1-2. Bizibu ki abaheereza ba Yahwe abesigwa ebibasobora kutunga?

 NITUSOBORA kuhikwaho ekizibu eky’amaani, nikihindura obwomeezi bwaitu ahonaaho. Ekyokurorraho, Ow’oruganda Luis a bakamukeberamu ekookoro ey’akabi. Dakitaali akamugambira ngu, akaba naija kwomeera habw’ameezi make. Monika hamu na iba bakaba nibegondeza omu kuheereza Yahwe. Baitu kiro kimu, Monika akakimanya ngu iba ow’akaba ali mugurusi omu kitebe akaba nakora ebibi by’amaani omu nsita kumara emyaka nyingi. Munyaanya itwe Olivia ow’atali omu buswere akaruga omu ka ye habwokuba ihunga ly’amaani likaba nirigenda kuteera. Obuyagarukire, akasanga ihunga lihwerekeriize enju ye. Omu bwire butaito buti obwomeezi bw’abantu banu bukahinduka ahonaaho. Naiwe wakahikwahoga enyikara ekaleetera obwomeezi bwawe kuhinduka ahonaaho?

² N’obukiraaba ngu nituheereza Yahwe n’obwesigwa, naitwe tuhikwaho ebizibu kandi turwara nk’abantu abandi. Ekindi, abantu abamu nibasobora kutuhiiganiza habwokuba nituheereza Yahwe. N’obukiraaba ngu Yahwe tatanga ebintu binu kutuhikaho, araganiize kutukonyera. (Is. 41:10) Yahwe n’asobora kutukonyera kwikara twine okusemererwa, kukora encwamu enungi, n’okwikara tuli besigwa haluwe, n’obutuba nituraba omu nyikara ezirukukirrayo kimu kuguma. Omu kicweka kinu, nitwija kubazaaho emiringo ena Yahwe eyatukonyeramu obututunga ebizibu. Nitwija n’okurora ekitusemeriire kukora kusobora kugasirwa omu bukonyezi obwatuha.

 YAHWE NAIJA KUKULINDA

3. Obutuhikwaho ekizibu eky’amaani, nikisobora kutugumira kukora ki?

³ Ekizibu. Obututunga ekizibu ekya bwangubwangu, nikisobora kutugumira kuba n’entekereza ey’ehikire n’okukora encwamu enungi. Habwaki? Nitusobora kuba nituhurra obusaasi bwingi omu mutima kandi nitwetuntura muno. Nitusobora kwehurra nk’omuntu ow’ali omu mwirima atamanyire omuhanda ogw’okukwata. Wetegereze omulingo banyaanya itwe ababaziibweho ha kutandika baayehuliiremu obubaatungire ebizibu. Olivia n’agamba ati: “Hanyuma y’ihunga kusiisa enju yange, nkehurra nyetuntwire muno kandi nsobiirwe.” Monika n’agamba ati: “Iba nyowe obuyangobiize, nkehurra kubi muno. Nkasaasa muno, nasisana nk’omuntu oubacumisire omutima. Kikangumira kukora emirimo eya buli kiro. Ekintu ekinkaba ntarukunihira, nikyo kyabaireho.” Yahwe naraganiza kutukonyera ata obutuhikwaho ebizibu?

4. Kusigikirra ha Abafiripi 4:​6, 7, Yahwe aturaganiize ki?

⁴ Omulingo Yahwe atukonyeramu. Araganiize kutuha Baibuli ekyeyeta ‘obusinge bwa Ruhanga.’ (Soma Abafiripi 4:​6, 7.) Obusinge bunu, nukwo okutekaana n’okuhuumura okututunga omu bitekerezo habwokuba n’enkoragana enungi na Yahwe. Obusinge bunu ‘nibukira okumanywa kwona,’ habwokuba butuleetera kutekaana n’okwehurra kurungi muno kukira nk’okuturukutekereza. Kyakakubahoga kuba oyetuntwire muno baitu hanyuma y’okusaba Yahwe, ahonaaho okahurra watekaana? Enyehurra egi nubwo “obusinge bwa Ruhanga.”

