1-2. (a) Habwaki Yesu yatwolekere omulingo ogwanguhire ogw’okwijuka okufa kwe? (b) Miringo ki eya Yesu ei turukwija kubazaaho?

NOSOBORA kusoborra kiki ekikorwa ha mukoro gw’Ekiijukyo ekibaho buli mwaka? Hataroho kugurukyagurukya, abarukukira obwingi nitusobora kwijuka ebintu ebikira kukorwa ha Kiihuro kinu ekya Mukama Waitu. Habwaki? Habwokuba entekaniza ey’ekorwa ha kiro eki eyanguhire. Baitu omukoro gwo, gw’embaganiza. Hati nitusobora kwekaguza, ‘Habwaki entekaniza enu eyanguhire muno?’

² Yesu obwakaba natebeza omu nsi, akaba amanyirwe habw’okwegesa amananu omu mulingo ogworobere kandi omu mulingo ogwanguhire kwetegereza. (Mat. 7:28, 29) Omu mulingo nugwo gumu, akatwoleka nk’oku tusobora kwijuka * okufa kwe omu mulingo ogwanguhire baitu ogw’amakuru. Katwetegereze kurungi ekiihuro eky’Ekiijukyo hamu n’ebintu Yesu yagambire n’ebiyakozere. Obu nubwo turayeyongera kwetegereza nk’oku Yesu yali mwebundaazi, mumanzi, kandi w’okugonza, kandi nitwija kurora n’omulingo tusobora kumukuratira kurungi.

3. Kusigikirra ha Matayo 26:26-28, omukoro gw’Ekiijukyo Yesu oguyatandikireho gukaba gwanguhire kwingana nkaha, kandi ebintu bibiri ebiyakozeseze bikaba nibyemerraho omu kiikaro kyaki?

³ Yesu obuyatandikireho omukoro ogw’Ekiijukyo, akaba ali n’abakwenda be 11 abesigwa. Akakwata ebintu ebyali bisigaireho ha mukoro ogw’Okuhingurwaho yatandika omukoro ogwanguhire.  (Soma Matayo 26:26-28.) Akakozesa omugaati ogutatumbisiibwe gwonka na vino ey’ekaba eroho. Yesu akagambira abakwenda be ngu ebintu ebi bibiri bikaba nibyemerraho omu kiikaro ky’omubiri gwe n’esagama ye ebyakaba ali haihi kuhonga habwabo. Abakwenda nibasobora kuba batarahuniriire habwa Yesu kukozesa ebintu ebyanguhire biti kutandikaho omukoro omukuru ogwa mulingo gunu. Habwaki nitugamba tuti?

4. Obuhabuzi Yesu yahaire Maliza nibutukonyera buta kumanya habwaki Yesu yakozere omukoro gw’Ekiijukyo omu mulingo ogwanguhire?

⁴ Tekerezaaho ekintu ekyabaireho ameezi make enyuma omu mwaka gwakasatu ogw’obuheereza bwa Yesu, obuyabungire omu ka y’enganjani ze​—Lazaro, Maliza, na Malyamu. Omu nyikara enu ey’ekaba etekaine, Yesu akatandika kwegesa. Maliza akaba aroho baitu akaba ahugukire habwokuba akaba aliyo natekaniriza omugenyi we ekiihuro eky’amaani. Yesu obuyarozere ekintu kinu, akahabura Maliza omu mulingo ogw’embabazi yamukonyera kurora ngu kikaba kitarukwetagisa kutekaniza ekiihuro ky’amaani. (Luk. 10:40-42) Hanyuma y’akasumi obuhakaba nihaburayo esaaha nke Yesu aitwe, akata omu nkora obuhabuzi obuyahaire Maliza. Akakora omukoro gw’Ekiijukyo omu mulingo ogwanguhire. Ekintu kinu nikitwegesa ki hali Yesu?

5. Ekiihuro ekitaito kikooleka ngu Yesu muntu wa mulingo ki, kandi kinu nikikirraniza kita na Abafiripi 2:5-8?

⁵ Yesu akooleka obwebundaazi omu buli kimu ekiyabazaaga n’ekiyakoraga. Nahabweki tikirukuhuniiriza kurora ngu akooleka obwebundaazi bw’amaani muno ha kiro kye eky’okumalirra obwakaba atakaisirwe. (Mat. 11:29) Akaba akimanyire ngu akaba nagenda kuhayo ekihongwa ekirukukirrayo kimu obukuru omu byafaayo by’abantu kandi ngu Yahwe akaba nagenda kumuhumbuura amuhe ekiikaro eky’ekitiinisa omu iguru. Nobwaraaba akaba akimanyire, atakole omukoro ogw’amaani kandi ogw’okweyoleka ogw’okwijuka okufa kwe. Oihireho, akagambira abegeswa be ngu buli mwaka baijukege okufa kwe n’ekiihuro ekitaito. (Yoh. 13:15; 1 Kol. 11:23-25) Ekiihuro ekitaito kinu kikoleka ngu Yesu akaba atali muntu w’emyehembo. Nikitusemeza muno kurora ngu Omukama waitu ow’omu iguru mwebundaazi.​—Soma Abafiripi 2:5-8.

