1-2. Mulingo ki enyikara y’abantu erukusisanamu n’ey’omusigazi ow’abaziibweho omu kacweka 1?

 TEKEREZAAHO omusigazi ow’aine abazaire abaguuda. Kiro kimu agwibwaho ekizibu ky’amaani muno; abazaire be bafeera omu butandwa. Amakuru ago gamuleetera obusaasi obw’amaani. Baitu hakyaliyo amakuru agandi amabi muno. Akyetegereza ngu abazaire be bakakozesa kubi sente kandi baamuleka aine ibanja ery’amaani muno. Hati kitekerezeeho, omu kiikaro eky’okugwetwa itungo lyabo, agwetwa amabanja gaabo, kandi bakama ba sente nibagonza abasasule ahonaho. Ibanja ly’amaani muno tasobora kulisasura.

² Omu miringo emu, enyikara ei turumu nesisana nk’ey’omusigazi onu. Abazaire baitu ab’okubanza Adamu na Hawa, bakaba bahikiriire kandi baikaraga omu rugonjo orurungi muno. (Kub. 1:27; 2:​7-9) Bakaba baine okunihira okw’okwegondeza omu bwomeezi oburungi obutahwaho. Baitu hanyuma ebintu bikahinduka. Bakafeerwa eka yaabo ey’ekaba eri Orugonjo Orurungi hamu n’okunihira okw’okwomeera ebiro n’ebiro. Kiki abaana baabo eki baagweserwe kuruga hali bo? Baibuli egamba ngu: “Egi niyo nsonga habwaki kuraba omu muntu omu [Adamu], ekibi kikataaha omu nsi, kandi ekibi kyaleeta okufa, kandi nukwo okufa kwahikire kuti hali abantu boona habwokuba boona bakasiisa.” (Bar. 5:12) Ekintu Adamu yatugwesere nikyo ekibi ekirugamu okufa. Ekibi kinu eki  twagwetiirwe kiri nk’ibanja ery’amaani muno omuntu weena hali itwe eri atasobora kusasura.—Zab. 49:8.

 3. Habwaki ebibi byaitu nibisobora kulengesanizibwa ‘n’amabanja’?

³ Yesu akalengesaniza ebibi ‘n’amabanja.’ (Mat. 6:12; Luk. 11:4) Obutusiisa tuba nitusisana nk’abaine ibanja hali Yahwe, kandi tuba twine kulisasura. Baitu kakuba Yahwe atarataireho entekaniza ey’okutuganyira ebibi byaitu, ekintu kyonka ekyakusoboire kulisazaamu nukwo okufa kandi tutaine okunihira okw’okwongera kwomeera.—Bar. 6:​7, 23.

 4. (a) Kiki ekyakuhikire ha basiisi boona kakuba batarakonyiirwe? (Zabuli 49:​7-9) (b) Omu Baibuli, ekigambo “ekibi” kimanyisa ki? (Rora n’akasanduuko “ Ekibi.”)

⁴ Itwe itwenka titusobora kugarraho ekintu Adamu na Hawa baafeeriirwe. (Soma Zabuli 49:​7-9.) Kakuba tutaratungire obukonyezi, twakubaire tutaine okunihira okw’okutunga obwomeezi obutahwaho rundi kuhumbuuka. Amananu gali, twakufiire nk’ebisoro ebitarahangirwe okwomeera ebiro n’ebiro kandi ebitaine okunihira okw’okuhumbuuka.—Mug. 3:19; 2 Pet. 2:12.

 5. Isiitwe ow’okugonza atukonyiire ata kutusasurra ibanja ery’ekibi eki twagwetiirwe? (Rora ekya ha kyesweko.)

⁵ Obu turukwongera tukatekerezaaho omusigazi ou tubalizeehoga ha kutandika, yakwehuliire ata kakuba hazookayo omusaija omuguuda akehayo kumusasurra amabanja ge goona? Hataroho kugurukyagurukya, omusigazi onu yakwolekere okusiima kandi akaikiriza ekisembo kinu eky’embabazi. Omu mulingo nugwo gumu, Isiitwe ow’okugonza Yahwe, atuhaire ekisembo ekisasura ibanja ery’ekibi eki twagwetiirwe kuruga hali Adamu. Yesu akasoborraho ekisembo kinu ati: “Habwokuba Ruhanga akagonza muno ensi, yahayo Omwana we ayazairwe omu wenka, nukwo ogu weena arukumwikiririzaamu atahwerekerezebwa baitu atunge obwomeezi obutahwaho.” (Yoh. 3:16) Kwongerraho, ekisembo nikyo kimu kitusobozesa kutunga enkoragana enungi na Yahwe.

