1. Habwaki Ekiijukyo nikyo ekiro ekirukukirayo obukuru omu mwaka? (Luka 22:​19, 20)

 HALI abantu ba Yahwe, ekiro eky’okwijuka okufa kwa Kristo nikyo kiro ekirukukirayo obukuru omu mwaka. Nugwo omukoro gwonka Yesu Kristo oguyaragiire abahondezi be kwijuka. (Soma Luka 22:​19, 20.) Haroho ensonga nyingi ezituleetera kulindirra Ekiijukyo n’ekihika. Leka tubazeeho zimu hali zo.

2. Nsonga ki ezimu ezituleetera kulindirra Ekiijukyo n’ekihika?

² Ekiijukyo kitukonyera kwecumiitirizaaho obukuru bw’ekicunguro. Kandi kitwijukya emiringo tusobora kwoleka okusiima habw’ekicunguro. (2 Kol. 5:​14, 15) Ekindi, kituha omugisa ogw’okuhuumuzangana nk’ab’oruganda na banyaanya itwe. (Bar. 1:12) Buli mwaka, abafukire omu by’omwoyo baingi nabo babaho ha Kiijukyo. Abamu kibekambisa kugaruka hali Yahwe habw’okugonza okubabooleka. Kandi baingi abaija habw’omurundi gwabo ogw’okubanza, kibekambisa kutandika kwega Baibuli. Mali ebintu binu byona biretera Ekiijukyo kuba ky’omuhendo haliitwe!

3. Ekiijukyo kituleetera kita kuba omu bumu nk’oruganda orw’ensi yoona? (Rora ekisisani.)

³ Tekerezaaho omulingo Ekiijukyo kituteraniza hamu nk’oruganda orw’ensi yoona. Izooba obuliba nirigwa, Abakaiso ba Yahwe omu nsi yoona besorooza hamu ha kiro eky’Ekiijukyo. Itwena tuhuliiriza orubazo orwoleka obukuru bw’ekicunguro. Tuzina ebizina bibiri, turabyamu omugati na viini, kandi hanyuma y’esaara ina, n’omutima gumu itwena tugamba ngu “amiina.” Omu saaha 24, ebitebe byona biba bihondiire entekaniza niyo emu. Tekerezaaho okusemererwa Yahwe na  Yesu okubahurra obubaturora itwena nitubateekamu ekitiinisa omu mulingo ogu.

4. Nitwija kubazaaho ki omu kicweka kinu?

⁴ Omu kicweka kinu, nitwija kubazaaho ebikaguzo binu: Nitusobora tuta kutekaniza emitima yaitu habw’ekiro ky’Ekiijukyo? Nitusobora tuta kukonyera abandi nabo kugasirwa? Kandi nitusobora tuta kukonyera abafukire omu by’omwoyo? Ebyokugarukamu eby’ebikaguzo binu nibiija kutukonyera kwetekaniriza omukoro gunu omukuru.

NITUSOBORA TUTA KUTEKANIZA EMITIMA YAITU HABW’EKIRO KY’EKIIJUKYO?

5. (a) Habwaki tusemeriire kwecumiitirizaaho obukuru bw’ekicunguro? (Zabuli 49:​7, 8) (b) Kiki eky’oyegere omu vidiyo Habwaki Yesu Yafiire?

⁵ Gumu ha miringo ey’erukukirayo obukuru eitusobora kutekaniza emitima yaitu habw’Ekiijukyo nukwo kwecumiitirizaaho obukuru bw’ekicunguro kya Yesu Kristo. Busaho ekitukaba nitusobora kukora kwecungura kuruga omu kibi n‘okufa. (Soma Zabuli 49:​7, 8; rora vidiyo Habwaki Yesu Yafiire?) a Nahabweki Yahwe akakora entekaniza kusindika Yesu nukwo aheyo obwomeezi bwe ha bwaitu. (Bar. 6:23) Yahwe na Yesu, bakooleka okwefeereza okw’amaani. Obutwikara nitwecumiitirizaaho okwefeereza oku, tweyongera kusiima ekicunguro. Nitwija kubazaaho bimu ha bintu Yahwe na Yesu bayefeeriize kusobora kuhayo ekicunguro. Leka tubanze turole kuhayo ekicunguro kyali nikitwarramu ki?

