1-2. (a) Nidi abamu obubakira kutekerezaaho muno omuntu oubarukugonza ayafiire? (b) Kiki Yesu ekiyatandikireho obwakaba atakafiire?

N’OBUHARABAHO akasumi kaingi hanyuma y’okufa kw’abantu turukugonza, twikara nitubaijuka. Abantu abamu, ekiro abantu baabo baferiiremu obukihika, babatekerezaaho muno.

² Buli mwaka tweteranizaaho obukaikuru n’obukaikuru bw’abantu omu nsi yoona, abesorooza hamu kwijuka Yesu Kristo, omuntu outurukugonza muno. (1 Pet. 1:8) Twesorooza hamu kumwijuka habwokuba akahayo obwomeezi bwe nk’ekicunguro kutujuna kuruga omu kibi hamu n’okufa. (Mat. 20:28) Kandi amananu gali, Yesu n’agonza abahondezi be kwijuka okufa kwe. Omu kiro Yesu atakafiire, akatandikaho ekiihuro eky’embaganiza kandi yaragira ati: “Mukolege muti okuijuka nyowe.”​—Luk. 22:19.

3. Kiki ekiturukugenda kubazaaho omu kicweka kinu?

³ Omu bantu ababa ha mukoro gw’okwijuka okufa kwa Yesu, bake muno abaine okunihira okw’okugenda kwikara omu iguru. Baitu obukaikuru n’obukaikuru bw’abantu abaine okunihira okw’okwikara omu nsi, nabo babaho. Omu kicweka kinu nitwija kubazaaho habwaki guruupu zinu ibiri ziba n’ekihika buli mwaka eky’okubaho ha Kiijukyo. Kandi nitwija n’okubazaaho omulingo tugasirwa obutubaho. Leka tutandike nitubazaaho ensonga ezimu habwaki abaseserweho amagita babaho.

4. Habwaki abaseserweho amagita balya ha mugaati kandi banywa na ha viino ha kiro ky’Ekiijukyo?

⁴ Buli mwaka abaseserweho amagita ababa ha Kiijukyo, balya ha mugaati kandi banywa na ha viino. Habwaki balya ha mugaati kandi banywa na ha viino? Kugarukamu ekikaguzo eki, tekerezaaho ekyabaireho ha kiro eky’okumalirra omu bwomeezi bwa Yesu obw’omu nsi. Hanyuma y’ekiihuro eky’Okuhingurwaho, Yesu Kristo akatandikaho omukoro ogutukira kweta Ekiihuro kya Mukama Waitu. Akarabyamu omugaati hamu na viino omu bakwenda be abesigwa 11 kandi yabagambira kulya hamu n’okunywa. Yesu akabagambiraho ebiragaano bibiri​—ekiragaano ekihyaka hamu n’ekiragaano eky’Obukama. * (Luk. 22:19, 20, 28-30) Ebiragaano binu bikaba nibiija kusobozesa abakwenda abo hamu n’abantu abandi abake kufooka abakama kandi banyakatagara omu iguru. (Kus. 20:6; 14:1) Abaseserweho amagita abasigaireho, * abali omu biragaano binu ebibiri, nubo bonka basemeriire kulya ha mugaati kandi bakanywa na ha viino ha kiro ky’Ekiijukyo.

5. Kiki abaseserweho amagita ekibamanyire ha kunihira okubahairwe?

⁵ Haroho n’ensonga endi habwaki abaseserweho amagita baba n’ekihika eky’okubaho ha Kiijukyo: Omukoro gunu gubaha omugisa ogw’okutekerezaaho okunihira kwabo. Yahwe abahaire okunihira okurungi muno​—okw’okutunga obwomeezi obutafa kandi obutajunda omu iguru, kuheereza hamu na Yesu Kristo anyakuhairwe ekitiinisa kingi kandi hamu n’abaseserweho amagita abandi, kandi n’ekirukukira byona, nibaija n’okutunga omugisa ogw’okuba omu maiso ga Yahwe! (1 Kol. 15:51-53; 1 Yoh. 3:2) Abaseserweho amagita bakimanyire ngu baraaliziibwe kugenda omu iguru kwegondeza omu migisa enu. Baitu kusobora kwikirizibwa kutaaha omu iguru, basemeriire kwikara bali besigwa kuhika ha kufa. (2 Tim. 4:7, 8) Abaseserweho amagita obubatekerezaaho okunihira kwabo okw’okugenda omu iguru, kibaletera okusemererwa kwingi. (Tit. 2:13) Kandi ‘ab’entaama ezindi’ ubo bakwatwaho bata? (Yoh. 10:16) Nsonga ki ezimu ezibaletera nabo babaho ha Kiijukyo?