 6. Bigambo ki Baibuli ebi ekozesa ebi turukwija kubazaaho omu kicweka kinu kandi habwaki?

⁶ Nitusobora kugasirwa tuta kuruga omu kisembo kinu ekirungi ekisobozesa ebibi byaitu rundi amabanja gaitu kuganyirwa? Eky’okugarukamu eky’ekikaguzo eki nikisangwa omu bigambo Baibuli ebi ekozesa nka okuteranizibwa, kulihirra, kuleha, ekicunguro, okucungurwa, hamu na kwetwa ab’okuhikirra. Omu kicweka kinu nitwija kubazaaho amakuru g’ebigambo binu byona. Obu turayecumiitirizaaho ebintu Yahwe akozere kutuganyira, okusiima kwaitu nikwija kweyongera.

 EKIGENDERERWA: OKUTERANIZIBWA

 7. (a) Kintu ki ekindi Adamu na Hawa eki baafeeriirwe? (b) Nk’abaijukuru ba Adamu na Hawa, kiki eki turukukirayo kwetaaga? (Abarooma 5:​10, 11)

⁷ Kwongerra ha kufeerwa okunihira okw’okwomeera ebiro n’ebiro, Adamu na Hawa bakafeerwa n’enkoragana yabo ey’omuhendo na Isebo Yahwe. Ha kubanza, Adamu na Hawa bakaba bali kicweka ky’eka ya Ruhanga. (Luk. 3:38) Baitu, obu baayangire kworobera Yahwe, akababinga omu ka ye batakazaire abaana. (Kub. 3:​23, 24; 4:1) Nk’abaijukuru baabo, nitwetaaga okuteranizibwa na Yahwe. (Soma Abarooma 5:​10, 11.) Ekirukumanyisa, tusemeriire kukurakuraniza enkoragana enungi na uwe. Kusigikirra ha kitabu ekimu, ekigambo eky’Oruyonaani ekikozesebwa hanu kumanyisa “okuteranizibwa” nikisobora n’okumanyisa “omunyanzigwa kumufoora omunywani.” Ekirukusemeza kiri ngu, Yahwe nuwe yabandize kugira eki yakoraho kusobozesa ekintu kinu kubaho. Omu mulingo ki?

ENTEEKANIZA: KULIHIRRA

 8. Okulihirra nikimanyisa ki? (b) Kuleha nikimanyisa ki?

⁸ Kulihirra eri nteekaniza Yahwe ei ataireho kusobora kugarraho enkoragana enungi hagati ye n’abantu abasiisi. N’etwarramu kuhingisaniza ekintu ekimu n’ekindi ebiine omuhendo ogurukwinganaingana. Omu mulingo gunu, ekintu ekibuzire rundi ekisiisirwe nikisobora kwongera kutungwa rundi kugarurwaho. Ebyahandiikirwe eby’Oruyonaani bikozesa ekigambo ekiine amakuru agarukusisana “n’okulihirra” kandi eki nikyo, kuleha. (Bar. 3:25) Kuleha kiri kikorwa ekisobozesa omuntu kutunga obusinge hamu n’enkoragana enungi na Ruhanga.

 9. Nteekaniza ki ey’akasumi kake Yahwe ei yataireho kusobozesa ebibi by’Abaisaleri kuganyirwa?

⁹ Abaisaleri kusobora kutunga enkoragana enungi na Yahwe, Ruhanga akabateraho enteekaniza ey’akacu kake ebibi byabo kusobora kuganyirwa. Omu Isaleri, ekiro eky’okulihirra kyabahoga omurundi gumu buli mwaka. Ha kiro eki, nyakatagara omukuru yahongaga ebihongwa eby’ebisoro habw’abantu. Amananu gali, ebihongwa by’ebisoro tibyaihirahoga kimu ebibi by’abantu habwokuba omuhendo gw’obwomeezi bw’ebisoro tugurukwingana omuhendo gw’obwomeezi bw’abantu. Baitu Abaisaleri obu bayegarukamuga kandi bakahayo ebihongwa Yahwe ebi yabaga naagonza, yabaga ayeteekaniize kubaganyira ebibi byabo. (Baheb. 10:​1-4) Ebihongwa Abaisaleri ebi baahayoga ha Kiro eky’Okulihirra, na ha biro ebindi byabakonyeraga kukyetegereza ngu bakaba bali basiisi, kandi ngu bakaba nibetaaga ekintu ekirukukiraho ekisobora kuswekerra kimu ebibi byabo.

