1-2. Nyikara ki ez’abaheereza ba Yahwe abarukukira obwingi ezibarukurabamu, kandi biki ebisobora kurugamu?

TEKEREZAAHO enyikara zinu isatu: Ow’oruganda omuto bamusangamu oburwaire obw’amaani kandi oburukumuletera kwikara n’ayeyongera kuceka. Ow’oruganda ow’aine emyaka nka 50 arukukora n’amaani bamubinga ha mulimo, kandi alengaho muno kuserra gundi baitu gumubura. Munyaanya itwe omwesigwa ayeyongerra kimu kuceka habw’okukaikura ekimuletera kukora kake muno omu kuheereza Yahwe.

² Obworaaba noraba omu nyikara nk’ezo ezibaziibweho eruguru, nosobora kwehurra nk’atakyaine omugaso. Enyikara ezo nizisobora kukumaraho okusemererwa, kukuletera kwehurra otaine mugaso, kandi nizisobora n’okuletera enkoragana yaawe n’abantu abandi kuceka.

3. Sitaani hamu n’abantu abahondera entekereza ye, batwaza bata abantu abandi?

³ Kusisanaho na Sitaani, abantu b’ensi barora obwomeezi bw’abantu nk’obutaine mugaso. Kuruga kara Sitaani aikaire natwaza abantu nk’abataine omugaso. Habw’itima akagambira Hawa ngu akaba nagenda kutunga obugabe obuyakujemiire Yahwe, kandi kunu akaba akimanyire ngu kujemera Ruhanga kyali nikigenda kuletera Hawa kufa. Sitaani aikaire aine omukono omu by’entahya, eby’obulemi, hamu n’amadiini omu nsi yoona. Nahabweki tikirukutuhuniriza kurora abasubuzi baingi, abalemi, hamu n’abebembezi b’amadiini nibatwaza abantu omulingo ogutali gw’ekitiniisa kandi ogurukwoleka ngu tibarukubafaaho.

4. Nitugenda kubazaaho ki omu kicweka kinu?

 ⁴ Baitu kandi Yahwe nagonza tukimanye ngu tuli b’omuhendo, kandi atukonyera obututunga ebizibu ebisobora kutuletera kwehurra nk’abataine mugaso. (Zab. 136:23; Bar. 12:3) Ekicweka kinu nikiija kusoborra omulingo Yahwe atukonyeramu omu nyikara zinu: (1) Obuturwara, (2) obututunga ebizibu omu by’entahya, kandi (3) obutukura omu myaka kandi tukatandika kwehurra nk’abataine kintu kyona eky’omugaso ekitusobora kukorra Yahwe. Baitu katubanze twetegereze ensonga habwaki itwena tuli b’omuhendo hali Yahwe.

5. Kiki ekirukwoleka ngu abantu b’omuhendo hali Yahwe?

⁵ N’obukiraaba ngu Yahwe akatuhanga kuruga omu cuucu tuli b’omugaso muno kukira ecuucu. (Kub. 2:7) Tekerezaaho ensonga ezimu ezirukutugumya ngu tuli b’omuhendo omu maiso ga Yahwe. Akatuhanga n’obusobozi obw’okwoleka emiringo ye, ekitwahukaniza ha bihangwa ebindi byona. (Kub. 1:27) Kandi akatuha n’obujunanizibwa obw’okurolerra ensi hamu n’ebisoro.​—Zab. 8:4-8.

6. Bwakaiso ki obundi oburukwoleka ngu Yahwe narora abantu abatahikiriire nk’ab’omuhendo hali we?

⁶ Adamu n’obuyasiisire, Yahwe akagumizaamu n’arora abantu nk’ab’omuhendo. Habwokuba tuli b’omuhendo muno hali we, akahayo Omwana we ow’arukugonza muno Yesu nk’ekicunguro habw’ebibi byaitu. (1 Yoh. 4:9, 10) Yahwe naija kusigikirra ha kicunguro, kuhumbuura abo boona abafiire habw’ekibi kya Adamu, ‘abahikiriire n’abatahikiriire.’ (Eng. 24:15) Ekigambo kye nikyoleka ngu tuli b’omugaso muno hali we n’obuturaaba turwaire, tuli banaku, rundi tukuzire omu myaka.​—Eng. 10:34, 35.

