EKICWEKA KY’OKWEGA 8
EKIZINA 130 Oganyirege
Nitusobora Tuta Kwegera ha Kuganyira kwa Yahwe?
“Nimuganyirangana, . . . nka Ruhanga omu Kristo okuyaganyiire inywe.”—BEF. 4:32.
EBI TURAYEGA
Ekicweka kinu nikiija kubazaaho ebi tusobora kukora kuganyira omuntu ow’atusobiize.
1-2. (a) Nidi obu kikira muno kutugumira kuganyira omuntu? (b) Denise akooleka ata okuganyira?
KIKUGUMIRA kuganyira abandi? Baingi hali itwe kitugumira kukira muno omuntu obu akora rundi akabaza ekintu kikatusaaliza muno. Baitu haroho ebintu ebi tusobora kukora kusingura enyehurra embi kandi tukaba bantu abarukuganyira. Tekerezaaho ekyokurorraho kya munyaanya itwe arukwetwa Denise, a ayayolekere okuganyira okw’amaani. Omu mwaka 2017, Denise n’eka ye nubwo bakaba baakaruga kubungira Ekitebe Ekikuru eky’Abakaiso ba Yahwe ekikaba kyakaruga kwombekwa. Obu bakaba bali omu muhanda nibagaruka omuka, omusaija ondi motoka ye ekamutabukaho kandi yatomera matoka yabo. Hanyuma y’obutandwa obu, Denise, akakaba. Obu yagarukireho, akakyetegereza ngu abaana be bakaba batungire ebihuta by’amaani kandi musaija we Brian akaba afiire. Obu aijuka ekyabaireho, Denise naagamba ati, “Nkehurra nyenuubire kandi mbuzabuziibwe.” Hanyuma y’okukyetegereza ngu omusaija ayabatomiire akaba ataine kibizu kyona kandi busaho ekyamuhugwire, Denise akasaba Yahwe amuhe obusinge.
2 Omusaija ayabatomiire akakwatwa kandi yajunaanwa omusango ogw’okwita. Omusango obu gwakumusingire, akaba naija kusibwa omu nkomo. Kooti ekagambira Denise ngu omusaija onu kucwerwa omusango nikiija kusigikirra ha bujulizi bwe. Denise naagamba ati: “Nkehurra oti rundi omuntu asazire ebihooya byange ebisemberwe kandi hanyuma yaseesamu ekisura kingi, habwokuba nkaba nyine kubazaaho akasumi akakyakizireyo kuba kabi muno omu bwomeezi bwange.” Hanyuma ya wiiki nke, Denise akagenda omu kooti kuha obwakaiso hali omusaija ow’akaba aleetiire eka ye obusaasi obw’amaani muno. Kiki eki yabalize? Denise akasaba omuramuzi kuganyira omusaija ogu. b Obu yamazire kubaza, omuramuzi akatandika kurra kandi yagamba ati: “Omu myaka 25, ei mmazire nimpereza nk’omuramuzi, tinkahurraga ekintu nka kinu. Tinkahurraga abantu abatwaziibwe kubi nibasaba omuramuzi aganyire ogu ow’abatwaize kubi. Tinkahurraga ebigambo eby’okugonza n’okuganyira nka binu.”
3. Kiki ekyaletiire Denise kuganyira?
3 Kiki ekyakonyiire Denise kuba muntu ow’arukuganyira? Akecumiitirizaaho okuganyira kwa Yahwe. (Mik. 7:18) Obu tusiima Yahwe habw’okuganyira oku atwolekere, nikiija kutwekambisa kuganyira abandi.
4. Yahwe naagonza tukole ki? (Abefeso 4:32)
4 Yahwe naagonza tuganyire abandi nk’oku na uwe atuganyira. (Soma Abefeso 4:32.) Naatunihirramu kwikara twetekaniize kuganyira abo abatutwaza kubi. (Zab. 86:5; Luk. 17:4) Omu kicweka kinu nitwija kubazaaho ebintu bisatu ebiratukonyera kwongera ha kuganyira kwaitu.
OTAITIRA ERIISO ENYEHURRA ZAAWE
5. Kusigikirra ha Enfumo 12:18, nitusobora kwehurra tuta kakuba omuntu atukora kubi?
5 Nikisobora kutusaaliza muno omuntu obu abaza rundi akakora ekintu ekitali kirungi kukira muno obu aba ali munywani waitu nfenanfe rundi omunyabuzaale. (Zab. 55:12-14) Obwire obumu, obusaasi obu tutunga nibusobora kulengesanizibwa n’okucumitwa omuhyo. (Soma Enfumo 12:18.) Nitusobora kulengaho kutateeka omutima ha nyehurra zaitu. Eki obu tukikora, tusisana nk’abacumisirwe omuhyo kandi tukaguleka omu kihooya. Omu mulingo nugwo gumu, titusobora kunihira ngu obusaasi bwaitu nibwija kuhwaho kakuba tutabuteekaho omutima.
