EKICWEKA KY’OKWEGA 7
EKIZINA 15 Kugiza Omwana wa Yahwe Omuzigaijo!
Okuganyira kwa Yahwe Nikukugasira Kuta?
“Baitu haroho okuganyira [kwonyini] namberoli.”—ZAB. 130:4.
EBI TURAYEGA
Nitwija kurora ebyokurorraho kuruga omu Baibuli ebirukwoleka omulingo ogw’embaganiza Yahwe ogu atuganyiramu. Ekicweka kinu nikiija kutukonyera kweyongera kumusiima habw’okuganyira kwe.
1. Habwaki emirundi erukukira obwingi kigumire kwetegereza okuganyira kw’abantu?
“NKUGANYIIRE.” Ekigambo eki nikisobora kukuhuumuza, kukira muno obu okyetegereza ngu haroho ekintu eki obalize rundi eki okozere kyasaaliza omuntu. Baitu ekigambo “nkuganyiire” nikimanyisa ki? Tugambe ngu omuntu ou osaaliize aba naagamba ngu enkoragana yanyu egarukiireho kimu? Rundi aba naamanyisa ngu tarukugonza kwongera kubazaaho ensonga egi? Okuganyira kw’abantu kugumire kwetegereza.
2. Okuganyira kwa Yahwe nikubazibwaho kuta omu Byahandiikirwe? (Rora n’obugambo obuli hansi.)
2 Omulingo Yahwe aganyiramu itwe abantu abatahikiriire, nigwahukana n’omulingo tuganyirangana. Okuganyira kwa Yahwe kwembaganiza. Omuhandiiki wa zabuli akabazaaho Yahwe ati: ‘Baitu haroho okuganyira kwonyini namberoli, nukwo otiinwe.’ a (Zab. 130:4) Ego, okuganyira kwa Yahwe kuli “kuganyira kwonyini.” Atwoleka nk’oku okuganyira kwonyini kusemeriire kuba. Omu nyikara ezimu, abahandiiki ba Baibuli bakakozesa ekigambo eky’Oruheburaniya okuganyira, ekitakozesebwa kumanyisa okuganyira okw’abantu.
3. Okuganyira kwa Yahwe nikwahukana kuta n’okwaitu? (Isaya 55:6, 7)
3 Yahwe obu aganyira omuntu, ekibi ky’omuntu ogu aba akiihireho kimu. Aba naasobora kwongera kuba n’enkoragana enungi na uwe. Nitusiima muno Yahwe habwokuba aikara naatuganyira, kandi obu atuganyira aba atuganyiriire kimu.—Soma Isaya 55:6, 7.
4. Yahwe atukonyera ata kwetegereza okuganyira kwonyini?
4 Okuganyira kwa Yahwe obu kuraaba nikwahukana n’okwaitu, itwe abantu abatahikiriire nitusobora tuta kumanya okuganyira kwonyini? Yahwe atukonyera kuraba omu kukozesa ebyokurorraho ebitukonyera kwetegereza omulingo atuganyira. Omu kicweka kinu nitwija kubazaaho bimu ha byokurorraho ebi. Nibiija kutwoleka omulingo Yahwe aihaho ekibi n’omulingo agarraho enkoragana ey’esiisirwe. Obu turayekebiija ebyokurorraho binu, nibiija kwongera ha kugonza n’okusiima oku twiniire Isiitwe ow’embabazi.
YAHWE AIHAHO EKIBI
5. Kiki ekibaho Yahwe obu atuganyira ebibi byaitu?
5 Omu Baibuli, ebibi bikira kulengesanizibwa n’emigugu erukulemeera. Omukama Daudi akabazaaho ebibi bye ati: ‘Baitu ebyokusiisa byange bimpikire ha mutwe; nk’omugugu ogurukulemeera, bindemeriire kimu.’ (Zab. 38:4) Baitu Yahwe aganyira ebibi by’abasiisi abegarukamu. (Zab. 25:18; 32:5) Ekigambo eky’Oruheburaniya ekirukumanyisa okuganyira omu nkarra zinu nikisobora kumanyisa “kwimukya” rundi “kuhimba.” Nitusobora kutekerezaaho Yahwe nk’omusaija ow’amaani ow’arukututuura ekibi kuruga ha mabega gaitu kandi akakitwara.
