1. Nyikara ki ey’egumangaine Daudi eyiyayesangiremu?

DAUDI akaba nairuka nukwo batamwita. Saulo, omukama ow’amaani omu Isaleri akaba acweriiremu kimu kumwita. Daudi obwakaba nayetaaga ebyokulya akabanza yagenda omu rubuga rwa Nobu, nambere yasabire nyakatagara Ahimereki amuhe emigaati etaano yonka. (1 Sam. 21:1, 3) Hanyuma uwe n’abasaija be, bakatandika kwikara omu bwingira. (1 Sam. 22:1) Habwaki Daudi akaba ali omu nyikara enu?

2. Saulo aketeeka ata omu nyikara ey’akabi? (1 Samuiri 23:16, 17)

² Saulo akakwatira Daudi ihali ery’amaani muno habwokuba abantu baingi bamugonzaaga kandi bamuhaisanizaaga habw’okusingura obulemu emirundi nyingi. Kandi Saulo akaba akimanyire ngu obujeemu bwe bukaletera Yahwe kumwihaho obukama bwa Isaleri kandi ngu akaba akomere Daudi kufooka omukama omu kasumi ak’omu maiso. (Soma 1 Samuiri 23:16, 17.) Baitu nk’oku Saulo akaba akyali mukama wa Isaleri, akaba aine ihe ery’amaani kandi n’abasagiki baingi, nahabweki, Daudi akaba aine kwiruka nukwo batamwita. Mali Saulo akaba natekereza ngu nasobora kulemesa Ruhanga kufoora Daudi omukama? (Is. 55:11) Baibuli terukutugambira, baitu ekiturukugumya kiri ngu: Saulo akaba nayeteeka omu nyikara ey’akabi muno. Abo boona abarwanisa Ruhanga tibasingura!

3. Daudi akehurra ata, n’obukiraaba ngu akaba naaraba omu nyikara ey’egumangaine?

³ Daudi akaba ali mwebundaazi. Tali nuwe yacwiremu kufooka mukama wa Isaleri. Baitu Yahwe nuwe yamukomere. (1 Sam. 16:1, 12, 13) Saulo akaba anobere muno Daudi. Baitu Daudi atajunaane Yahwe habw’akabi akaakaba arumu kandi atetomboite  habw’okutunga ebyokulya bitaito rundi habw’okwikara omu bwingira. Oihireho, nikisoboka kuba ngu obwakaba ayeserekere omu bwingira obu, nubwo yahandiikire ekizina ekirungi eky’okukugiza ekirumu ebigambo ebiri omu kyahandiikirwe ekyebembiire ekicweka kyaitu, ekirukugamba ngu: “Abo abaserra [Yahwe], tibaliburwa ekisemiire kyona.”​—Zab. 34:10.

4. Bikaguzo ki ebiturukugenda kubazaaho, kandi habwaki bikuru?

⁴ Omu kasumi kanu, abaheereza ba Yahwe baingi, obwire obumu tibaba n’ebyokulya ebirukumara rundi ebyetaago ebindi. * Kinu kibaireho abaheereza ba Yahwe baingi kukira muno omu kasumi ak’oburwaire bwa korona. Kandi ebintu nibiija kweyongerra kimu kuguma obuturayeyongera kwirra haihi ‘n’omuhito omwingi.’ (Mat. 24:21) Nahabweki kirungi tugarukemu ebikaguzo binu bbina: Mulingo ki ogwa Daudi ‘atarabuzirwe ekisemiire kyona’? Habwaki tusemeriire kwega kumarwa ebitwine? Habwaki tusemeriire kwesiga Yahwe ngu naija kuturolerra? Kandi omu kasumi kanu nitusobora tuta kwetekaniriza ebirukwija omu maiso?

5-6. Zabuli 23:1-6 n’etukonyera eta kwetegereza Daudi ekiyamanyisize obuyagambire ngu abaheereza ba Ruhanga “tibaliburwa ekisemiire kyona”?

