Hanyuma ya 1920 bazaire bange bakeega amananu, kandi kinu kikabaho obubaali batakatahire obuswere. Nkazaarwa omu 1939. Obunkaba kyali muto twaikaraga omu Bungereza, nagendaga n’abazaire bange omu nsorrokano, kandi hanyuma nk’ataaha isomero erya Theocratic Ministry School. N’omu kasumi kanu ninkyaijuka omulingo nayehuliremu obunkaba nitemba ha bokisi nukwo nsobole kwemerra h’akatuti, mpe orubazo rwange orw’okubanza. Nkaba nyine emyaka mukaaga kandi nkaba ntiniire muno habw’okurora abantu boona abakuru abakaba bahuliriize.

Kunkonyera omu buheereza, ise nyowe akampandikira enyanjura ey’okukozesa omu buheereza. Nkaba nyine emyaka munaana obunabandize kugenda kutebeza ha mulyango ndi nyenka. Nk’asemererwa muno omusaija obuyaikiriize akapapura kange kandi aho naaho yaikiriza akatabu “Let God Be True”! Nk’airuka nagenda kugambira ise nyowe. Obuheereza hamu n’ensorrokano bikandetera okusemererwa kandi bikankonyera kugonza kuheereza Yahwe habw’akasumi koona.

Nkeyongerra kimu kugonza Baibuli ise nyowe obuyahaireyo ibara lyange bansindikirege Watchtower. N’ekihika kingi nasomaga buli magaziini obuyabaga yakahika. Nkeyongera kwesiga Yahwe kandi kinu kikandetera kwehayo hali uwe.

Nyowe hamu n’abazaire bange tukagenda ha rusorrokano orukooto orwa 1950 orwali rwine omutwe Theocracy’s Increase Assembly omu New York. Kiro Kyakana, Agusto 3, omutwe gw’ekiro eki gwali nigugamba, “Ekiro ky’Abamisani.” Kiro eki, Ow’oruganda Carey Barber ay’ahikire y’aheereza h’Akatebe Akalemi, akaha orubazo orw’okubatizibwa. Ha kumalirra kw’orubazo rwe akatukaguza ebikaguzo bibiri eby’okubatizibwa, nkemerra nagamba ati: “Ego!” Nkaba nyine emyaka 11 baitu nk’akyetegereza ngu nkaba ntiire orutambu orukuru  muno. Baitu nkatiina kugenda omu maizi habwokuba nkaba ntakegere kuziha. Isento nyowe akansendekereza yantwarwa nambere barukugenda kubatiriza kandi yangumya ngu ntatiina. Okubatizibwa kukanguha muno habwokuba n’ebigere byange bitahike hansi. Ab’oruganda bakangabirangana, omu akambatiza kandi ondi yanyiha omu maizi. Kurugira kimu ha kiro eki ekikuru, Yahwe agumizeemu kuterekereza emihanda yange.

Obunamazire kusoma, nkaba ningonza kutandika kuheereza nka payoniya, baitu abegesa bange bakanyekambisa kugenda ha yunivasite. Nk’aikiriza kukora ekibarukugonza; baitu omu kasumi kake nk’akyetegereza ngu tindukwija kusobora kwikara ngumire omu by’omwoyo kandi h’akaire nuko kamu nk’ateeka omutima ha misomo yange, nahabweki nk’acwamu kurugayo. Nk’asaba hali Yahwe ha nsonga enu, kandi nkahandiikira abasomesa bange ebbaruha nimbasobororra omu mulingo ogw’embabazi ngu nkaba ningenda kuleka kusoma ha kumalirra kw’omwaka gwange ogw’okubanza. Nkesigira kimu Yahwe kandi n’atandika kuheereza nka payoniya.

Omu Julaayi 1957 Beseri ekansaba kugenda kuheereza omu rubuga rwa Wellingborough. Nkakaguza ab’oruganda ha Beseri ya London kungambira ow’oruganda ow’amazire akasumi kaingi n’aheereza nka payoniya ou nsobora kweteranizaaho. Ow’oruganda Bert Vaisey akanyegesa ebintu bingi, akaba ali mutebezi omwekambi kandi akankonyera kuba n’entekaniza enungi ey’okutebeza. Ekitebe kyaitu kikaba kirumu banyaanya itwe mukaaga abakaba bakaikwire, Ow’oruganda Vaisey hamu na nyowe. Kutekaniza hamu n’okwejumbira omu nsorrokano kikankonyera muno kwesiga Yahwe, hamu n’okwoleka okwikiriza kwange.