“Wanganyira” (Zab. 32:5)
6. Yahwe atwara ebibi byaitu kuhika nkaha?
6 Ekyokurorraho ekindi kyoleka omulingo Yahwe atwara hara ebyokusiisa byaitu. Zabuli 103:12 etugambira eti: ‘Nk’oburugaizoba okubuli hara n’obugwaizoba, nukwo ataire hara naitwe ebyokusiisa byaitu.’ Oburugaizooba buli hara muno n’obugwaizooba. Oburugaizooba tibusobora kutangatangana n’obugwaizooba. Ekirukumanyisa ngu Yahwe atwara hara muno ebibi byaitu kukira nk’oku tusobora kutekereza. Mali kinu nikitugumiza kimu ngu Yahwe obu atuganyira, aba atuganyiriire kimu!
“Nkoburugaizoba okubuli hara nobugwaizoba” (Zab. 103:12)
7. Baibuli ebazaaho eta Yahwe eki akorra ebibi byaitu? (Mik. 7:18, 19)
7 N’obu kiraaba ngu omu mulingo ogw’akokurorraho Yahwe atwara hara ebibi byaitu, tugambe ngu aikara naabiijuka? Nangwa. Omukama Hezekiya akahandiikaho Yahwe ati: “Baitu ebibi byange byona obinagire enyuma yawe.” (Is. 38:9, 17) Ekyokurorraho kinu kyoleka ngu Yahwe aihaho ebibi by’abo abegarukiremu kandi abinaga hara, naabiiha omu maiso ge. Ebigambo binu nibisobora n’okumanyisa ngu: “Oleetiire [ebibi byange] kusisana nk’ebitakabahoga.” Baibuli eyongera ebazaaho ensonga enu omu bigambo ebindi ebirukusangwa omu Mika 7:18, 19. (Soma.) Enkarra zinu nizibazaaho Yahwe nk’arukunaga ebibi byaitu omu nziha z’enyanja. Omu busumi obwa kara, ekintu ekyanagwaga omu nyanja, tikyayongeraga kuzooka.
“Baitu ebibi byange byona obinagire enyuma yawe” (Isa. 38:17)
“Kandi olinaga ebibi byabu byona omu nziha zenyanja” (Mik. 7:19)
8. Kiki eki twayega?
8 Kuraba omu byokurorraho binu, twayega ngu Yahwe obu atuganyira, atwihiraho kimu ebibi byaitu. Nahabweki, titusemeriire kwongera kwecwera omusango. Mali nk’oku Daudi yagambire, “Baine okusemererwa abo abaganyiirwe ebikorwa byabo ebibi kandi abaihirweho ebibi byabo. Aine okusemererwa omuntu Yahwe ou atalibarra ebibi bye.” (Bar. 4:6-8) Oku nukwo kuganyira kwonyini.
YAHWE ATWOGEZAAHO KIMU EBIBI BYAITU
9. Byokurorraho ki Yahwe ebi akozesa kusoborra orulengo rw’okuganyira kwe?
9 Yahwe akozesa ebyokurorraho ebindi ebirukwoleka ngu kuraba omu kicunguro ayogyaho ebibi by’abasiisi abarukwegarukamu. Tekerezaaho omulingo Baibuli ebazaaho Yahwe eki akora. Omu mulingo ogw’akokurorraho, Yahwe abazibwaho nk’ow’arukwogya ebibi binu. Kinu kirugirramu omusiisi kusemezebwa. (Zab. 51:7; Is. 4:4; Yer. 33:8) Yahwe wenyini abazaaho ekintu ekiruga omu ntekaniza enu ati: “Ebibi byanyu nobubiba nkorugoye orurukutukura, biryera nkebirika; nobubigajuka nkesagama, birifoka nkebyoya ebirukwera.” (Is. 1:18) Kigumire muno kwihaho ebitonyezi ebirukutukura ha rugoye. Baitu, kuraba omu kyokurorraho kinu Yahwe naatugumya ngu ebibi byaitu nibisobora kwogebwa byona bikahwaho kuhika ha rulengo ngu tibikyasobora kurorwa.
“Ebibi byanyu nobubiba nkorugoye orurukutukura, biryera nkebirika” (Is. 1:18)
10. Kyokurorraho ki ekindi Yahwe eki akozesa ekirukwoleka okuganyira kwe?
10 Nk’oku twarozere omu kicweka ekyahoire, ebibi nibirengesanizibwa ‘n’amabanja.’ (Mat. 6:12; Luk. 11:4) Nahabweki, buli murundi tusiisira Yahwe, ibanja lyaitu nirisisana nk’erirukweyongera obukooto. Naatubanja ibanja ery’amaani. Baitu Yahwe obu atuganyira kisisana oti rundi asalizeemu ibanja. Tarukutwetaagisa kusasura ibanja eri atuganyiire. Mali kinu kyokurorraho ekirukusoborra okuhuumura okututunga Yahwe obu atuganyira!