7. Nsonga ki ezindi ezirukwoleka ngu Ruhanga narora abaheereza be nk’ab’omuhendo?

⁷ Haroho n’ensonga ezindi habwaki Yahwe n’aturora nk’ab’omuhendo. Akatucunda kwija hali we kandi akasemererwa obutwahuliirize amakuru amarungi. (Yoh. 6:44) Obutwatandikire kwirra haihi na Yahwe, nauwe akatwirra haihi. (Yak. 4:8) Yahwe atekamu amaani n’obwire kutwegesa, ekirukwoleka ngu tuli b’omuhendo hali we. Amanyire tuli bantu bamulingo ki kandi n’ebitusemeriire kukora nukwo tweyongere kuba bantu abarukumusemeza. Kandi atuhana habwokuba n’atugonza. (Nfu. 3:11, 12) Bunu bwakaiso obugumire oburukwolekera kimu ngu Yahwe n’atugonza!

8. Ebigambo ebiri omu Zabuli 18:27-29 nibisobora bita kutukonyera kuraba omu bizibu twine entekereza ey’ehikire?

⁸ Abantu abamu baroraga Omukama Daudi nk’ataine mugaso, baitu Daudi akaba akimanyire ngu Yahwe n’amugonza kandi n’amusagika. Daudi habw’okumanya kintu kinu kikamukonyera kugumira enyikara ye n’entekereza ey’ehikire. (2 Sam. 16:5-7) Obutwehurra tuhoirwemu amaani rundi obututunga ebizibu, Yahwe n’asobora kutukonyera kurora enyikara yaitu omu mulingo oguhikire kandi nasobora kutukonyera kubirabamu. (Soma Zabuli 18:27-29.) Yahwe obwarukuba natusagika, tiharoho ekisobora kutulemesa kumuheereza twine okusemererwa. (Bar. 8:31) Hati leka tubazeeho enyikara zinu isatu nambere kikuru muno kwijuka ngu Yahwe n’atugonza kandi ngu tuli b’omuhendo haliwe.

9. Oburwaire nibusobora kutuletera kwehurra tuta?

⁹ Oburwaire nibusobora kutuletera kwehurra kubi muno, tukatandika n’okutekereza ngu titukyaine mugaso hali omuntu wena. Obwire oburukukira obwingi twehurra kubi muno obuturwara kandi obutwesanga ngu abantu abandi baine kutukonyera omu buli kimu. Kandi nitusobora n’okwehurra kubi habwokuba tituky’asobora kukora ebintu ebitwakoraga  kara. Omu busumi nka bunu, Yahwe n’asobora kutugarramu amaani. Omu mulingo ki?

10. Kusigikirra ha Enfumo 12:25, kiki ekisobora kutukonyera obuturukuba turwaire?

¹⁰ Obuturukuba turwaire, “ekigambo ekirungi” nikisobora kutugarramu amaani. (Soma Enfumo 12:25.) Omu Baibuli, Yahwe atuteriiremu ebigambo bingi ebirungi ebitwijukya ngu tuli b’omuhendo haliwe n’obuturukuba turwaire. (Zab. 31:19; 41:3) Kakuba twikara nitusoma Baibuli, Yahwe naija kutukonyera kugumira kweralikirra habw’oburwaire bwaitu.

11. Yahwe akakonyera ata ow’oruganda omu?

¹¹ Tekerezaaho ekyokurorraho eky’ow’oruganda Jorge. Obwakaba akyali musigazi, akatunga oburwaire obw’amaani oburukwikara nibweyongera kumucekya kandi obumuletera kwehurra nk’ataine mugaso. Jorge nagamba ati: “Nkaba ntetekaniriize omulingo oburwaire bunu bwandetiire kwehurramu kandi nkehurra kubi muno habwokuba abantu baikaraga bandoleriire habw’oburwaire bwange. Obunayeyongiire kuba kubi, nkatekerezaaho omulingo obwomeezi bwange bwali nibugenda kuhindukira kimu. Nkehurra kubi muno kandi nayesengereza Yahwe ankonyere.” Yahwe akamukonyera ata? Nagamba ati: “Habwokuba nkaba ntasobora kusoma kumara obwire bwingi, ab’oruganda bakampa amagezi nsomege enkarra ntaito kuruga omu kitabu kya Zabuli ezirukwoleka omulingo Yahwe afaaho abaheereza be. Naikaraga ninsoma enkarra zinu buli kiro kandi zampumuzaaga kandi zingumya. Hanyuma y’akasumi, abantu bakyetegereza ngu nkaba nyeyongiire kutunga okusemererwa. Bakangambira ngu okusemererwa kwange kwabagarramuga amaani. Nkakyetegereza ngu Yahwe akaba n’agarukamu okusaba kwange! Akankonyera kuhindura omulingo nayeroramuga. Kandi nkatandika kuteeka omutima ha mulingo Ekigambo kye kyoleka nandoramu n’obundaba ndi murwaire.”