6. Ekicunguro nikyo kiki kandi habwaki Yesu yakihaireyo?

⁶ Ekicunguro nugwo omuhendo ogusasurwa kwegarurra ekintu ekibabaire bakutwaireho. Yahwe akahanga Adamu ali musaija ow’ahikiriire. Obuyasiisire, uwe n’abaana be bakafeerwa ekisembo eky’obwomeezi obutahwaho. Kusobora kutugarurra Adamu ekiyatufeeriize, Yesu akahayo obwomeezi bwe obuhikiriire nk’ekihongwa. Omu bwomeezi bwe bwona omu nsi, Yesu atakole kibi “nobubwakuba obugobya butazoke omu kanwake.” (1 Pet. 2:22) Yesu obuyafiire, obwomeezi bwe bukaba buhikiriire nk’obwa Adamu. Nahabweki, bukaba nibusobora kusasurra Adamu ekiyatufeeriize.—1 Kol. 15:45; 1 Tim. 2:6.

7. Yesu akatunga birengo ki obw’akaba ali omu nsi?

⁷ N’obukiraaba ngu Yesu Kristo akaraba omu birengo eby’amaani obwakaba ali omu nsi, akaikara nayorobera Ise ow’omu iguru. Obwakaba akyali muto, Yesu akaba aine kworobera abazaire be abatahikiriire n’obukiraaba ngu akaba azairwe ahikiriire. (Luk. 2:51) Obwakaba ali nsinganto, akaba aine kurwanisa ebyohyo byona ebyakumuletiire kujeemera abazaire be rundi Yahwe. Obuyakuzire akaba aine kwangirra ebyohyo kuruga hali Sitaani, ayamwoheze nukwo aleke kuba mwesigwa hali Ruhanga. (Mat. 4:​1-11) Sitaani akaba n’agonza kuleetera Yesu kujeemera Yahwe nukwo amulemese kuhayo ekicunguro.

8. Yesu akagumira birengo ki ebindi?

⁸ Omu buheereza bwe omu nsi, Yesu akagumira ebirengo ebindi bingi. Abanyanzigwa be bakamuhiiganiza kandi baalengaho n’okumwita. (Luk. 4:​28, 29; 13:31) Akagumiisiriza n’obutahikirra bw’abahondezi be. (Mar. 9:​33, 34) Obubaamucweriire omusango, bakamubonabonesa kandi baamusekereza. Hanyuma, bakamwita omu mulingo gw’obusaasi kandi ogurukuswaza muno. (Baheb. 12:​1-3) Ekirengo kye eky’okumalirra akakigumiisiriza habwe wenka ataine bulinzi bwa Yahwe. b—Mat. 27:46.

9. Oyehurra ota habw’ekihongwa kya Yesu? (1 Petero 1:8)

 ⁹ Amananu gali, ekicunguro kiketaagisa Yesu kwefeereza muno. Obutwecumiitirizaaho okubonabona kwona Yesu okuyarabiremu habwaitu, tweyongera kumugonza.—Soma 1 Petero 1:8.

10. Yahwe akefeereza ki kusobora kuhayo ekicunguro?

¹⁰ Kandi Yahwe akefeereza ki kurora Yesu yahayo ekicunguro? Yahwe na Yesu bagonzangana muno nk’oku taata agonza mutabani we. (Nfu. 8:30) Tekerezaaho omulingo Yahwe yayehuliiremu obuyarozere ebirengo bingi muno Omwana we ebiyarabiremu omu nsi. Hataroho kugurukyagurukya, Yahwe akasaasa muno obuyaboine Omwana we natwazibwa kubi, nibamwanga, kandi nabonabona.

11. Bazaaho ekyokurorraho ekirukwoleka omulingo Yahwe yayehuliiremu Yesu obwakaba nabonabona.

¹¹ Omuzaire wena ayafeeriirwe omwana amanyire obusaasi obuleetwa kufeerwa omwana. Twine okwikiriza okw’amaani omu kuhumbuuka baitu nabwo tusaasa muno obutufeerwa omuntu outurukugonza. Ekyokurorraho kinu nikitukonyera kumanya omulingo Yahwe yayehuliiremu obuyarozere Omwana we owarukugonza muno nabonabonesebwa kandi naitwa omu mwaka 33 Y.A.K. c—Mat. 3:17.

