1-2. Kiki ekiturukwetaaga kwikara nitukora hanyuma y’okubatizibwa? Soborra.

 OKIRA kuyonja eka yaawe emirundi ingaha? Obundi obwokaba otakagitahire okabanza kugiyonja muno n’obwegendereza. Baitu kiki ekisobora kurugamu kakuba oleka kugiyonja? Niija kwiragura muno kandi egube. Kusobora kwikaza eka yaawe eri nyecumi, osemeriire kugiyonja obutoosa.

² Amaani nugo gamu agarukwetaagisibwa, obukirukuhika ha kwikara nituterekereza entekereza yaitu hamu n’engeso zaitu. Ky’amananu ngu, obutukaba tutakabatiziibwe, tukekamba muno kukora empindahinduka ezirukwetaagisibwa omu bwomeezi bwaitu nukwo tusobole ‘kweyogyaho okusisikara kwona okw’omubiri n’okw’omwoyo.’ (2 Kol. 7:1) Baitu hati nitwetaaga kworobera obuhabuzi obw’omukwenda Paulo ‘obw’okweyongera kufooka bahyaka omu ntekereza yaitu.’ (Bef. 4:23, NWT) Habwaki nitwetaaga kwikara nituterekereza entekereza yaitu? Habwokuba oburofu n’ecuucu eby’ensi enu nibisobora kurahuka kututaahamu. Kusobora kwikara nitusemeza Yahwe, tusemeriire kwikara butoosa nitwekebiija entekereza yaitu, engeso zaitu, hamu n’okwegomba kwaitu.

3. ‘Kuhindurwa omu magezi gaawe’ nikimanyisa ki? (Abarumi 12:2)

³ Kiki ekitusemeriire kukora kusobora kuhindurwa omu magezi gaitu, ekirukumanyisa kuhindurwa omu ntekereza yaitu? (Soma Abarumi 12:2.) Ekigambo ky’Oruyonaani ekirukumanyisa  “muhindurwe omu magezi ganyu” nikisobora n’okumanyisa “kusemezaamu entekereza yaawe.” Nahabweki, tikirukumanyisa ngu tusemeriire kukoraho ebintu ebimu ebirungi byonka. Oihireho, tusemeriire n’okwekebiija omuntu waitu ow’omunda kandi tukakora empindahinduka omu bwomeezi bwaitu ezirukwetaagisibwa nukwo tusobole kworobera endengo za Yahwe nk’okuturukusobora. Baitu kinu titusemeriire kukikora omurundi gumu gwonka, tusemeriire kwikara nitukikora.

4. Nitusobora tuta kulinda entekereza yaitu kutabumbwa ensi enu embi?

⁴ Obuturafooka bahikiriire nitwija kusemezaaga Yahwe omu buli kimu kyona ekiturakoraga. Baitu omu kasumi kanu, nitwetaaga kwikara nitwekamba muno kusemeza Yahwe. Wetegereze akakwate Paulo yayolekere akali hagati y’okuhindurwa amagezi gaitu hamu n’okumanya Ruhanga eby’agonza nk’oku kyolekerwe omu Abarumi 12:2. Omu kiikaro ky’okwikiriza nsi enu kutubumba, tusemeriire kubanza kwekebera kumanya obuturaaba nitwikiriza entekereza ya Ruhanga hatali eya Sitaani kwebembera ebigendererwa byaitu n’encwamu zaitu.

5. Nitusobora tuta kwekebiija entekereza yaitu erukukwata ha kwirra haihi okw’ekiro kya Yahwe? (Rora ekisisani.)

⁵ Tekerezaaho ekyokurorraho. Yahwe nagonza twikale tulindiriire okwija kw’ekiro kye. (2 Pet. 3:12) Wekaguze: ‘Omulingo ntwazaamu obwomeezi bwange, kyoleka ngu ninyetegereza nk’oku empero ey’ensi enu embi eri haihi kuhika? Encwamu zange ezirukukwata ha kusoma n’emirimo, zooleka ngu kuheereza Yahwe nikyo kintu ekirukukirayo obukuru omu bwomeezi bwange? Nyine okwikiriza ngu Yahwe naija kutuha, nyowe n’eka  yange ebyetaago byaitu, rundi nkira kuteeka muno omutima ha itungo?’ Yahwe asemererwa muno obwarora nitulengaho kukora ebintu eby’agonza omu buli kimu kyona ekitukora.​—Mat. 6:25-27, 33; Baf. 4:12, 13.