12. Obworaaba oine oburwaire, kiki eky’osobora kukora kutunga obukonyezi bwa Yahwe?

 ¹² Obworaaba oine oburwaire, kigumye ngu Yahwe namanya enyikara ey’orukurabamu. Mwesengereze akukonyere otunge endora ey’ehikire ha nyikara ey’orumu. Hanyuma kozesa Baibuli kumanya ebigambo ebirukuhumuza Yahwe eby’akuteriiremu. Teeka omutima ha Byahandiikirwe ebirukwoleka nk’oku Yahwe arora abaheereza be nk’abantu ab’omuhendo. Obworakora eki, noija kukyetegereza ngu Yahwe murungi hali abamuheereza n’obwesigwa.​—Zab. 84:11.

13. Nyineeka obwafeerwa omulimo nasobora kwehurra ata?

¹³ Buli nyineeka wena agonza kuhikyaho ab’eka ye ebyetaago byabo. Ow’oruganda nasobora kufeerwa omulimo gwe n’obwaraaba ataine ensobi yoona ey’akozere. Nasobora kwekamba muno kuserra omulimo ogundi baitu gumubura. Obwayesanga omu nyikara egi ayehurra nk’ataine omugaso. Kuteeka omutima ha mirago ya Yahwe nikisobora kumukonyera kita?

14. Nsonga ki eziretera Yahwe kuhikiriza emirago ye?

¹⁴ Yahwe ahikiriza emirago ye. (Yos. 21:45; 23:14) Kinu akikora habw’ensonga nyingi. Ensonga ey’okubanza, habwokuba nikikwataho ibara lye. Yahwe araganiize kurolerra abaheereza be abesigwa kandi ayehurra ngu aine obujunanizibwa obw’okuhikiriza omurago ogu. (Zab. 31:1-3) Kwongera hali eki, Yahwe akimanyire ngu kakuba atafaaho ab’omu ka ye nikiija kutumaramu amaani. Naturaganiza ngu naija kutuha ebyetaago byaitu eby’omubiri n’eby’omwoyo kandi busaho kintu kyona ekisobora kumulemesa kuhikiriza eky’araganiize!​—Mat. 6:30-33; 24:45.

15. (a) Abakristaayo omu kyasa eky’okubanza bakatunga kizibu ki? (b) Zabuli 37:18, 19 n’etukonyera kugumya ki?

¹⁵ Kwetegereza ensonga habwaki Yahwe  ahikiriza emirago ye kitukonyera kuguma obuturukuba twine ebizibu omu by’entahya. Tekerezaaho ekyokurorraho eky’Abakristaayo ab’omu kyasa eky’okubanza. Ekitebe ekikaba kiri omu Yerusalemu obukyatandikire okuhiganizibwa muno, Abakristaayo boona bakararanga ‘oihireho abakwenda bonka.’ (Eng. 8:1) Tekerezaaho eby’arugire omu kuraranga kunu. Bakatunga ebizibu omu by’entahya habwokuba Abakristaayo baingi bakafeerwa amaka gaabo, hamu n’emirimo yabo. Baitu Yahwe atabahemukire kandi bakaikara baine okusemererwa. (Eng. 8:4; Baheb. 13:5, 6; Yak. 1:2, 3) Yahwe akasagika Abakristaayo abo abesigwa kandi naitwe naija kutusagika.​—Soma Zabuli 37:18, 19.

