1-2. (a) Yahwe arora ki obukaikuru n’obukaikuru bw’abantu obubaija ha Kiijukyo? (Rora ekisisani ekiri ha kyesweko.) (b) Omu kicweka kinu nitugenda kubazaaho ki?

TERAMU akasisani orole omulingo Yahwe ayehurra obwarora obukaikuru n’obukaikuru bw’abantu kuruga omu nsi yoona baizire ha mukoro gw’Ekiijukyo. Tarora omuhendo gwonka, baitu arora na buli muntu anyakuroho. Nk’ekyokurorraho, arora abo abaija ha mukoro gunu buli mwaka. Abamu basobora kuba baraba omu kuhiganizibwa kw’amaani baitu nabwo nibaija ha mukoro gunu. Abandi tibakira kwija omu nsorrokano za buli kiro baitu kuba ha mukoro gunu bakitwara kuba nk’obujunanizibwa halubo. Kandi Yahwe arora nabo abaija ha Kiijukyo omurundi gw’okubanza, orundi nibaija habw’okugonza kumanya gukorwa guta.

² Hataroho kugurukyagurukya, Yahwe asemererwa obwarora abantu baingi baizire ha Kiijukyo. (Luk. 22:19) Baitu hali Yahwe, omuhendo gw’abantu abaizire tikiri nikyo ekikira kuba kikuru. Akira muno kuta omutima ha nsonga habwaki baizire; hali Yahwe, ekigendererwa nikyo kikuru. Omu kicweka kinu, nitwija kubazaaho ekikaguzo kinu ekikuru: Habwaki tugenda omu nsorrokano zoona ezi Yahwe atuteraho hatali ha Kiijukyo honka?

3-4. (a) Habwaki tugenda omu nsorrokano? (b) Obutugenda omu nsorrokano kyoleka ngu tuli bantu ba mulingo ki? (c) Kusigikirra ha 1 Abakolinso 11:23-26, habwaki tutasemeriire kuburaho ha Kiijukyo?

³ Ensonga erukukirayo obukuru habwaki tugenda omu nsorrokano eri habwokuba guli mulingo gw’okuramya Yahwe. Ensonga endi eri habwokuba tuba tugenzere kwegesebwa Yahwe. Abantu ab’emyehembo bagamba ngu busaho omuntu asemeriire  kubegesa. (3 Yoh. 9) Okwahukanaho nabo, itwe tuba n’ekihika ky’okwegesebwa Yahwe n’ekitebe eky’arukukozesa.​—Is. 30:20; Yoh. 6:45.

⁴ Okubaho kwaitu ha nsorrokano kwoleka ngu tuli bebundaazi, kandi twetegekere kwegesebwa. Tugenda ha Kiijukyo tikuli ngu habwokuba tusemeriire kubaho, baitu habwokuba nitworobera ekiragiro kya Kristo obuyagambire: “Kinu mukikolege obumurakanywaga okunyijukaga nyowe.” (Soma 1 Abakolinso 11:23-26.) Orusorrokano runu rugumya okunihira kwaitu okw’ebiro eby’omu maiso kandi rutwijuka ngu Yahwe natugonza muno. Baitu Yahwe namanya ngu nitwetaga kugarurwamu amaani hatali murundi gumu gwonka omu mwaka. Niyo ensonga habwaki atuha ensorrokano eza buli wiiki kandi niyo ensonga habwaki atwekambisa kuzigendamu. Obwebundaazi butuletera kumworobera. Buli wiiki tukozesa obwire bwaitu kusobora kutekaniza n’okugenda omu nsorrokano.

5. Habwaki abantu abaculeezi baikiriza okuralizibwa kwa Yahwe?

⁵ Yahwe araaliza abantu kwija kubegesa kandi baingi baikiriza kwija. (Is. 50:4) Obubaija ha Kiijukyo, basemererwa muno kandi bamalirra batandikire kwija n’omu nsorrokano ezindi. (Zek. 8:20-23) Itwena hamu otwaliremu abahyaka n’abaikaire omu mananu nitugonza kwegesebwa n’okuragirirwa Yahwe, anyakuli “mukonyezi [waitu] kandi omujuni [waitu].” (Zab. 40:17) Mali haroho ekintu kyona ekirukusemeza kandi ekirukukira obukuru kukira kwikiriza okuraalizibwa kwa Yahwe n’Omwana we Yesu owakirayo kugonza?​—Mat. 17:5; 18:20; 28:20.