⁵ Daudi akaba namanyisa ki obuyagambire ngu abaheereza ba Yahwe “tibaliburwa ekisemiire kyona”? Daudi obuyahandiikire Zabuli eya 23 akakozesa ebigambo ebirukusisana n’ebyo. Nahabweki, Zabuli egi n’esobora kutukonyera kwetegereza ekyakaba namanyisa. (Soma Zabuli 23:1-6.) Daudi atandika Zabuli egi n’ebigambo binu: “[Yahwe] nuwe mulisa wange; tindiseega.” Omu Zabuli egi, Daudi abazaaho ebintu ebindi ebikuru muno, nk’emigisa ey’eby’omwoyo enyingi eyiyatungire habw’okwikiriza Yahwe kuba muliisa we. Yahwe ‘amuterekereza omu mihanda ey’okuhikirra,’ kandi n’obwesigwa asagika Daudi omu bwire oburungi, n’omu bwire obugumangaine. Daudi akyetegereza ngu obwomeezi bwe omu iriisizo lya  Yahwe “eryobunyansi obuto” tiburukwija kuburwamu ebizibu. Obwire obumu nasobora kuhwamu amaani nk’omuntu ow’arukurubatira “omu kihanga ekyekiituru ekyokufa,” kandi naija kuba n’abanyanzigwa. Baitu habwokuba Yahwe nuwe omuliisa we, Daudi tarukwija ‘kutiina kabi koona.’

⁶ Nahabweki kinu nikyo kyokugarukamu eky’ekikaguzo kyaitu: Mulingo ki ogwa Daudi ‘atarabuzirwe ekisemiire kyona’? Akaba aine buli kimu kyona ekyaba nayetaaga kusobora kwikara ali haihi na Yahwe. Okusemererwa kwe kwali kutarukusigikirra ha itungo. Daudi yamarwaga byona Yahwe ebiyamuhaga. Ekintu ekyali kikuru hali uwe niyo emigisa hamu n’obulinzi ebiyatungaga kuruga hali Ruhanga.

7. Kusigikirra ha Luka 21:20-24, nyikara ki ezigumangaine Abakristaayo abaikaraga omu Yuda omu kyasa eky’okubanza ezibarabiremu?

⁷ Kuruga omu bigambo bya Daudi, nitukirora ngu kikuru muno kuba n’entekereza ehikire ha itungo. Nitusobora kwegondeza omu bintu ebitwine, baitu titusemeriire kubitwara nk’ebirukukirayo obukuru omu bwomeezi bwaitu. Ago gakaba mananu ag’omugaso Abakristaayo ab’omu kyasa eky’okubanza abaikaraga omu Yuda ag’abahikire bayetegereza kurungi. (Soma Luka 21:20-24.) Yesu akaba abahabwire ngu akasumi kakuhikire ‘amahe gehinguliriize’ orubuga rwa Yerusalemu. Eki obukyabaireho, kyali nikibetaagisa kutandika ‘kwirukira omu nsozi.’ Kakuba barugire omu rubuga, bakujunire obwomeezi bwabo, baitu kyali nikyetaagisa kuleka ebintu byabo bingi enyuma. Omu myaka ey’enyumaho, Watchtower emu ekagamba eti: “Bakaleka emisiri yabo hamu n’amaka gaabo, kandi batatunge n’obwire obw’okusorooza ebintu omu maju gaabo. Bakesiga ngu Yahwe naija kubalinda kandi abakonyere, nahabweki bakebembeza kumuramya kukira ekintu ekindi kyona ekyali nikisobora kuzooka nk’ekikuru.”

8. Isomo ki erikuru eritusobora kwega kuruga hali ebi ebyahikireho Abakristaayo ab’omu kyasa eky’okubanza abaikaraga omu Yuda?

