1-3. Bizibu ki ebisobora kuleetera abaheereza ba Yahwe kurra?

NIDI obuwamaliriire kurra? Obwire obumu turra habw’okusemererwa. Baitu emirundi erukukira obwingi turra habw’obusaasi omu mutima. Ekyokurorraho nitusobora kurra obutufeerwa omuntu outurukugonza. Munyaanya itwe Lorilei, kuruga omu Amerika akahandiika ati: “Haro obwire obumu obu nayehurraga ngu obusaasi obw’okufeerwa muhara wange bukaba bw’amaani muno kuhika ha rulengo ngu kikazooka hakaba ataroho kintu ekisobora kumpumuza. Omu bwire obu nkaba nintekereza ngu tinsobora kugumira obusaasi obu.” *

² Nitusobora kurra na habw’ensonga ezindi. Munyaanya itwe Hiromi, payoniya arukwikara omu Japan, akagamba ati: “Obwire obumu nsaalirwa muno habwokuba abantu abantebeza tibarukugonza kuhurra ebirukukwata ha Baibuli. Obwire obumu nsaba Yahwe ndimu kurra ankonyere nsobole kuzoora omuntu ow’okwegesa amananu.”

³ Haroho obwoyehurra nka banyaanya itwe banu? Baingi omuliitwe kitubaho. (1 Pet. 5:9) Nitugonza ‘kukorra [Yahwe] n’okusemererwa,’ baitu nitusobora kuba nitumuheereza niturra habw’obujune, kuhwamu amaani, rundi habw’enyikara endi yoona ey’erukulenga obwesige bwaitu omuli Ruhanga. (Zab. 6:6; 100:2) Kiki ekitusobora kukora obuturukuba nitwehurra tuti?

4. Biki ebiturukugenda kubazaaho omu kicweka kinu?

⁴ Nitusobora kwegera ha kyokurorraho kya Yesu. Obwire obumu, Yesu na uwe akaraba omu nyikara ezigumangaine ezamuletiire ‘kurra amaizi.’ (Yoh. 11:35; Luk. 19:41; 22:44; Baheb. 5:7) Leka tubazeeho enyikara ezi. Obuturaaba nituzibazaaho, nitwija  kurora amasomo agatusobora kuzegeraho. Kandi nitwija n’okurora ekitusobora kukora omu nyikara ezituletera kurra.

5. Kiki ekiturukwega hali Yesu kuruga omu Yohana 11:32-36?

⁵ Omu mwaka gwa 32 C.E., munywani wa Yesu nfe na nfe Lazaro akarwara kandi yafa. (Yoh. 11:3, 14) Lazaro akaba aine banyaanya be babiri, Malyamu na Maliza, kandi Yesu yagonzaaga muno eka enu. Abakazi banu bakasaalirwa muno mugenzi wabo omugonzebwa obuyafiire. Hanyuma ya Lazaro kufa, Yesu akagenda omu kyaro kya Besaniya, nambere Malyamu na Maliza baikaraga. Maliza obuyahuliire ngu Yesu ali mukwija, akarahuka kugenda kumutangatangana. Tekerezaaho obujune obwakaba aine obuyagambire ati: “Mukama wange, kakuba okaboli hanu, [mugenzi wange] tiyakufiire.” (Yoh. 11:21) Hanyuma y’ebi, Yesu obuyarozere Malyamu hamu n’abandi nibarra, na uwe ‘akarra amaizi.’​—Soma Yohana 11:32-36.

6. Habwaki Yesu yalizire Lazaro obuyafiire?

⁶ Habwaki Yesu yalizire Lazaro obwakaba afiire? Ekitabu Insight on the Scriptures nikigarukamu kiti: “Kufa kwa munywani we Lazaro hamu n’obujune bagenzi be baarabiremu bikaleetera Yesu ‘kusinda kandi n’okurra.’” * Yesu nasobora kuba akaba n’atekerezaaho obusaalizi munywani we nfe na nfe Lazaro obuyarabiremu obwakaba arwaire kandi n’omulingo Lazaro yayehuliiremu obuyakyetegeriize ngu ali haihi kufa. Hataroho kugurukyagurukya, Yesu obuyarozere obusaasi bw’amaani Malyamu na Maliza obu bakaba baine habw’okufa kwa mugenzi wabo, nakyo kikamuletera kurra. Obworaaba oferiirwe munywani wawe nfe na nfe, rundi omunyabuzaale, hataroho kugurukyagurukya, naiwe otungire enyehurra nk’ezi. Tekerezaaho amasomo asatu ag’osobora kwega omu kurra kwa Yesu habw’okufa kwa Lazaro.