5. Obusinge bwa Ruhanga bulinda buta ebitekerezo byaitu n’emitima yaitu?

⁵ Orukarra rwa 7 rugambire ngu obusinge bwa Ruhanga “bulirinda emitima yanyu nebitekerezo byanyu.” Ekigambo “bulirinda” eky’Oruyonaani kyakozesebwaga kumanyisa abaserikale abaalindaga orubuga rutatahirirwa. Abaikazi ab’omu rubuga oru baabyamaga baine obusinge, nibamanya ngu abaserikale nibalinda emiryango yarwo. Omulingo nugwo gumu, obusinge bwa Ruhanga obubulinda emitima yaitu n’ebitekerezo byaitu, tuhurra tutekaine tutarukutiina ekintu kyona. (Zab. 4:8) Nka Hana, ekizibu kyaitu n’obukitahwaho ahonaaho, nitusobora kuhurra twine obusinge. (1 Sam. 1:​16-18) Kandi obutuba tutekaine, kitwanguhira kutekereza kurungi n’okukora encwamu enungi.

6. Kiki ekitusobora kukora kutunga obusinge bwa Ruhanga? (Rora ekisisani.)

⁶ Ekitusemeriire kukora. Nk’oku abantu abaabaga bali omu rubuga bayetaga abaserikale kubalinda, naitwe nitusobora kusaba  Yahwe atuhe obusinge bwe nukwo butulinde. (Luk. 11:9; 1 Bas. 5:17) Luis, outubalizeehoga akabazaaho ekyakonyiire uwe na mukazi we Ana kugumiisiriza obubaakimanyire ngu naija kwomeera emyezi nke. Luis akagamba ati: “Omu nyikara nk’enu, nikisobora kuguma kukora encwamu ezirukukwata ha by’obujanjabi hamu n’ensonga ezindi. Baitu okusaba kukatukonyera kwikara twine obusinge.” Luis na mukazi we nibagamba ngu bakaikara nibasaba Yahwe abahe obusinge omu bitekerezo n’okutekaana omu mutima, kandi abakonyere kukora encwamu enungi. Kandi mali Yahwe akabakonyera. Obworaaba noraba omu kizibu eky’amaani, ikara nosaba muno, kandi Yahwe naija kukuha obusinge bwe oburalinda omutima gwawe n’ebitekerezo byawe.—Bar. 12:12.

YAHWE NAIJA KUTUGARRAMU AMAANI

7. Nitusobora kwehurra tuta obututunga ekizibu eky’amaani?

⁷ Ekizibu. Obututunga ebizibu nitusobora kwehurra, kutekereza, rundi kwetwaza omu mulingo gutali gwa buli kiro. Nitusobora kutunga enyehurra ezirukwahukana kandi niziikara nizihinduka ahonaaho. Ana, outubalizeehoga akagamba ngu akatunga enyehurra ezirukwahukana hanyuma ya Luis kufa. Akagamba ati: “Obwire obumu nahurraga amasu kandi ninyenuuba muno. Nakwatwaga ekiniga ninyekaguza habwaki andekereho.” Ekindi, Ana yahurraga ali wenka kandi kyamugumiraga kukora ebintu kurungi nk’oku Luis yabikoraga. Haroho obuyayehurraga nk’eryato erirukutwarwa ihunga ha nyanja. Yahwe atukonyera ata obutuba twenuubire?

8. Nk’oku kyolekerwe omu 1 Petero 5:​10, Yahwe naraganiza kutukorra ki?

⁸ Omulingo Yahwe atukonyeramu. Naturaganiza kutugarramu amaani. (Soma 1 Petero 5:10.) Eryato obuliba niriteerwa ihunga, nirisobora kutandika kutwarwatwarwa embaju n’embaju. Amaato agarukira obwingi gakolerwaho ebyoma ebiri nk’amapapa ebiteekwa omu mbaju ibiri, ebigakonyera kutatwarwatwarwa ihunga. Ebyoma binu bikonyera eryato kugumizaamu nirigenda kurungi obuliteerwa omuyaga, kandi abantu abarumu baikara batekaine. Baitu ebyoma binu kusobora kukonyera kurungi eryato, lisemeriire kuba nirigenda. Omulingo nugwo gumu, obuturaikara nituheereza Yahwe n’obwesigwa, naija kutuha amaani agaratukonyera kuguma.