“Otuganyire amabanja gaitu” (Mat. 6:12)
11. Baibuli eba n’emanyisa ki obu egamba ngu ebibi byaitu ‘bisiimwirwe’? (Ebik. 3:19)
11 Yahwe tasazaamu ebibi byaitu kyonka, baitu abisiimuura. (Soma Ebikorwa by’Abakwenda 3:19.) Ekyokurorraho, tekerezaaho omuntu ow’arukusazaamu ibanja erya sente nyingi ezihandiikirwe ha rupapura. Baitu omuhendo gwa sente ezo gusigara nigukyarorwa. Baitu kusiimuura ekintu nikyahukana. Kusobora kwetegereza ekyokurorraho kinu, tusemeriire kwijuka ngu omu busumi obwa kara bwino eyakozesebwaga yabaga etabwirwemu carbon, gaamu hamu n’amaizi. Omuntu akaba naasobora kukozesa ekikuuto ekirumu amaizi kusiimuura ebikaba bihandiikirwe. Nahabweki, ibanja obu lyasiimuurwaga, lyaburraga kimu. Abantu baabaga batakyasobora kurora ebyabaga bihandiikirwe. Ebyabaga bihandiikirwe, byasisanaga nk’ebitakabahoga. Mali nikigarramu amaani kukimanya ngu Yahwe tagarukira ha kusazaamu ebibi byaitu kyonka, baitu abisiimurra kimu!—Zab. 51:9.
“Ebibi byanyu bisiimuurwe” (Ebik. 3:19)
12. Kiki eki turukwegera ha kyokurorraho ekirukubazaaho ekicu ekikwasire?
12 Yahwe akozesa ekyokurorraho ekindi kwoleka omulingo asiimuraho ebibi byaitu. Naagamba ati: ‘Ndagalizeho eby’okusiisa byawe, nk’ekicu ekikwasire, n’ebibi byawe nk’ekicu.’ (Is. 44:22) Yahwe obu atuganyira ebibi byaitu asisana nk’ow’akozeseze ekicu ekikwasire kubisereka nukwo tutabirora kandi na uwe atabirora.
“Ndagalizeho ebyokusisa byawe nkekicu ekikwasire” (Is. 44:22)
13. Yahwe obu atuganyira ebibi byaitu, kituleetera kwehurra tuta?
13 Ebyokurorraho ebi nibitwegesa ki? Yahwe obu atuganyira ebibi byaitu, titusemeriire kwikara nitwejunaana obwomeezi bwaitu bwona. Habw’ekihongwa kya Yesu Kristo, ebibi byaitu bikasalizibwamu kimu. Yahwe obu atuganyira kisisana oti rundi titukakoraga ekibi kyona. Kinu kyoleka okuganyira kwonyini okuruga hali Yahwe obu twegarukamu.
YAHWE AGARRAHO ENKORAGANA ENUNGI
Okuganyira Isiitwe ow’omu iguru atwoleka kutusobozesa kutunga enkoragana enungi na uwe (Rora akacweka 14)
14. Habwaki nitwesiga Yahwe ngu naija kutuganyirra kimu? (Rora )
14 Okuganyira kwonyini okuruga hali Yahwe kutusobozesa kutunga enkoragana enungi na uwe. Kandi kutukonyera kurwanisa enyehurra ey’okwecwera omusango. Titusemeriire kutiina ngu Yahwe naatwahurra enzigu omu nsita kandi ngu naaserra omulingo aratufubira. Eki tasobora kukikora. Habwaki tusemeriire kwesiga Yahwe obu agamba ngu atuganyiire? Yahwe akagambira nabbi Yeremiya ati: ‘Baitu ndiganyira okutahikirra kwabu, n’ekibi kyabu ndireka okukiijuka.’ (Yer. 31:34) Omukwenda Paulo obu akaba naabazaaho ebigambo binu akakozesa ebigambo ebirukusisana nabyo naagamba ati: ‘N’ebibi byabo tindibiijuka obundi.’ (Baheb. 8:12) Kinu nikitugasira kita?
“Nekibi kyabu ndireka okukiijuka” (Yer. 31:34)
15. Yahwe taijuka ebibi byaitu omu mulingo ki?
15 Omu Baibuli, amakuru g’ekigambo kwijuka tigarukugarukira ha muntu kwijuka ekintu rundi kukitekerezaaho kyonka, baitu nikitwarramu n’omuntu kugira eki yakoraho. Omusaija enkozi y’ebibi ow’akaba ahanikirwe ha muti haihi na Yesu akagamba ati: “Yesu onyijuke obu olitaaha omu Bukama bwawe.” (Luk. 23:42, 43) Akaba atarukugambira Yesu kumutekerezaaho kasumi ako. Ekyokugarukamu kya Yesu kikooleka ngu naija kugira eki yakoraho kuhumbuura omusaija ogu. Nahabweki Yahwe obu agamba ngu takyaijuka ebibi byaitu, aba naamanyisa ngu taine kintu kyona eki arukwija kutukora. Tarukwija kutufubira omu kasumi ak’omu maiso habw’ebibi ebi atuganyiire.
