1-2. Kiki malaika ekiyagambiire abakazi abakaba baizire ha kituuro kya Yesu, kandi na Yesu wenyini akabagambira ki?

BWALI bwire bwa nyenkyakara Nisani 16 omwaka 33 C.E., harabireho esaaha ezirukuhingura omu 36 Yesu amazire kuziikwa, abakazi abarukitiina Ruhanga bakagenda ha kituuro nambere Yesu bamuziikire. Obu bahikire ha kituuro nambere Yesu yali aziikirwe, n’ekigendererwa eky’okusiiga omubiri gwe ebiboya hamu n’amagita, bakahunirra muno obu basangire omubiri gwe gutarumu! Malaika akagambira abegeswa banu ngu Yesu akaba ahumbukiire kuruga omu bafu, kandi yabagambira ati: “Nabebembera okugenda Galiraya; nuho mulimurorra.”​—Mat. 28:1-7; Luk. 23:56; 24:10.

² Hanyuma y’abakazi banu kuruga ha kituuro, Yesu akaija nambere bali kandi yabagambira ati: “Mugende mugambire bagenzi bange bagende Galiraya, nuho balindorra.” (Mat. 28:10) Yesu kutandika natekaniza orusorrokano runu hanyuma y’okuhumbuuka nikyoleka ngu akaba aine oburagirizi obw’amaani obwakaba nagonza kuha abegeswa be!

3-4. Habwaki ekiragiro ekiri omu Matayo 28:19, 20 kyali kitali ky’abakwenda bonka? (Rora ekisisani ekya ha kyesweko.)

³ Soma Matayo 28:16-20. Harusorrokano runu Yesu yatekaniize, akasoborra kurungi omulimo omukuru abahondezi be baali nibagenda kukora omu kyasa eky’okubanza kandi omulimo gunu nitukyagukora na hati. Yesu akagamba ati: “Mugende, muhindule amahanga gona abageswa, . . . , nimubegesa okukwata byona ebinabaragiire.”

⁴ Yesu nagonza abahondezi boona batebeze. Ekiragiro kinu atakiheereze  abakwenda be 11 bonka. Kinu nitukigumya tuta? Yesu obuyahaire ekiragiro eky’okufoora abantu abegeswa ha rusozi omu Galiraya, abakwenda bonka nubo baali baroho? Ijuka malaika akagambiire abakazi ati: ‘Mulimurorra [omu Galiraya].’ Kinu nikimanyisa ngu n’abakazi banu abesigwa baine kuba baali baroho Yesu obuyahaire ekiragiro eki. Haroho n’obwakaiso obundi. Omukwenda Paulo akooleka ngu Yesu “[akarorwa] bene baitu okukira bikumi bitano omurundi gumu.” (1 Kol. 15:6) Bakamurorra nkaha?

5. Habwaki nitugamba ngu 1 Abakolinso 15:6 n’ebazaaho orusorrokano oruli omu Matayo esuura 28?

⁵ Haroho ensonga ezirukutuletera kutekereza ngu omu 1 Abakolinso 15:6 Paulo akaba n’abazaaho orusorrokano orw’abaire omu Galiraya orukubazibwaho omu Matayo esuura 28. Nsonga ki? Ey’okubanza, abegeswa ba Yesu abaingi barugaga omu kicweka kya Galiraya. Nahabweki kyali nikyanguha kutangatangana abantu baingi ha rusozi orw’omu Galiraya hatali omu Yerusalemu omu ka y’omuntu. Eyakabiri, Yesu akaba amazire ira kutangatangana n’abakwenda be ikumi 11 omu ka y’omuntu ey’ekaba eri omu Yerusalemu. Kakuba Yesu akaba n’agonza kuha abakwenda be bonka ekiragiro ky’okutebeza n’okufoora abantu abegeswa, yakubaire akikoliire omu Yerusalemu hatali kuragira abakwenda, n’abegeswa abandi kutangatangana nauwe omu Galiraya.​—Luk. 24:33, 36.

6. Matayo 28:20 n’etukonyera eta kumanya ngu ekiragiro eky’okufoora abantu abegeswa nikitukwataho omu kasumi kanu, kiki ekirukwoleka ngu nituhondera ekiragiro kinu omu kasumi kanu?