⁸ Isomo ki erikuru eritusobora kwega kuruga omuli ebi ebyahikireho Abakristaayo ab’omu kyasa eky’okubanza abaikaraga omu Yuda? Watchtower eitubalizeehoga ekagamba ngu: “Omu kasumi ak’omu maiso nitusobora kutunga ebirengo ebirayoleka omulingo turoramu itungo; niryo turukutwara nk’ekintu ekirukukira obukuru hali itwe, rundi ekikuru muno hali itwe nukwo kujunwa habwokuba besigwa hali Ruhanga? Empero obweraija, nikisobora kutwetaagisa kugumira ebizibu kandi n’okwefeereza ebintu bingi. Nk’Abakristaayo ab’omu kyasa eky’okubanza abairukire kuruga omu Yuda, naitwe nikiija kutwetaagisa kwikara twetekaniize kukora kyona ekirukwetaagisa.” *

9. Obuhabuzi bwa Paulo hali Abaheburaniya nibukugarramu buta amaani?

⁹ Teeramu akasisani omulingo kyagumiire Abakristaayo abo kulekaho buli kimu kyona kandi bakatandika kwikara omu kiikaro ekihyaka. Baali nibetaaga kuba n’okwikiriza ngu Yahwe naija kubaha ebyetaago byabo. Baitu haali haroho ekintu ekyakubakonyire. Obu haali nihaburayo emyaka etaano, Abarooma batahirre Yerusalemu, omukwenda Paulo akaha Abaheburaniya obuhabuzi oburungi muno, akagamba ati: “Omu kutekereza kwanyu muleke okwegomba erupiya; ebimunyinabyo nibyo bibamale: baitu uwe wenka akagamba ati Tindikuleka na kake, kunu tindikuhemukira na kake. Nukwo nobumanzi oburungi turagamba ngu [Yahwe] nuwe mukonyezi wange; tinditina: abantu balisobora okunkora ki?” (Baheb. 13:5, 6) Busaho kugurukyagurukya abo abataire omu nkora obuhabuzi bwa Paulo, Abarooma batakabatahiriire, kikabanguhira kumarwa ebintu ebike ebibatungire omu ka yabo empyaka.  Bakaba nibakigumya ngu Yahwe naija kubarolerra omu byetaago byabo. Ebigambo bya Paulo nibitugumya ngu naitwe nitusobora kwesigira kimu Yahwe kuturolerra omu byetaago byaitu.

10. Paulo akatugambira ‘nsita’ ki?

¹⁰ Paulo akaha Timoseo obuhabuzi nubwo bumu, kandi naitwe nibutukwataho. Akahandiika ati: “Baitu obutunyina ebyokulya nebyokujwara, ebi bitumale.” (1 Tim. 6:8) Kinu nikimanyisa ngu titusemeriire kulya ebyokulya ebirungi, kwikara omu nju enungi, rundi kuguraga engoye empyaka? Eki tikiri nikyo Paulo akaba namanyisa. Paulo akaba namanyisa ngu tusemeriire kumarwa ebi ebitwine. (Baf. 4:12) Egi niyo ‘ensita’ Paulo yabalizeeho omu Abafiripi 4:12. Ekintu ekirukirayo omuhendo ekitwine, niyo enkoragana yaitu na Ruhanga hatali ebintu ebitwine.​—Hab. 3:17, 18.

11. Isomo ki eritukwega kuruga omu bigambo bya Musa hali Abaisaleri?

¹¹ Ebituteekereza ngu nitwetaaga, nibisobora kuba nibyahukana n’ebya Yahwe amanyire ngu nitwetaaga. Tekerezaaho Musa ekiyagambiire Abaisaleri hanyuma y’okumara emyaka 40 omu irungu, akagamba ati: “[Yahwe] Ruhanga wawe akakuha omugisa omu mulimo gwona ogwomukono gwawe: akamanya amagenda gawe omu irungu linu eringi: emyaka egi amakumi ana [Yahwe] Ruhanga wawe akaikara naiwe; otasege kantu.” (Bir. 2:7) Omu myaka 40 egi, Yahwe yaheerezaaga Abaisaleri emanu ey’okulya. Kandi n’engoye zonyini ezibarugire nazo Misiri zitakule. (Bir. 8:3, 4) N’obukiraaba ngu abamu nibasobora kuba batekeriize ngu ebintu binu  tibirukumara, Musa akaijukya Abaisaleri ngu bakaba baine byona ebibarukwetaaga. Yahwe asemererwa obutwega kumarwa ebitwine kandi tukasiima na habw’ebintu ebitaito eby’atuha kandi tukakyetegereza ngu bisembo kuruga hali uwe.