6. Nitusobora tuta kwegera ha kyokurorraho kya Yesu eky’okuba bebundaazi obuturukuba tuli omu bizibu?

⁶ Nitusobora tuta kwegera ha bwebundaazi bwa Yesu? Kinu nitukikora kurabira omu kwebembeza ebyetaago by’abandi hati ebyaitu. (Baf. 2:3, 4) Yongera otekerezeeho ekiro kya Yesu  eky’okumalirra atakafiire. Yesu akaba akimanyire ngu nagenda kwitwa omu mulingo ogw’obusaasi; baitu akafaaho muno abakwenda be, abakaba nibagenda kuganya muno habw’okufa kwe. Nahabweki akakozesa obwire bwe obw’okumalirra nayegesa abakwenda be, nabagarramu amaani, kandi nabanihiza. (Yoh. 14:25-31) Omu bwebundaazi bwingi, Yesu akooleka ngu yafaayoga muno kurora ngu abandi bali kurungi kukira n’omulingo yayefahoga. Kinu kakyokurorraho kirungi ekiyatuteriireho!

7. Yesu akoleka ata obumanzi bw’amaani hanyuma y’okutandika omukoro gw’Ekiihukro kya Mukama Waitu?

⁷ Yesu akooleka obumanzi obw’ekika kya haiguru muno obuharabireho obwire buke amazire kutandika omukoro ogw’Ekiihuro kya Mukama Waitu. Akabwoleka ata? Yesu akaikiriza kukora Ise eby’agonza n’obukiraaba ngu akaba amanyire kinu nikigenda kumuletera kwitwa omu mulingo ogurukukwasa ensoni, obu najunaanwa ogw’okujuma Ruhanga. (Mat. 26:65, 66; Luk. 22:41, 42) Yesu akalindira kimu obwesigwa nukwo ahaise ibara lya Yahwe ekitiinisa, akyolekere kimu ngu Ruhanga nuwe asemeriire kulema, kandi atereho abantu abarukwegarukamu omugisa ogw’okwomeera ebiro n’ebiro. Baitu ha bwire nubwo bumu, akatekaniza emitima y’abakwenda be habw’ebi ebikaba nibigenda kubahikaho.

8. (a) Yesu akagambira ki abakwenda be abesigwa? (b) Emyaka eyahondireho hanyuma y’okufa kwa Yesu, abegeswa be bakoleka bata ngu bakaba nibahondera ekyokurorraho kye eky’obumanzi?

⁸ Yesu akooleka obumanzi bw’amaani obuyabandize kuta ha rubaju okwetuntura kwe nukwo ate omutima ha byetago by’abakwenda be abesigwa. Omukoro oguyatandikireho hanyuma y’okubinga Yuda, gwakwijukize abo boona abakaba nibagenda kufooka bahondezi be abaseserweho amagita, emigisa y’esagama ye eyasesekere, n’omugisa gw’okutaaha omu kiragaano ekihyaka. (1 Kol. 10:16, 17) Kusobora  kubakonyera kusigara bali besigwa nukwo bagende omu iguru, akagambira abahondezi be ebintu uwe na Ise bakaba nibabetagisa. (Yoh. 15:12-15) Yesu akagambiraho abakwenda be okulengwa okubakaba nibagenda kurabamu omu busumi obw’omu maiso. Nakozesa ekyokurorraho kye habwe, akabatererra nagamba ngu “mugume!” (Yoh. 16:1-4a, 33) Hanyuma y’emyaka nyingi kurabaho, abegeswa ba Yesu bakaba nibakyahondera ekyokurorraho kye ky’okwehayo n’eky’obumanzi. N’obukiraaba ngu kikaba nikisobora kubarugiramu kubonabona, bakasagikangana kuraba omu kulengwa okurukwahukana.​—Baheb. 10:33, 34.