⁶ Wetegereze ensonga eyakasatu kandi enkuru. Ekiragiro kya Yesu eky’okufoora abantu abegeswa kyali kitakukwataho Abakristaayo ab’omu kyasa eky’okubanza bonka. Kinu nitukumanya tuta? Yesu obuyamazire kuha ekiragiro kinuakagamba ati: ‘Nyowe ndi hamu nainywe ebiro byona, okuhikya obusinge bunu obubulihwaho.’ (Mat. 28:20) Nk’oku Yesu yagambire, n’omu kasumi kanu abantu nibakora omulimo ogw’okufoora abantu abegeswa. Kitekerezeeho haihi abantu 300,000 nubo barukubatizibwa buli mwaka nk’Abakaiso ba Yahwe kandi bafooka begeswa ba Yesu Kristo!

7. Kiki ekiturukwija kubazaaho, kandi habwaki?

⁷ Abantu baingi abeega Baibuli bakurakurana kandi bahika ha kubatizibwa. Baitu, abamu abatusoma nabo Baibuli nikizooka ngu bezigaziga obukirukuhika ha kufooka abegeswa. Nibagonza kusoma baitu tibakurakurana kuhika ha kubatizibwa. Obworaaba oine omwegi wa Baibuli, nitukigumya ngu nogonza kumukonyera kuteeka omu nkora ebyarukwega nukwo afooke mwegeswa wa Kristo. Omu kicweka kinu nitwija kubazaaho nk’oku tusobora kuhika ha mutima gw’omwegi wa Baibuli kandi tukamukonyera kukurakurana omu by’omwoyo. Habwaki tusemeriire kubazaaho ensonga enu? Habwokuba akaire nikaija kuhika nambere tusemeriire kucwamu kugumizaamu nitwega n’omuntu rundi kumuleka.

8. Habwaki nikisobora kutugumira kukonyera abeegi ba Baibuli abamu kugonza Yahwe?

⁸ Yahwe nagonza abantu bamuheereze habw’okumugonza. Nahabweki, ekigendererwa kyaitu kiri ky’okukonyera abeegi baitu ba Baibuli kukyetegereza nk’oku Yahwe n’abafaaho kandi n’abagonza muno. Nitugonza kubakonyera kurora Yahwe nka “[Ise abo] abatanyina baisebo, kandi omuramuzi wabafakati.” (Zab. 68:5) Abeegi baawe ba Baibuli obubarakyetegereza ngu Ruhanga n’abagonza muno, nikisobora kubaletera nabo kumugonza. Abeegi abamu nikisobora kubagumira kurora Yahwe nka Isitwe ow’engonzi habwokuba baisebo batabooleke okugonza kandi batabafeeho. (2 Tim. 3:1, 3) Obworaaba nosoma nabo bakonyere kwetegereza kurungi, emiringo ya Yahwe ey’erabakonyera  kumugonza. Konyera abeegi baawe kukyetegereza nk’oku Ruhanga waitu ow’okugonza n’agonza batunge obwomeezi obutahwaho kandi ayetegekere kubakonyera kubutunga. Kintu ki ekindi ekitusobora kukora?

9-10. Butabu ki obutusemeriire kukozesa kwegesa abeegi ba Baibuli, kandi habwaki tusemeriire kukozesa obutabu obu?

⁹ Kozesa obutabu “Baibuli Etwegesa Ki?” na ‘Mwerindirege omu Kugonza kwa Ruhanga.’ Obutabu obu bukozerwe omu mulingo ogurukutusobozesa kuhika ha mitima y’abeegi baitu ba Baibuli. Ekyokurorraho, esuura 1 ey’akatabu Baibuli Etwegesa Ki n’egarukamu ebikaguzo binu: Ruhanga atufaaho, rundi ki tatugirra embabazi?, Ruhanga ahurra ata obwarora abantu nibabonabona?, kandi N’osobora kuba munywani wa Ruhanga? Kandi akatabu Mwerindirege omu Kugonza kwa Ruhanga? nikasobora kubakonyera kata? Akatabu kanu nikaija kukonyera omwegi wawe kwetegereza habwaki kuhondera emisingi ya Baibuli nikisobora kumukonyera kutunga obwomeezi oburungi kandi n’okumukonyera kwirra haihi na Yahwe. N’obworaaba oikaire  n’okozesa obutabu bunu kwegesa abandi, tekaniza kurungi buli murundi oraaba n’ogenda kwegesa omuntu ondi kandi otekanize n’osigikirra ha byetaago bye.