6. Nitusobora kwetwaza tuta kakuba omuntu atubiihiza?
6 Omuntu obu atukora kubi, nitusobora kukwatwa ekiniga ha kubanza. Na Baibuli ekigumya ngu nitusobora kukwatwa ekiniga. Baitu etutererra ngu titusemeriire kwikiriza enyehurra egi kutulema. (Zab. 4:4; Bef. 4:26) Habwaki? Habwokuba emirundi erukukira obwingi, enyehurra zirugamu ebikorwa. Kandi ekiniga tikirugamu ebirungi. (Yak. 1:20) Ijuka ngu, kukwatwa ekiniga eri nyehurra enyakwija bwija, baitu kwikara nakyo eri ncwamu yaawe.
Kukwatwa ekiniga eri nyehurra enyakwija bwija, baitu kwikara nakyo eri ncwamu yaawe
7. Nyehurra ki ezindi ezi tusobora kutunga omuntu obu atusaaliza?
7 Obu tuba tutwaziibwe kubi, nitusobora kuhurra obusaasi obw’emiringo endi. Ekyokurorraho, munyaanya itwe arukwetwa Ann naagamba ati: “Obu nkaba nkyali muto, isenyowe akalekaho nyinanyowe kandi yaswera omukozi waitu. Nkehurra ndekerweho. Kandi obu baazaire abaana, nkehurra nk’ow’atakyagonzebwa. Nkakura ninyehurra nk’ow’atarukwetaagwa.” Munyaanya itwe arukwetwa Georgette abazaaho omulingo yayehuliire hanyuma ya musaija we kutaba mwesigwa hali uwe, naagamba ati: “Tukaba tuli banywani kurugira kimu omu buto. Tukaheereza hamu nka bapayoniya! Mali akancwa omutima.” Kandi munyaanya itwe arukwetwa Naomi naagamba ati: “Nkaba ntarukunihira ngu musaija wange naasobora kunsaaliza. Nahabweki obu yangambiire ngu ataaha naarora ebisisani eby’orwanju baitu naakinsereka, nkehurra nk’ow’abiihabiihirwe kandi ow’agobeziibwe.”
8. (a) Nsonga ki ezimu ezisemeriire kutuleetera kuganyira abandi? (b) Birungi ki ebi tutunga obu tuganyira? (Rora akasanduuko “ Kiki Eki Osemeriire Kukora Kakuba Otunga Enyehurra Embi Muno Habw’Okutwazibwa Kubi?”)
8 Titusobora kulema ebintu abandi batukora rundi batubazaaho, baitu nitusobora kulengaho kulema omulingo twetwazaamu. Kandi emirundi erukukira obwingi, ekintu ekirukukirayo oburungi nikyo kuganyira. Habwaki? Habwokuba tugonza Yahwe kandi naagonza tube bantu abarukuganyira. Kakuba twikara tukwasirwe ekiniga kandi tukalemwa kuganyira, nitusobora kwetwaza omu mulingo ogutali gw’amagezi kandi twehikyeho akabi. (Nfu. 14:17, 29, 30) Wetegereze ekyokurorraho kya munyaanya itwe arukwetwa Christine. Naagamba ati: “Obu mba nyine ekiniga rundi ntwaziibwe kubi, tinkira kuseka. Ntandika n’okulya ebyokulya ebitarumu kiriisa. Timbyama ekirukumara kandi kingumira kulema enyehurra zange, ekindetera kutwaza kubi musaija wange hamu n’abantu abandi.”
9. Habwaki tutasemeriire kwahura enzigu?
9 Omuntu ow’atutwaize kubi, n’obu atatusaba ekiganyiro, nitusobora kukehya obusaasi obu atuhikizeeho. Omu mulingo ki? Georgette, ou tusangirwe tubalizeeho naagamba ati: “Kikantwarra obwire, baitu nkaleka kwahurra ow’akaba ali musaija wange enzigu, n’okumukwatirwa ekiniga. Ekyarugiremu nkatunga obusinge bwingi.” Obu tuleka kwahura enzigu, tuba nitutangira obusaasi obu twine kukwataho omulingo tutwazaamu abantu abandi. Ekindi, na itwe tuba twehaire ekisembo—ekirukumanyisa tuba tutakyateeka omutima ha nsonga egi, kandi eki kituleetera kwongera kwegondeza omu bwomeezi. (Nfu. 11:17) Baitu kakuba omanya eki osemeriire kukora baitu nabwo kikakugumira kuganyira?