6. Kiki ekitusemeriire kugumizaamu nitukora?

⁶ Tusemeriire kwekebiija entekereza yaitu butoosa kandi tukole empindahinduka ezirukwetaagisibwa. Paulo akagambira Abakolinso ati: “[Mwekebiije inywenka, obumuraaba] muikaire omu kuikiriza; mwerenge inywenka.” (2 Kol. 13:5) Kuba “omu kuikiriza” tikirukugarukira ha kugenda omu nsorrokano rundi kwejumbira omu buheereza kyonka. Nikitwarramu entekereza yaitu, ebintu ebitwegomba, hamu n’ebigendererwa byaitu. Nahabweki nitwetaaga kwikara nituhindura entekereza yaitu kuraba omu kwikara nitusoma Ekigambo kya Ruhanga, kwega kuteekereza nka Yahwe, hamu n’okukora kyona ekirukwetaagisibwa kumusemeza.​—1 Kol. 2:14-16.

7. Kusigikirra ha Abefeso 4:31, 32, kintu ki ekindi ekitusemeriire kukora, kandi habwaki nikisobora kuguma?

⁷ Soma Abefeso 4:31, 32. Oihireho kukora empindahinduka omu bwomeezi baitu, tusemeriire ‘kujwara omuntu omuhyaka.’ (Bef. 4:24) Tusemeriire kwekamba kusobora kukora eki. Ebintu ebindi ebitusemeriire kukora n’amaani kurora twayeihamu, nibyo okusarra kwona, kubihirwa hamu n’ekiniga. Habwaki eki nikisobora kuguma? Habwokuba engeso ezimu nizisobora kuba zigumire kuleka. Ekyokurorraho, Baibuli egamba ngu abantu abamu ‘b’okubihirwa’ kandi ‘b’ekiniga.’ (Nfu. 29:22) Omuntu kusobora kweyihamu emiringo egi embi, asemeriire kwikara nalengaho muno kukora empindahinduka na hanyuma y’okubatizibwa, nk’oku ekyokurorraho ekirukwongeraho kirukwoleka.

8-9. Ekyokurorraho kya Stephen nikyoleka kita ngu nitwetaaga kwikara nitujuura omuntu owaira?

⁸ Ow’oruganda arukwetwa Stephen akaba aine ekizibu eky’okulema ekiniga kye. Nagamba ati: “N’obunamazire kubatizibwa nkaba nyine kwikara nindwanisa ekiniga kyange, ekyokurorraho, kiro kimu obutukaba tuli omu buheereza nitutebeza nju ha nju, nkahambya omusuma ow’akaba aibire rediyo yange kuruga omu motoka yange. Obunamwiriire haihi akanaga rediyo kandi yairuka. Obunagambiireho abandi abankaba ndi nabo omulingo nayongiire natungamu rediyo yange, omugurusi w’ekitebe akankaguza ati, ‘Stephen, wakukozere ki kakuba obaire omukwasire?’ Ekikaguzo eki kikandetera kuteekereza kandi n’okwekambisibwa kwikara nindinda obusinge.” b

⁹ Ekyokurorraho kya Stephen nikyoleka ngu nitusobora kwoleka omulingo omubi tutarukukinihira, n’obukiraaba ngu twikaire nituteekereza ngu tukagwecwaho. Kakuba eki kikubaho, otahwamu amaani kandi otatekereza ngu oli Mukristaayo omubi. N’omukwenda Paulo akagamba ati: “Obungonza kukora ekirungi, ekibi [kiba] kindi haihi.” (Bar. 7:21-23) Abakristaayo itwena, tusemeriire kwikara niturwanisa engeso embi eziikara niziija nk’ecuucu n’oburofu omu maju gaitu. Tusemeriire kwikara nitwekamba kwikara tuli becumi. Eki nitusobora kukikora tuta?

10. Nitusobora tuta kurwanisa engeso embi? (1 Yohana 5:14, 15)

¹⁰ Saba Yahwe kandi omugambire ha ngeso ey’erukukugumira kuleka kandi okigumye ngu naija kukuhurra kandi akukonyere. (Soma 1 Yohana 5:14, 15.) N’obukiraaba ngu Yahwe tarukwija kukora ekyamahano kumaraho  engeso egi embi, naija kukuha amaani nukwo osobole kutooleka engeso egi embi. (1 Pet. 5:10) Hanyuma, korra ha saara zaawe kuraba omu kwetantara ebintu ebisobora kuleetera omuntu wawe owaira kugaruka. Ekyokurorraho wegendereze kutarora filimu, puroguraamu za tivi, rundi kusoma ebitabu ebirukukurakuraniza engeso ey’oliyo nolengaho kweihamu. Kandi otaikiriza ebitekerezo byawe kwikara ha kwegomba okubi.​—Baf. 4:8; Bak. 3:2.

