1. Kiki ekikwija omu mutwe obw’otekerezaaho Yahwe?

 WAKALENGAHOGA kutekerezaaho Yahwe muntu wa mulingo ki? Kiki ekikwija omu bitekerezo obwoba n’omusaba? N’obuturaaba ngu titusobora kurora Yahwe, Baibuli emubazaaho omu miringo erukwahukana. Baibuli eyeta Yahwe ‘izooba, engabu’ kandi ‘omurro oguruwokya.’ (Zab. 84:11; Baheb. 12:29) Omu kwolekwa, Ezekyeri akabazaaho Yahwe nk’ow’arukusisana ibaale safiro, ekyoma ekirukumulinkana, hamu n’omuhangaizima ogurukwangasana. (Ez. 1:​26-28) Omulingo Baibuli esoborraho Yahwe nigusobora kutuhuniiriza rundi nigutuleetera kumutiina.

2. Kiki ekisobora kulemesa abantu abamu kwirra haihi na Yahwe?

² Habwokuba titusobora kurora Yahwe, nikisobora kutugumira kukikiriza ngu n’atugonza. Abantu abamu nibasobora kutekereza ngu Yahwe tasobora kubagonza habw’ebintu ebibi ebibaakozere kara. Obundi baisebo batabooleke okugonza. Yahwe amanyire habwaki obwire obumu nikisobora kutugumira kwikiriza ngu n’atugonza. Baitu akozesa Baibuli kutukonyera kumanya muntu wa mulingo ki.

3. Habwaki tusemeriire kwecumiitirizaaho okugonza kwa Yahwe?

³ Baibuli egamba ngu Yahwe kugonza. (1 Yoh. 4:8) Byona ebyakora bisigikirra ha kugonza. Habwokuba Ruhanga aine okugonza kwingi kandi okw’amaani, akwoleka naabo abatarukumugonza. (Mat. 5:​44, 45) Omu kicweka kinu, nitwija kubazaaho Yahwe muntu wa mulingo ki, kandi atwoleka ata okugonza. Obuturayeyongera kwega hali Ruhanga waitu, nitwija kweyongera kumugonza.

YAHWE ATUGONZA MUNO

4. Okugonza kwa Yahwe kukuleetera kwehurra ota? (Rora ekisisani.)

⁴ “[Yahwe] wembabazi nyingi.” (Yak. 5:11) Omu Baibuli Yahwe ayerengesaniza na maama ow’aine okugonza. (Is. 66:​12, 13)  Tekerezaaho omulingo maama owokugonza afaaho omwana we omuto. Amukiikira ha bibero bye, aikara namuzaanisa, kandi amubaliza omu iraka erirungi. Obwarra rundi obwaba ali omu busaasi, amuha ekyarukwetaaga nukwo aculeere. Obuturukuba tuli omu busaasi, twikale nitwijuka ngu Yahwe n’atugonza. Omuhandiiki wa Zabuli akahandiika ati: “Omu bitekerezo byange ebingi ebiri omuli nyowe, okuhumuza kwawe kunsemeza obwomezi bwange.”—Zab. 94:19.

5. Okugonza kwa Yahwe okutalekera kukugasira kuta?

⁵ Yahwe mwesigwa. (Zab. 103:8) Tayanguhiriza kutulekaho obutukora ekintu ekibi. Abaisaleri bakaikara nibabiihiza Yahwe, baitu obubayegarukamuga kuruga ha mutima, yaikaraga n’abooleka okugonza. Ekyokurorraho, akabagambira ati: “Okaba oli womuhendo omu maiso gange, kandi owekitinisa, kandi nkakugonza.” (Is. 43:​4, 5) N’akasumi kanu Yahwe atwiniire okugonza nk’okwakaba ainiire Abaisaleri. Tusemeriire kwikara nitumwesiga. N’obuturaaba tukozere ensobi ez’amaani, Yahwe tarukwija kwanguhiriza kutulekaho. Obutwegarukamu kuruga ha mutima kandi tukagaruka hali Yahwe, agumizaamu natwoleka okugonza. Aturaganiza ngu naija ‘kutuganyira.’ (Is. 55:7) Baibuli egamba ngu Yahwe obwatuganyira, tutunga “ebiro ebyokuhumuzibwa” kuruga haluwe.—Eng. 3:19.

