1. Kurugira kimu kara abaheereza ba Yahwe boolekere mutima gwa mulingo ki?

 OTWARA enkoragana yaawe na Yahwe kuba y’omuhendo? Hataroho kugurukyagurukya, ego! Kandi toli wenka. Kurugira kimu omu busumi obwakara, abantu baingi behuliire nkaiwe. (Zab. 104:​33, 34) Baingi beferiize kusobora kuramya Yahwe. Abanaziri ab’omu Isaleri eyakara eki nikyo baakozere. Abanaziri nubo baha, kandi kiki ekitusobora kwegera ha kyokurorraho kyabo?

2. (a) Abanaziri bakaba nubo baha? (Okubara 6:​1, 2) (b) Habwaki Abaisaleri abamu baacwamuga kufooka Banaziri?

² Ekigambo “Omunaziri” kiruga omu kigambo ky’Oruheburaniya ekirukumanyisa “Ogu ow’Akomerwemu,” “ow’Abaganiziibwe hali abandi,” rundi “ow’Ayehaireyo.” Abanaziri bakaba bali Baisaleri abayefeerezaaga ebintu ebimu nukwo basobole kuheereza Yahwe omu mulingo ogw’embaganiza. Ebiragiro bya Musa byaikirizaaga omusaija rundi omukazi kukora okweraga okw’embaganiza hali Yahwe nacwamu kuba Omunaziri habw’akasumi. a (Soma Okubara 6:​1, 2.) Okweraga kunu, kwatwarramuga kuhondera ebiragiro Abaisaleri abandi ebibataahonderaga. Habwaki Abaisaleri abamu baacwamuga kufooka Banaziri? Okugonza okubainiire Yahwe hamu n’okusiima habw’emigisa eyarukubaha nikyo kyabekambisaaga.—Bir. 6:5; 16:17.

3. Abaheereza ba Ruhanga ab’omu kasumi kanu, nibasisana bata Abanaziri?

³ Ebiragiro bya Musa obubyahoireho, omu kiikaro kyabyo  hagarukamu “ekiragiro kya Kristo,” entekaniza ey’okuheereza nk’Abanaziri ekahwaho. (Bag. 6:2; Bar. 10:4) Baitu nabwo kasumi kanu abaheereza ba Yahwe booleka ngu nibagonza kumuheereza n’omutima gwabo gwona, n’obwomeezi bwabo bwona, n’ebitekerezo byabo byona, n’amaani gabo goona. (Mar. 12:30) Turaganiza Yahwe ngu nitugonza kumuheereza obutwehayo haluwe. Kusobora kuhikiiriza okweraga kwaitu, kitwetaagisa kukora Yahwe eby’agonza n’okwefeereza. Kwegaho omulingo Abanaziri bahikiirizaaga okweraga kwabo, nikisobora kutukonyera kurora omulingo naitwe tusobora kuhikiiriza okweraga kwaitu. b (Mat. 16:24) Leka tubazeeho bimu ha byokurorraho.

BA MUNTU OW’ARUKWEFEEREZA

4. Kusigikirra ha Okubara 6:​3, 4, Abanaziri bakaba baine kwefeereza ki?

⁴ Soma Okubara 6:​3, 4. Abanaziri bakaba batarukwikirizibwa kunywa amaarwa nobukwakuba kulya emizabbibu. Abantu ababetoroire baayegondezaaga omu byokulya binu, habwokuba byali bitaine kabi koona. Baibuli egamba ngu ‘amaarwa gasemeza omutima gw’omuntu’ kandi kisembo kuruga hali Ruhanga. (Zab. 104:​14, 15) Abanaziri bayefeerezaaga okusemererwa okuleetwa ebintu binu, nukwo basobole kuheereza Yahwe. c

5. Madián na Marcela bakefeereza ki kandi habwaki?

⁵ Kusisanaho Abanaziri, naitwe twefeereza ebintu ebimu nukwo tusobole kwongera ha buheereza bwaitu hali Yahwe. Tekerezaaho ekyokurorraho ky’Ow’oruganda Madián na mukazi we Marcela. d Bakaba nibegondeza omu bwomeezi oburungi. Madián akaba aine omulimo ogurukusasura sente nyingi kandi nibaikara omu nju ey’ebbeyi. Baitu bakaba nibagonza kwongera ha buheereza bwabo. Kusobora kuhika ha kigendererwa eki, bakatandika kukora empindahinduka. Nibagamba ngu: “Tukakeehya ha nturukya yaitu, twagenda omu nju eya sente ntaito kandi twatunda motoka yaitu.” Madián na Marcela bakaba nibasobora kuheereza Yahwe baine ebintu binu, baitu bakabyefeereza habwokuba eki kyakubakonyiire kwanguhirwa kwongera ha buheereza bwabo. Encwamu enu ekabaleetera okumarwa n’okusemererwa.