12. Kiki ekitusobora kukora Ekiijukyo kitahikire?

¹² Ekiijukyo kitakahikire, habwaki buli omu nk’omuntu rundi omu kuramya kwanyu okw’eka mutesomesaaho ebirukukwata ha kicunguro? Kozesa Ekitabu Ekikonyera Abakaiso ba Yahwe Kuseruliiriza rundi ebitabu ebindi ebirukubazaaho ensonga enu omu bwijwire. d Ekindi, kigumye ngu wahondera entekaniza ey’okusoma Baibuli ey’Ekiijukyo enyakuli omu katabu Obwomeezi n’Obuheereza Bwaitu Nk’Abakristaayo​—Akatabu k’Ensorrokano. Kandi ha kiro ky’Ekiijukyo oteebwa kurora puroguraamu ey’embaganiza ey’Okuramya okwa Nyenkyakara. Obututekaniza emitima yaitu habw’ekiro ky’Ekiijukyo, kitusobozesa kukonyera n’abantu abandi kugasirwa.—Ezer. 7:10.

KONYERA ABANTU ABANDI KUGASIRWA

13. Kintu ki eky’okubanza ekitusemeriire kukora kukonyera abandi nabo kugasirwa ha Kiijukyo?

¹³ Nitusobora tuta kukonyera abantu abandi kugasirwa ha kiro ky’Ekiijukyo? Eky’okubanza nukwo kubaraaliza. Oihireho kuraaliza abantu tutangatangana omu buheereza, nitusobora n’okuhandiika orukarra rw’abantu  abaturukugonza kuraaliza. Banu nibatwarramu abanyabuzaale, abatukora nabo, abeegi bataahi baitu, hamu n’abandi. N’obuturaaba tutaine kaadi ezirukumara kubaraaliza, nitusobora kubasindikira endagirro nukwo bagitunge ha byoma ebyakalimagezi. Nikisobora kutuhuniriza habw’abantu abaraabaho ha kiro ky’Ekiijukyo.—Mug. 11:6.

14. Bazaaho ensonga habwaki kikuru kuraaliza omuntu n’okozesa kaadi.

¹⁴ Kuraaliza omuntu n’okozesa kaadi nikisobora kumuleetera kugonza kubaho. Kiro kimu, munyaanya itwe ow’aine iba atali omu h’Abakaiso ba Yahwe akahunirra obuyamugambiire ngu n’agonza kugenda nauwe ha Kiijukyo. Habwaki kyamuhuniriize? Habwokuba emyaka nyingi enyuma, munyaanya itwe yaikaraga namuraaliza baitu atarukwija. Habwaki yaikiriize ha murundi gunu? Iba akagamba ati: “Ntungirege kaadi ey’erukundaliza.” Kandi yasobororra mukazi we ngu omugurusi w’ekitebe ow’akaba amanyire nuwe agimuhaire. Omu mwaka ogu n’emyaka eyahondireho iba akagumizaamu nabaho ha Kiijukyo.

15. Kiki ekitusemeriire kwikara nitwijuka obuturukuba nituraaliza abantu ha Kiijukyo?

¹⁵ Kiijuke ngu abantu turaaliza nibasobora kuba baine ebikaguzo bingi, kukira muno obubaba batakaijaga omu nsorrokano zaitu. Nahabweki nitusobora kutekerezaaho ebikaguzo ebibasobora kutukaguza kandi tutekanize eby’okugarukamu. (Bak. 4:6) Ekyokurorraho, abamu nibasobora kutukaguza: ‘Bintu ki ebiraabayo ha mukoro?’ ‘Guramara bwire bukwingana ki?’ ‘Nsemeriire kujwara nta?’ ‘Ndasasura sente zingaha kutaahamu?’ ‘Haliyo kusorooza sente?’ Obuturaaba nituraaliza abantu nitusobora kubakaguza, “Oine ekikaguzo kyona?” kandi hanyuma tubagarukemu ebikaguzo baratukaguza. Ekindi, nitusobora n’okukozesa vidiyo Ijuka Okufa kwa Yesu na Biki Ebikolebwa omu Kingdom Hall?, kukonyera omuntu kwetegereza ebintu ebikorwa omu nsorrokano zaitu. Omu isomo lya 28 ery’ekitabu Wegondeze Omu Bwomeezi Ebiro n’Ebiro! harumu ensonga ezindi ezitusobora kubagambiraho.