6. Habwaki ab’entaama ezindi babaho ha Kiijukyo buli mwaka?

⁶ N’obukiraaba ngu ab’entaama ezindi tibalya ha mugaati kandi tibanywa ha viino basemererwa kubaho ha Kiijukyo. Omu 1938, abo abaine okunihira okw’okwikara omu nsi nubwo babandize kuraalizibwa kubaho ha Kiijukyo. Watchtower eya Maaci 1, 1938, ekagamba eti: “Nikiija kuba kihikire kandi kisemeriire ab’entaama ezindi kubaho n’okurora ebirukugenda omu maiso. . . . Nabo kasemeriire kubabeera akasumi ak’okusemererwa.” Ab’entaama ezindi basemererwa kubaho ha Kiijukyo nk’oku abagenyi abaraaliziibwe basemererwa kubaho ha mukoro gw’okugaitwa.

7. Habwaki ab’entaama ezindi baba n’ekihika eky’okuhuliiriza orubazo orw’Ekiijukyo?

⁷ Ab’entaama ezindi nabo, batekerezaaho okunihira kwabo. Baba n’ekihika ky’okuhuliiriza orubazo rw’Ekiijukyo, habwokuba rubazaaho muno ebintu Kristo hamu 144,000 abaralema hamu na uwe, ebibarakorra abantu abesigwa omu Bulemi bw’Emyaka Rukumi.  Hansi y’obulemi bw’Omukama wabo Yesu Kristo, abalemi abo ab’omu iguru nibaija kukonyera Yesu kufoora ensi orugonjo orurungi, n’okukonyera abantu kufooka abahikiriire. Kisemeza muno obukaikuru n’obukaikuru obw’abantu ab’entaama ezindi ababaho ha Kiijukyo kutekerezaaho akasumi nambere obunabbi bwa Baibuli bulihikirra, nk’obu oburukusangwa omu Isaya 35:5, 6; 65:21-23; hamu na Okusuku’rwa 21:3, 4. Obu bateramu akasisani ubo n’abagonzebwa baabo bali omu nsi empyaka, kibakonyera kugumya okunihira kwabo h’akasumi ak’omu maiso, kandi n’encwamu yabo ey’okutaleka kuheereza Yahwe.​—Mat. 24:13; Bag. 6:9.

8. Nsonga ki endi ey’eretera ab’entaama ezindi kubaho ha Kiijukyo?

⁸ Tekerezaaho ensonga endi habwaki ab’entaama ezindi babaho ha Kiijukyo. Baba nibagonza kwoleka abaseserweho amagita okugonza kwabo hamu n’obusagiki. Ekigambo kya Ruhanga kikaranga ngu hakubaireho enkoragana ey’amaani hagati y’abaseserweho amagita hamu n’abo abaine okunihira okw’okwikara omu nsi. Omu mulingo ki? Leka tubazeeho ebyokurorraho ebimu.

9. Obunabbi oburukusangwa omu Zakaliya 8:23, nibwoleka ki ha mulingo ab’entaama ezindi barukwehurra hali abaseserweho amagita?

⁹ Soma Zakaliya 8:23. Obunabbi bunu nibusoborra kurungi omulingo ab’entaama ezindi barukwehurra h’Abakristaayo bagenzi babo abaseserweho amagita. Ebigambo “nainywe” hamu ‘n’Omuyudaaya’ byona nibimanyisa guruupu ey’abaseserweho amagita. (Bar. 2:28, 29) “Abantu ikumi abomu ndimi zona ezamahanga” nibakikirra ab’entaama ezindi. Ekigambo ‘kukwata’​—nikimanyisa ngu baba besigwa hali abaseserweho amagita obu nibabeteranizaaho omu kuramya okw’amananu. Nahabweki, ha kiro ky’Ekiijukyo booleka ngu nibekwatira kimu abaseserweho amagita obu nibabeteranizaaho omu kuramya okw’amananu.

