo bw’okukora emirimo yoona ey’omuka, baitu tibarukwikirizibwa kugambira baiba bo entekereza yabo.” Nyineeka ow’ahondera entekereza nk’ezi ezitali z’okugonza kandi ezitarukusigikirra ha Byahandiikirwe, agumanganiza obwomeezi bwa mukazi we, alemwa kuhondera ekyokurorraho kya Yesu, kandi abihiza Yahwe.​—Bef. 5:28, 29; 1 Pet. 3:7.

6. Kiki banyinabwenge eki barukwetaaga kukora kusobora kugumya enkoragana yabo na Yahwe?

⁶ Nk’oku twayegere omu kicweka ekihoire, Yahwe nanihira banyineeka Abakristaayo kuha ab’omu maka gaabo ebyetaago eby’omwoyo, eby’omubiri, kandi n’okubaletera kwehurra baine obulinzi. (1 Tim. 5:8) Baitu banyaanya itwe abali omu buswere, n’obubaraaba baine bingi eby’okukora, nibetaaga kutunga obwire buli kiro kusoma Ekigambo kya Ruhanga, kukyecumitirizaaho, kandi n’okusaba hali Yahwe kuruga ha mutima. Kinu nikisobora kutanguha. Banyinabwenge baine bingi eby’okukora, nahabweki nibasobora kwehurra ngu tibaine bwire, rundi amaani ag’okukora ebintu ebi. Baitu kikuru batunge obwire obw’okubikora. Habwaki? Habwokuba Yahwe n’agonza buli omu omulitwe kutunga kandi n’okwikara aine enkoragana enungi na uwe.​—Eng. 17:27.

7. Kiki ekirakonyera nyinabwenge kwanguhirwa kuhikiriza obujunanizibwa bwe?

⁷ Ky’amananu ngu ninyinabwenge nasobora kukora n’amaani kusobora kworobera iba ow’atahikiriire. Baitu nikiija kumwanguhira kuhikiriza obujunanizibwa Yahwe obw’amuhaire, kakuba ayetegereza kandi akaikiriza ensonga eziri omu Baibuli ezirukwoleka habwaki asemeriire kutekamu iba ekitiinisa kandi n’okumworobera.

8. Nk’oku kyolekerwe omu Abefeso 5:22-24, habwaki nyinabwenge Omukristaayo acwamu kworobera iba?

⁸ Nyinabwenge Omukristaayo acwamu kworobera iba habwokuba akimanyire ngu eki nikyo Yahwe arukumusaba kukora. (Soma Abefeso 5:22-24.) Nayesiga Yahwe Ise ow’omu  iguru, habwokuba akimanyire ngu na mugonza kandi tasobora kumusaba kukora ekintu ekitamugasire.​—Bir. 6:24; 1 Yoh. 5:3.

9. Kiki ekibaho nyinabwenge obw’ayorobera Yahwe kuraba omu kuteekamu iba ekitiinisa?

⁹ Abantu b’ensi bekambisa abakazi kujemera emisingi ya Yahwe kandi n’okurora entekaniza ey’okworobera baiba bo nk’ey’erukubamaramu ekitiinisa. Baitu abo abakurakuraniza entekereza nk’ezi, tibamanyire Ruhanga waitu ow’okugonza. Yahwe tasobora kuha bahara be ab’omuhendo ekiragiro ekirukubamaramu ekitiinisa. Munyaanya itwe obwayekamba kuhikiriza obujunanizibwa Yahwe obw’amuhaire, aleta obusinge omu ka ye. (Zab. 119:165) Kinu kigasira iba, uwe, hamu n’abaana be.

10. Masomo ki agatusobora kwega omu bigambo bya munyaanya itwe Carol?

¹⁰ Nyinabwenge obw’ayorobera iba ow’atahikiriire ayoleka ngu n’agonza kandi n’atekamu Yahwe ekitiinisa, ay’ataireho entekaniza ey’obusobozi. Munyaanya itwe Carol arukwikara omu South America nagamba ati: “Nkimanyire ngu iba nyowe naija kukora ensobi, kandi nkimanyire omulingo mutwazaamu obw’akora ensobi ezi kyoleka obundaaba nintwara enkoragana yange na Yahwe nk’ekikuru. Nahabweki, ndengaho muno kwikara nimworobera habwokuba ningonza kusemeza Ise nyowe ow’omu iguru.”