6. Obwebundaazi bukakonyera buta omusaija omu kwija ha Kiijukyo?

⁶ Buli mwaka, tutamu amaani kuraaliza abantu baingi muno kwija kwijuka okufa kwa Yesu. Abantu baingi abebundaazi bagasiirwe habw’okwikiriza Yahwe okubaraaliza. Katurole ekyokurorraho. Emyaka y’enyuma, ow’oruganda akakwasa omusaija kaadi y’okumuraaliza ha Kiijukyo baitu omusaija yamugambira ngu tarukwija kusobora kubaho. Baitu obwire bw’Ekiijukyo obubwahikire, ow’oruganda akahunirra kurora omusaija onu nataaha omu Kyombeko ky’Obukama. Omusaija onu akakwatwaho muno habw’omulingo bamutangiriiremu kyamuletera n’okutandika kwija omu nsorrokano eza buli wiiki. Omu mwaka ogwahondireho gwona, akoosa ensorrokano isatu zonka. Kiki ekyamuletiire kucwamu kwijaga omu nsorrokano zoona? Obwebundaazi bwe nubwo bwamuletiire kuhindura entekereza ye. Hanyuma y’akasumi ow’oruganda ayamuraalize akagamba ngu, “Omusaija onu mwebundaazi muno.” Hataroho kugurukyagurukya, Yahwe nuwe yalesere omusaija onu, kandi hati ali omu ha baheereza ba Yahwe.​—2 Sam. 22:28; Yoh. 6:44.

7. Ebitwega omu nsorrokano n’ebitusoma omu Baibuli nibisobora bita kutukonyera kuba bebundaazi?

⁷ Ebitwega omu nsorrokano n’ebitusoma omu Baibuli bitukonyera kwebundaaza. Obuhaba hasigaireho wiiki nke Ekiijukyo kihike, ensorrokano zaitu zikira kubazaaho ekyokurorraho kya Yesu n’obwebundaazi yayolekere obuyahaireyo obwomeezi bwe nk’ekicunguro. Kandi obuhasigarayo ebiro bike Ekiijukyo kihike, tuterererwa kusoma ebicweka bya Baibuli ebirukubazaaho ebintu ebyabaireho omu busumi bw’okwitwa n’okuhumbuuka kwa Yesu. Ebitwega omu nsorrokano n’ebitusomaho omu Baibuli bituletera kweyongera kusiima ekihongwa Yesu yahaireyo habwaitu. Bituletera kwegera ha kyokurorraho kye eky’obwebundaazi kandi bituletera kukora Yahwe eby’agonza n’omu bwire obugumire.​—Luk. 22:41, 42.

8. Yesu akooleka ata obumanzi?

⁸ Tulengaho kuhondera ekyokurorraho kya  Yesu eky’okwoleka obumanzi. Tekerezaaho obumanzi yayolekere obuhakaba hasigaireyo ebiro bike aitwe. Akaba akimanyire kurungi ngu obwire buli haihi kuhika abanyanzigwa be bamuswaze, bamutere, kandi bamuhanike. (Mat. 20:17-19) Baitu nabwo akehayo yafa. Obwire obubwahikire, akagambira abakwenda be abesigwa abaakaba ali nabo omu musiri gwa Gesesemane: “Muimuke, tugende; Dora arukungobeza amalize kuhika.” (Mat. 26:36, 46) Kandi ekitebe ky’abantu baingi obukyaizire kumukwata kiine ebintu by’okurwanisa, akarugayo yaija omu maiso yabeyoleka, kandi yaragira abaserikale kuleka abakwenda be bagende. (Yoh. 18:3-8) Kinu ka kyokurorraho kirungi eky’obumanzi! Omu kasumi kanu, abaseserweho amagita n’ab’entaama ezindi balengaho kuhondera ekyokurorraho kya Yesu eky’obumanzi. Omu mulingo ki?