12. Kiki ekirukwoleka ngu Daudi akaba atarukweyesiga wenka baitu n’ayesiga Yahwe?

¹² Daudi akaba akimanyire ngu Yahwe mwesigwa kandi arolerra abo abamugonza. N’obukiraaba ngu obwomeezi bwe bukaba buli omu kabi, nambere yahandiikire Zabuli eya 34, n’amaiso ag’okwikiriza akarora malaika wa [Yahwe] amwehinguliriize. (Zab. 34:7) Obundi, Daudi nasobora kuba yalengesaniize malaika wa Yahwe n’omuserukale ow’atiire orukande omu bwerre ow’aikara ali bulindaara kurora omunyanzigwa. N’obukiraaba ngu Daudi akaba ali murwani w’amaani kandi Yahwe akaba amuraganiize ngu naija kufooka mukama, atesige obukugu bwe obw’okukozesa omwesuuso rundi empirima kusingura abanyanzigwa be. (1 Sam. 16:13; 24:12) Obwesige bwe bukaba buli omuli Ruhanga kandi akaba nakigumiza kimu ngu malaika wa Yahwe ajuna abo boona abanyakumutiina. Ky’amananu ngu omu kasumi kanu, titurukunihira kutunga obulinzi omu mulingo ogw’ekyamahano. Baitu tukimanyire ngu buli omu wena ow’ayesiga Yahwe naija kutunga obwomeezi obutahwaho n’obuyakufa omu kasumi kanu.

13. Gogi wa Magogi obwaratutahirra habwaki nitwija kuzooka nk’abataine bulinzi, baitu habwaki tutasemeriire kutiina? (Rora ekisisani ekya ha kyesweko.)

¹³ Omu kasumi akatali kahara, obwesige bwaitu omu obusobozi bwa Yahwe obw’okutulinda nibwija kulengwa. Gogi ow’omu nsi ya Magogi, ekirukumanyisa amahanga agesoroize hamu obugaratahirra abantu ba Ruhanga, obwomeezi bwaitu nibwija kuzooka nk’obuli omu kabi. Nikiija kutwetaagisa kukigumya ngu Yahwe nasobora kutujuna kandi naija kukikora. Omu maiso g’amahanga, nitwija kuzooka nk’entaama ezitaine muntu wena ow’okuzirinda. (Ez. 38:10-12) Nitwija kuba tutaine eby’okurwanisa kandi tutatendekerwe kurwana. Amahanga nigaija kuteekereza ngu kyanguhire kutusingura. Tibarukwija kusobora kurora bamalaika itwe abaturukwija kuba niturora habw’amaiso ag’okwikiriza, abatiire enkambi kwetoroora abantu ba Ruhanga kandi abetekaniize kubalinda. Amahanga tigarukusobora kurora ebintu eby’omwoyo. Nigaija kuhunirra muno ihe ery’omu iguru obuliraija kuturwanirra!​—Kus. 19:11, 14, 15.

