1-3. (a) Habwaki Yahwe yagondeze Sulemani, kandi Sulemani akatunga migisa ki? (b) Bikaguzo ki ebiturukwija kugarukamu omu kicweka kinu?

SULEMANI akaba akyali musigazi nambere yafookiire omukama wa Isareri. Hakutandikwa kw’obulemi bwe, Yahwe akamubonekera omu kirooto yamugambira ati: “Saba ekindakuha.” Sulemani akagarukamu ati: “Nyowe ndi mwana kwonka; tindukumanya nobukwakuba okuturuka nobukwakuba okutaha. . . . Habweki omuhe omuiru wawe omutima ogurukwetegereza acwege emisango yabantu bawe.” (1 Bakam. 3:5-10) Sulemani akooleka obuculeezi bwingi obuyasabire “omutima ogurukwetegereza.” Nikyo orukurorra ngu Yahwe akagonza Sulemani! (2 Sam. 12:24) Ruhanga waitu akasemererwa muno habw’omukama onu omuto kusaba “omutima ogwamagezi, kandi ogurukwetegereza.”​—1 Bakam. 3:12.

² Obwire bwona Sulemani obuyamazire ali mwesigwa hali Yahwe, akatunga emigisa nyingi. Akatunga omugisa gw’okwombeka yekaru “habwibara lya Mukama, Ruhanga wa Isareri.” (1 Bakam. 8:20) Amagezi Ruhanga yamuhaire gakamuletera kumanywa omu biikaro biingi. Kandi ebintu yabalize hansi y’oburagirizi bwa Ruhanga bikahandiikwa omu bitabu bisatu ebya Baibuli. Ekimu ha bitabu binu nikyo ekitabu eky’Enfumo.

³ Omu kitabu eky’Enfumo, ekigambo omutima nikibazibwaho haih emirundi kikumi. Ekyokurorraho, Enfumo 4:23 nirugamba: “[Linda] omutima gwawe nokwekamba kwona.” Omu kyahandiikirwe kinu, ekigambo “omutima” nikimanyisa ki? Nitwija kugarukamu ekikaguzo kinu omu kicweka kinu. Kandi nitwija kugarukamu n’ebikaguzo binu bibiri: Setani alengaho ata kusiisa omutima gwaitu? Kandi nitusobora kulinda tuta omutima gwaitu? Obuturaaba nitugonza kusigara tuli besigwa hali Ruhanga, tusemeriire  kutunga eby’okugarukamu eby’ebikaguzo binu ebikuru.

4-5. (a) Zabuli 51:6 netukonyera eta kwetegereza amakuru g’ekigambo “omutima”? (b) Omulingo tufaaho omubiri gwaitu nikitukonyera kita kwetegereza obukuru bw’okufaaho omutima gwaitu?

⁴ Omu Enfumo 4:23, ekigambo “omutima” nikikozesebwa kumanyisa eki ekituli omu nda, rundi eki ekiri “omu mutima hatarorwa” (Soma Zabuli 51:6.) Kinu nikimanyisa ngu ekigambo “omutima” nikimanyisa ebitekerezo byaitu, enyehurra yaitu, ebigendererwa byaitu, hamu n’ebitwegomba. Ekigambo “omutima” nikimanyisa kiki kyonyini ekituli omu nda, hatali nk’okuturukuzooka aheru.

