OMU busumi obwa kara omusaija rundi eka ye baasasuraga omukaaga hanyuma y’okwikiranganiza n’abanyabuzaale b’omukazi. Omukaaga nigusobora kuba gwatwarramuga ebintu eby’omuhendo, ebisoro, rundi sente. Obwire obumu gwasasurwaga kurabira omu kukora emirimo, ekyokurorraho Yakobo akaikiranganiza na ise Rakeri kumukorra emyaka musanju nukwo amuhemu muhara we. (Kub. 29:17, 18, 20) Kusasura omukaaga kyali kiine kigendererwa ki?

Omukugu omu kuseruliiriza ha bya Baibuli arukwetwa Carol Meyers akagamba ati: “Kusasura omukaaga nikisobora kuba kyasasurraga emirimo omwisiki yakoraaga eka yabo, kandi kinu kyabaga kikuru muno omu maka [nambere babaga balimi].” Kandi omukaaga nigusobora kuba gwakonyeraga kugumya enkoragana hagati y’amaka ago abiri agaabaga gateraniziibwe obuswere. Enkoragana enu n’esobora kuba yasobozesaaga abanyabuzaale kukonyerangana. Ekindi kusasura omukaaga kyagumyaga ngu omukazi ajumbiirwe kandi ngu n’agenda kuruga omu ka ya ise agende kurolererwa n’okulindwa iba.

Kusasura omukaaga tikyamanyisaaga ngu omukazi yabaga kintu ekisobora kugurwa rundi kutundwa. Ekitabu Ancient Israel​—Its Life and Institutions nikigamba kiti: “Ekiragiro eky’okusasura sente rundi ekintu ekindi eky’omuhendo hali eka ey’omwisiki nikisobora kuzooka ngu baabaga baguzire omwisiki. Baitu nikizooka ngu [omukaaga] gwarorwaga nka sente ezaabaga zihairweyo kukonyera eka y’omwisiki habw’emirimo abaire n’akora hatali nka sente ez’okumugura.”

N’omu kasumi kanu, omu mahanga agamu, abantu bagumizeemu n’omugenzo ogw’okusasura omukaaga. Abazaire Abakristaayo obubasaba omukaaga booleka ‘[okwetegereza] kwabo hali abantu boona’ kuraba omu kusaba omukaaga ogutali mwingi muno. (Baf. 4:5; 1 Kol. 10:32, 33) Omu mulingo gunu booleka ngu ‘tibarukugonza erupiya,’ rundi tibali b’omururu. (2 Tim. 3:2) Ekindi, abazaire Abakristaayo obubatasaba omukaaga oguhinguraine, kimanyisa ngu omusaija tarukwija kwetaaga kwongezaayo okugaitwa kuhikya obw’aratunga sente ez’okugusasura. Rundi omusaija tarukwija kwehurra ngu asemeriire kuleka kuheereza nka payoniya nukwo atunge omulimo ogw’akasumi koona oguramusobozesa kutunga sente ez’okusasura omukaaga oguhinguraine.

Omu mahanga agamu gavumenti ziine ebiragiro ebirukukwata ha kusasura omukaaga. Omu mahanga ago, abazaire Abakristaayo borobera ebiragiro ebi. Habwaki? Habwokuba Baibuli n’etererra Abakristaayo ‘kuhurraga abalemi abakuru’ kandi n’okworobera ebiragiro ebitarukucwa ebiragiro bya Ruhanga.​—Bar. 13:1; Eng. 5:29.