¹⁰ Kiki eky’osobora kukora kakuba omwegi wawe aba n’agonza kumanya isomo eritali omu Bikwato Byaitu Ebitukozesa Kwegesa baitu liri omu kitabu ekindi? N’osobora kumugambira asome ekitabu eki omu bwire bwe obundi nukwo musobole kugumizaamu nimwega kimu ha bitabu ebitukozesa kwegesa ebitubalizeehoga.

11. Nidi obutusemeriire kutandika kukikunguraho n’okukingaho n’okusaba obuturukuba nitwegesa omwegi, kandi nosobora ota kwoleka omwegi wawe omugaso gw’okusaba?

¹¹ Mutakatandikire kwega mubanze musabe. Emirundi erukukira obwingi, kirungi kutandikiraho kukingura n’okumalirra n’esaara hanyuma y’okutandika kwega n’omuntu Baibuli. Tusemeriire kukonyera omwegi waitu kukimanya ngu kusobora kwetegereza Ekigambo kya Ruhanga nitwetaaga omwoyo ogurukwera. Abegesa ba Baibuli abamu bakozesa ekyahandiikirwe ekiri omu Yakobo 1:5 kukonyera abeegi babo kurora omugaso ogw’okusaba, ekirukugamba ngu: “Baitu omuntu wena omulinywe obwaburwa amagezi, asabe Ruhanga.” Nukwo omwegesa akaguze omwegi we ati, “Nitusobora tuta kutunga amagezi kuruga hali Ruhanga?” Kinu nikisobora kukonyera omwegi wawe kwikiriza mukasaba.

12. Nosobora ota kukozesa Zabuli 139:2-4 kukonyera omwegi wawe kusemeza omulingo asabamu?

¹² Yegesa omwegi wawe omulingo asemeriire kusaba. Musoborre nk’oku Yahwe nagonza kuhurra esaara ze ezirugire ha mutima. Musoborre ngu omusaara zaitu nitusobora kugambira Yahwe kiki kyonyini ekiri ha mutima gwaitu kandi n’ebintu ebitutasobora kugambira abantu abandi. Ijuka ngu Yahwe amanyire ebitekerezo byaitu byona. (Soma Zabuli 139:2-4.) Nitusobora n’okwekambisa omwegi waitu kusaba Ruhanga nukwo amukonyere kuleka engeso embi hamu n’entekereza etahikire. Ekyokurorraho, omwegi nasobora kuba amazire akasumi nasoma, baitu haroho ekijaguzo ekitali omu byahandiikirwe eky’arukugonza. Akimanyire ngu tikihikire, baitu haroho ebintu ebimu ebikorwa ha kiro eki eby’akira kugonza. Mwekambise kugambira Yahwe omulingo gwonyini ogw’arukwehurramu kandi amwesengereze kumukonyera kugonza ebintu Ruhanga eby’agonza.​—Zab. 97:10.

13. (a) Habwaki tusemeriire kutandika kara kuraaliza abeegi kwija omu nsorrokano? (b) Nitusobora tuta kukonyera omwegi waitu kutatiina abantu obwarukuba aizire omu nsorrokano?

¹³ Tandika kara kuraaliza omwegi wawe kwija omu nsorrokano. Omwegi wawe eby’ahurra kandi n’eby’arora omu nsorrokano ez’Ekikristaayo nibisobora kuhika ha mutima gwe kandi bimukonyere kukurakurana. Mwoleke vidiyo Biki Ebikolebwa omu Kingdom Hall? kandi muraalize n’omuhimbo kugenda naiwe omu nsorrokano. Obukiraaba nikisoboka, nosobora kumukonyera omu by’endubata kwija omu nsorrokano. Kirungi kugenda n’abatebezi abarukwahukana kwegesa omwegi wawe owa Baibuli. Kinu nikiija kukonyera omwegi wawe kumanya abantu abali omu kitebe nukwo kimukonyere kuleka kutiina abantu obwaliba aizire omu nsorrokano.