⁵ Katukozese ekyokurorraho ekirukukwata ha bwomeezi bwaitu kulengaho kwoleka omulingo kikuru kumanya kiki ekituli omu nda. Eky’okubanza, tusemeriire kwikara nitulya eby’okulya eby’ekiriisa n’okukora ebisasaizi obuturaaba nitugonza emibiri yaitu ikale n’ezooka kurungi. Nikyo kimu n’obwomeezi bwaitu obw’eby’omwoyo, obuturaaba nitugonza bube burungi tusemeriire kusoma Baibuli hamu n’ebitabu by’omwiru omwesigwa kandi buli kiro tukole ebintu ebirukwoleka ngu nitwikiririza omuli Yahwe. Twoleka ngu nitwikiririza omuli Yahwe obututa omu nkora ebitwegere kandi tukabazaaho okwikiriza kwaitu. (Bar. 10:8-10; Yak. 2:26) Ekyakabiri, kakuba tusigikirra ha mulingo turukuzokamu aheru, nitusobora kutekereza ngu twine obwomeezi oburungi kandi kunu omunda turwaire. Nikyo kimu n’omu by’omwoyo, kakuba tusigikirra ha biturukukora omu kitebe kya Yahwe, nitusobora kutekereza ngu twine okwikiriza okugumire, baitu kandi nitwesanga ngu omu mutima tutandikire kwijwamu okwegomba okubi. (1 Kol. 10:12; Yak. 1:14, 15) Twijuke ngu Setani nagonza kututahyamu entekereza ye nukwo asiise omutima gwaitu. Kinu nasobora kukikora omu miringo ki? Kandi nitusobora kwerinda tuta?

6. Setani aine kigendererwa ki, kandi alengaho kukihikiriza ata?

⁶ Setani nagonza tusisane nka uwe​—omujemu arukugaya endengo za Yahwe kandi arukwebembeza omutima ogw’okwefaaho. Setani tasobora kutuhambiriza kutekereza n’okwetwaza nka uwe. Nahabweki haroho emiringo ey’akozesa  kusobora kuhikiriza ekigendererwa kye. Nk’ekyokurorraho, atwetorooza abantu abaamazire ira kusiisa. (1 Yoh. 5:19) Ekintu kinu akikora natekereza ngu nitwija kumara obwire bwingi n’abantu banu n’obuturaaba tukimanyire ngu enganjani embi zitusiisa omu bitekerezo n’omu bikorwa. (1 Kol. 15:33.) Akakozesa akatego kanu hali Omukama Sulemani kandi kakakora. Sulemani akaswera abakazi baingi abakaba batarukuramya Yahwe, kandi ekintu kinu kikakwataho muno obwomeezi bwe habwokuba obwire bukahika abakazi banu “bahindura omutimagwe” yaruga hali Yahwe.​—1 Bakam. 11:3.

7. Kintu ki ekindi Setani eky’akozesa kujanjaaza entekereza ye, kandi habwaki tusemeriire kwekengera muno?

⁷ Setani akozesa filimu na puroguramu za tivi kurarangya entekereza ye. Akimanyire ngu enganikyo tizigarukira ha kutusemeza kwonka baitu zisobora n’okuhindura entekereza, enyehurra, hamu n’enyetwaza yaitu. Yesu akakozesa omulingo gunu kwegesa, baitu uwe akagukozesa omu mulingo omurungi. Ekyokurorraho, enganikyo ze ezirukukwata hali Omusamaliya ayakonyiire omusaija ayagwire omu bazinzi, hamu n’omwana ayarugire omu ka ya ise yagenda yasiisa obugwetwa bwe. (Mat. 13:34; Luk. 10:29-37; 15:11-32) Baitu abanyakuhondera entekereza ya Setani nibasobora kukozesa omulingo gunu ogw’enganikyo kusiisa ebitekerezo byaitu. Tusemeriire kukozesa amagezi. Filimu na puroguramu za tivi nibisobora kutusemeza n’okutwegesa bitasiisire entekereza yaitu. Baitu tusemeriire kwekengera muno. Obuturaaba nitukomamu eby’okwesemeza, tusemeriire kwekaguza, ‘Filimu enu, rundi puroguramu enu eya tivi n’entekamu omutima gw’okuhondera okwegomba kwange okw’omubiri?’ (Bag. 5:19-21; Bef. 2:1-3) Osemeriire kukora ki kakuba orora ngu puroguramu ya tivi n’ekurakuraniza entekereza ya Setani? Gyetantale nk’oku osobora kwetantara oburwaire oburukuturra!

