Isenyowe na Nyinanyowe bakaba bali Bakaturikiti kaswa. Baitu obu bayegere kuruga omu Baibuli ngu ibara lya Ruhanga nuwe Yahwe, boona bakafooka Abakaiso ba Yahwe abekambi. Isenyowe akaleka kubaija ebisisani bya Yesu. Oihireho akakozesa obukugu bwe obw’okubaija, kuhindura ekisika eky’enju yaitu ekya hansi kugifoora Ekyombeko eky’Obukama eky’okubanza omu San Juan del Monte, ekiikaro ekirukusangwa omu Manila, orubuga orukuru orwa Philippines.

Hanyuma y’okuzaarwa omu 1952, abazaire bange bakatandika kunyegesa hali Yahwe nk’oku bakaba nibakora hali bagenzi bange abakuru aboojo bbana hamu n’abaisiki basatu. Obu nkaba ninkura, isenyowe akanyekambisa kusomaga esuura emu ya Baibuli buli kiro, kandi yanyegesaaga n’ebitabu byaitu ebindi bingi ebirukusigikirra ha Baibuli. Obwire obumu, abazaire bange baraalizaaga abaroleerezi b’ebicweka hamu n’ab’oruganda abatumirwe itaagi kwija kwikara omuka. Nk’eka twatungaga okusemererwa kwingi hamu n’okugarurwamu amaani kuruga omu bintu abantu banu baatugambiraga, ebyatwekambisize itwena kwebembeza obuheereza omu bwomeezi bwaitu.

Nkeega bingi muno kuruga hali abazaire bange abakaba bali besigwa hali Yahwe. Hanyuma ya nyinanyowe omugonzebwa kufa habw’oburwaire, Nyowe na Isenyowe tukatandika kuheereza hamu nka bapayoniya omu 1971. Baitu hanyuma omu 1973 obu nkaba nyine emyaka 20, isenyowe akafa. Kufeerwa abazaire bange boona, kikandetera kwehurra ndi nyenka. Baitu okunihira “okwamazima okutatengetatengeta” okurukusangwa omu Baibuli kukankonyera kwikara ngumire omu nyehurra n’omu by’omwoyo. (Baheb. 6:19) Hanyuma y’okurabaho obwire buke isenyowe afiire, nkaikiriza obujunanizibwa obw’okuheereza nka payoniya ow’embaganiza ha kizinga ekya Coron ekikaba kyesoroire, omu isaza lya Palawan.

Nambere nahikiire omu Coron nkaba nyine emyaka 21. Nk’omwojo ow’akaba akuliire omu rubuga, kikampuniriza kukimanya ngu hakaba haliyo amasanyarazi make, amaizi ga tapu make, kandi hakaba haliyo  motoka nke na pikipiki nke. N’obu kiraaba ngu hakaba haliyo ab’oruganda bake, nkaba ntaine payoniya ondi ow’okutebeza na uwe kandi obwire obumu natebezaaga nyenka. Omu kwezi okw’okubanza nkooya muno eka yange hamu n’abanywani bange. Omu bwire bw’ekiro, naimukyaga amaiso gange nindora iguru erijwire enyunyuzi kandi ntadika kurra. Nkatekerezaaho kulekaho obuheereza bwange kandi ngaruke omuka.

Omu bwire obu, obu nayehurraga ndi nyenka, naikaraga ninsaba Yahwe kuruga ha mutima. Naijukaga ebigambo ebirukugarramu amaani ebi nkaba nsomere kuruga omu Baibuli n’omu bitabu byaitu. Emirundi erukukira obwingi nakiraga kutekerezaaho Zabuli 19:14. Nkakyetegereza ngu Yahwe akaba naija kuba ‘omwandara gwange n’omucunguzi wange’ obu nakwecumiitirize ha bintu ebirukumusemeza nk’emirimo ye n’emiringo ye. Watchtower ey’ine omutwe “Toli Wenka” a ekankonyera muno. Naikaraga ningisoma emirundi nyingi. Mali omu busumi obu nkasisana nk’owali na Yahwe itwenka, kandi kinu kikampa emigisa nyingi ey’okusaba, kwesomesa n’okwecumiitiriza.

Hanyuma y’obwire buke mmazire kuhika omu Coron, nkakomwa kuheereza nk’omugurusi. Nk’oku ninyowe nkaba omugurusi nyenka, buli wiiki nkatandika kwebemberaga Theocratic Ministry School, Service Meeting, Congregation Book Study, hamu na Watchtower Study. Ekindi, naahaga embazo za boona buli wiiki. Habwokuba nkaba nyine bingi ebyokukora nkaba ntakyayehurra ngu ndi nyenka!