7. Kiki ekiturukwega hali Yahwe, Yesu obuyalizire habw’enganjani ze?

⁷Yahwe n’ayetegereza omulingo orukwehurra.  Yesu nuwe kisisani kya Ise kyonyini. (Baheb. 1:3) Yesu obuyalizire akooleka omulingo Ise ayehurramu. (Yoh. 14:9) Obworaaba oferiirwe omuntu ow’orukugonza, kigumye ngu Yahwe n’ayetegereza obusaasi bwawe kandi n’akusalirirwa. N’agonza kukiza omutima gwawe ogucwekere.​—Zab. 34:18; 147:3.

8. Habwaki nitusobora kukigumiza kimu ngu, nitwija kwongera kurora abagonzebwa baitu abaafiire?

⁸Yesu nagonza kuhumbuura abagonzebwa baawe abaafiire. Yesu obwakaba atakalizire, akagumya Maliza ati: “[Mugenzi wawe] nagenda okuhumbuka.” Maliza akaikiririza omu bigambo bya Yesu. (Yoh. 11:23-27) Maliza nk’oku akaba ali muheereza wa Yahwe omwesigwa, busaho kugurukyagurukya akaba akimanyire ngu Eriya hamu na Erisa bakaba bahumbwire abantu emyaka nyingi enyuma. (1 Bakam. 17:17-24; 2 Bakam. 4:32-37) Kandi akaba ahuliireho n’abantu Yesu abaakaba ahumbwire. (Luk. 7:11-15; 8:41, 42, 49-56) Naiwe nosobora kukigumiza kimu ngu noija kwongera kurora abagonzebwa baawe abaafiire. Yesu kurra obwakaba nahumuza banywani be abakaba baine obujune bwakaiso oburukugumiza kimu ngu aine ekihika kingi eky’okuhumbuura abaafiire!

9. Nka Yesu nitusobora tuta kusagika abali omu bujune? Bazaaho ekyokurorraho.

⁹Nosobora kusagika abali omu bujune. Yesu atagarukire ha kurra na Maliza hamu na Malyamu kyonka, baitu akabahuliiriza kandi yabagambira ebigambo ebirukuhumuza. Naitwe nitusobora kukora nikyo kimu hali abo abali omu bujune. Omugurusi we kitebe Dan, arukwikara omu Australia, nagamba ati: “Hanyuma y’okufeerwa mukazi wange, nkaba ninyetaaga obusagiki. Ab’oruganda baingi n’abakazi baabo baikaraga betekaniize nyamusana n’ekiro kumpuliiriza. Bakandeka n’asoborra obusaasi bwange kandi batakwatwe ensoni obunarraga. Obunayehurraga ntarukusobora kukora emirimo, bankonyeraga kurabira omu kwogya motoka yange, bangendera omu katale kungurra ebyokulya, hamu n’okuncumbira.   Kandi basabaga nanyowe butoosa. Bakooleka ngu banywani mali, kandi b’oruganda omu bwire bw’obujune.”​—Nfu. 17:17.

10. Soborra ebyabaireho omu Luka 19:36-40, kandi n’ekyahondiireho.

¹⁰ Ha Nisani 9, omu 33 C.E Yesu akahika Yerusalemu. Obwakaba ali haihi kuhika omu rubuga, ekitebe ky’abantu kikesorooza kandi bayara engoye zaabo omu muhanda omu maiso ge kwoleka ngu nibaikiriza ngu nuwe Mukama wabo. Hataroho kugurukyagurukya akasumi ako kaali k’okusemererwa kwingi. (Soma Luka 19:36-40.) Nahabweki abegeswa be nibasobora kuba baali batarukunihira ekyayongiireho. ‘Obuyairiire haihi yarora orubuga, yarulirirra.’ N’amaziga omu maiso ge, Yesu akaranga ebintu ebibi ebikaba nibigenda kuhikaho abantu ab’omu Yerusalemu.​—Luk. 19:41-44.