8. Abazaire nibasobora kukonyera bata abaana babo kulinda emitima yabo?

⁸ Abazaire, mwine obujunanizibwa bw’embaganiza obw’okulinda kurungi abaana banyu nukwo entekereza ya Setani etabasiisa. Hataroho  kugurukyagurukya, mukora kyona ekirukusoboka kulinda abaana banyu batakwatwa endwara. Eka yaawe ogiikaza eri nyecumi, kandi onaga ekintu kyona ekisobora kukurwaza rundi ekisobora kurwaza abaana baawe. Nikyo kimu n’omu by’omwoyo, osemeriire kulinda abaana baawe hali puroguramu za tivi, filimu, emizaano ya ha byoma bya kali magezi, hamu n’emikura ey’esobora kubatahyamu entekereza ya Setani. Yahwe akuhaire obusobozi bw’okukonyera abaana baawe kufooka banywani be. (Nfu. 1:8; Bef. 6:1, 4) Nahabweki otatiina kubateraho ebiragiro ebirukusigikirra ha misingi ya Baibuli ebibasemeriire kuhondera omu ka. Bagambire ebintu ebihikire kurora n’ebitahikire kurora, kandi obasoborre nambere osigikiriire kusobora kukora encwamu ya mulingo ogu. (Mat. 5:37) Abaana baawe obubarayeyongera kukura, tendeka entekereza yabo nukwo ubo bonka basobole kumanya ekihikire n’ekigwire. (Baheb. 5:14) Kandi otebwa ngu abaana baawe nibaija kwega bingi omu bigambo byawe, baitu kandi nibaija kwega ebirukukiraho omu bikorwa byawe.​—Bir. 6:6, 7; Bar. 2:21.

9. Setani akurakuraniza ntekereza ki, kandi habwaki eri y’akabi?

⁹ Omulingo gundi Setani alengaho kusiisa omutima gwaitu nukwo kutuletera kwesiga amagezi g’abantu omu kiikaro ky’okwesiga entekereza ya Yahwe. (Bak. 2:8) Tekerezaho emu ha ntekereza Setani arukukurakuraniza, ey’erukugamba ngu​—kufooka muguuda nikyo kisemeriire kuba kigendererwa kikuru omu bwomeezi. Abaine entekereza enu nibasobora kufooka baguuda, rundi nibasobora kutafooka. Babe bafookere bagunda rundi batafokere, nibaba bali omu kabi k’amaani. Habwaki? Habwokuba omutima gwabo gwona nibasobora kuguta ha kukora sente nibahika n’okunagiriza obwomeezi bwabo, amaka gabo, hamu n’enkoragana yabo na Ruhanga habwokuba nibagonza kuba baguuda. (1 Tim. 6:10) Nitusiima muno habwokuba Isiitwe ow’omu iguru kandi ow’amagezi atukonyera kuba n’entekereza ehikire ey’erukukwata ha sente.​—Mug. 7:12; Luk. 12:15.

10-11. (a) Kiki ekitusemeriire kukora kusobora kulinda omutima gwaitu? (b) Abalinzi b’embuga omu busumi bwa kara bakaba baine bujunanizibwa ki, kandi omuntu waitu ow’omu nda nasobora kukora ata nk’omulinzi?

¹⁰ Obuturaaba tuli b’okulinda kurungi omutima gwaitu, tusemeriire kwega kumanyirra akabi n’okurahuka kukeriinda. Kinu nikitwijukya omulimo ogukorwa omulinzi. Omu busumi bw’Omukama Sulemani, omulinzi yayemerraga haiguru ha bisiika by’orubuga kandi yahaburaga abantu obuyaroraga akabi nikaija. Ekyokurorraho kinu nikitukonyera kumanya ekitusemeriire kukora kutangira Setani kusiisa entekereza yaitu.