Hanyuma y’okumara akasumi kake ndi omu nkomo habw’okwanga kutaaha amahe, nkatangatangana munyaanya itwe Barbara, ow’akaba ali payoniya ow’embaganiza. Tukataaha obuswere omu 1959, kandi twali twetegekere kugenda hoona nambere baratusindika. Ha kubanza, bakatusindika omu Lancashire omu matemba ga Bungereza. Hanyuma omu Janwali 1961, nk’aralizibwa kugenda omu isomero ery’okwezi kumu erya Kingdom Ministry School ha Beseri ey’omu London. Eky’ampuniriize obutwamazire okusoma, nk’asindikwa kugenda kuheereza omu mulimo ogw’okubungira ebitebe. Nk’amara wiiki ibiri omu rubuga rwa Birmingham, nintendekebwa omuroleerezi w’ekicweka ow’akaba amazire obwire bwingi naheereza, kandi Barbara akaikirizibwa kunyeteranizaaho. Hanyuma tukagarukayo kuheereza omu bicweka bya Lancashire hamu na Cheshire.

Obutukaba tugenzere kuhumuraho omu Agusto 1962, tukatunga ebbaruha kuruga ha itaagi. Omu bbaruha egi hakaba harumu foomu ez’okwijuza kugenda omu isomero lya Gilead! Hanyuma y’okusaba ha nsonga egi, nyowe hamu na Barbara tukaijuza foomu zinu kandi twarahuka kuzisindika ha ofiisi y’itaagi nk’oku baali batusabire. Hanyuma y’ameezi ataano, tukagenda Brooklyn, omu New York, omu isomero elya Gilead, omu kilaasi eya 38, nambere abeegi bayegaga Baibuli kumara emyezi ikumi.

Omu isomero lya Gilead, tukeega bingi ha Kigambo kya Ruhanga, ekitebe kye, hamu  n’Abakristaayo bagenzi baitu omu nsi yoona. Kikatusemeza muno omu myaka yaitu ey’obuto kwega bingi kuruga h’abeegi abaali baheriize kumara akaire kaingi. Nk’atunga n’omugisa ogw’okukora ha beseri buli kiro n’Ow’oruganda Fred Rusk, omu h’abegesa baitu. Ekintu kimu ekikuru ekinamwegereho nikyo eky’okuhana omu kuhikirra, kandi eki nikimanyisa kukigumya ngu obuhabuzi obw’ohaire nibusigikirra ha Byahandiikirwe. Omu b’oruganda abatuhaire embazo hali harumu ab’oruganda abaali bamazire akasumi kaingi nibaheereza, nk’ow’oruganda Nathan Knorr, Frederick Franz, hamu na Karl Klein. Tukeega bingi kuruga ha W’oruganda A. H. Macmillan, ow’akaba ali mwebundaazi, ayatuhaire orubazo orw’atukonyire kumanya omulingo Yahwe yahabwiremu abantu be omu kasumi ak’okulengwa akabaireho kuruga omu 1914 kuhika ha kutandika kwa 1919!

Obutwali tuli haihi kumalirra emisomo yaitu, Ow’oruganda Knorr akagambira nyowe na Barbara ngu twali nitugenda kuheereza omu ihanga lya Burundi omu Afrika. Tukanguha twagenda omu laiburale ey’ekaba eri ha Beseri kurora omu katabu ka Yearbook kumanya abatebezi baingaha abakaba bali omu Burundi omu kasumi ako. Baitu eky’atuhunirize tutasangemu muhendo gwona ogurukukwata ha ihanga eri! Tukakyetegereza ngu twali nitugenda omu kiikaro ekitakatebezebwamuga omu Afrika, ekiikaro ekitwali tumanyireho bike muno. Mali, tuketuntura muno! Baitu hanyuma tukehurra tutekaine.

Omu buheereza bwaitu obuhyaka buli kimu kyona kyali nikyahukana n’ebitukaba tumanyiriire​—enyikara y’obwire, enyetwaza y’abantu, hamu n’orulimi. Hati twali twine kwega kubaza Orufaransa. Kandi twali nitwetaaga kutunga n’ah’okwikara. Hanyuma y’ebiro bibiri tumazire kuhika, omu h’ab’oruganda abatwasomere nabo omu Gilead, arukwetwa Harry Arnott, akatubungira obw’akaba n’agaruka omu buheereza bwe omu Zambia. Akatukonyera kutunga enju ey’afookere eka yaitu ey’okubanza nk’abamisani. Omu kasumi kake ab’obusobozi bakatandika kutuhiganiza, kandi baali batamanyire kintu kyona h’Abakaiso ba Yahwe. Obutwali twakatandika kwegondeza omu buheereza baitu, ab’obusobozi bakatumanyisa ngu kusobora kwikara omu ihanga eri, twali nitwetaaga kutunga pamiti erukutwikiriza kukora. Eky’obusaasi, twali twine kurugayo kandi tukagenda omu ihanga erihyaka, ha murundi gunu Uganda.