6. Habwaki Abakristaayo kasumi kanu befeereza? (Rora ekisisani.)

 ⁶ N’okusemererwa, abaheereza ba Yahwe kasumi kanu befeereza nukwo basobole kwongera ha buheereza bwabo hali Yahwe. (1 Kol. 9:​3-6) Yahwe taturagira kwefeereza kandi ebintu ebitwefeereza tibiri bibi. Ekyokurorraho, abamu balekereho emirimo, amaju, rundi ebintu ebindi ebibarukugonza muno. Abamu bacwamu kulindaho kutaaha obuswere rundi babanza kulindaho kuzaara abaana. Abandi bacwamu kugenda kuheereza nambere hali obwetaago, n’obukibetaagisa kulekaho banywani babo n’ab’omu maka gaabo. Baingi omuliitwe twefeereza ebintu binu habwokuba nitugonza kuha Yahwe ekirukukirayo oburungi. Kigumye ngu Yahwe asiima okwefeereza kwona okw’okora kakube kutaito rundi kw’amaani habw’okugonza kwongera ha buheereza bwawe.—Baheb. 6:10.

IKARA OYETEKANIIZE KUBA W’EMBAGANIZA HALI ABANDI

7. Kiki ekikaba nikisobora kuleetera Omunaziri kugumirwa kuhikiiriza okweraga kwe? (Okubara 6:5) (Rora ekisisani.)

⁷ Soma Okubara 6:5. Abanaziri bakaragirwa kutasara isoke. Eki obubaakikoraga, baayolekaga ngu nibagonza kworobera Yahwe. Omunyaisaleri obuyabaga ali w’okuba Omunaziri kumara akasumi akaraihire, isoke lye lyaraihaga kandi buli omu akaba n’asobora kulirora. Abantu abarukwikara nauwe obubaasagikaga encwamu ye ey’okuheereza nk’Omunaziri, kyamwanguhiraga kuhikiiriza okweraga kwe. Eky’obusaasi, haroho akasumi Abaisaleri obubaalekere kuteekamu ekitiinisa encwamu y’Abanaziri kandi baaleka n’okubasagika. Omu kasumi ka nabbi Amosi, Abaisaleri abatali abesigwa bakaikara nibaha ‘Abanaziri amaarwa’ nukwo babaleetere kucwa ekirahiro kyabo eky’okutanywa amaarwa. (Am. 2:12) Kiine kuba kyabetaagisaaga obumanzi bw’amaani kusobora kugumira ha ncwamu yabo ey’okutanywa amaarwa n’okwikara bali b’embaganiza..

8. Ekyokurorraho kya Benjamin kikugarwiremu kita amaani?

⁸ N’akasumi kanu, kitwetaagisa kuba bamanzi kusobora kuba b’embaganiza n’obukiraaba ngu nitutiina rundi twine ensoni. Tekerezaaho ekyokurorraho eky’Ow’oruganda Benjamin, kuruga Norway ow’aine emyaka ikumi. Obuhacwekereho obulemu omu Ukraine, ha isomero lye hakabayo omukoro ogurukwoleka ngu nibasagika ihanga lya Ukraine. Abaana bakaragirwa kuzina ekizina bajwaire engoye ez’erangi y’ebendera  eya Ukraine. Kusobora kwoleka ngu tarukugonza kwetaba omu mukoro gunu ogw’okugwera orubaju, Benjamin akemerra hara n’ekiikaro nambere omukoro gwali guli. Baitu omwegesa obuyamurozere, akamwamirra n’agamba ati: “Ija otweteranizeeho. Itwena tukulinzire!” N’obumanzi, Benjamin akahikirra omwegesa yamugambira ati: “Tinyejumbira omu mikoro ey’okugwera orubaju omu by’obulemi. Kandi Abakaiso ba Yahwe baingi bali omu nkomo habw’okwanga kugenda omu bulemu.” Omwegesa akaikiriza ebiyamugambiire kandi yamuleka. Baitu hanyuma abeegi bataahi be bakatandika kumukaguliiriza habwaki atabeteranizeeho. Benjamin akatiina muno yagonza n’okurra, baitu n’obumanzi yabagambira ebigambo ebiyagambiire omwegesa. Hanyuma Benjamin akagambira bazaire be ngu Yahwe nuwe amukonyiire kugambira abandi ha nyikiriza ze.