11. Habwaki Yesu yalizire habw’abantu ba Yerusalemu?

¹¹ Yesu akasaalirwa omu omutima habwokuba akaba akimanyire ngu n’obubaraaba bamutangiriire kurungi, Abayudaaya abarukukira obwingi tibakwikiriize enjiri y’Obukama. Ekyakurugiremu Yerusalemu ekaba negenda kuhwerekerezebwa kandi Abayudaaya abakukizireho bakaba nibagenda kutwarwa omu bunyagwa. (Luk. 21:20-24) Eky’obusaasi, nka Yesu nk’oku akaba agambire, abantu abarukukira obwingi bakamwanga. Abantu abarukukira obwingi omu kiikaro kyanyu betwaza bata obubahurra amakuru g’Obukama? Kakuba abantu bake muno nubo bahuliiriza obw’obegesa amananu, kiki eky’osobora kwega Yesu obuyalizire habw’abantu ba Yerusalemu? Leka tubazeeho amasomo gandi asatu.

12. Kiki ekitusobora kwega hali Yahwe, Yesu obuyalizire habw’abantu ba Yerusalemu?

 ¹²Yahwe afaaho abantu. Okurra kwa Yesu nikutwijukya ngu Yahwe afaaho muno abantu. ‘Tarukugonza omuntu wena okubura, baitu boona bahike omu kwegarukamu.’ (2 Pet. 3:9) Omu kasumi kanu, twoleka ngu nitugonza abaturukutebeza kurabira omu kwikara nitulengaho kubakonyera kwega amakuru amarungi ag’Obukama.​—Mat. 22:39. *

13-14. Yesu akooleka ata abantu embabazi, kandi naitwe nitusobora tuta kukurakuraniza omulingo ogu?

¹³Yesu akekamba omu kutebeza. Akooleka okugonza okw’akaba ainiire abantu kuraba omu kukozesa buli kagisa koona kubegesa. (Luk. 19:47, 48) Kiki ekyaletiire Yesu kukora eki? Yesu akabakwatirwa embabazi. Obwire obumu, baingi bagonzaaga kuhurra ebigambo bya Yesu, ekyamuleteraga uwe n’abegeswa be ‘kutasobora nokulya ebyokulya.’ (Mar. 3:20) Kandi omusaija omu ow’akaba n’agonza kubaza na Yesu ekiro, Yesu akaikiriza kumutangatangana obwire obu. (Yoh. 3:1, 2) Abantu abarukukira obwingi abaahuliriize Yesu, batafooke begeswa be. Baitu boona abaamuhuliriize akabatebeza bahwituka. (Eng. 10:42) Kasumi kanu naitwe nitugonza kuha buli omu omugisa ogw’okuhuliiriza amakuru amarungi. Kusobora kuhikiiriza kinu, nitwetaaga kuhindahinduramu omulingo tutebeza.

¹⁴Ikara oyetekaniize kukora empindahinduka ezirukwetaagisa. Kakuba tutahindahinduramu obwire tutebeza, nitusobora kulemwa kutangatangana abantu abaakugondeze kwega amananu. Payoniya arukwetwa Matilda nagamba ati: “Nyowe na musaija wange tulengaho kuhinduramu obwire obututebezaamu abantu. Omu bwire bwa nyenkyakara, tutebeza omu biikaro nambere abantu bakorra bizineesi. Obuzihika saaha mukaaga tutebeza nitukozesa akagaali habwokuba abantu baingi baba bali omu mihanda. Hanyuma omu bwire bwa rwebagyo kitwanguhira kusanga abantu baingi omu maka gaabo.” Omu kiikaro ky’okwikara nitutebeza omu bwire oburukutwanguhira, tusemeriire kwehayo kukora empindahinduka nukwo tusobole kutebeza  omu bwire turasobora kutangatangana abantu. Obuturakora tuti, tukigumye ngu nitwija kusemeza Yahwe.

15. Kusigikirra ha Luka 22:39-44, biki ebyabaireho omu kiro Yesu obwakaba atakafiire?

¹⁵ Nisani 14, omu mwaka gwa 33 C.E., omu bwire bwa rwebagyo, Yesu akagenda omu rugonjo rwa Gesesemane. Obwakaba ali oku, akagambira Yahwe buli kimu kyona ekiri ha mutima gwe. (Soma Luka 22:39-44.) Omu kasumi ako akagumangaine, Yesu ‘akesengereza, narra muno amaizi.’ (Baheb. 5:7) Omu kiro Yesu obwakaba atakafiire, biki ebiyasabire? Akasaba Yahwe kumuha amaani nukwo asobole kwikara ali mwesigwa hali Uwe n’okukora ebyagonza. Yahwe akahurra esaara y’Omwana we erukuruga ha mutima kandi yasindika malaika kumugarramu amaani.