10. Nteekaniza ki ey’orutekerro Yahwe ei yataireho kutusobozesa kuganyirwa ebibi byaitu?

¹⁰ Yahwe akaba aine enteekaniza ey’orutekerro eyakutusobozeseze kuganyirwa ebibi byaitu. Akakora enteekaniza nukwo Omwana we omugonzebwa “[aheebweyo] omurundi gumu okwetweka ebibi byabaingi.” (Baheb. 9:28) Yesu akahayo “obwomeezi bwe nk’ekicunguro habw’abaingi.” (Mat. 20:28) Ekicunguro nikyo kiki?

OMUHENDO: EKICUNGURO

11. (a) Kusigikirra ha Baibuli, ekicunguro nikyo kiki? (b) Nooha ow’akaba naasobora kuhayo obwomeezi bwe nk’ekicunguro?

¹¹ Kusigikirra ha Baibuli, ekicunguro nugwo omuhendo oguheebwayo kuleetaho okulihirra rundi okuteranizibwa. Ekicunguro nikyo Yahwe asigikirraho kutugarurra eki twafeeriirwe. Omu mulingo ki? Ijuka ngu Adamu na Hawa bakafeerwa obwomeezi bwabo obuhikiriire hamu n’okunihira okw’okwomeera ebiro  n’ebiro. Nahabweki ekicunguro kikaba kiine kuba omuhendo ogurukwinganainganira kimu ekintu eki twafeeriirwe. (1 Tim. 2:6) Kikaba kiine kusasurwa omuntu wenka (1) ow’akaba ahikiriire; (2) aine obusobozi obw’okwomeera omu nsi ebiro n’ebiro; kandi (3) ow’akaba ayehaireyo kuhayo obwomeezi obu habwaitu. Obu nubwo obwomeezi bw’omuntu ogu bwakugarwireho rundi bulihirra obwomeezi obu twafeeriirwe.

12. Habwaki Yesu yasoboire kuhayo obwomweezi bwe nk’ekicunguro ekikaba nikyetaagisa?

¹² Teekerezaaho ensonga isatu habwaki Yesu yasoboire kuhayo obwomeezi bwe nk’ekicunguro. (1) Akaba ahikiriire—‘atakole ekibi.’ (1 Pet. 2:22) (2) Habw’ensonga enu, akaba aine obusobozi obw’okwomeera ebiro n’ebiro. (3) Akaba ayehaireyo kufa n’okuhayo obwomeezi bwe habwaitu. (Baheb. 10:​9, 10) Nk’omusaija ow’ahikiriire, Yesu akaba nainganaingana n’omusaija ow’okubanza, Adamu obu akaba atakasiisire. (1 Kol. 15:45) Kuraba omu kufa, Yesu akasobora kulihirra ekibi kya Adamu, kandi eki nikyo kugarraho Adamu eki akaba atufeeriize. (Bar. 5:19) Habw’esonga enu Yesu akafooka “Adamu owahanyuma.” Tikikyayetaagisa omuntu ondi ow’ahikiriire kusasurra Adamu eki yafeeriirwe. Habwokuba Yesu akafa “omurundi gumu namara.”—Baheb. 7:27; 10:12.

13. Mbaganiza ki enyakuli hagati y’enteekaniza ey’okulihirra n’ekicunguro?

¹³ Hati, mbaganiza ki enyakuli hagati y’enteekaniza ey’okulihirra n’ekicunguro? Enteekaniza ey’okulihirra nikyo ekintu Ruhanga eki akora kugarraho enkoragana enungi hagati ye n’abantu. Ekicunguro nugwo omuhendo oguheebwayo kulihirra abantu abasiisi. Omuhendo ogu niyo esagama ya Yesu ey’omuhendo eyaseeserwe habwaitu.—Bef. 1:7; Baheb. 9:14.

EBIRUGAMU: KUCUNGURWA N’OKWETWA AB’OKUHIKIRRA

14. Kiki eki turukwija kubazaaho, kandi habwaki?

¹⁴ Biki ebiruga omu nteekaniza ey’okulihirra? Kusobora kugarukamu ekikaguzo eki, nitwija kubazaaho amakuru g’ebigambo bibiri Baibuli ebi ekozesa kutukonyera kwetegereza omulingo tugasirwa omu kuganyira kwa Yahwe.

15-16. (a) Omu Baibuli, ekigambo “okucungurwa” nikimanyisa ki? (b) Kulekerwa kuruga omu kibi n’okufa kituleetera kwehurra tuta?