6. Ekyahandiikirwe ekiri omu Zakaliya 2:8 nikitwegesa ki hali Yahwe?

⁶ Soma Zakaliya 2:8. Habwokuba Yahwe atugonza, amanyire omulingo twehurramu kandi n’agonza kutulinda. Asaasa muno obutuba nitubonabona. Nahabweki nitusobora kukigumya ngu naija kugarukamu esaara zaitu obutumusaba tuti: “Ondindege nkemboni eyeriso.” (Zab. 17:8) Eriso kiri kimu ha bicweka eby’omubiri ebitukirayo kulinda muno. Nahabweki Yahwe obwatulengesaniza n’emboni ey’eriso lye, aba nasisana nk’ow’arukugamba ngu, ‘Omuntu wena ow’akora kubi abantu bange, akora kubi ekintu eky’omuhendo hali nyowe.’

7. Habwaki tusemeriire kugumya obwesige bwaitu omu kugonza kwa Yahwe?

⁷ Yahwe n’agonza tukigumye ngu n’agonza buli omu haliitwe. Baitu akimanyire ngu ebintu ebitwarabiremu, rundi ebizibu ebiturukurabamu nibisobora kutuleetera kugurukyagurukya obwaraaba n’atugonza.  Kiki ekiratukonyera kukigumya ngu Yahwe n’atugonza? Nukwo kumanya omulingo ayoleka ngu n’agonza Yesu, abaseserweho amagita, hamu naitwe itwena.

OMULINGO YAHWE AYOLEKAMU OKUGONZA

8. Habwaki Yesu akaba nakigumya ngu Yahwe namugonza?

⁸ Yahwe na Yesu bamazire emyaka nyingi nibagonzangana. Enkoragana yabo emazire obuhumbi n’obuhumbi bw’emyaka. Omu Matayo 17:​5, Yahwe akooleka kurungi okugonza okwainiire Yesu. Yahwe akaba n’asobora kugamba ati: ‘Ogu nuwe nkyanganukiire.’ Baitu akaba n’agonza tumanye okugonza okwainiire Yesu, nahabweki akagamba ngu “ogu nuwe Mwana wange oungonza.” Yahwe akaba nayesiimisa Yesu kandi Yesu ekyakaba ali haihi kukora kikamusemeza. (Bef. 1:7) Kandi Yesu akaba nakigumya ngu Ise namugonza muno. Egi niyo ensonga habwaki Yesu akaikara n’agamba ngu Ise namugonza.—Yoh. 3:35; 10:17; 17:24.

9. Kigambo ki ekirukwoleka ngu Yahwe agonza abaseserweho amagita? Soborra. (Abarumi 5:5)

⁹ Wetegereze ekigambo Baibuli eky’ekozesa kwoleka ngu Yahwe n’agonza muno abaseserweho amagita. Egamba ngu okugonza kwa Ruhanga “kuseserwe” halibo. (Soma Abarumi 5:5.) Ekitabu ekimu kigamba ngu ekigambo kinu nikimanyisa “kuseseka nk’amaizi ag’ekyambu agarukugera.” Mali ebigambo binu byoleka omulingo Yahwe agonza abaseserweho amagita! Abaseserweho amagita bakimanyire ngu Ruhanga n’abagonza. (Yud. 1) Omukwenda Yohana akabazaaho omulingo barukwehurra obuyahandiikire ati: “Murole okugonza okukuli Isitwe okuyatuhaire, itwe okwetwa abana ba Ruhanga!” (1 Yoh. 3:1) Yahwe agonza abaseserweho amagita bonka? Nangwa, habwokuba akyolekere ngu itwena n’atugonza.