10. Kiki Yahwe ekyakozere kuhikiriza obunabbi obuli omu Ezekyeri 37:15-19, 24, 25?

¹⁰ Soma Ezekyeri 37:15-19, 24, 25. Yahwe akahikiiriza obunabbi bunu, kurabira omu kuleetera abaseserweho amagita hamu n’abentaama ezindi kukorra hamu omu bumu. Obunabbi bubazaaho emiigo ebiri, abo abaine okunihira okw’okugenda omu iguru, bali nk’omwigo “[gwa] Yuda” (oruganda orwarugwamuga abakama ba Isaleri), kandi abo abaine okunihira ow’okwikara omu nsi, bali nk’omwigo “gwa Eferaimu.” * Yahwe akaba nagenda kuteraniza guruupu zinu ibiri nukwo zifooke “omuigo gumu.” Kinu nikimanyisa ngu nibaheereza hamu omu bumu hansi y’Omukama wabo omu Yesu Kristo. Buli mwaka, abaseserweho amagita hamu n’abentaama ezindi babaho ha Kiijukyo, batali guruupu ibiri baitu ‘nk’igana limu’ hansi ‘y’omuliisa omu.’​—Yoh. 10:16.

11. Mulingo ki omukuru ogw’entaama ezirukubazibwaho omu Matayo 25:31-36, 40 z’olekamu ngu nizisagika bagenzi ba Kristo?

¹¹ Soma Matayo 25:31-36, 40. “Entama” Yesu eziyabalizeeho nizikikirra abahikiriire ab’omu kasumi akaha mpero, abaine okunihira okw’okwikara omu nsi. Basagika n’obwesigwa bagenzi ba Kristo abaseserweho amagita abasigaireho, kukira muno kurabira omu kubakonyera kuhikiriza obujunanizibwa obw’amaani obubaine obw’okutebeza n’okufoora abantu abegeswa omu nsi yoona.​—Mat. 24:14; 28:19, 20.

12-13. Miringo ki endi ab’entaama ezindi boolekamu ngu nibasagika bagenzi ba Kristo?

¹² Buli mwaka, omu wiiki Ekiijukyo obukiba  kitakahikire, ab’entaama ezindi booleka obusagiki bwabo hali bagenzi ba Kristo kurabira omu kwejumbira omu kampaini ey’ensi yoona ey’okuraaliza abantu ha Kiijukyo. (Rora akasanduuko “ Otandikire Ira Kwetekaniriza Akasumi nk’Ekiijukyo?”) Kandi bakonyera kukora entekaniza nukwo Ekiijukyo kisobole kubaho omu bitebe byona omu nsi n’obukiraaba ngu ebitebe ebirukukira obwingi tibibamu abaseserweho amagita. Ab’entaama ezindi basemererwa muno habw’okusagika bagenzi ba Kristo omu miringo nk’egi. Bakimanyire ngu Yesu arora byona ebibakorra bagenzi be abaseserweho amagita nk’ebibakoliire uwe wenyini.​—Mat. 25:37-40.

¹³ Nsonga ezindi habwaki itwena tusemeriire kubaho ha Kiijukyo, katube twine okunihira okw’okugenda omu iguru rundi kwikara omu nsi?

14. Yahwe na Yesu bolekere bata ngu nibatugonza muno?

¹⁴Kwoleka okusiima habw’okugonza Yahwe na Yesu batwolekere. Yahwe atwolekere omu miringo nyingi ngu n’atugonza, baitu haroho omulingo ogumu ogurukukira endi yoona. Omulingo gunu nugwo ogw’okusindika Omwana we ow’omuhendo kwija kubonabonesebwa n’okutufeera. (Yoh. 3:16) Kandi tukimanyire ngu na Yesu na uwe akatwoleka okugonza kwingi muno, obuyaikiriize kuhayo obwomeezi bwe habwaitu. (Yoh. 15:13) Titusobora kusasura Yahwe na Yesu habw’okugonza okw’amaani okubaatwolekere. Baitu nitusobora kwoleka okusiima kwaitu kurabira omu mulingo twetwazaamu buli kiro. (Bak. 3:15) Kandi tubaho ha Kiijukyo nukwo tusobole kwijuka okugonza okubaatwolekere kandi naitwe kwoleka ngu nitubagonza.