9. Nitusobora tuta kusemeza omutima gwa Yahwe?

⁹ Habwokuba tucwamu kworobera Yahwe, tuba b’embaganiza hali abantu abandi. Nitwetaaga obumanzi kusobora kugambira abandi ha mulimo rundi ha isomero ngu tuli bamu h’Abakaiso ba Yahwe. Kandi nk’oku enyetwaza n’entekereza y’abantu omu nsi ey’eyongiire kusiisikara, nikisobora kutugumira kuhondera emisingi ya Baibuli n’okugambiraho abandi amakuru amarungi. (2 Tim. 1:8; 3:13) Baitu ijuka ngu ‘tusemeza omutima gwa Yahwe,’ obutwoleka obumanzi tukaikara tuli b’embaganiza hali abo abatarukumuheereza.—Nfu. 27:11; Mara. 3:18.

IKARA N’OYEBEMBEZA YAHWE OMU BWOMEEZI BWAWE

10. Habwaki kisobora kuba kyagumiire Abanaziri kworobera ekiragiro ekiri omu Okubara 6:​6, 7?

¹⁰ Soma Okubara 6:​6, 7. Abanaziri bakaba batasobora kwirra haihi n’omutumbi. Kunu kusobora kutazooka nk’okwefeereza okw’amaani. Baitu omu kasumi aka Isaleri, Omunaziri kyamugumiraga kworobera ekiragiro kinu kukira muno obuyafeerwaga omunyabuzaale. Emigenzo eky’akasumi ako, yayetaagisaaga abantu kwirra haihi n’omutumbi. (Yoh. 19:​39, 40; Eng. 9:​36-40) Baitu, Omunaziri akaba atasobora kuhondera omugenzo gunu. N’obuyabaga afeeriirwe omuntu ow’omu ka ye, Omunaziri yayolekaga okwikiriza okw’amaani nagumira ha kweraga kwe. Mali Yahwe yakonyeraga abaheereza be banu abesigwa kwikara bagumire omu kasumi ako akatanguhire.

11. Kiki Omukristaayo eky’asemeriire kwijuka obwarukuba nakora encwamu ezirukukwata ha nsonga ez’omu ka ye? (Rora ekisisani.)

 ¹¹ Nk’Abakristaayo, okweraga kwaitu okw’okuheereza Yahwe tukutwara nk’ekintu ekikuru. Kandi kinu kikwataho encwamu zaitu n’omulingo tukoragana n’ab’omu maka gaitu. Twekamba kuhikyaho ab’omu maka gaitu ebyetaago byabo, baitu twebembeza Yahwe ebyarukugonza kukira ab’omu maka gaitu ebibarukugonza. (Mat. 10:​35-37; 1 Tim. 5:8) Obwire obumu, nikisobora kutwetaagisa kukora encwamu ezirukusemeza Yahwe baitu ezitarukusemeza abanyabuzaale baitu.

12. Alexandru obuyahikirweho enyikara ey’egumire omu ka, akakora ki kandi kiki ekyatarakozere?

¹² Tekerezaaho ekyokurorraho kya Alexandru na mukazi we Dorina. Hanyuma y’okumara omwaka nibeega Baibuli n’Abakaiso ba Yahwe, Dorina akaleka kwega kandi akaba n’agonza Alexandru nauwe aleke. Baitu omu mulingo ogutekaine, Alexandru akamugambira ngu naija kugumizaamu nayega. Eki kitasemeze Dorina kandi akalengaho kumuhambiriza kuleka kwega. Alexandru n’agamba ngu akalengaho kwetegereza habwaki mukazi we akaba nayetwaza ati baitu kitamwanguhire. Obwire obumu, Dorina yamubalizaaga kubi kandi eki kyamuleeteraga kugonza kuleka kwega. Baitu Alexandru, akagumizaamu nayebembeza Yahwe kandi yagumizaamu nayoleka mukazi we okugonza n’okumuteekamu ekitiinisa. Hakumalirra ekyokurorraho kye kikekambisa mukazi we kwongera kwega Baibuli kandi hanyuma yabatizibwa.—Rora vidiyo ha jw.org enyakwine omutwe Alexandru na Dorina Văcar: “Okugonza Nukugumisiriza, Kuba Nembabazi” omu kicweka “Amananu Gahindura Obwomeezi.”