11. Kiki ekikonyera munyaanya itwe Aneese kuganyira, kandi kiki ekitusobora kwega omu bigambo bye?

¹¹ Nikisobora kugumira nyinabwenge kutekamu iba ekitiinisa kandi n’okumworobera kakuba ayehurra ngu iba tarukufaaho enyuhurra ze hamu n’ebirukumweralikiriza. Baitu wetegereze munyaanya itwe ow’aswirwe arukwetwa Aneese eky’akora ekintu eki obukibaho. Nagamba ati: “Ndengaho muno kutabihirwa, kandi nyijuka ngu itwena tukora ensobi. Ekigendererwa kyange ky’okuganyira kuruga ha mutima nk’oku Yahwe akora. Kandi obumuganyira nyongera ntunga obusinge omu bitekerezo.” (Zab. 86:5) Nyinabwenge obwaganyira, kikira kumwanguhira kworobera iba.

12. Baibuli erumu byokurorraho ki?

¹² Abamu nibasobora kutekereza ngu omuntu ow’ayorobera abaine busobozi, muceke. Baitu entekereza egi tehikire n’akake. Baibuli erumu  ebyokurorraho bingi eby’abantu ab’amaani muno abayorobiire obusobozi. Tekerezaaho ekitusobora kwegera hali Yesu, Abigairi, hamu na Malyamu.

13. Habwaki Yesu aikiriza kworobera Yahwe? Soborra.

¹³ Yesu ayorobera Yahwe, baitu eki tikirukumanyisa ngu taine magezi rundi obukugu. Omulingo yayegesaamuga ogwanguhire kandi ogurukwetegerezebwa kurungi, nigukyolekera kimu ngu aine amagezi maingi muno. (Yoh. 7:45, 46) Yahwe akaba akimanyire ngu Yesu aine obukugu bwingi, kandi enu niyo ensonga habwaki y’amwikiriize kukorra hamu na uwe omu kuhanga ebintu byona ebiri omu iguru hamu n’omu nsi. (Nfu. 8:30; Baheb. 1:2-4) Kandi hanyuma ya Yahwe kuhumbuura Yesu, akamuha ‘obusobozi bwona omu iguru n’omu nsi.’ (Mat. 28:18) N’obukiraaba ngu Yesu aine obukugu bwingi, ayesiga Yahwe kumuhabura. Habwaki? Habwokuba agonza Ise.​—Yoh. 14:31.

14. Banyineeka nibasobora kwegera ki (a) ha mulingo Yahwe aroramu abakazi, (b) ha bigambo ebiri omu Enfumo 31?

¹⁴ Banyineeka ekibasobora kwega. Yahwe ataragire banyinabwenge kworobera baiba bo ngu habwokuba arora abakazi nk’abatali b’omugaso muno kwingana abasaija. Kinu Yahwe akakyoleka kuraba omu kukoma abakazi hamu n’abasaija kulema hamu na Yesu. (Bag. 3:26-29) Yahwe akoleka ngu nayesiga Omwana we obuyamuhaire obusobozi. Omu mulingo nugwo gumu, nyineeka ow’amagezi aha mukazi we obusobozi obumu. Baibuli obw’eba n’esoborra obujunanizibwa obwanyinabwenge omurungi, eyoleka ngu nasobora kurolerra eka, kugura n’okutunda itaka, kandi n’okukora bizinesi. (Soma Enfumo 31:15, 16, 18.) Tali nk’omwiru ow’atasemeriire kubaza entekereza ye. Baitu, iba amwesiga kandi ahuliiriza entekereza ze. (Soma Enfumo 31:11, 26, 27.) Omusaija obwatwaza mukazi we omu mulingo gunu ogw’ekitiinisa, mukazi we amworobera aine okusemererwa.