LEMA ENYEHURRA ZAAWE
10. Habwaki tusemeriire kuleka obwire bukarabaho, kusobora kuleka kwehurra twine ekiniga? (Rora n’ebisisani.)
10 Kiki ekisobora kukukonyera kuleka kukwatwa bwangu ekiniga n’okwehurra kubi? Kimu ha bintu ebisobora kukukonyera nukwo kuleka obwire bukarabaho. Hanyuma y’okutunga obujanjabi, omuntu ow’atungire ebihuta eby’amaani aba nayetaaga obwire kurora yakira. Omu mulingo nugwo gumu, nitusobora kwetaaga obwire kweihamu enyehurra embi nukwo tuketekaniza kuganyira omuntu kuruga ha mutima.—Mug. 3:3; 1 Pet. 1:22.
Nk’oku omuntu ow’ahendekere ayetaagisa kurolererwa kurungi hamu n’obwire kusobora kukira, nikyo kimu n’omuntu obu atubiihiza (Rora akacweka 10)
11. Kusaba nikusobora kukukonyera kuta kuba muntu arukuganyira?
11 Saba Yahwe akukonyere kuba muntu arukuganyira. c Ann, ou tusangirwe tubalizeeho, naasoborra omulingo okusaba kwamukonyiire. Naagamba ati: Nkasaba Yahwe kuganyira buli omu hali itwe omuka, habw’ebintu ebitahikire ebi twakozere rundi ebi twabalize. Hanyuma nkahandiikira isenyowe na mukazi we omuhyaka ebbaruha, nabagambira ngu mbaganyiire.” Ann naagamba ngu kikaba kitanguhire kukikora. Baitu naayongera naagamba ati: “Habw’okulengaho kwegera ha kuganyira kwa Yahwe, isenyowe na mukazi we nibasobora kugonza kumanya bingi ebirukukwata hali Yahwe.”
12. Habwaki tusemeriire kwesiga Yahwe omu kiikaro ky’okwesiga enyehurra zaitu? (Enfumo 3:5, 6)
12 Wesige Yahwe hatali enyehurra zaawe. (Soma Enfumo 3:5, 6.) Yahwe aikara amanyire ekirukukira oburungi hali itwe. (Is. 55:8, 9) Kandi tasobora kutusaba kukora ekintu ekisobora kutuhikyaho akabi. Egi niyo ensonga habwaki obu atusaba kuganyira, tukigumiza kimu ngu kukikora kitugasira. (Zab. 40:4; Is. 48:17, 18) Ha rubaju orundi kakuba twesiga enyehurra zaitu, nizisobora kutulemesa kuganyira. (Nfu. 14:12; Yer. 17:9) Naomi, ou tusangirwe tubalizeeho naagamba ati: “Ha kubanza nkaba nindora ngu tikirukunyetaagisa kuganyira iba nyowe habw’okurora ebisisani eby’orwanju. Nkaba ntiinire ngu kakuba nkikora, naija kwongera ansaalize, rundi ayebwe obusaasi obu yampikizeeho. Nkateekereza ngu Yahwe naamanya enyehurra zange. Baitu nkatandika kukyetegereza ngu Yahwe kwetegereza enyehurra zange tikirukumanyisa ngu naikiraniza nazo. Naamanya omulingo ndukwehurra kandi naamanya ngu kitwara obwire kuleka kuhurra ekiniga. Baitu naagonza mbe omuntu ow’arukuganyira.” d
KURAKURANIZA ENYEHURRA ENUNGI
13. Kusigikirra ha Abarooma 12:18-21, kiki eki tusemeriire kukora?
13 Obu tuganyira omuntu ow’atusaaliize muno, tuba tutarukugonza kugarukira ha kucwamu ngu titulyongera kubazaaho ekyabaireho. Omuntu ow’atusaaliize kakuba aba ali w’oruganda rundi munyaanya itwe, ekigendererwa kyaitu kisemeriire kuba eky’okugarraho obusinge. (Mat. 5:23, 24) Omu kiikaro ky’okucwamu kwikara n’ekiniga, tucwamu kwoleka embabazi n’okuganyira. (Soma Abarooma 12:18-21; 1 Pet. 3:9) Kiki ekisobora kutukonyera kukikora?