9. (a) Habwaki obwire obumu nikisobora kutwetagisa obumanzi kugenda omu nsorrokano? (b) Ekyokurorraho kyaitu nikisobora kukwataho kita ab’oruganda abasibirwe habw’okwikiriza kwabu?

⁹ Kusobora kuba omu nsorrokano butoosa, nikisobora kutwetagisa kwoleka obumanzi n’omu nyikara ezitanguhire. Abamu ha bagenzi baitu baija omu nsorrokano n’obukiraaba ngu baba baine obujune, bahoirwe amaani, rundi bali baceke omu bwomeezi. Abandi booleka obumanzi obubaija omu nsorrokano n’obubaraaba batunga okuhiganizibwa kuruga omu banyabuzaale n’ab’eby’obulemi. Banza otekerezeho omulingo ekyokurorraho kyaitu kikwataho ab’oruganda ababohiirwe omu nkomo habw’okwikiriza kwabo. (Baheb. 13:3) Obubahurra ngu nitweyongerayo kuheereza Yahwe n’obuturaaba nituraba omu bizibu bingi, kibagarramu amaani omu kwikiriza kwabo, kibaha obumanzi, kandi kibaletera kulinda obwesigwa bwabo. Omukwenda Paulo nauwe akahikwaho ekintu nikyo kimu. Obwakaba ali omu nkomo ya Roma, yasemererwaga buli murundi yahurraga ngu bagenzi be nibaheereza Yahwe n’obwesigwa. (Baf. 1:3-5, 12-14) Nasobora kuba yahandikiire Abaheburaniya ebbaruha obuhakaba hasigaireyo akaire kake alekerwe rundi obuhakaba harabireho akaire kake amazire kulekerwa. Omu bbaruha ye, akatererra Abakristaayo abo abesigwa kwikara nibagonzangana n’okutanagiriza ensorrokano.​—Baheb. 10:24, 25; 13:1.

10-11. (a) Nibaha abatusemeriire kuraaliza ha Kiijukyo? (b) Kusigikirra ha Abefeso 1:7, habwaki tusemeriire kubaraaliza?

¹⁰ Twoleka obumanzi obuturaaliza abanyabuzaale, abakozi bagenzi baitu, hamu n’abataahi kwija ha Kiijukyo. Habwaki turaaliza abantu banu? Habwokuba tuba nitusiima muno Yahwe na Yesu ekibatukoliire kandi twesanga tutarukusobora kukyesigaliza tutabaraalize ha Kiijukyo. Nitugonza nabo bamanye omulingo basobora kugasirwa kuruga ha ‘mbabazi’ za Yahwe ezitukaba tutasemeriire ezatwolekerwe kuraba omu kicunguro.​—Soma Abefeso 1:7; Kus. 22:17.

¹¹ Obutwoleka obumanzi tukaija omu nsorrokano, tuba nitwoleka n’omulingo gundi ogw’omundo, ogu Ruhanga n’Omwana we Yesu bayolekere omu mulingo ogw’ekika kya haiguru.

12. (a) Ensorrokano zongera zita kugumya okugonza kwaitu hali Yahwe na Yesu? (b) Ekyahandiikire ekya 2 Abakolinso 5:14, 15 nikyoleka ngu nitusobora kwegera hali Yesu omu mulingo ki?

¹² Okugonza kwaitu hali Yahwe na Yesu kutwekambisa kugenda omu nsorrokano. Hanyuma, ebitwega omu nsorrokano byongera kugumya okugonza kwaitu hali Yahwe na Yesu. Omu nsorrokano zinu, twikara nitwijukibwa ebintu abantu banu babiri batukoliire. (Bar. 5:8) Kukira muno Ekiijukyo kitwijukya omulingo baine okugonza okuhamire, na hali abo abatakamayire obukuru bw’ekicunguro. Habw’okusiima kwingi, tulengaho kukopa Yesu omu mulingo tutwazaamu obwomeezi bwaitu buli kiro. (Soma 2 Abakolinso 5:14, 15.) Kwongerezaaho, emitima yaitu etwekambisa kukugiza Yahwe habw’okutuha ekicunguro. Ogumu ha miringo tusobora kumukugiza nukwo kuhayo eby’okugarukamu ebirukuruga ha mutima obuturukuba tuli omu nsorrokano.