¹⁵ Omu Baibuli, okucungurwa kimanyisa kulekerwa, rundi kwetwa ab’okuhikirra ekibaho hanyuma y’ekicunguro kusasurwa. Omukwenda Petero akakibazaaho ati: “Nimumanya ngu mutacungurwe nebintu ebisisikara nka feza na zabu, okuruga omu ngeso zanyu ezitarumu ezimwahairwe abaisenkuru inywe: baitu mukacungurwa nesagama eyomuhendo mwingi nkeyomwana gwentama ogutaloho bulema nobukakuba akamogo, niyo ya Kristo.”—1 Pet. 1:​18, 19.

¹⁶ Habw’ekicunguro nitusobora kulekerwa kuruga omu kibi n’okufa ebireetaho okubonabona kw’amaani. (Bar. 5:21) Mali, nitusiima muno Yahwe na Yesu habwokuba tucungwirwe habw’esagama ya Yesu ey’omuhendo.—1 Kol. 15:22.

17-18. (a) Okwetwa ab’okuhikirra nikimanyisa ki? (b) Tugasirwa tuta Yahwe obu atweta ab’okuhikirra?

¹⁷ Baibuli egamba ngu abaheereza ba Yahwe baihirweho omusango, kinu nikimanyisa ngu tikikyatwetaagisa kusasurra ebibi ebi tukora. Yahwe obu akora kinu, aba atarukurubatirra endengo ze ez’obwinganiza. Titwihwaho omusango ngu habwokuba tukikoleriire, kandi taitira ebibi byaitu eriiso. Baitu, habwokuba nitwikiririza omu nteekaniza ey’okulihirra hamu n’ekicunguro kya Yesu kristo, eki  nikyo Yahwe asigikirraho kuganyira amabanja rundi ebibi byaitu.—Bar. 3:24; Bag. 2:16.

¹⁸ Tugasirwa tuta Yahwe obu atwihaho omusango? Abo abakomerwe kulema na Yesu omu iguru bamazire ira kwetwa ab’okuhikirra kandi bafookere abaana ba Ruhanga. (Tit. 3:7; 1 Yoh. 3:1) Ebibi byabo biganyiirwe. Nikisisana oti rundi tibakabikoraga, kandi habw’ensonga egi kibasemeriire okuba omu Bukama. (Bar. 8:​1, 2, 30) Abo abaine okunihira okw’okwikara omu nsi baihirweho omusango, nibabarwa nk’abanywani ba Ruhanga kandi ebibi byabo biganyiirwe. (Yak. 2:​21-23) Ab’ekitebe ekingi, abalikiraho Haramagedoni, baine okunihira okw’okutafa. (Yoh. 11:26) “Abahikiriire” “n’abatahikiriire” abaafiire nibaija kuhuumbuka. (Ebik. 24:15; Yoh. 5:​28, 29) Ha kumalirra, abaheereza ba Yahwe abesigwa boona omu nsi nibaija kutunga “obugabe obw’ekitiinisa obw’abaana ba Ruhanga.” (Bar. 8:21) Mali, ka mugisa gw’amaani oguruga omu nteekaniza ey’okulihirra —kandi ogu nugwo kuteranizibwa na Isiitwe, Yahwe!

19. Enyikara yaitu esemiire omu mulingo ki? (Rora n’akasanduuko “ Kiki Yahwe Eki Akozere Kutuganyira.”)

¹⁹ Amananu gali, enyikara yaitu ekaba eri nk’ey’omusigazi ou tusangirwe tubalizeeho, ayaferiirwe buli kimu kyona kandi yagwetwa ibanja ery’amaani muno eri akaba atasobora kusasura. Baitu Yahwe, akatukonyera. Enyikara yaitu ehindukire habw’enteekaniza ey’okulihirra hamu n’okusasura okw’ekicunguro. Okwikiriza kwaitu omu Yesu Kristo nikutusobozesa kucungurwa rundi kulekerwa kuruga omu kibi n’okufa. Yahwe obu atuganyira ebibi byaitu, bisisana oti rundi tibikabahoga. Baitu ekirukukirayo obukuru kiri ngu, hati nitusobora kutunga enkoragana enungi na Isiitwe ow’omu iguru ow’okugonza, Yahwe.

20. Kiki eki turukwija kubazaaho omu kicweka ekirukuhonderaho?

²⁰ Obu tuteekerezaaho ebintu byona Yahwe na Yesu batukoliire, kituleetera kubasiima muno. (2 Kol. 5:15) Kakuba bataratukonyiire, twakubaire tutaine okunihira kwona! Ekicweka ekirukuhonderaho nikiija kubazaaho eby’okurorraho ebirukwahukana kuruga omu Baibuli ebirukwoleka omulingo tugasirwa omu kicunguro.