¹¹ Omu busumi bwa kara, abalinzi b’orubuga bakorraga hamu n’abalinzi b’emiryango y’orubuga. (2 Sam. 18:24-26) Boona hamu baakonyeraga kurora ngu enyigi z’orubuga zikingirwe omunyanzigwa obuyabaga naija. (Neh. 7:1-3) Omuntu waitu ow’omunda anyakutendekerwe kusigikirra ha Baibuli * nasobora kukora nk’omulinzi w’orubuga kandi nasobora kutuhabura buli murundi Setani aralengaho kutahirra omutima gwaitu​—obwalengaho kutahirra ebitekerezo byaitu, enyehurra yaitu, ebigendererwa byaitu, hamu n’ebintu ebitwegomba. Buli murundi omuntu waitu ow’omunda atuhabura hali akabi, tusemeriire kumuhuliiriza kandi tukiinge enyigi z’omutima gwaitu.

12-13. Nitusobora kwohebwa kukora ki, baitu tusemeriire kwetwaza tuta?

¹² Katukozese ekyokurorraho kurora omulingo tusobora kwerinda hali entekereza embi eya  Setani. Yahwe atwegeseze ngu “obusihani nokutasemera kwona, nobukwakuba okwegomba, bitaligambwaho [omuliitwe].” (Bef. 5:3) Baitu hati nitusobora kukora ki kakuba abeegi bagenzi baitu rundi abakozi bagenzi baitu batandika kubaza ebintu ebirukukwata ha busihani? Tukimanyire ngu tusemeriire “okwanga obutatina Ruhanga nokwegomba okwomunsi.” (Tit. 2:12) Omuntu waitu ow’omunda nasobora kutuhabura hali akabi. (Bar. 2:15) Baitu turamuhuliiriza? Omu kiikaro ky’okumuhuliiriza nitusobora kwesanga tusikiriziibwe kweyongera kuhuliiriza ebi bagenzi baitu barukubazaaho rundi nitusobora n’okusikirizibwa kurora ebisisani ebibarukusindika. Baitu tusemeriire kuhindura orubazo rundi kurugaho kusobora kwerinda akabi.

¹³ Nikyetagisa obumanzi bwingi kwangirra bagenzi baitu kakuba batusindikiriza kutekereza ha bintu ebibi rundi kubikora. Tukigumye ngu Yahwe narora amaani agaturukutekamu kandi ngu naija kutuha amaani n’amagezi ebiturukwetaga kusobora kwanga entekereza ya Setani. (2 Byom. 16:9; Is. 40:29; Yak. 1:5) Kintu ki kindi ekitusobora kukora kusobora kulinda kurungi omutima gwaitu?

14-15. (a) Bintu ki ebitusemeriire kwikiriza kutaaha omu mutima gwaitu, kandi eki nitusobora kukikora tuta? (b) Ekyahandiikirwe eky’omu Enfumo 4:20-22 nikisobora kutukonyera kita kugasirwa muno omu kusoma Baibuli? (Rora akasanduuko “ Nk’Oku Osobora Kwecumitiriza.”)

¹⁴ Kusobora kulinda omutima gwaitu, tikirukumara kukingira aheru entekereza embi, baitu nikyetagisa n’okukingurra ebitekerezo ebirungi. Yongera otekerezeho ekyokurorraho ky’orubuga orwine ebisiika. Omulinzi w’enyigi z’orubuga yakingaga enyigi kulemesa abanyanzigwa kutahamu, baitu obwire obundi akaba aine kukinguraho enyigi ezi nukwo bataahyemu eby’okulya n’ebintu bindi ebibabaga balesere omu rubuga. Kakuba enyigi zitakingurwaga, abaikazi b’omurubuga bakaba nibasobora kwitwa enjara. Nikyo kimu naitwe, tusemeriire kwikara nitukingura emitima yaitu kuleka ebitekerezo bya Ruhanga bitahemu.