16. Baibuli ebazaaho eta obugabe oburuga omu kuganyirwa kwonyini?
16 Baibuli ekozesa ekyokurorraho ekindi kutwoleka obugabe oburuga omu kuganyira kwonyini. Habwokuba tuli abatahikiriire, Baibuli etulengesaniza ‘n’abairu b’ekibi.’ Baitu Yahwe obu atuganyira, tusisana nk’abairu ‘abalekiirwe kuruga omu kibi.’ (Bar. 6:17, 18; Kus. 1:5) Obu tukimanya ngu Yahwe atuganyiire, nitusobora kusemererwa nk’omwiru ow’alekiirwe.
‘Mukalekerwa kuruga omu kibi’ (Bar. 6:18)
17. Okuganyira kurugamu okukizibwa omu mulingo ki? (Isaya 53:5)
17 Soma Isaya 53:5. Ekyokurorraho ekyokumalirra eki turukwija kubazaaho nikitulengesaniza n’abantu abaine endwaire ey’akabi. Habw’ekicunguro Yahwe eki yatuhaire kuraba omu Mwana we, nitubazibwaho nk’abakiziibwe. (1 Pet. 2:24) Ekicunguro kitusobozesa kugarraho enkoragana yaitu na Yahwe ey’eba esisikaire habw’okurwara omu by’omwoyo. Nk’oku omuntu ow’aba akiziibwe endwaire ey’amaani asemererwa, na itwe tusemererwa muno obu tukizibwa omu by’omwoyo kandi tukatunga enkoragana enungi na Yahwe ey’eruga omu kuganyira kwe.
“Habw’ebihooya bye tukakizibwa” (Is. 53:5, NWT)
OKUGANYIRA KWA YAHWE KUKWATAHO KUTA OBWOMEEZI BWAITU
18. Biki ebi twegere kuraba omu kubazaaho ebyokurorraho kuruga omu Baibuli ebirukukwata ha kuganyira kwa Yahwe? (Rora n’akasanduuko “Omulingo Yahwe Atuganyira.”)
18 Biki ebi twegere kuraba omu kubazaaho ebyokurorraho kuruga omu Baibuli ebirukukwata ha kuganyira kwa Yahwe? Obu tuganyira, na itwe atuganyirra kimu kandi habw’ebiro n’ebiro. Kinu kitusobozesa kutunga enkoragana enungi na Isiitwe ow’omu iguru. Ha murundi nugwo gumu tukiijuka ngu okuganyira kwonyini kiri kisembo Yahwe eki atuha habwokuba naatugonza kandi mugabi hatali ngu habwokuba kitusemeriire.—Bar. 3:24.
19. (a) Habwaki tusemeriire kusiima Yahwe? (Abarooma 4:8) (b) Kiki eki turukwija kubazaaho omu kicweka ekirukuhonderaho?
19 Soma Abarooma 4:8. Mali itwena tusemeriire kusiima Yahwe habwokuba ali Ruhanga ow’okuganyira kwonyini! (Zab. 130:4) Baitu obu turaaba nitugonza Yahwe kutuganyira, haroho ekintu ekikuru eki tusemeriire kukora. Wetegereze Yesu eki yagambire: “Baitu obu mutabaganyira ensobi zaabo, na Isiinywe talibaganyira ensobi zanyu.” (Mat. 6:14, 15) Nahabweki, tusemeriire kwegera ha kuganyira kwa Yahwe. Eki nitusobora kukikora tuta? Ekicweka ekirukuhonderaho nikiija kutwoleka omulingo tusobora kukikora.
EKIZINA 46 Yahwe, Nitukusiima
a Omulingo ekihandiiko eky’Oruheburaniya kikozesaamu ekigambo “okuganyira,” nikyoleka ngu kunu nukwo okuganyira kwonyini. Kandi okuganyira kwa Yahwe kunu nikwahukanira kimu ha kw’abantu. Empindura nyingi eza Baibuli tizitamu embaganiza enu enkuru muno, baitu yo Baibuli eya New World Translation of the Holy Scriptures ekitamu, ekigifoire ey’embaganiza obu eba n’ebazaaho Zabuli 130:4.