15. Habwaki ekicunguro kisembo ky’omuhendo mwingi hali abaseserweho amagita hamu n’ab’entaama ezindi?

¹⁵Kwoleka okusiima habw’ekisembo eky’Ekicunguro. (Mat. 20:28) Ekicunguro ky’omuhendo muno hali abaseserweho amagita, habwokuba nikyo kisobozesa okunihira kwabo kuhikirra. Habwokuba nibaikiririza omu kihongwa kya Yesu, Yahwe abeeta abahikiriire kandi abafoire baana be. (Bar. 5:1; 8:15-17, 23) N’ab’entaama ezindi nibasiima muno habw’ekicunguro. Habwokuba nibaikiririza omu sagama ya Yesu eyasesekere, nibasiimwa omu maiso ga Ruhanga, nibamuheereza kandi baine okunihira okw’okuraba “omu muhito omwingi.” (Kus. 7:13-15) Omulingo gumu abaseserweho amagita hamu n’ab’entaama ezindi booleka okusiima kwabo habw’ekicunguro nugwo ogw’okubaho ha Kiijukyo buli mwaka.

16. Nsonga ki endi ey’etuletera kubaho ha Kiijukyo?

¹⁶ Ensonga endi habwaki tugonza kubaho ha Kiijukyo niyo ey’okugonza kworobera Yesu. Katube twine okunihira okw’okugenda omu iguru rundi okw’okwikara omu nsi, buli omuliitwe n’agonza kworobera ekiragiro Yesu y’ataireho ha kiro yatandikiireho omukoro gw’Ekiijukyo obuyaragiire ati: “Mukikolege okunyijukaga nyowe.”​—1 Kol. 11:23, 24.

17. Ekiijukyo kitukonyera kita kweyongera kwirra haihi na Yahwe?

¹⁷Tweyongera kwirra haihi na Yahwe. (Yak. 4:8) Nk’oku twegere, Ekiijukyo kituha omugisa ogw’okutekerezaaho okunihira Yahwe okwatuhaire n’okwecumitirizaaho kugonza okwingi okwatwolekere. (Yer. 29:11; 1 Yoh. 4:8-10) Kutekerezaaho okunihira okuturukugumya okurukukwata h’akasumi ak’omu maiso hamu n’okugonza okutalekera Yahwe okwatwolekere, kituletera kweyongera kumugonza  n’okugumya enkoragana yaitu na uwe.​—Bar. 8:38, 39.

18. Kwecumitirizaaho ekyokurorraho kya Yesu kituletera kugonza kukora ki?

¹⁸Kituletera kugonza kwegera ha kyokurorraho kya Yesu. (1 Pet. 2:21) Omu biro obutuba tuli haihi kuhika ha Kiijukyo, omutima tuguteeka habirukukwata ha wiiki ya Yesu ey’okumalirra omu nsi, okufa kwe, hamu n’okuhumbuuka kwe. Hanyuma, ha kiro ky’Ekiijukyo, orubazo oruheebwa rutwijukya okugonza Yesu okwatwiniire. (Bef. 5:2; 1 Yoh. 3:16) Obutusomaho ekyokurorraho kya Yesu eky’okwehayo, kandi tukakyecumitirizaaho, kituletera kugonza “okugendaga [nka uwe] okuyagendaga.”​—1 Yoh. 2:6.

19. Nitusobora tuta kwikara omu kugonza kwa Ruhanga?

¹⁹Tweyongera kucweramu kimu kwikara omu kugonza kwa Ruhanga. (Yud. 20, 21) Twikara omu kugonza kwa Ruhanga kurabira omu kukora kyona ekiturukusobora kumworobera, kweza ibara lye, hamu n’okusemeza omutima gwe. (Nfu. 27:11; Mat. 6:9; 1 Yoh. 5:3) Kubaho ha Kiijukyo kituletera kweyongera kucweramu kimu kwetwaza buli kiro, omu mulingo ogurukwoleka Yahwe ngu nitugonza kwikara omu kugonza kwe ebiro n’ebiro!

20. Nsonga ki enungi ezituletera kubaho ha Kiijukyo?

²⁰ Katube twine okunihira okw’okwikara omu iguru rundi omu nsi ebiro n’ebiro, itwena twine ensonga enungi habwaki tusemeriire kubaho ha Kiijukyo. Buli mwaka obutwesorooza hamu ha kiro eki, twijuka okufa kwa Yesu Kristo omuntu outurukugonza. Baitu ekirukukira obukuru, twijuka okugonza okurukukirayo, Yahwe okuyatwolekere obuyahaireyo Omwana we nk’ekicunguro. Mwaka gunu, Ekiijukyo nikiija kubaho rwebagyo Kyakataano, Apuli 15, 2022. Nitugonza Yahwe n’Omwana we, nahabweki, ha kiro eky’okwijuka okufa kwa Yesu, busaho kintu ekirukwija kuba kikuru muno haliitwe kukira kubaho ha Kiijukyo.