11. Biki ebitusobora kukora kwikara tujwaire omuntu omuhyaka?

¹¹ N’obukiraaba ngu okajuuramu omuntu owaira, kikuru muno kukurakuraniza omuntu omuhyaka. Eki n’osobora kukikora ota? Kifoole kigendererwa kyawe kwegera hali Yahwe obworukuba noyega ha miringo ye. (Bef. 5:1, 2) Ekyokurorraho, obworukusoma omu Baibuli enkarra ezirukubazaaho okuganyira kwa Yahwe, wekaguze, ‘Nganyira abantu abandi?’ Obwosoma ha mulingo Yahwe asaliririrwa abanaku, wekaguze ‘Nanyowe nsaliririrwa Abakristaayo bagenzi bange abali omu bwetaago, kandi nkyoleka omu bikorwa?’ Ikara nohindura amagezi gaawe kuraba omu kujwara omuntu omuhyaka, kandi ogumiisirize obworaaba nokora ekintu eki.

12. Stephen akerorra ata amaani agali omu Kigambo kya Ruhanga?

¹² Stephen, outusangirwe tubalizeeho kara akakizoora ngu mpora mpora akasobora kujwara omuntu omuhyaka. Nagamba ati: “Kuruga mbatizibwa, mpikirweho enyikara nambere kirukunyetaagisa muno kulema ekiniga kyange. Nyegere kurugaho nkagenda abantu obubalengaho kumbihiza rundi ndengaho kufukya enyikara omu miringo endi. Abantu baingi, otwaliiremu na mukazi wange bansiimire habw’omulingo nsoboire kukwatamu enyikara ezi. Nanyowe kimpuniriize muno! Tindukwehaisaniza habw’empindahinduka zinu ezinkozere omu ngeso zange. Oihireho ninkigumya ngu Baibuli n’esobora kuhindura obwomeezi bw’abantu.”

13. Kiki ekiratukonyera kukora ekintu ekihikire? (Abagaratiya 5:16)

¹³ Soma Abagaratiya 5:16. Yahwe atuha omwoyo gwe ogurukwera omu bwijwire nukwo gutukonyere kukora ekihikire. Obutusoma Ekigambo kya Ruhanga tuba nitwikiriza omwoyo ogurukwera kutukonyera kuhindura entekereza yaitu. Kandi tutunga omwoyo ogurukwera obutugenda omu nsorrokano. Omu nsorrokano ezi, tumara obwire n’Abakristaayo bagenzi baitu abarukulengaho kukora ekihikire nkaitwe kandi eki nikigarramu amaani. (Baheb. 10:24, 25; 13:7) Kandi obutusaba Yahwe kuruga ha mutima kandi tukamwesengereza kutukonyera omu buceke bwaitu, naija kutuha omwoyo ogurukwera kugumizaamu niturwanisa okwegomba okubi. N’obukiraaba ngu ebintu binu tibirukwija kumaraho okwegomba okubi, nibiija kutukonyera kwerinda kukorra ha kwegomba kwaitu. Nk’oku Abagaratiya 5:16 egamba ngu, abo abagenda n’omwoyo ogurukwera ‘tibalihikiriza okwegomba kw’omubiri.’

14. Habwaki kiri kikuru kwikara n’okurakuraniza omutima ogw’okugonza kukora ekihikire?

¹⁴ Obuturaaba tutandikire kukora ebintu ebiratukonyera kuba n’enkoragana enungi na Yahwe, kikuru muno kwikazaaho entekaniza egi n’okwikara nitukurakuraniza omutima ogw’okugonza kukora ekihikire. Habwaki? Habwokuba omu h’abanyanzigwa baitu aikara n’aturwanisa. Omunyanzigwa ogu nukwo okwoheebwa okw’okukora ekigwire. Na hanyuma y’okubatizibwa nitusobora kwesanga  nitukora ebintu ebitusemeriire kwetantara nk’okuteera ejaara, kukozesa kubi amaarwa, rundi kurora ebisisani eby’orwanju. (Bef. 5:3, 4) Ow’oruganda omu omuto nagamba ati: “Kimu ha bintu ebikizireyo kungumira, nukwo kweihamu enyehurra ey’okugonza kuteerana n’abasaija. Nkatekereza ngu enyehurra enu niija kuhikya obwire egende, baitu na hati nkyagiine.” Kiki ekisobora kukukonyera kakuba oba oine okwegomba okubi kandi okugumire kuleka?