Tukeralikirra muno habwokuba twali nitugenda omu Uganda tutaine Visa, baitu tukesiga Yahwe. Ow’oruganda kuruga Canada ow’akaba aizire omu  Uganda kuheereza nambere hali obwetaago, akasobora kusobororra omukuru ow’akaba n’akora ha by’okutaaha n’okuturuka omu ihanga enyikara yaitu. Omukuru akatwikiriza, akatuha ameezi make kuhikya obuturasobora kwehandiikisa kusobora kwikirizibwa kwikara omu ihanga. Eki kikatwoleka ngu Yahwe akaba n’atukonyera.

Enyikara omu Uganda ekaba neyahukanira kimu n’eya Burundi. Omulimo gw’okutebeza gwali gutandikire ira omu Uganda, n’obukiraaba ngu omu ihanga lyona hali harumu abatebezi 28. Obutwabaga nitutebeza twatangatanganaga abantu baingi abarukubaza Orungereza. Baitu omu kasumi kake tukakyetegereza ngu kusobora kukonyera abeegi baitu kukurakurana, twali nitwetaaaga kwega rumu ha ndimi enyingi eza Uganda. Tukacwamu kwega Oruganda habwokuba twatebezaaga omu kicweka kya Kampala nambere abantu baingi babazaaga Oruganda. Kikatutwarra emyaka kwega kubaza kurungi Oruganda, baitu obutwarwegere kikatukonyera kweyongera kutebeza kurungi! Tukatandika kwetegereza kurungi kiki abeegi baitu ba Baibuli baali nibetaaga kwega. Abeegi baitu obubarozere omulingo twali nitubafaaho muno, bakatandika kutwesiga, kandi batugambira omulingo baali nibehurra ha bintu ebi baali nibeega.

Tukatunga okusemererwa kwingi obutwakonyire abantu kwega amananu, kandi okusemererwa kwaitu kukeyongera obutwasabirwe kuheereza omu mulimo gw’okubungira ebitebe omu ihanga lyona. Hansi y’oburagirizi bw’ihanga lya Kenya, tukarambura ihanga lyona, nituserra ebiikaro nambere ba payoniya ab’embaganiza barukwetaagwa muno. Emirundi erukukira obwingi abantu abakaba batamanyire Abakaiso ba Yahwe bakatukunira muno. Batutangirraga kandi batucubiraga n’ebyokulya.

Nkatandika kugenda na ha rugendo rundi orw’embaganiza. Nkaruga Kampala n’agendera omu gaali y’omwika kumara ebiro bibiri, nagenda omu rubuga rwa Mombasa omu Kenya. Hanyuma nkagendera omu meeri, n’agenda omu Seychelles, ihanga erikozerwe ebizinga bingi ebiri omu Indian Ocean. Hanyuma, kuruga omu 1965 kuhika 1972, nkatandika kugenda na Barbara butoosa kubungira Seychelles. Omu kasumi ako hali haliyo abatebezi babiri bonka, baitu hanyuma bakafooka guruupu, kandi hanyuma bakafooka ekitebe. Engendo ezindi zikandetera kubungira ab’oruganda omu Eritrea, Ethiopia, hamu na Sudan.

Enyikara y’eby’obulemi ekahinduka omu Uganda hanyuma y’abanyamahe kukwata gavumenti. Emyaka ey’akabi kaingi ey’ahondireho ekankonyera kukyetegereza nk’oku ky’amagezi kuhondera obuhazi oburukugamba ngu “muheyoga hali Kaisali ebya Kaisali.” (Mar. 12:17) Haroho akasumi nambere abanyamahanga boona abarukwikara omu Uganda basabirwe kugenda kwehandiikisa ha poliisi ey’ebali haihi. Eki tukakikora omu bwangu. Hanyuma y’ebiro bike, obutwali nituvuga motoka omu Kampala, abapoliisi bakaija nambere nyowe hamu n’omu misani ondi tukaba tuli. Tukatiina muno! Bakatujunaana kuba bambega kandi batutwara ha poliisi enkuru nambere twabasoboroliire ngu tuli bamisani ab’obusinge. Tukabagambira ngu tukaba tumazire kwehandiikisa ha poliisi, baitu bakanga kwikiriza. Bakatukwata kandi batuvuga batutwara ha poliisi ey’ekaba eri haihi n’eka yaitu ey’abamisani. Tukasemererwa muno, omu poliisi outwasangireyo kandi ow’akaba akimanyire nk’oku twali twehandikisize, obuyatumanyiriire, kandi obuyaragiire abalinzi baitu kutulekera!

