KYAKASATU nyenkyakara, ebiro by’okwezi 24 Janwali 2018, ab’oruganda n’abanyaanya itwe ab’omu Beseeri eya Amerika n’eya Canada bakasemererwa muno obubahuliire ekirango eky’embaganiza ekikaba nikigamba ngu: Ow’oruganda Kenneth Cook, Jr., akaba akomerwe kuba omu ha b’oruganda abali ha Katebe Akalemi ak’Abakaiso ba Yahwe.

Ow’oruganda Cook akazalirwa kandi yakurra omu Pennsylvania, U.S.A. Amananu akagegera hali omwegi mugenzi we obwakaba ali haihi kumara siniya, kandi akabatizibwa Juuni 7, 1980. Akatandika kuheereza omu buheereza obw’akasumi koona Sebutemba 1, 1982 nka payoniya ow’akasumi koona. Hanyuma y’emyaka ebiri naheereza nka payoniya, akeetwa kugenda kuheereza ha Beseeri, kandi akatandika kuheereza omu Wallkill, New York, Okitobba 12, 1984.

Emyaka 25 eyahondiireho, Ow’oruganda Cook akagimara nakora emirimo erukwahukana otwaliremu n’okukora omu byoma ebiturukya ebitabu hamu n’okukora omu ofiisi erukurolerra Ababeseeri. Akaswera mukazi we Jamie, omu mwaka 1996, kandi mukazi we nauwe akatandika kuheereza ha Beseeri omu Wallkill. Omu Desemba, 2009, Ow’oruganda Cook na mukazi we bakafururwa bagaruka ha Watchtower Educational Center ey’erukusangwa omu Patterson, New York, nambere ow’oruganda onu yahairwe obujunanizibwa bw’okukora ha mabbaruha ga Beseeri. Omu kwezi kwa Apuli 2016, hanyuma y’okugarurwaho kake omu Wallkill, Ow’oruganda na Munyanyaanya itwe Cook bakafururwa bagarurwa omu Brooklyn, New York. Hakarabaho ameezi ataano babatwara ha ofiisi yaitu enkuru ey’ensi yoona enyakuli omu Warwick, New York. Janwali 2017, Ow’oruganda Cook akakomwa kuheereza nk’omukonyezi ha katebe akarukwetwa Writing Committee akali hansi y’Akatebe Akalemi.