15. Kiki banyinabwenge ekibasobora kwegera ha kyokurorraho kya Yesu?

¹⁵ Banyinabwenge ekibasobora kwega. Nobukiraaba ngu Yesu akakora ebintu eby’amaani, tarukwehurra ngu kworobera obusobozi bwa Yahwe nikimumaramu ekitiinisa. (1 Kol. 15:28; Baf. 2:5, 6) Omu mulingo nugwo gumu, omukazi omurungi arukuhondera ekyokurorraho kya Yesu tarukwija kwehurra ngu n’aswara habw’okworobera iba. Tarukwija kusagika iba habwokuba namugonza kyonka, baitu ekirukukira obukuru habwokuba n’agonza Yahwe kandi n’amutekamu ekitiinisa.

16. Kusigikirra ha 1 Samuiri 25:3, 23-28, bizibu ki Abigairi ebiyarabiremu? (Rora ekisisani ekiri ha kyesweko.)

¹⁶ Abigairi akaba aswirwe omusaija arukwetwa Nabali. Akaba ali musaija ow’arukwegonza wenka, ow’emyehembo, kandi ow’atarukusiima. Eki nobukiraaba nukwo kyali kiri, Abigairi atalengeho kuserra ensonga ey’eramuletera kuruga omu buswere bwe. Akaba nasobora kuculeera kandi akaikiriza Daudi n’abasaija be kwita iba. Baitu, akakora kyona ekyarukusobora kulinda iba hamu n’eka yabo enkooto. Tekerezaaho obumanzi obuyayolekere obuyagenzere omu maiso g’abasaija 400 abakaba baine eby’okurwanisa kandi omu mulingo ogw’ekitiinisa y’asoborra Daudi ekizibu kye. Kandi akaikiriza n’okusaba ekiganyiro habw’ebikorwa bya iba. (Soma 1 Samuiri 25:3, 23-28.) Daudi akakyetegereza ngu Yahwe akaba akozeseze omukazi onu omu manzi kumuhabura nukwo atakora ensobi ey’amaani.

17. Banyineeka nibasobora kwega ki omu kyokurorraho kya Daudi na Abigairi?

¹⁷ Banyineeka ekibasobora kwega. Abigairi akaba ali mukazi ow’amagezi. Daudi akakora ekintu eky’amagezi obuyahuliriize obuhabuzi bwe. Ekyarugiremu, akerinda kwita abantu abataine musango. Omu mulingo nugwo gumu, nyineeka ow’amagezi naija kutekerezaaho muno entekereza ya mukazi we atakakozere  encwamu enkuru. Obundi entekereza ya mukazi we n’esobora kumukonyera kwerinda kukora encwamu etali nungi.

18. Banyinabwenge nibasobora kwega ki omu kyokurorraho kya Abigairi?

¹⁸ Banyinabwenge ekibasobora kwega. Nyinabwenge arukugonza Yahwe kandi arukumutekamu ekitiinisa, nasobora kugasira eka ye n’obukiraaba ngu iba tarukuheereza Yahwe rundi tarukuhondera emisingi ye. Tarukwija kuserra omulingo ogutarukwikirizibwa omu byahandiikirwe kumaraho obuswere bwe. Oihireho, kuraba omu kutekamu iba ekitiinisa n’okumworobera naija kulengaho kuletera iba kugonza kwega hali Yahwe. (1 Pet. 3:1, 2) Baitu iba n’obw’acwamu kwanga kuheereza Yahwe, Yahwe asemererwa obw’arora nyinabwenge onu n’ayorobera iba kandi nagumizaamu ali mwesigwa hali Yahwe.

19. Nidi nyinabwenge obw’atasemeriire kworobera iba?

¹⁹ Nyinabwenge Omukristaayo kandi arukworobera iba tarukwija kumusagika kakuba amugambira kukora ekintu ekirukucwa ebiragiro rundi emisingi ya Baibuli. Ekyokurorraho, iba munyaanya itwe ow’atali omu h’Abakaiso ba Yahwe nasobora kugambira munyaanya itwe kubaza ebisuba, kwiba, rundi kwejumbira omu kintu ekindi kyona ekirukubiihiza Yahwe. Abakristaayo boona otwaliiremu na banyaanya itwe abali omu buswere bebembeza kworobera Yahwe Ruhanga. Kakuba munyaanya itwe asabwa kucwa emisingi ya Baibuli, asemeriire kwanga kandi asoborre iba omu mulingo ogw’embabazi baitu ogw’obumanzi habwaki atasobora kukikora.​—Eng. 5:29.