9. Ebikwato byaitu ebitukozesa kuseruliiriza nibisobora bita kutukonyera obuturukuba twetuntwire? (Rora ekisisani.)

⁹ Ekitusemeriire kukora. Obworukuba oyenuubire, lengaho kwikara n’ohondera entekaniza yaawe ey’eby’omwoyo. Ky’amananu ngu  n’osobora kutakora ebiwakoraga kara. Baitu ijuka ngu Yahwe tarukukunihirramu kukora ebyotarukusobora. (Lengesaniza na Luka 21:​1-4.) Wetereho entekaniza ey’okwesomesa n’okwecumiitirizaaho eby’osomere. Habwaki kinu kikuru? Habwokuba, Yahwe akozesa ekitebe kye kutuha ebintu ebitugarramu amaani obutuba twenuubire. Kutunga ebirukubazaaho enyikara yaawe, n’osobora kukozesa ebikwato ebitukozesa kuseruliiriza ebiri omu rulimi rwawe nka JW Library^®app, Watchtower Laiburale eya ha Mukura, hamu n’Ekitabu Ekikonyera Abakaiso ba Yahwe Kuseruliiriza. Monika, outubalizeehoga akagamba ngu obuyahurraga ayenuubire, yakozesaaga ebitabu binu kutunga obuhabuzi obwarukwetaaga. Ekyokurorraho akaserulizaaho ebigambo binu; “ekiniga,” “kugobeza,” hamu “n’obwesigwa.” Hanyuma yasomaga kuhikya obuyayehurraga kurungi. N’agamba ati: “Obunatandikire kwesomesa nkaba nyetuntwire muno, baitu ha kumalirra nkehurra ngu Yahwe nasisana arukungwa omu kifuba. Nkakyetegereza ngu Yahwe namanya omulingo ndukwehurramu kandi akaba nankonyera.” Yahwe n’asobora kukozesa ebintu nka binu kukukonyera kugarukwamu amaani n’okutekaana omu mutima.—Zab. 119:​143, 144.

YAHWE NAIJA KUKUSAGIKA

10. Nitusobora kwehurra tuta obututunga ekizibu ekirukumaramu amaani?

¹⁰ Ekizibu. Hanyuma y’okutunga ekizibu eky’amaani, obwire obumu nitusobora kwehura tutaine amaani. Nitusobora kusisana nk’omwiruki ow’akaba amanyiriire kwiruka baitu hati ahendekere. Nikisobora n’okutugumira kukora ebintu ebitwaroraga nk’ebyanguhire, rundi nituhurra tutakyangonza kukora ebintu ebyatusemezaaga. Nka Eriya, nikisobora kutugumira kwimuka omu kitabu, nitugonza kwikara tubyamire. (1 Bakam. 19:​5-7) Yahwe naraganiza kutukorra ki obuturukuba nituhurra tutaine maani?

11. Mulingo ki ogundi Yahwe ogw’atukonyeramu? (Zabuli 94:18)

¹¹ Omulingo Yahwe atukonyeramu. Naraganiza kutusagika. (Soma Zabuli 94:18.) Nk’oku omwiruki ow’ahendekere ayetaaga obukonyezi kusobora kurubata, naitwe nitusobora kwetaaga obukonyezi kwikara nituheereza Yahwe. Obutuba tuli omu nyikara nk’egi, Yahwe naturaganiza ati: “Nyowe [Yahwe] Ruhanga wawe ndikwata omukono gwawe ogwobulyo, ninkugambira nti otatina; ndakukonyera.” (Is. 41:13) Omukama Daudi akarora omulingo Yahwe yamukonyiire. Obwakaba naraba omu bizibu bingi,  n’abanyanzigwa be nibamutiinisiriza, akagambira Yahwe ati: “Nomukono gwawe ogwobulyo gukansagika.” (Zab. 18:35) Baitu Yahwe atusagika ata?

12. Nibaha Yahwe ab’asobora kukozesa kutukonyera obutuba tuli baceke?

¹² Yahwe atusagika kuraba omu kwekambisa abandi kutukonyera. Ekyokurorraho, Daudi obwakaba ahoirwemu amaani, munywani we Yonasani akagenda nambere ali yamugarramu amaani. (1 Sam. 23:​16, 17) Kandi Yahwe akakoma Erisa kukonyera Eriya. (1 Bakam. 19:​16, 21; 2 Bakam. 2:2) Kasumi kanu, Yahwe n’asobora kukozesa ab’omu maka gaitu, abanywani, rundi abagurusi kutusagika. Baitu obutuhikwaho enyikara egumire, tukira kwehurra tutarukugonza kuba hamu n’abantu abandi. Nahabweki, nitusobora kwesoroora. Kyabulikiro kwehurra oti. Baitu kiki ekitusobora kukora kutunga obukonyezi bwa Yahwe?