14. Biki ebitusobora kukora hati, kwetekaniriza obusumi obw’omu maiso?

¹⁴ Biki ebitusobora kukora hati kwetekaniriza obusumi obw’omu maiso? Tusemeriire kuba n’entekereza ey’ehikire ha bintu ebitwine kandi tusemeriire kukyetegereza ngu kiro kimu ebintu ebi, nitwija kubirekaho. Ekindi, nitwetaaga kumarwa ebintu ebitwine kandi okusemererwa kwaitu kusemeriire kuruga omu kuba n’enkoragana enungi na Yahwe. Obuturayeyongera kumanya kurungi Ruhanga waitu, nitwija kweyongera kukigumiza kimu ngu aine obusobozi obw’okutulinda, Gogi wa Magogi obwaratutahirra.

15. Bintu ki Daudi ebyakaba arabiremu ebyamwegeseze ngu Yahwe talimuhemukira?

¹⁵ Tekerezaaho ekintu ekindi ekyakonyire Daudi kandi naitwe ekisobora kutukonyera kwetekaniriza ebirengo. Daudi akagamba ati: “Muroze, mumanye [Yahwe] okwali murungi: ahebwa omugisa anyakumwesiga.” (Zab. 34:8) Ebigambo ebi, nibisoborra habwaki Daudi akaba nasobora kwesiga Yahwe ngu naija kumusagika. Daudi yakiraga kwesiga Yahwe kandi  Ruhanga we atamuhemukire. Daudi obwakaba akyali muto, akaba aine kurwanisa omusaija Omufirisiti Goliasi, ow’akaba ali mukooto muno. Kandi Daudi akagambira omurwani onu ow’amaani ati: “Ekiro kya hati [Yahwe] arakuhayo omu mukono gwange.” (1 Sam. 17:46) Hanyuma, Daudi obwakaba naheereza Omukama Saulo, emirundi nyingi Saulo akalengaho kumwita. Baitu “[Yahwe] akabali nauwe.” (1 Sam. 18:12) Habwokuba Yahwe akaba akonyire Daudi omu busumi obwakara, Daudi akaba nakigumiza kimu Yahwe naija kugumizaamu namukonyera omu bizibu bye.

16. Miringo ki eitusobora ‘kuroza’ oburungi bwa Yahwe?

¹⁶ Obuturayeyongera kwesiga obuhabuzi bwa Yahwe omu kasumi kanu, nitwija kweyongera kumwesigira kimu ngu aine obusobozi obw’okutujuna omu kasumi ak’omu maiso. Nikyetaagisa okwikiriza kw’amaani kandi n’okwesigira kimu Yahwe kusobora kusaba mukama waitu ha mulimo kutuha obwire obw’okugenda omu rusorrokano orukooto. Rundi kumusaba kutuhindurramu obwire tusemeriire kukora nukwo tusobole kugenda omu nsorrokano zoona, kandi n’okwongera ha bwire tumara omu buheereza. Kiki ekiturakora kakuba mukama waitu ayanga okusaba kwaitu kandi tukafeerwa n’omulimo gwaitu? Twine okwikiriza ngu Yahwe talitulekaho, rundi kutuhemukira, kandi ngu naija kwikara natuha ebyetaago byaitu? (Baheb. 13:5) Baingi abali omu buheereza bw’akasumi koona, nibasobora kutugambira ebyokurorraho ebirukwoleka omulingo Yahwe y’abakonyire omu kasumi konyini obu baali nibamwetaaga muno. Yahwe mwesigwa.

17. Ekyahandiikirwe eky’omwaka 2022, nikyo kiha, kandi habwaki kisemeriire?

¹⁷ Nk’oku Yahwe ali arubaju rwaitu, titurukwetaaga kutiina ebirabaho omu kasumi ak’omu maiso. Ruhanga waitu talitulekaho kakuba tugumizaamu nitwebembeza ebyarukugonza omu bwomeezi bwaitu. Kutwijukya obwetaago obw’okwetekaniza hati habw’obusumi obugumangaine oburukwija omu maiso kandi n’okwesigira kimu Yahwe ngu talitulekaho, Akatebe Akalemi kakomere Zabuli 34:10 kuba ekyahandiikirwe eky’omwaka 2022: “Abo abaserra [Yahwe], tibaliburwa ekisemiire kyona.”