20. Nitukimanya tuta ngu Malyamu akaba aine enkoragana y’amaani na Yahwe?

²⁰ Malyamu akaba aine enkoragana ey’amaani na Yahwe. Busaho kugurukyagurukya, akaba amanyire kurungi Ebyahandiikirwe. Obw’akaba nabaza na Erisabesi, nyina Yohana Omubatizi, Malyamu akajuliza Ebyahandiikirwe eby’Oruheburaniya emirundi erukuhingura omu 20. (Luk. 1:46-55) Kandi tekerezaaho na kinu: N’obukiraaba ngu Malyamu akaba ajumbiirwe Yusufu, malaika wa Yahwe atabanze kubonekera Yusufu. Malaika akabanza kubaza na Malyamu wenyini kandi yamugambira nk’oku akaba nagenda kuzaara Omwana wa Ruhanga. (Luk. 1:26-33) Yahwe akaba amanyire Malyamu kurungi  kandi akaba n’amwesiga ngu naija kugonza kandi arolerre kurungi Omwana we. Kandi busaho kugurukyagurukya Malyamu akagumizaamu aine enkoragana enungi na Yahwe, na hanyuma ya Yesu kufa hamu n’okuhumbuuka kugaruka omu iguru.​—Eng. 1:14.

21. Kiki banyineeka ekibasobora kwega kuruga omu bigambo ebiri omu Baibuli ebirukukwata hali Malyamu?

²¹ Banyineeka ekibasobora kwega. Nyineeka ow’amagezi asemererwa mukazi we obw’aba amanyire Ebyahandiikirwe kurungi. Tamubihirirwa kandi tatekereza ngu mukazi we nuwe arukugonza kufooka mutwe gw’eka. Akyetegereza ngu kakuba mukazi we amanya kurungi Baibuli hamu n’emisingi ey’erumu, nasobora kukonyera eka yabo. Baitu n’obukiraaba ngu nyinabwenge asomere muno kukira iba, bujunanizibwa bwa iba kwebembera omu kuramya okw’eka hamu n’omu ntekaniza ezindi ez’eby’omwoyo.​—Bef. 6:4.

22. Kiki banyinabwenge ekibasobora kwegera hali Malyamu?

²² Banyinabwenge ekibasobora kwega. N’okubikiraaba ngu omukazi akimanyire ngu iba nuwe asemeriire kwebembera omu kuramya Yahwe, kinu tikimwihaho obujunanizibwa bwe obw’okwikara aine okwikiriza okugumire. (Bag. 6:5) Nahabweki asemeriire kweteraho obwire obw’okwesomesa hamu n’okwecumitiriza. Eki nikiija kumukonyera kwikara nagonza Yahwe, kumutamu ekitiinisa, kandi n’okutunga okusemererwa omu kworobera iba.

23. Banyinabwenge abarukworobera baiba bo, begasira bata, bagasibara amaka gaabo, hamu n’ekitebe?

²³ Banyinabwenge abaikara niborobera baiba bo habwokuba nibagonza Yahwe, batunga okusemererwa hamu n’okumarwa kukira abo abanga kworobera entekaniza ya Yahwe ey’obusobozi. Nibaija kuteraho abasigazi hamu n’abaisiki ekyokurorraho ekirungi. Kandi bakonyera kuletaho okugonza hamu n’obusinge omu ka kandi n’omu kitebe. (Tit. 2:3-5) Omu kasumi kanu, abakazi nubo barukukira obwingi omu baheereza ba Yahwe abesigwa. (Zab. 68:11) Baitu itwena, katube tuli basaija rundi bakazi, nitusobora kuleta okusemererwa omu kitebe. Omu kicweka ekirukwongeraho, nitwija kubazaaho omulingo itwena tusobora kukikora.