KYAKASATU Janwali 18, 2023, ekirango eky’embaganiza kikateekwa ha jw.org, nikigamba ngu Ow’oruganda Gage Fleegle na Jeffrey Winder bakomerwe kuheereza h’Akatebe Akalemi ak’Abakaiso ba Yahwe. Boona baheeriize Yahwe n’obwesigwa kumara emyaka nyingi.

Ow’oruganda Fleegle akakurra bugwaizooba bwa Pennsylvania, U.S.A., kandi akakuzibwa abazaire abarukuheereza Yahwe. Obwakaba akyali nsinganto, bakafurukira omu tawuni entaito nambere hakaba hali obwetaago. Hanyuma y’obwire buke, akabatizibwa omu Novemba 20, 1988.

Abazaire be baikaraga nibamwekambisa kutaaha obuheereza obw’akasumi koona. Baakiraga kuraaliza abaroleerezi b’ebicweka n’Ababbeseri omu ka yabo, kandi Ow’oruganda Fleegle akarora okusemererwa ab’oruganda na banyaanya itwe banu okubakaba baine. Hanyuma y’obwire buke amazire kubatizibwa, akatandika kuheereza nka payoniya ow’akasumi koona, omu Sebutemba 1, 1989. Hanyuma y’emyaka ebiri, omu Okitobba 1991, akatandika kuheereza ha Bbeseri omu Brooklyn, yahika ha kigendererwa kye eky’akaba ayeteriireho obwakaba aine emyaka 12.

Ha Bbeseri Ow’oruganda Fleegle akamara emyaka munaana nakora omu kusiba ebitabu, kandi hanyuma yasindikwa kuheereza omu Kitongole eky’Obuheereza. Omu kasumi ako, akaheereza omu kitebe eky’orulimi orwa Russia habw’emyaka nke. Omu 2006 akataaha obuswere na mukazi we Nadia, nauwe ayamweteranizeeho kuheereza ha Bbeseri. Bakaheereza hamu omu kitebe eky’Orupotugwizi kandi baamara emyaka erukuhingura ikumi bali omu kitebe eky’orulimi Orusipanisi. Hanyuma y’Ow’oruganda Fleegle kumara emyaka nyingi naheereza omu Kitongole eky’Obuheereza, akasindikwa kuheereza omu ofiisi y’Akatebe Akarukujunanizibwa n’Okwegesa, kandi hanyuma yasindikwa omu Ofiisi y’Akatebe  ak’Obuheereza. Omu Maaci 2022, akakomwa kuheereza nk’omukonyezi h’Akatebe ak’Obuheereza ak’Akatebe Akalemi.

Ow’oruganda Winder akakurra omu Murrieta, California, U.S.A. Bazaire be bakaba bali omu mananu kandi akabatizibwa Maaci 29, 1986. Omu kwezi okwahondiireho hanyuma y’okubatizibwa, akatandika kuheereza nka payoniya omusagiki. Hanyuma y’emyezi nke akatandika kuheereza nka payoniya ow’akasumi koona omu Okitobba 1, 1986.

Hanyuma akagenda kubungira bagenzi be aboojo abakaba nibaheereza ha Bbeseri kasumi ako. Ebiyarozereyo bikamuleetera kugonza kusaba kuheereza ha Bbeseri obwarakura. Omu Maayi 1990, akaraalizibwa kuheereza ha Bbeseri ey’omu Wallkill.

Ha Bbeseri, Ow’oruganda Winder akakora emirimo erukwahukana. Ekyokurorraho, akakora omu kuyonja, omu faamu, n’omu ofiisi ya Bbeseri. Akataaha omu buswere na mukazi we Angela omu 1997, kandi kuruga obu baikaire nibaheereza hamu ha Bbeseri. Omu 2014 bakasindikwa Warwick, nambere Ow’oruganda Winder yakonyiire omu kwombeka ekitebe kyaitu ekikuru. Omu 2016 bakasindikwa omu Patterson ha Watchtower Educational Center nambere Ow’oruganda Winder akaba nakora omu kitongole kya vidiyo n’amaraka. Hanyuma y’emyaka ena, bakongera baagaruka Warwick, nambere Ow’oruganda Winder yasindikirwe kuheereza omu Ofiisi y’Ekitongole Ekirukujunanizibwa n’Ababbeseri. Omu Maaci 2022 akakomwa kuheereza nk’omukonyezi w’Akatebe Akarukujunanizibwa n’Ababbeseri ak’Akatebe Akalemi.

Nitusaba ngu Yahwe ahe omugisa ab’oruganda banu abanyakuli bisembo haliitwe, obu nibagumizaamu kukora n’amaani kusagika Obukama.—Bef. 4:8.