14. Kiki eki tusemeriire kwekamba kukora kandi habwaki?
14 Tusemeriire kwekamba kurora omuntu ow’atutwaize kubi omu mulingo Yahwe amuroramu. Yahwe acwamu kuteeka omutima ha bintu ebirungi omu bantu. (2 Byom. 16:9; Zab. 130:3) Kakuba tunihirramu abantu emiringo embi, niyo turukwija kubaserramu, baitu obu turabaserramu emiringo enungi, niyo turukwija kutunga. Obu turaserra emiringo enungi omu bantu, nikiija kutwanguhira kubaganyira. Ekyokurorraho, ow’oruganda arukwetwa Jarrod naagamba ati: “Kinyanguhira kuganyira ow’oruganda obu ndegesaniza ekibi eki akozere n’orukarra rw’ebintu bingi ebirungi ebi mmugonzaaho.”
15. Habwaki kikuru kugambira omuntu ngu omuganyiire?
15 Ekintu ekindi ekikuru eki tusemeriire kutekerezaaho kukora nikyo kugambira omuntu ngu omuganyiire. Habwaki? Wetegereza Naomi, ou tusangirwe tubalizeeho eki arukugamba: “Ibanyowe akankaguza ati, ‘Onganyiire?’ Obu nayasamize akanwa kange kumugambira ngu, ‘nkuganyiire,’ ebigambo bikaaniga. Nkakyetegereza ngu nkaba ntamuganyiire kuruga ha mutima. Baitu hanyuma y’akasumi nkasobora kumugambira ngu, ‘nkuganyiire.’ Nkaba ntasobora kwikiriza okuhuumura, ibanyowe ow’akaba aine amaziga omu maiso oku yatungire. Kandi nanyowe nkatunga obusinge. Kuruga obu nkatandika kumwesiga kandi twayongera twafooka banywani nfenanfe.”
16. Kiki eki oyegere obu kirukuhika ha kuganyira?
16 Yahwe naagonza tube bantu abarukuganyira. (Bak. 3:13) N’obu kiraaba nukwo kiri, nikisobora kutugumira kuganyira abandi. Baitu nitusobora kukikora kakuba tuleka kwitira eriiso enyehurra zaitu kandi tukatamu amaani kuzirwanisa. Obu nubwo tusobora kutunga enyehurra enungi.—Rora akasanduuko “ Ebintu Bisatu Ebisobora Kukukonyera Kuba Muntu ow’Arukuganyira.”
TEEKA OMUTIMA HA BIRUNGI EBIRUGA OMU KUBA BANTU ABARUKUGANYIRA
17. Habwaki tusemeriire kuganyira abandi?
17 Nitusobora kuba twine ensonga nyingi ezirukutuleetera kuganyira. Baitu leka tubazeeho zimu ha nsonga ezi. Eky’okubanza, twegera hali Isiitwe ow’embabazi Yahwe kandi tumusemeza. (Luk. 6:36) Ekyakabiri, twoleka okusiima habw’okuganyira Yahwe oku atwolekere. (Mat. 6:12) Kandi ekyakasatu, twegondeza omu bwomeezi oburungi kandi twikazaaho enkoragana ey’egumire hagati yaitu n’abantu abandi.
18-19. Kiki ekisobora kurugamu obu tuba bantu abarukuganyira?
18 Kakuba tuganyira abandi, nitusobora kutunga emigisa ei tubaire tutarukunihira. Ekyokurorraho, tekerezaaho ekyahikire hali Denise, ou tusangirwe tubalizeeho. N’obu kiraaba ngu akaba ataine eki amanyire omu kasumi ako, omusaija ayabatomiire akaba naatekaniza kweyita hanyuma y’okucwerwa omusango. Baitu okuganyira kwa Denise kukamukwataho kandi yatandika kwega Baibuli n’Abakaiso ba Yahwe.
19 Nitusobora kwehurra ngu kuganyira omuntu kiri kimu ha bintu ebikyakizireyo kuguma—baitu nikisobora kuba kiri kimu ha bintu ebikyakizireyo kurugwamu emigisa. (Mat. 5:7) Nahabweki, leka itwena tukole kyona ekirukusoboka, kwegera ha kuganyira kwa Yahwe.
EKIZINA 125 Baine Okusemererwa ab’Embabazi!
a Amabara agamu gahindwirwe.
b Omu nyikara nk’egi, buli Mukristaayo asemeriire kucwamu eki asemeriire kukora.
c Rora vidiyo z’ebizina ebiri ha jw.org ebiine emitwe “Forgive One Another,” “Forgive Freely,” na “Friends Again.”
d N’obu kiraaba ngu kurora ebisisani by’orwanju kibi kandi nikisaaliza, Ebyahandiikirwe tibirukwoleka ngu kiri kintu omuntu eki asemeriire kusigikirraho kugaitururwa.