14. Kiki ekisobora kukonyera omwegi wa Baibuli kukura omu by’omwoyo?

¹⁴ Ekigendererwa kyaitu kiri ky’okukonyera abeegi baitu ba Baibuli kukura omu by’omwoyo. (Bef. 4:13) Omuntu obwaikiriza kwega Baibuli, omutima gwe gwona nasobora kuguteeka ha mulingo kwega Baibuli kuramukonyera we nk’omuntu. Baitu okugonza kwe hali Yahwe obukugenda nikweyongera, atandika kugonza kukonyera abandi otwaliremu nabo abali omu kitebe. (Mat. 22:37-39) Omu kaire akasemeriire, otatiina kumugambira entekaniza ey’okusagika omulimo ogw’Obukama nitukozesa sente.

15. Nitusobora tuta kukonyera omwegi wa Baibuli kumanya eky’okukora obw’atunga ebizibu?

 ¹⁵ Yegesa omwegi wawe owa Baibuli eky’okukora obw’aratunga ebizibu. Ekyokurorraho, kakuba omwegi wawe owali mutebezi atakabatiziibwe, akugambira ngu haroho omuntu omu kitebe ow’amubihiize, omu kiikaro ky’okugwera orubaju, mugambire emisingi ya Baibuli ey’asemeriire kuhondera. Nasobora kumuganyira, baitu kakuba ayehurra ngu tasobora kumuganyira nasobora kumuhikirra omu mulingo ogw’embabazi kandi ogw’okugonza n’ekigendererwa ‘ky’okutunga’ mugenzi we. (Lengesaniza na Matayo 18:15.) Mukonyere kutekaniza ebyarukugenda kubaza. Mwoleke nk’oku asobora kukozesa puroguramu eya JW Library^®, Research Guide for Jehovah’s Witnesses, hamu n’omukura gwa jw.org^® kumanya eky’okukora omu nyikara enu. Obwarayega omulingo asemeriire kukwatamu ensonga nka zinu atakabatizibwe, nikiija kumukonyera kutunga enkoragana enungi n’ab’oruganda hanyuma y’okubatizibwa.

16. Habwaki kirungi kuraaliza omutebezi ondi kugenda naiwe obworukuba n’ogenda kwegesa omwegi wawe?

¹⁶ Raaliza abatebezi abandi omu kitebe hamu n’omuroleerezi w’ekicweka kugenda naiwe obworaaba n’ogenda kumwegesa. Habwaki? Kwongera ha nsonga ezitubalizeehoga, abatebezi abandi nibasobora kumukonyera omu miringo iwe ey’otasobora kumukonyeramu. Ekyokurorraho, kakuba omwegi wawe ataaha nagonza kuleka omuze ogw’okunywa etaaba baitu alemesibwe kumara akasumi, raaliza omutebezi kugenda naiwe kumwegesa ay’asoboire kusingura omuze ogu hanyuma y’okulengaho emirundi nyingi. Omutebezi mutaahi wawe ogu nasobora kumuha amagezi agarukwetaaga gonyini. Baitu obworaaba nohurra tikirukukwanguhira kwegesa omwegi wawe, obu harukuba haroho omutebezi ondi anyakwine obukugu kukukira, nosobora kumusaba nuwe amwegese omu murundi ogu. Okimanye ngu obukugu obw’abatebezi abandi nibusobora kugasira omwegi wawe. Oikale n’okiijuka ngu ekigendererwa kyaitu kiri ky’okukonyera omwegi kukura omu by’omwoyo.

17-18. Kiki eky’osemeriire kutekerezaaho otakacwiremu kuleka omwegi wawe?