Nkegondeza muno omu buheereza omu Coron—kandi bamu ha beegi bange ba Baibuli bakahika babatizibwa. Baitu hakaba haliyo n’ebizibu. Obwire obumu, kyanyetaagisaaga kurubata kuruga nyenkyakara kuhika shaaha mukaaga eza nyamusaana kusobora kuhika omu kiikaro nambere twabaga nitugenda kutebeza, kandi obu ntamanyire na nambere ndaraara obu ndahikayo. Ekiikaro ky’ekitebe kyaitu eky’okutebezaamu kikaba kirumu obuzinga obundi obutaito bwingi. Obwire obumu nakiraga kugendera omu lyato omu ihunga eringi kusobora kuhikayo n’obu kiraaba ngu nkaba ntamanyire kuziha! Omu nyikara zinu zoona ezigumangaine, Yahwe akandiinda kandi yanfaaho. Hanyuma nkakyetegereza ngu Yahwe akaba naantekaniza habw’emitalibaine ei nkaba ninyija kutangatangana omu buheereza bwange oburukuhonderaho.

Omu 1978, nkasindikwa kuheereza omu Papua New Guinea, omu matemba ga Australia. Papua New Guinea liri ihanga erinyakwijwire ensozi kandi haihi niringana na Spain. Kikampuniriza kukimanya ngu lirimu abantu abarukuhika nk’obukaikuru busatu kandi abarukubaza endimi ezirukuhingura omu 800. Ekirungi kiri ngu abantu abarukukira obwingi bakaba nibasobora kubaza orulimi orwa Melanesian Pidgin, orumanyirwe nka Tok Pisin.

Nkateekwa omu kitebe eky’Orungereeza habw’akaire kake, ekiri omu rubuga orukuru orwa Port Moresby. Baitu hanyuma nkagaruka omu kitebe ekya Tok Pisin kandi natandika kwega orulimi oru. Nakozesaaga ebi nkaba ninyega omu kilaasi omu kutebeza. Kinu kikankonyera kwega bwangu orulimi. Omu kaire kake nkasobora kuha orubazo omu rulimi orurukumanywa nka Tok Pisin. Kikampuniriza ngu obu nkaba ntakahikize omwaka gumu nyizire omu ihanga lya Papua New Guinea, nkakomwa kuheereza nk’omuroleerezi w’ekicweka omu bitebe eby’orulimi orwa Tok Pisin ebinyakuli omu masaza maingi amakooto.

Baitu habwokuba ebitebe bikaba bitali haihingana, nkaba nyine kutekaniza ensorrokano ez’ekiro kimu nyingi kandi ezayetaagisaaga kugendagenda. Ha kubanza nkehurra ndi nyenka habw’ebiikaro ebi nkaba ntamanyiriire, ihanga erihyaka, orulimi oruhyaka,  hamu n’emigenzo empyaka. Nkaba ntasobora kuruga omu kitebe kimu kugenda omu kitebe ekindi habwokuba ekiikaro kiba kiijwire ensozi. Nahabweki kyanyetaagisaaga kutemba enyonyi haihi buli wiiki. Obwire obumu, ninyowe nabaga omusaabazi nyenka omu nyonyi entaito kandi ey’ekaba eri omu nyikara embi. Kusisanaho n’okugendera omu lyato, enyonyi zandeteraga kwehurra nyeralikiriire!

Bantu bake muno abakaba baine amasimu, nahabweki nabazaaga n’ab’omu bitebe obu nimbasindikira amabbaruha. Emirundi nyingi, nahikaga omu bitebe n’ebbaruha zange zitakahikireyo, kandi kyanyetaagisaaga n’okukaguza abataahi kumanya nambere Abakaiso ba Yahwe bali. Baitu buli murundi nazooraga ab’oruganda, bantangirraga n’okusemererwa kwingi, kandi kinu kyandeteraga kwehurra ngu amaani ndukutekamu tigarukufeera busa. Nkarora obusagiki bwa Yahwe omu miringo nyingi, kandi enkoragana yange na uwe ekeyongera muno.

Ha rusorrokano rwange orw’okubanza ha kizinga ekikaba kiri ha mwaro ekirukwetwa Bougainville, haroho abaswerangaine abakaba baine akaseko h’amatama abampikiriire kandi bankaguza bati: “Notwijuka?” Nkaijuka ngu nkaba mbatebiizeeho obu nkaba naakahika omu Port Moresby. Nkaba ntandikire kubeegesa Baibuli kandi hanyuma nabalekera ow’oruganda. Hati boona bakaba babatiziibwe! Gunu gukaba guli gumu ha migisa nyingi ei natungire omu myaka esatu ei namazire omu Papua New Guinea.