16. Bikaguzo ki ebindi abaija ha Kiijukyo ebibasobora kukukaguza?

 ¹⁶ Hanyuma y’Ekiijukyo, abaizire habw’omurundi gwabo ogw’okubanza nibasobora kuba baine ebikaguzo ebindi. Nibasobora kwekaguza, habwaki busaho n’omu ow’aliire ha mugaati n’obukwakuba kunywa ha viini rundi habwaki abantu bake nubo baliire kandi baanywa. Rundi nibasobora kukaguza mirundi ingaha eitwijuka okufa kwa Yesu. Nibasobora kugonza kumanya ensorrokano z’Abakaiso ba Yahwe zoona obuziraaba zitekaniziibwe omu mulingo nugwo gumu. N’obukiraaba ngu ebintu binu byona bibaziibweho omu rubazo rw’Ekiijukyo, ow’aizire habw’omurundi ogw’okubanza n’agonza kumanya ebirukukiraho. Ekicweka ekiine omutwe “Habwaki Omulingo Abakaiso ba Yahwe Bajaguzaamu Ekiihuro kya Mukama Waitu Ekya Rwebagyo Nigwahukana Hali Amadiini Agandi?” ekiri ha jw.org nikisobora kutukonyera kugarukamu ebikaguzo ebimu. Nitugonza kukora ekiturukusobora kukonyera abantu “abaine entekereza enungi ey’esobora kubaleetera kutunga obwomeezi obutahwaho” kugasirwa ha Kiijukyo.—Eng. 13:​48, NWT.

KONYERA ABAFUKIRE OMU BY’OMWOYO

17. Abagurusi nibasobora bata kukonyera abo abafukire omu by’omwoyo? (Ezekyeri 34:​12, 16)

¹⁷ Omu kasumi ak’Ekiijukyo, abagurusi nibasobora bata kukonyera abo abafukire omu by’omwoyo? Mubooleke ngu nimubafaaho. (Soma Ezekyeri 34:​12, 16.) Ekiijukyo kitakahikire mukigumye ngu mwabaterra amasimu. Mubagambire nk’oku murukubafaaho kandi nk’oku murukugonza kukora kyona ekimurukusobora kubakonyera. Mubaraalize kwija ha Kiijukyo. Kakuba baija, mubatangirre n’omuhimbo. Hanyuma y’Ekiijukyo mwikale nimubaza nabo kandi mugumizeemu nimubaha obukonyezi obubarukwetaaga kurora baagaruka hali Yahwe.—1 Pet. 2:25.

18. Buli omu, omu kitebe n’asobora ata kukonyera abafukire omu by’omwoyo? (Abarumi 12:10)

¹⁸ Buli omu, omu kitebe nasobora kukonyera abafukire omu by’omwoyo abaija ha Kiijukyo.  Omu mulingo ki? Kuraba omu kubooleka okugonza, embabazi, n’okubateekamu ekitiinisa. (Soma Abarumi 12:10.) Ijuka ngu nikisobora kuba kyabagumiire muno kwija omu nsorrokano. Obundi baikaire nibatiina ngu tibarukwija kubatangirra kurungi. e Nahabweki wetantale kubakaguliiriza ebikaguzo ebirukubaswaza rundi kubagambira ebigambo ebisobora kubasaaliza. (1 Bas. 5:11) Ab’oruganda na banyaanya itwe banu abagonzebwa nabo baheereza ba Yahwe. Tusemererwa obubaija kutweteranizaaho omu kumuramya.—Zab. 119:176; Eng. 20:35.

19. Tugasirwa tuta obutubaho ha Kiijukyo?

¹⁹ Nitusiima muno Yesu habw’okuturagira kwijuka okufa kwe buli mwaka. Kandi tumanyire ensonga habwaki kikuru muno. Obutubaho ha Kiijukyo, tugasirwa kandi tukonyera n’abandi kugasirwa omu miringo nyingi. (Is. 48:​17, 18) Tweyongera kugonza Yahwe na Yesu. Twoleka ngu nitusiima habw’ekibaatukoliire. Tweyongera kugumya enkoragana yaitu n’ab’oruganda na banyaanya itwe. Kandi nitusobora kukonyera n’abandi kugasirwa omu migisa eiturayegondezaamu habw’ekicunguro. Leka itwena tukole ekiturukusobora kwetekaniriza Ekiijukyo eky’omwaka gunu ekiro ekirukukirayo obukuru omu mwaka!