¹⁷ Kakuba omwegi wawe owa Baibuli aba atarukukurakurana, nosobora kutandika kwekaguza oti: ‘Ndekeraho kumwegesa?’ Obworaaba notekerezaaho ekikaguzo kinu osemeriire kutekerezaaho obusobozi bwe. Abantu abamu barahuka kukurakurana kukira abandi. Wekaguze: ‘Kusigikirra ha nyikara ey’omwegi wange arumu, akurakuraine nk’oku kisemeriire?,’ ‘Atandikire “okukwata” rundi kuteeka omu nkora ebyarukwega?’ (Mat. 28:20) Omwegi nasobora kukurakurana mpora baitu nabwo asemeriire kuba nakurakurana.

¹⁸ Kiki eky’osobora kukora kakuba omazire akasumi noyega n’omuntu baitu okakyetegereza ngu tarukufaayo ha bintu ebyarukwega? Tekerezaaho ekyokurorraho kinu: Omwegi wawe akamara kwega akatabu Baibuli Etwegesa Ki?, kandi obundi akatandikire n’okwega akatabu Mwerindirege omu Kugonza kwa Ruhanga, baitu takaijaga  omu nsorrokano n’obukyakuba Ekiijukyo! Kandi obwire obumu asazaamu obwire obw’okwega habw’ensonga ezitarumu. Obworaaba oine omwegi nk’ogu, otatiina kubaza nauwe ha nsonga egi. *

19. Kiki eky’osobora kukaguza omuntu arukuzooka nk’atarukufaayo ha bintu ebyarukwega, kandi kiki eky’osemeriire kubanza kumanya?

¹⁹ Nosobora kubanza okamukaguza ekikaguzo kinu, ‘Notekereza kiki ekirukwija kukugumira muno kakuba ofooka omu h’Abakaiso ba Yahwe?’ Omwegi nasobora kukugarukamu ngu, ‘Ningonza kwega amananu, baitu tinakugondeze kufooka omu h’Abakaiso ba Yahwe!’ Egi obweraaba niyo ntekereza ye hanyuma y’okumara akasumi kaingi nayega, mali nikikwetagisa kugumizaamu kwegesa omuntu nk’ogu? Baitu omwegi ogu asobora kukozesa omugisa gunu kukugambira ensonga ey’etaaha n’emulemesa kukurakurana. Ekyokurorraho, nasobora kwehurra ngu tarukwija kusobora kutebeza nju ha nju. Obwomanya omulingo arukwehurramu kikukonyera kumanya omulingo osobora kumukonyera.

20. Ekyahandiikirwe ekiri omu Engeso Ezabakwenda 13:48 nikitukonyera kita kumanya obuturaaba tusemeriire kugumizaamu nitwega n’omuntu?

²⁰ Ekirukusaaliza kiri ngu, abeegi abamu nibasisana Abaisaleri ab’omu kasumi ka nabbi Ezekyeri. Wetegereze Yahwe ekiyagambiire Ezekyeri h’abantu abo: “Dora, iwe oli nambere bali nkekizina ekirukugonzebwa ekyomuntu anyina iraka erisemiire, amanyire muno okutera enanga: baitu nibahurra ebigambo byawe, kunu tibarukubikora.” (Ez. 33:32) Nikisobora kukugumira kugambira omuntu ngu nogenda kuleka kumwegesa. Baitu twijuke ngu, ‘ebiro ebisigaireyo bike.’ (1 Kol. 7:29) Omu kiikaro ky’okusiisa obwire noyegesa omwegi atarukukurakurana, tusemeriire kuserra omuntu arukwoleka ngu aine entekereza enungi ey’esobora kumuletera kutunga obwomeezi obutahwaho.​—Soma Engeso Ezabakwenda 13:48 kuruga omu bugambo obuli hansi. *

21. Ekyahandiikirwe kyaitu eky’omwaka 2020 nikyo kiha, kandi habwaki kisemeriire?

²¹ Omu mwaka 2020, ekyahandiikirwe eky’omwaka nikiija kutukonyera kuteeka omutima ha kusemeza omulingo turukukoramu omulimo gwaitu ogw’okufoora abantu abegeswa. Ekyahandiikirwe kinu kirumu ebigambo Yesu Kristo yabalize ha rusorrokano rukuru orwabaire ha rusozi omu Galiraya, ebirukugamba ngu: “Nahabweki, mugende mufoole abantu abegeswa . . . , nimubabatiza.”​—Mat. 28:19, NW.