Obu nkaba ntakarugire omu Coron omu 1978, nkatangatangana munyaanya itwe omurungi kandi ow’arukwefeereza ow’arukwetwa Adel. Akaba naaheereza nka payoniya ow’akasumi koona obu naakuza abaana be babiri, Samuel na Shirley. Ha murundi nugwo gumu, akaba naarolerra nyina ow’akaba akuzire omu myaka. Omu Maayi 1981, nkagaruka omu Philippines kutaaha obuswere na Adel. Hanyuma y’okutaaha obuswere, tukaheereza hamu nk’abapayoniya ab’akasumi koona obu niturolerra eka yaitu.

N’obu kiraaba ngu nkaba nyine eka, omu 1983, nkongera nakomwa kuheereza nka payoniya ow’embaganiza kandi nasindikwa ha kizinga kya Linapacan, omu isaza lya Palawan. Eka yaitu yoona ekagenda omu kiikaro kinu ekikaba kyesoroire, kandi nambere hakaba hatali Abakaiso ba Yahwe. Hanyuma y’okurabaho omwaka nka gumu, nyina Adel akafa. Baitu tukaikara twine bingi eby’okukora omu buheereza, ekyatukonyiire kugumira okuganya. Tukatandika kwegesa abeegi ba Baibuli abarukukurakurana omu Linapacan kandi abaagonzaaga kwija omu nsorrokano, ekyalesereho obwetaago bw’Ekyombeko ky’Obukama. Nahabweki, tukakyeyombekera. Hanyuma y’okurabaho emyaka esatu yonka twizire, kikatusemeza kurora abantu 110 baizire ha Kiijukyo, kandi baingi hali bo bakakurakurana kandi babatizibwa.

Omu 1986, nkasindikwa kuheereza omu kizinga kya Culion, nambere hakaba hali ekiikaro ekirumu abarwaire b’ebigenge. Hanyuma y’emyaka nke, Adel na uwe akakomwa kuheereza nka payoniya ow’embaganiza. Ha kubanza, tukabanza twatiina kutebeza abantu abakaba baine emibiri ey’esisiirwe oburwaire bw’ebigenge. Baitu ab’oruganda na banyaanya itwe ab’omu kiikaro eki bakatugumya ngu abantu abakaba barwaire oburwaire obu bakaba batungire obujanjabi, kandi ngu tukaba tutasemeriire kutiina ngu nibwija kutukwata. Bamu h’abantu abakaba barwaire baagendaga omu nsorrokano omu ka ya munyaanya itwe. Omu kaire kake tukamanyiira, kandi kikatusemeza kugambiraho  abantu abo okunihira kwaitu okw’omu Baibuli abakaba nibehurra ngu tibakyagonzebwa Ruhanga hamu n’abantu. Kikatusemeza muno kurora abantu abakaba barwaire muno baine okusemererwa habw’okukimanya ngu kiro kimu, nibaija kuba n’obwomeezi oburungi.—Luk. 5:​12, 13.

Abaana baitu bakamanyiira bata obwomeezi omu Culion? Nyowe na Adel tukaraaliza banyaanya itwe abato babiri kuruga omu Coron kutweteranizaaho nukwo abaana baitu basobole kutunga abanywani abarungi. Samuel, Shirley, hamu na banyaanya itwe banu babiri, bakegondeza omu buheereza, baatandika kwegesa abaana baingi Baibuli kandi nyowe na Adel, twatandika kwegesa abazaire b’abaana abo. Kandi haroho akasumi nambere tukaba nitwega Baibuli n’amaka 11. Omu kaire kake, tukatandika kwegesa abeegi ba Baibuli abakaba nibakurakurana, kandi ekyarugiremu, tukatandikaho ekitebe ekihyaka!

Ha kubanza, ninyowe omugurusi wenka ow’ekitebe ow’akaba ali omu kiikaro eki. Nahabweki itaagi likansaba kwebembera ensorrokano eza buli wiiki hali abatebezi munaana omu Culion kandi hanyuma nkole ekintu nikyo kimu hali abatebezi mwenda abakaba bali omu kyaro ekirukwetwa Marily, ekyantwarraga esaaha isatu kuhikayo omu lyato. Hanyuma y’ensorrokano, twamaraga esaaha nyingi niturubata omu nsozi, nitugenda kwegesa abeegi ba Baibuli omu kyaro ekirukwetwa Halsey.

Hanyuma, abantu baingi bakaija omu mananu omu Marily hamu n’omu Halsey ekyatuleetiire kwombeka Ebyombeko by’Obukama omu biikaro ebi. Nk’oku kikaba kiri omu Linapacan, ab’oruganda hamu n’abantu abandi abarukugonza amananu, nubo baatuhaire ebintu ebirukukira obwingi eby’okwombekesa kandi baatamu n’amaani gaabo kwombeka. Ekyombeko ky’Obukama eky’omu Marily kikaba nikisobora kwikaliza abantu 200 kandi kikaba nikisobora kugalihibwa ekyatukonyeraga kukwatirayo ensorrokano enkooto.