15. Habwaki nikigarramu amaani kukimanya ngu okwegomba okubi nikuhika h’abantu boona? (Rora ekisisani.)

¹⁵ Obworaaba norwanisa okwegomba okubi okugumire kuleka, ijuka ngu toli wenka. Baibuli n’egamba eti: “Busaho ekyohyo ekikaba kibakwasire inywe, ekitali kyabantu bona.” (1 Kol. 10:13a) Ebigambo ebi bikahandiikirwa Abakristaayo abaikaraga omu Kolinso. Bamu halibo bakaba bali basihani, bakuuhya, kandi abandi batamiizi. (1 Kol. 6:9-11) Notekereza hanyuma y’okubatizibwa kwabo batatunge okwegomba okubi? Bakakutunga. Bakaba bali Bakristaayo abaseserweho amagita, baitu bakaba bakyali bantu abatahikiriire. Hataroho kugurukyagurukya, nabo obwire obumu barwanisaaga okwegomba okubi. Eki kisemeriire kutugarramu amaani. Habwaki? Habwokuba nikyoleka ngu okwegomba kwona okubi okwoliyo norwanisa, omuntu ondi nauwe akakurwanisa. Amananu gali, n’osobora kwikara ‘noguma omu kuikiriza kwawe, omanyire ngu okubonabonesebwa oku [kuhikire] ha batahi banyu abali omu nsi.’​—1 Pet. 5:9.

16. Mutego ki ogutusemeriire kwetantara, kandi habwaki?

¹⁶ Wetantale omutego ogw’okuteekereza ngu busaho omuntu wena arukwetegereza ekizibu eky’orukurabamu. Entekereza enu n’esobora kukuleetera kutekereza ngu enyikara yaawe teine kunihira kwona kandi ngu toine maani ag’osobora kukozesa kurwanisa  okwegoma okubi. Baibuli egamba eti: “Ruhanga wokwesiga, atalibaleka okwohebwa okukira ekimusobora; baitu hamu nokwohebwa alitaho hokuirukira, nukwo musobole okuguma.” (1 Kol. 10:13b) Nahabweki, okwegomba okubi kakube kuli kw’amaani, nitusobora kukugumira. Habw’obukonyezi bwa Yahwe, nitusobora kuleka kukorra ha kwegomba oku okubi.

17. N’obukiraaba ngu titusobora kwetantara okwegomba okubi, kiki ekitusobora kukora?

¹⁷ Ikara noijuka kinu: Habwokuba tuli bantu abatahikiriire, titusobora kwetantara okwegomba okubi. Baitu kakuba kutwizira nitusobora kukwangirra ahonaho nk’oku Yusufu yakozere obuyairukire mukazi wa Potifa. (Kub. 39:12) Titusemeriire kukorra ha kwegomba okubi!

18-19. Bikaguzo ki ebitusobora kwekaguza obuturukuba nitulengaho kuhindura amagezi gaitu?

¹⁸ Kuhindurwa omu magezi gaawe, nikitwarramu kugumizaamu noyekamba kukigumya ngu entekereza hamu n’ebikorwa byawe byasemeza Yahwe. Nahabweki tusemeriire kwekebiija kandi tukekaguza tuti butoosa: ‘Ebintu ebinkora byoleka ngu nimmanya ebiro ebiturumu kasumi kanu? Ninyeyongera kukurakurana omu kujwara omuntu omuhyaka? Nyikiriza omwoyo gwa Yahwe kwebembera obwomeezi bwange nukwo nsobole kurwanisa kukorra ha kwegomba okw’omubiri?’

¹⁹ Obworaaba noyekebera, otenihirramu kuba omuntu ow’ahikiriire, baitu semerererwa ebintu ebirungi ebiwakakora. Kakuba orora ngu oine nambere osemeriire kusemezaamu, otahwamu amaani. Oihireho, hondera obuhabuzi oburukusangwa omu Abafiripi 3:16, NWT: “Kyona ekituhikireho omu kukurakurana, katweyongere kugendera omu muhanda ogu.” Obworakora eki, kigumye ngu Yahwe naija kukuha omugisa habw’amaani orukuteekamu kwikara nohindura amagezi gaawe.