13. Nitusobora kwoleka tuta ngu okugonza kwaitu hali Yahwe na Yesu kw’amaani? Soborra.

¹³ Nitusobora kwoleka ngu okugonza kwaitu hali Yahwe na Yesu kugumire kakuba twerekesa ekintu kyona habwabo. Emirundi erukukira obwingi twefereza ebintu ebirukwahukana kusobora kuba omu nsorrokano. Ebitebe ebirukukira obwingi biba n’orumu ha nsorrokano zabyo rwebagyo, kandi obwire obu abarukukira obwingi tuba tujwahire. Kandi orusorrokano orundi rubaho ha wikendi obwire bw’abantu baingi bahumurraho. Obutwija omu nsorrokano tujwahire, Yahwe akirora? Mali akirora! Kandi twijuke ngu amaani agatutamu kwija omu nsorrokano nukwo na Yahwe ayongera kusiima habw’okugonza okutumwoleka.​—Mar. 12:41-44.

14. Yesu akatuteraho ata ekyokurorraho ky’okwoleka okugonza kuraba omu kwefereza?

¹⁴ Yesu akatuteraho ekyokurorraho eky’okwoleka okugonza kuraba omu kwefereza. Akaba atetegekere kufeera abegeswa be kwonka, baitu na buli kiro akebembeza ebyetaago byabo hatali ebye. Nk’ekyokurorraho, akatangatangana n’abegeswa be n’obwakaba ajwahire rundi aine obujune. (Luk. 22:39-46) Kandi omutima yagutaga ha mulingo asobora kugabira abandi hatali omulingo abandi basobora kumugabira. (Mat. 20:28) Okugonza kwaitu hali Yahwe n’ab’oruganda obukuraaba kugumire  kwingana aho, nitwija kukora kyona ekirukusoboka kuba ha Kiijukyo otwaliremu n’ensorrokano ezindi zoona.

15. Nibaha abaturukukira muno kugonza kukonyera?

¹⁵ Ekitebe Ekikristaayo ekiturumu nikyo kyonka eky’amananu kandi tugonza muno kukozesa obwire bwaitu obuturukuba tusoboire kutunga, kweta abahyaka kutweteranizaaho. Baitu ha rubaju orundi twakugondeze kukonyera “abomunju yokuikiriza” kukira muno abafukire omu by’omwoyo. (Bag. 6:10) Twoleka ngu nitubagonza obutubekambisa kwija omu nsorrokano, kukira muno kwija ha Kiijukyo. Nka Yahwe na Yesu, tukwatwaho muno omuntu anyakufukire omu by’omwoyo obwagaruka hali Isiitwe Yahwe, kandi Omuliisa waitu ow’okugonza.​—Mat. 18:14.

16. (a) Nitusobora kugarranganu tuta amaani, kandi ensorrokano zaitu niziija kutukonyera zita? (b) Habwaki bunu nubwo obwire burungi omu mwaka gunu kwijuka ebigambo bya Yesu ebirukusangwa omu Yohana 3:16?

¹⁶ Omu wiiki ezirukwija, wekambe kuraaliza abantu baingi kwija ha Kiijukyo ekiraabaho Kyakataano Rwebagyo, ebiro by’okwezi 19, Apuli, 2019. (Rora akasanduuko “ Orabaraaliza?”) Kurabira kimu omu mwaka ogurukwija, leka tugarranganemu amaani kurabira omu kwija omu nsorrokano zoona ezi Yahwe atuteriireho. Nk’oku obusinge bunu buli haihi kuhwaho, nitwetaga ensorrokano nukwo zitukonyere kwikara tuli bebundaazi, bamanzi, kandi abantu abaine okugonza. (1 Bas. 5:8-11) N’omutima gwaitu gwona, leka twoleke omulingo turukwehurra hali Yahwe n’Omwana we habw’okutugonza muno!​—Soma Yohana 3:16.