Omu 1993 abaana obu bakaba bakuzire, nyowe na Adel tukatandika kukora omulimo ogw’okubungira ebitebe omu Philippines. Hanyuma, omu mwaka gwa 2000, nkaba omu isomero lya Ministerial Training School obu nibantendeka kuba omwegesa omu isomero eri. Nkehurra nk’ow’atarukusobora obujunanizibwa bunu baitu Adel yaikaraga nanyekambisa. Akanyijukya ngu Yahwe naija kumpa amaani kusobora kuhikiiriza obujunanizibwa bunu obuhyaka. (Baf. 4:13)  Adel akaba naakigumya habwokuba akaba naahikiiriza obuheereza bwe obu naagumira oburwaire.

Omu 2006 obu nkaba nfookere omwegesa, Adel bakamukeberamu oburwaire oburukumanywa nka Parkinson’s disease. Tukatiina muno! Obu nagambiire Adel ngu obuheereza tubuleke, akangarukamu ati, “Caali nserurra dakitaali ow’arankonyera ha burwaire bwange bunu, kandi nkimanyire ngu Yahwe naija kutukonyera kugumizaamu omu buheereza bwaitu.” Emyaka mukaaga eyahondiireho, Adel akagumizaamu n’obuheereza bwe, atarukutontorooma. Obu akaba atakyasobora kurubata, akatandika kutebereza omu kagaali ke ak’abalema. Obu akaba atakyasobora kubaza, yagarukamuga omu nsorrokano obu naabaza ekigambo kimu rundi bibiri. Adel yatungaga obutumwa obw’okumusiima habw’ekyokurorraho kye ekirungi eky’okugumiisiriza kuhikya obu yafiire omu 2013. Nkaba mmazire emyaka ey’erukuhingura omu 30 ndi na Adel, mukazi wange omwesigwa kandi omunywani mali, baitu obuyafiire, enyehurra ez’okuganya n’okwehurra ndi nyenka, zikongera zagaruka.

Adel yagonzaaga muno ngumizeemu omu buheereza bwange kandi eki nikyo nakozere. Nkaikara nyine bingi eby’okukora ekyankonyiire kugumira enyehurra ey’okwehurra ndi nyenka. Kuruga omu 2014 kuhika omu 2017, nkasindikwa kubungira ebitebe ebirukubaza orulimi oru Tagalog omu mahanga nambere omulimo gwaitu gukaba gutangirwe. Hanyuma nkabungira ebitebe eby’orulimi oru Tagalog omu Taiwan, omu United States, hamu na Canada. Omu 2019, nkeegesa isomero ery’Abatebezi b’Obukama omu rulimi Orungereeza, omu India hamu na Thailand. Ntungire okusemererwa kwingi muno omu buheereza bunu bwona. Mba n’okusemererwa kwingi muno obu ntekera kimu omutima gwange ha buheereza bwange hali Yahwe.

Omu buheereza bwona obuhyaka obu tunga, nyeyongera kugonza ab’oruganda na banyaanya itwe abantangatangana nahabweki kiba kitanguhire kubalekaho. Omu bwire nk’obu nyegere kwesigira kimu Yahwe. Nyikaire ninyerorra obusagiki bwe, kandi kinu kinkonyiire kwikiriza n’omutima gwange gwona empindahinduka zoona eziraabaho. Kasumi kanu, nimpereza nka payoniya ow’embaganiza omu Philippines. Ntekaine omu kitebe kyange ekihyaka, ekinyakufokere eka ey’erukunsagika kandi ey’erukunfaaho. Ekindi, nkinsemeza muno kurora Samuel na Shirley nibeegera ha kyokurorraho kya nyinabo eky’okwikiriza.—3 Yoh 4.

Ntungire ebirengo bingi omu bwomeezi bwange otwaliiremu n’okurora mukazi wange omugonzebwa naabonabonesebwa oburwaire obw’amaani kandi nibumwita. Ekindi, kinyetaagisize kugumira enyikara nyingi empyaka. Baitu nabwo nkirozere ngu Yahwe “tali hara na buli omu hali itwe.” (Ebik. 17:27) Omukono gwa Yahwe “tigugufahaire” kusobora kusagika n’okugumya abaheereza be n’obu barukuba bali omu biikaro ebyesoroire. (Is. 59:1) Yahwe, Omwandara gwange, aikaire nanyowe omu bwomeezi bwange bwona kandi nimusiima muno ntaine bugarukiro. Mali nkaba ntali nyenka.