9. Nitusobora kuhondera tuta ekyokurorraho kya Yesu omu kwoleka obumanzi?

⁹ Nikyo kimu na hati, nituhondera ekyokurorraho kya Yesu eky’obumanzi. Ekyokurorraho, nikyetagisa obumanzi kukonyera ab’oruganda abali omu kuhiganizibwa habw’okwikiriza kwabo. Obwire obumu, ab’oruganda nibasobora kutekwa omu nkomo bataine ekibakozere. Eki kakuba kibaho, tukole kyona ekiturukusobora kubakonyera, otwaliremu n’okubatonganirra. (Baf. 1:14; Baheb. 13:19) Omulingo ogundi ogutwolekamu obumanzi nukwo kweyongerayo kutebeza “nobumanzi.” (Eng. 14:3) Nka Yesu, twehaireyo kutebeza amakuru amarungi ag’Obukama, abantu n’obubakutuhakaniza rundi n’obubakutuhiganiza. Baitu obwire obumu nitusobora kwesanga tutaine obumanzi. Kiki ekitusobora kukora?

10. Obuharaaba hasigaireyo wiiki nke Ekiijukyo kihike, tusemeriire kukora ki, kandi habwaki?

¹⁰ Nitusobora kugumya obumanzi bwaitu kakuba tutekerezaaho okunihira okutwine habw’ekicunguro kya Kristo. (Yoh. 3:16; Bef. 1:7) Obuharaaba hasigaireyo wiiki nke kuhika ha Kiijukyo, twongeremu amaani omu kukora ebintu ebirukwoleka ngu nitusiima habw’ekicunguro. Akasumi ako obukarahika, tuhondere okusoma Baibuli okw’Ekiijukyo, kandi twikale nitusaba kandi nitwecumitiriza ha bintu ebyabaireho omu kasumi k’okufa kwa Yesu.  Hanyuma, ekiro eki obukirihika, tulyeyongera kwetegereza kurungi amakuru g’omugaati na vino hamu n’ekihongwa eky’embaganiza ebintu binu ekiburukumanyisa. Obutwetegereza ekintu Yesu na Yahwe baatukoliire, n’omulingo kisobora kutugasira itwe hamu n’abagonzebwa baitu, okunihira kwaitu okw’ebiro eby’omu maiso kweyongera kuguma, kandi kitukonyera n’okugumisiriza kuhika ha mpero.​—Baheb. 12:3.

11-12. Kiki ekitwayega?

¹¹ Tumazire kwega nk’oku Ekiihuro kya Mukama Waitu kitarukugarukira ha kutwijukya ekicunguro eky’omuhendo baitu nikitwijukya obwebundaazi n’obumanzi Yesu obuyayolekere. Kanikitusemeza muno kumanya ngu Yesu nakyayoleka emiringo enu nka Nyakatagara Omukuru, arukututonganirra! (Baheb. 7:24, 25) Kwoleka okusiima kwaitu kuruga ha mutima, tusemeriire kwijuka okufa kwa Yesu, nk’oku yaragiire. (Luk. 22:19, 20) Kinu tukikora ha kiro ekya Nisani 14, ekiro ekikuru muno omu mwaka.

¹² Omukoro ogwanguhire Yesu oguyakozere nitusobora kugwegeraho ekintu ekindi ekyaletiire Yesu kutufeera. Obw’akaba akyali omu nsi, akaba amanyirwe habw’okwoleka omulingo gunu. Ogu gukaba mulingo ki?

13. Yohana 15:9 na 1 Yohana 4:8-10 nizooleka zita okugonza oku Yahwe na Yesu bayolekere, kandi nibaha abagasirwe habw’okugonza oku?

¹³ Ebintu byona Yesu yakozere bikooleka okugonza Yahwe okwatwiniire. (Soma Yohana 15:9; 1 Yohana 4:8-10.) Ekirukukira byona, Yesu akehayo n’omutima gwe gwona, kuhayo obwomeezi bwe habwaitu. Tube tuseserweho amagita rundi tuli ‘ab’entaama ezindi,’ itwena tugasirwa omu kugonza Yahwe n’Omwana we batwolekere kurabira omu kihongwa eki. (Yoh. 10:16; 1 Yoh. 2:2) Tekerezaaho n’ebintu ebikozesebwa ha Kiijukyo; byoleka okugonza kwa Yesu n’okufaayo kwe hali abegeswa be. Omu mulingo ki?

14. Yesu akooleka ata abegeswa be okugonza?

¹⁴ Yesu akooleka abegeswa be abaseserweho amagita okugonza obuyatandikireho omukoro ogutagumire baitu ogwanguhire. Obwire obubwagenzere nibuhwaho, kikaba nikyetagisa abaseserweho amagita kwikara nibakora omukoro gunu omurundi gumu buli mwaka, nibagukorra omu nyikara yoona n’obubarukuba bali omu nkomo. (Kus. 2:10) Bakasobora kworobera Yesu? Ego!