16. Nyikara ki ezisobora kutuletera kugurukyagurukya Yahwe obwaraaba nasiima obuheereza bwaitu?

¹⁶ Obutweyongera kukura omu myaka, nitusobora kutandika kwehurra ngu titwine eky’amaani ekitusobora kukorra Yahwe. Omukama Daudi n’asobora kuba yatungire enyehurra niyo emu obuyatandikire kugurusa. (Zab. 71:9) Yahwe nasobora ata kutukonyera?

17. Ekyokurorraho ekya munyanya itwe Jheri nikitwegesa ki?

¹⁷ Tekerezaaho ekyokurorraho ekya munyaanya itwe arukwetwa Jheri. Bakamuraaliza kwija omu musomo ogwali nigugenda kuba ha Kingdom Hall ogurukukwata ha kurolerra ebyombeko ebitukozesa omu kuramya kwaitu baitu akaba atarukugonza kugendayo. Akagamba ati: “Ndimukaikuru kandi ndi nfaakati, n’ekindi tinyine bukugu bwona omu bintu eby’obwombeki. Tindukugasa.” Obu hali nihaburayo ekiro kimu omusomo gunu gutandike akasaba Yahwe kuruga ha mutima. Obuyaizire ha Ekyombeko ky’Obukama ekiro eky’ahondiireho, akaba nakyatekereza ngu tasemeriire kubaho. Omu musomo ogu, omu h’ab’oruganda abakaba nibegesa akagamba ngu obukugu oburukukira  kwetaagwa omu omulimo gunu nukwo kwikiriza kutendekwa Yahwe. Jheri nagamba ati: “Nkegambira nyenka omu mutima ngu ‘obukugu obu mbwine!’ Nkatandika kurra obunakyetegeriize ngu Yahwe agarukiremu esaara yange. Kandi akanyoleka ngu nanyowe nyine ekintu eky’omuhendo eki nsobora kumuha kandi akaba ayetegekere kunyegesa!” Jheri obwarukwijuka ebyabaireho nagamba ati: “Nkataaha omu musomo ogu ntiinire kandi mpwairwemu amaani. Baitu nambere omusomo gunu gwahweriire, nkaba nimpurra nyine obumanzi, ngarwirwemu amaani kandi ninyerora nk’omuntu ow’omugaso!”

18. Baibuli eyoleka eta ngu Yahwe aikara narora obuheereza bwaitu nk’obw’omuhendo n’obukiraaba ngu tukuzire omu myaka?

¹⁸ N’obuturayeyongera kukura omu myaka twikale tukimanyire ngu Yahwe atwiniire emirimo ey’okukora. (Zab. 92:12-15) Yesu akatwegesa ngu n’obuturaaba tucekere rundi nitusobora kuhayo bike muno, Yahwe nasiima muno obuheereza bwaitu. (Luk. 21:2-4) Nahabweki omutima oguteeke hali ebi eby’osobora kukora. Ekyokurorraho, oine omugisa ogw’okubaza na Yahwe, kusabira ab’oruganda bagenzi baawe, n’okugarramu amaani abantu abandi kwikara bali besigwa hali Yahwe. Yahwe akutwara kuba mukozi mutahi we habw’omutima gwawe ogw’okugonza kumworobera hatali habw’ebintu eby’orukusobora kukora.​—1 Kol. 3:5-9.

19. Ekyahandiikirwe ekya Abarumi 8:38, 39 nikitukonyera kugumya ki?

¹⁹ Katwine omugisa ogw’amaani kuramya Yahwe, Ruhanga ow’arora abaheereza be nk’ab’omuhendo muno haliwe! Akatuhanga nukwo tukole eby’agonza kandi obutumuramya omulingo oguhikire tutunga ekigendererwa omu bwomeezi bwaitu. (Kus. 4:11) Abantu b’ensi n’obubaraaba nibaturora nk’abantu abataine mugaso, baitu uwe Yahwe tali nukwo aturora. (Baheb. 11:16, 38) Obutwehurra tuhwoirwemu amaani, habw’oburwaire, ebizibu omu by’entahya, rundi habw’okukura omu myaka, leka twikale tukimanyire ngu busaho kintu kyona ekisobora kutubaganiza ha kugonza kwa Isiitwe ow’omu iguru.​—Soma Abarumi 8:38, 39.