13. Kiki ekitusemeriire kukora kusobora kugasirwa omu busagiki bwa Yahwe? (Rora ekisisani.)

¹³ Ekitusobora kukora. Otesoroora hali abandi. Kakuba twesoroora, nitusobora kutandika kwetekerezaaho itwenka n’ebizibu ebiturukurabamu. Eki nikisobora kutuleetera kukora encwamu ezitali nungi. (Nfu. 18:1) Itwena haroho obutuba nitugonza kuba itwenka, kukira muno obutuba nituraba omu kizibu eky’amaani. Baitu, kakuba twesoroora hali abandi kumara akasumi akaraihire, nitusobora kuba nitwanga obukonyezi obw’abantu Yahwe abarukukozesa kutusagika. Nahabweki, obworaaba noraba omu nyikara ey’egumire, ikiriza obukonyezi kuruga omu b’omu ka yaawe, abanywani, n’abagurusi. Barole nk’abantu Yahwe abarukukozesa kukusagika.—Nfu. 17:17; Is. 32:​1, 2.

YAHWE NAIJA KUKUHUUMUZA

14. Nyikara ki ezirukutiinisa ezitusobora kwesangamu?

¹⁴ Ekizibu. Obutuba nituraba omu nyikara ey’egumire, obwire obumu twehurra tutiinire. Omu Baibuli, abaheereza ba Ruhanga bakabazaaho akasumi obubayeralikiriire kandi baatiina habw’abanyanzigwa baabo rundi habw’ebizibu ebindi. (Zab. 18:4; 55:​1, 5) Naitwe nitusobora kuba nituhikwaho okuhakanizibwa omu ka, ha isomero, ha mulimo rundi gavumenti n’etuhiiganiza. Nitusobora kuba twine oburwaire obw’amaani kandi nitutiina ngu nitwija kufa. Obutwesanga omu nyikara nka zinu, nitusobora kwehurra nk’omwana omuto ow’ataine bukonyezi. Baitu Yahwe atukonyera ata?

15. Kusigikirra ha Zabuli 94:​19, Yahwe naturaganiza kutukorra ki?

 ¹⁵ Omulingo Yahwe atukonyeramu. Atuhuumuza. (Soma Zabuli 94:19.) Zabuli enu n’etuleetera kutekerezaaho omwana omuto ow’atiinire muno kandi ow’atasobora kubyama habw’enjura ey’amaani enyakurumu omuyaga n’enkuba. Nitusobora kuteeramu akasisani ise nataaha omu kisiika, namulera kandi namucuncubiza kuhikya agwijagiire. N’obukiraaba ngu enjura eriyo n’ekyagwa, ise amuhuumwize kandi yamuleetera kuhurra aine obulinzi. Obutuhikwaho enyikara ezirukutiinisa, naitwe nitusobora kwetaaga Isiitwe ow’omu iguru kutulera kandi akatuhuumuza kuhikya tulekere kutiina. Kiki ekitusemeriire kukora kusobora kutunga okuhuumuzibwa kuruga hali Yahwe?

16. Kiki ekitusobora kukora kugasirwa omu kuhuumuza kwa Yahwe? (Rora ekisisani.)

¹⁶ Ekitusemeriire kukora. Buli kiro, tunga obwire obaze na Yahwe kuraba omu kusaba n’okusoma Ekigambo kye. (Zab. 77:​1, 12-14) Hanyuma, obworatunga ekizibu, ekintu ekyorabanza kutekerezaaho nukwo kugambira Sso ow’omu iguru. Gambira Yahwe ebirukukuleetera kutiina, n’omulingo orukwehurra. Ikiriza abaze naiwe kandi akuhuumuze kuraba omu Byahandiikirwe. (Zab. 119:28) N’osobora kuserra enkarra ezirukukirayo kukuhuumuza obworukuba otiinire. N’osobora kugarukwamu amaani kakuba osoma ekitabu kya Yobu, Zabuli, Enfumo n’ebigambo bya Yesu ebiri omu Matayo esuura 6. Obworasaba hali Yahwe kandi okasoma Ekigambo kye, noija kwehurra ngu nakuhuumuza.

17. Kiki ekiturukugumya?

¹⁷ Nitusobora kukigumya ngu Yahwe naija kutukonyera obutuhikwaho enyikara ezigumire omu bwomeezi. Yahwe talitulekaho nakake. (Zab. 23:4; 94:14) Naraganiza ngu naija kutulinda, atugarremu amaani, atusagike kandi atuhuumuze. Isaya 26:3 niholeka Yahwe ekyarukwija kutukorra. Nihagamba ngu: “Oramulindiraga omu businge obuhikiriire anyakugumya okutekerezakwe haliwe baitu niwe arukwesiga.” Nahabweki, wesige Yahwe kandi okole kyona ekirukusoboka kugasirwa omu bintu ebyataireho kukukonyera. Obworakora eki noija kusobora kwikara ogumire n’obworatunga ebizibu eby’amaani.