Omu biro ebi, twatiinaga muno obutwahikaga ha rodi buloka ez’abasirikale, kukira muno abasirikale abatwemerezaaga obubabaga batamiire. Buli kaire,  twasabaga, tuteekana omu mitima, kandi batwikirizaaga kurabaho kurungi. Eky’obusaasi, omu 1973 abamisani boona kuruga omu mahanga agandi bakaragirwa kuruga omu Uganda.

Obuheereza bwaitu bukongera bwahinduka, ha murundi gunu twagenda omu ihanga erya Côte d’Ivoire, eriri omu Burugwa Izooba bwa Afrika. Enu ekaba mpindahinduka endi ey’amaani hali itwe, twali twine kwega enyetwaza y’abantu empyaka, kandi kwongera kubaza Orufaransa obwire bwona, hamu n’okumanyira kwikara n’abamisani abarukuruga omu mahanga agandi! Kandi na ha murundi gunu, tukarora omulingo Yahwe yakonyiremu abantu abebundaazi, kandi ab’emitima emirungi kuhuliriza amakuru amarungi. Nyowe hamu na Barbara tukarora omulingo Yahwe yaterekeriize emihanda yaitu.

Hanyuma omu kasumi kake Barbara bakamusangamu kansa. Tukagaruka Bulaaya omu ka, emirundi nyingi kusobora kumutungira obujanjabi, kandi omu 1983 tukakyetegereza ngu titukyasobora kuheereza omu Afrika. Ekintu kinu kikatusaliza muno!

Kansa ya Barbara ekeyongera obutwali nituheereza ha Beseri omu London, kandi eky’arugiremu akafa. Ab’oruganda na banyaanya itwe ha Beseri bakansagika muno. Haroho ow’oruganda na mukazi we abankonyire muno kumanyira enyikara yange empyaka kandi n’okugumizaamu ninyesiga Yahwe. Hanyuma, nkatangatangana munyaanya itwe ayakonyeraga ha Beseri, ow’akaba ali payoniya ow’embaganiza kandi ayagonzaaga muno Yahwe, ekyayolekere ngu akaba ali muntu ow’eby’omwoyo. Nyowe na Ann tukataaha obuswere omu 1989, kandi kuruga obu tuheriize hamu ha Beseri omu London.

Kuruga omu 1995 kuhika omu 2018, nkatunga omugisa ogw’okuheereza nk’ow’oruganda ow’atumirwe ekitebe kyaitu eky’ensi yoona (kara ayayetwaga zone overseer), kubungira amahanga ag’embaganiza agarukuhingura omu 60. Buli ihanga erinagenzeremu, nkarora omulingo Yahwe aha omugisa abaheereza be abali omu nyikara ezirukwahukana.

Omu 2017 nkongera na bungira Afrika. Nkasemererwa muno kutwara Ann omu Burundi habw’omurundi gwe ogw’okubanza, kandi itwena tukahunirra muno kurora omulingo abantu baingi bakaba baizire omu mananu! Ha muhanda nambere natebezaaga nju ha nju omu 1964, hati haroho Beseri enungi ey’erukukonyera abatebezi abarukuhingura omu 15,500.

Nk’asemererwa muno obunatungire orukarra oruroho amahanga agankaba ningenda kubungira omu 2018. Côte d’Ivoire ekaba emu ha mahanga agali ha rukarra runu. Obutwahikire omu rubuga orukuru orukwetwa Abidjan, nk’asisana nk’ow’agarukire omu ka. Obunkaba nindora enamba z’amasimu ez’ab’oruganda abarukuheereza ha Beseri, nk’akyetegereza ngu ow’oruganda ow’arukwikara haihi n’ekisiika ekibaali batutekaniriize nkaba mumanyire, ow’oruganda Sossou. Nk’aijuka ngu yaherezaaga nk’Omuroleerezi w’Orubuga obunkaba ndi omu Abidjan. Nkaba ntahikire, Sossou onu akaba ali mutabani we.

Yahwe ahikiriize omurago gwe. Ebizibu bingi ebindabiremu binyegeseze ngu obutwesiga Yahwe, mali aterekereza emihanda yaitu. Hati twine ekihika eky’okwikara nituheereza Yahwe kuhika obwaratwebembera akatuhikya omu nsi empyaka kandi enungi muno.​—Nfu. 4:18.