13. Nitusobora tuta kwoleka ngu nitugonza Yahwe n’ab’omu maka gaitu?

¹³ Yahwe nuwe yatandikireho eka, kandi n’agonza amaka gabemu okusemererwa. (Bef. 3:​14, 15) Baitu kuba n’okusemererwa kwonyini, tusemeriire kukora ebintu omu mulingo Yahwe arukugonza. Kigumye ngu Yahwe nasiima habw’ebintu orukwefeereza nukwo omuheereze, ha murundi nugwo gumu n’oyoleka ab’omu maka gaawe okugonza kandi n’obatwaza kurungi.—Bar. 12:10.

TWEKAMBISANGANE KUBA N’OMUTIMA NK’OGW’ABANAZIRI

14. Kukira muno nibaha abatusemeriire kwekamba kugarramu amaani kuraba omu bigambo byaitu?

¹⁴ Boona abacwamu kuheereza Yahwe, basemeriire kwikara betekaniize kwefeereza  habw’okugonza okubamwiniire. Baitu obwire obumu, nikisobora kutugumira. Kiki ekitusobora kukora kukonyerangana? Tusemeriire kubaza ebigambo ebirukwekambisa abandi kwefeereza. (Yob. 16:5) Omu kitebe kyanyu, harumu abarukulengaho kworobyamu obwomeezi bwabo nukwo bongere ha buheereza bwabo? Oine abato abomanyire, abarukwoleka obumanzi bakaikara bali b’embaganiza ha isomero n’obukiraaba ngu tikyanguhire? Oine abeegi ba Baibuli rundi ab’oruganda na banyaanya itwe abomanyire abarukuteekamu amaani kwikara bali besigwa n’obukiraaba ngu nibahakanizibwa abanyabuzaale? Kora kyona ekyorukusobora kubagarramu amaani kandi obasiime habw’amaani barukuteekamu kwikara bali besigwa hali Yahwe.—Fir. 4, 5, 7.

15. Abamu basoboire bata kusagika abo abali omu buheereza obw’akasumi koona?

¹⁵ Nitusobora kukonyera ab’oruganda na banyaanya itwe abali omu buheereza obw’akasumi koona. (Nfu. 19:17; Baheb. 13:16) Munyaanya itwe ow’akuzire omu myaka kuruga Sri Lanka eki nikyo yakozere. Obubayongiize akasiimo akaakaba natunga buli kwezi, akaba n’agonza kukonyera banyaanya itwe babiri abato kugumizaamu nibaheereza nka bapayoniya n’obukiraaba ngu bakaba baine ebizibu omu byentahya. Akacwamu kubahayoga akasente buli kwezi nukwo kabakonyere. Mali munyaanya itwe akooleka omutima ogw’okwefeereza!

16. Kiki ekitusobora kwegera ha kyokurorraho ky’Abanaziri ab’omu Isaleri eyakara?

¹⁶ Mali, haroho bingi ebitusobora kwegera ha kyokurorraho ekirungi eky’Abanaziri! Baitu entekeniza ey’Abanaziri netwegesa ekintu ekikuru hali Yahwe. Akimanyire ngu nitugonza kumusemeza, kandi ngu nitusobora kwefeereza nukwo tuhikiirize okweraga kwaitu. Ayoleka ngu natwesiga kuraba omu kutuha omugisa ogw’okwecweramu kumwoleka ngu nitumugonza. (Nfu. 23:​15, 16; Mar. 10:​28-30; 1 Yoh. 4:19) Entekaniza ey’Abanaziri neyoleka ngu Yahwe arora okwefeereza okutukora kandi kimusemeza obutukikora. Nahabweki, leka tucweremu kimu kugumizaamu nituheereza Yahwe kandi nitumuheereza ekirukukirayo oburungi, twegondiize.