15-16. Abamu basoboire bata kwijuka okufa kwa Yesu n’omu bwire obutanguhire?

¹⁵ Kuruga omu kyasa eky’okubanza kuhika na hati, Abakristaayo ab’amananu baikaire nibatamu amaani kurora baijuka okufa kwa Yesu. Baikaire nibalengaho muno kukora ebi byonyini ebyakozirwe ha Kiihuro kya Mukama Waitu, obwire obumu nibabikora n’obubarukuba bali omu nyikara ey’egumire. Katurole ebyokurorraho binu. Ow’oruganda Harold King obwakaba abohiirwe omu nkomo, kandi ali wenka omu kaduukuru omu ihanga lya China, akaba aine kuserra omulingo gw’okwijukamu okufa kwa Yesu. Akakozesa ebintu ebyaka aine kukora omukoro gw’Ekiijukyo, kandi akakikora omu nsita. Kandi akabalirra ebiro by’okwezi n’obwegendereza bwingi nukwo amanye ekiro kinu nikibaho di. Ekiro ky’Ekiijukyo obukyahikire, akatandika kuzina, yasaba, kandi yaha orubazo, kandi obu ebintu nabikora wenka.

¹⁶ Haroho ekyokurorraho kindi. Banyanyaanya itwe abakaba basibiirwe omu nkambi omu kasumi Obulemu bw’Ensi Yoona Obwakabiri bukaba nibugenda omu maiso, bakata obwomeezi bwabo omu kabi nukwo basobole kwijuka okufa kwa Yesu. Baitu habwokuba ebintu ebikozesebwa ha mukoro gunu byanguhire, bakasobora kwijuka okufa kwa Yesu omu nsita. Bakagamba bati: “Tukatekaho akameeza karoho  ekitambaara ekirukwera kandi twataho omugaati na viino, twabyehinguliriza. Tukakozesa kando habwokuba amasanyarazi gakaba nigasobora kwoleka abandi ekitukaba nitukora. . . . Tukagarukamu okurahira kwaitu hali Isiitwe ngu nitwija kukozesa amaani gaitu goona kweza ibara lye erirukwera.” Kunu kakwikiriza kw’amaani okubayolekere! Yesu kakatwoleka okugonza kw’amaani obuyatuteriireho omulingo ogwanghire ogw’okwijukamu okufa kwe n’omu bwire obutanguhire!

17. Bikaguzo ki ebitusobora kwekaguza?

¹⁷ Ekiijukyo obukiraaba nikyeyongera kwirra haihi, twekaguza ebikaguzo binu: ‘Ninsobora kuhondera nta ekyokurorraho kya Yesu omu kwoleka okugonza? Nkira kutekerezaaho muno ebyetaago by’abaheereza bagenzi bange kukira ebyange? Ab’oruganda n’abanyaanya itwe nimbanihirramu bingi kukira ebibarukusobora, rundi ki nimmanya obuceke bwabo?’ Katuhondere ekyokurorraho kya Yesu obwire bwona twikale nitwoleka ngu niturumirirwa abandi.​—1 Pet. 3:8.

18-19. (a) Kintu ki ekitutasemeriire kugurukyagurukya? (b) Kiki eky’ocwiremu kukora?

¹⁸ Ekiragiro ky’okwijuka okufa kwa Yesu kiri haihi kuhwaho. Yesu “obwaliija” omu muhito omwingi, alisorooleza “abakomebe” omu iguru, kandi obu nubwo eby’okwijuka okufa kwa Yesu birihwaho.​—1 Kol. 11:26; Mat. 24:31.

¹⁹ Kandi n’okwijuka okufa kwa Yesu obukulihwaho, twikale nitukigumya ngu abantu ba Yahwe baliikara nibaijuka n’omuhimbo mwingi ekiihuro kinu ekyanguhire nk’akokurorraho ak’obwebundaazi, obumanzi, n’okugonza okurukukirayo okwayolekerwe omuntu. Omu kasumi ako, abo boona abaijukaga okufa kwa Yesu omu mulingo gunu baligambiraho boona abaliba bali bomeezi nukwo nabo basobole kugasirwa. Baitu ekiihuro kinu kusobora kutugasira omu kasumi kanu, tusemeriire kwekamba kuhondera ekyokurorraho kya Yesu eky’obwebundaazi, obumanzi, n’okugonza. Kakuba tukora kinu, tukigumye ngu nitwija kutunga empeera kuruga hali Yahwe.​—2 Pet. 1:10, 11.