16. Habwaki Yesu akaba ayetuntwire muno obwakaba nasaba omu rugonjo rwa Gesesemane?

¹⁶ Busaho kugurukyagurukya, Yesu akarra omu rugonjo rwa Gesesemene habwokuba akaba ayetuntwire muno ngu abantu nibaija kumurora nk’omuntu ow’asigiire enziro ibara lya Ruhanga. Kandi akaba amanyire n’obujunanizibwa obw’amaani obwakaba aine obw’okwikara ali mwesigwa kandi n’okweza ibara lya Ise. Obworaaba noraba omu nyikara ey’egumangaine ey’erukulenga obwesige bwawe omuli Yahwe, kiki ekyosobora kwega omu kurra kwa Yesu? Leka tubazeeho amasomo gandi asatu.

17. Omulingo Yahwe yagarukiremu esaara za Yesu ez’okwesengereza nigutwegesa ki hali Uwe?

¹⁷Yahwe ahurra okwesengereza kwawe. Yahwe akahurra esaara za Yesu ezirukuruga ha mutima. Habwaki? Habwokuba ekigenderwa kya Yesu ekikuru kikaba ky’okwikara ali mwesigwa hali Ise kandi n’okweza ibara lye. Kakuba naitwe ekigendererwa kyaitu ekikuru kiba ky’okwikara tuli besiga hali Yahwe kandi n’okweza ibara lye, naija kutugarukamu obuturamusaba obukonyezi.​—Zab. 145:18, 19.

18. Miringo ki emu Yesu ali nk’omunywani ow’embabazi kandi arukwetegereza?

¹⁸Yesu nayetegereza omulingo orukwehurramu. Obutuba twetuntwire muno, kituhuumuza obutuba twine omunywani ow’arukwetegereza omulingo turukwehurramu, kukira muno ogu ayarabireho omu birengo ebiturukurabamu.  Yesu munywani wa mulingo ogu. Nayetegereza nikimanyisa ki kuba muceke kandi n’okwetaaga obukonyezi. Nayetegereza obuceke bwaitu, kandi naija kukigumya ngu twatunga obukonyezi “omu kasumi konyini akahikire.” (Baheb. 4:15, 16, NWT) Nk’oku Yesu yaikiriize obukonyezi bwa malaika omu rugonjo rwa Gesesemane, naitwe tusemeriire kwikiriza obukonyezi Yahwe arukutuha kurabira omu bitabu na vidiyo kuruga ha mwiru omwesigwa, embazo, rundi omugurusi, rundi munywani waitu ow’akuzire omu by’omwoyo obwatubungira kutugarramu amaani.

19. Nosobora ota kugarukwamu amaani? Bazaaho ekyokurorraho.

¹⁹Yahwe naija kukuha “obusinge bwa Ruhanga.” Yahwe naija kutugarramu ata amaani? Obutusaba tutunga ‘obusinge bwa Ruhanga oburukukira okumanywa kwona.’ (Baf. 4:6, 7) Obusinge Yahwe obwatuha butukonyera kutekaana kandi n’okuteekereza kurungi. Kinu nikyo kyahikireho munyaanya itwe Luz. Nagamba ati: “Obwire oburukukira obwingi nyehurra nyine amasu. Obwire obumu, enyehurra enu endetera kutekereza ngu Yahwe tarukungonza. Baitu kinu obukibaho, aho naaho ngambira Yahwe omulingo ndukwehurramu. Musaba ankonyere kweyongera kwehurra kurungi.” Ekyokurorraho kye nk’oku kirukwoleka, nitusobora kutunga obusinge kurabira omu kusaba.

20. Masomo ki agatwegere kuruga omu kurra kwa Yesu?

²⁰ Nitwega amasomo maingi agarukuhuumuza kandi ag’omugaso kuruga omu kurra kwa Yesu! Nitwijukibwa kusagika banywani baitu abali omu bujune kandi n’okwesiga ngu Yahwe na Yesu nibaija kutusagika kakuba tufeerwa omuntu outurukugonza. Nitwekambisibwa kutebeza kandi n’okwegesa omu mulingo ogw’embabazi habwokuba Yahwe na Yesu nabo booleka omulingo gunu omurungi. Kandi nikihuumuza kukimanya ngu Yahwe hamu n’Omwana we omugonzebwa nibetegereza omulingo turukwehurra, betegereza obuceke bwaitu kandi nibagonza kutukonyera kugumiisiriza. Leka tugumizeemu nituteeka omu nkora ebitwegere, kuhikya Yahwe obwalihikiriza omurago gwe omurungi ogurukugamba ngu “alisusura amaizi gona ha maiso [gaitu]”!​—Kus. 21:4.