¹⁵ Baibuli erumu entekereza ya Ruhanga, nahabweki buli murundi tugisoma tuba nituleka entekereza ya Yahwe kukwataho entekereza, enyehurra, n’ebikorwa byaitu. Nitusobora tuta kusoma Baibuli tukagasirwa omu bwijwire? Kikuru kusaba. Munyaanya itwe omu nagamba ati: “Obumba ntakatandikire kusoma Baibuli, mbanza kusaba Yahwe ankonyere kwetegereza kurungi ebintu ebiri omu Kigambo kye.” (Zab. 119:18) Ekintu ekindi tusemeriire kwecumitiriza ha bintu ebitusoma. Obutusaba, tukasoma, kandi tukecumitiriza, Ekigambo kya Ruhanga kihika munda “omu mutima [gwaitu],” kandi kituletera kugonza entekereza ya Yahwe.​—Soma Enfumo 4:20-22; Zab. 119:97.

16. Abaingi bagasiirwe bata habw’okurora puroguramu eza ha tivi yaitu?

¹⁶ Omulingo ogundi ogutwolekamu ngu nitwikiriza entekereza ya Ruhanga kutwebembera nukwo kuraba omu kurora ebintu ebiri ha tivi yaitu eya JW Broadcasting^®. Ow’oruganda omu na mukazi we nibagamba bati: “Mali puroguramu za tivi yaitu eza buli kwezi kubaire kugarukamu kw’esaara zaitu! Zitugarwiremu amaani kandi zitwekambisize buli murundi tubaire nituhurra twine enaku kandi nituhurra tuli itwenka. Omu nju yaitu, tukira kutaho obuzina obwizira omu puroguramu zinu. Tubutaho obutuba nitucumba, nitusemeza enju, rundi n’obutuba nitunywa caai.” Puroguramu zinu zitukonyera kulinda omutima gwaitu. Zitwegesa kutekereza nka Yahwe n’okwanga entekereza ya Setani.

17-18. (a) Kiki ekibaho obututa omu nkora ebintu Yahwe atwegesa nk’oku kyolekerwe omu 1 Ekyabakama 8:61? (b) Ekyokurorraho ky’Omukama Hezekiya nikitwegesa ki? (c) Kiki ekitusobora kusaba kusigikirra ha saara ya Daudi enyakuli omu Zabuli 139:23, 24?

¹⁷ Buli murundi tutunga emigisa habw’okukora ekintu ekihikire, okwikiriza kwaitu kweyongera kuguma. (Yak. 1:2, 3) Twehurra kurungi  habwokuba tuba tusemiize Yahwe kandi tumuletiire kutweta omu ha baana be, kandi n’ekihika kyaitu eky’okukora eby’agonza kyeyongera. (Nfu. 27:11) Turora buli kulengwa kwona nk’omugisa gw’okwoleka ngu omutima gwaitu gwona tugumaliire ha kuheereza Isiitwe ow’omu iguru. (Zab. 119:113) Kandi twoleka ngu nitugonza Yahwe n’omutima gwaitu gwona, omutima ogunyakwehaireyo kworobera ebiragiro bye n’okukora eby’agonza.​—Soma 1 Ekyabakama 8:61.

¹⁸ Turakora ensobi? Ego, habwokuba tituhikiriire. Kakuba tukora ensobi, ijuka ekyokurorraho eky’Omukama Hezekiya. Nauwe akakora ensobi. Baitu akegarukamu, yagenda omu maiso n’okuheereza Yahwe “nomutima oguhikiriire.” (Is. 38:3-6; 2 Byom. 29:1, 2; 32:25, 26) Nahabweki tutaikiriza Setani kututahyamu entekereza ye. Twikale nitusaba nukwo tutunge “omutima ogurukwetegereza.” (1 Bakam. 3:9; Soma Zabuli 139:23, 24.) Kakuba tulinda kurungi omutima gwaitu kukira ekintu kindi kyona, nitusobora kusigara tuli besigwa hali Yahwe.