10. Kintu ki ekirukukirayo kwoleka ngu Yahwe nakugonza?

¹⁰ Hati, kintu ki ekirukukirayo obukuru ekirukwoleka ngu Yahwe n’atugonza? Ekicunguro. Yahwe obuyakihaireyo akooleka okugonza okurukukirrayo kimu omu buhangwa bwona. (Yoh. 3:16; Bar. 5:8) Yahwe akahayo Omwana we ow’omuhendo kufeera abantu boona nukwo ebibi byabo biganyirwe, kandi bafooke banywani be. (1 Yoh. 4:10) Obutwikara nitwecumiitirizaaho Yahwe na Yesu ekibatukoliire, tweyongera kukyetegereza ngu nibagonza buli omu haliitwe. (Bag. 2:20) Ekicunguro kitasasurwe ngu habwokuba Yahwe n’agonza obwinganiza kyonka. Baitu kikaba kikorwa ekirukwoleka okugonza. Yahwe ayolekere okugonza okwingi okw’atwiniire kuraba omu kuhayo Omwana we Yesu ow’omuhendo. Yahwe akaikiriza Omwana we kubonabona kandi hanyuma yafa habwaitu.

11. Kiki ekiturukwega kuruga omu Yeremiya 31:3?

¹¹ Nk’oku turozere, Yahwe tagarukira ha kwehurra ngu n’atugonza baitu atugambira nk’oku n’atugonza. (Soma Yeremiya 31:3.) Yahwe atucunzire yatuleta nambere ali habwokuba n’atugonza. (Lengesaniza na Ekyebiragiro 7:​7, 8.) Busaho kintu rundi omuntu wena asobora kutwahukaniza ha kugonza okw’atwiniire. (Bar. 8:​38, 39) Okugonza kunu, iwe nikukuleetera kwehurra ota? Soma Zabuli 23, orole omulingo Daudi yayehuliire ha kugonza oku, n’omulingo naitwe kusobora kutuleetera kwehurra.

OKUGONZA YAHWE OKW’AKWINIIRE KUKULEETERA KWEHURRA OTA?

12. Bintu ki ebimu ebiri omu Zabuli 23?

¹² Soma Zabuli 23:​1-6. Omu Zabuli 23, Daudi ayoleka nk’oku akaba nakigumya ngu  Yahwe namugonza kandi namufaaho. Akabazaaho enkoragana ey’amaani eyakaba aine n’Omuliisa we Yahwe. Daudi akaba atarukutiina kintu kyona habwokuba Yahwe nuwe akaba namwebembera kandi akaba namwesigira kimu. Akaba nakigumiza kimu ngu Yahwe naija kumwoleka okugonza obwomeezi bwe bwona. Habwaki akaba nakigumya?

13. Habwaki Daudi akaba nakigumya ngu Yahwe namufaaho?

¹³ ‘Tindiseega.’ Daudi ataseege habwokuba Yahwe yaikaraga namuha buli kimu kyona ekyakaba nayetaaga. Ekindi, akaba akimanyire ngu nasiimwa Yahwe kandi ngu munywani we. Egi niyo ensonga habwaki akaba nakigumya ngu n’obuharaabaho ki omu kasumi ak’omumaiso, Yahwe naija kugumizaamu namuha byona ebyarukwetaaga. Habwokuba akaba nakigumya ngu Yahwe namugonza kandi ngu naija kumurolerra, kikamukonyera kuteralikirra, yatunga okusemererwa n’okumarwa.—Zab. 16:11.

14. Yahwe n’asobora ata kuturolerra?

¹⁴ Yahwe aturolerra omu mulingo ogw’okugonza kukira muno obutuhikwaho ebintu ebibi omu bwomeezi. Munyaanya itwe Claire, a ow’aheeriize ha Bbeseri kumara emyaka erukuhingura omu 20, akahurra asobiirwe eka yabo obuyatungire ebizibu ebihonderaine. Ise akateerwa stroke, omu h’abagenzi be yabingwa omu kitebe, baatunga ebizibu omu by’entahya, kandi na bbanka yatwara n’enju yabo. Yahwe akooleka ata ngu n’abagonza kandi nabafaaho? Claire n’agamba ati: “Yahwe akakonyera eka yaitu kutunga byona ebiturukwetaaga. Kandi emirundi erukukira obwingi  Yahwe akatuha ebintu ebirukukira ebitukaba nitwetaaga. Nkira kutekerezaaho omulingo Yahwe atukonyiiremu kandi nyikara ninyijuka okugonza okwatwolekere. Kinu kinkonyiire kwikara nimpereza Yahwe n’okusemererwa n’obuntunga ebizibu.”

15. Habwaki Daudi akehurra ahuumuziibwe? (Rora ekisisani.)

¹⁵ ‘Angarramu amaani.’ Obwire obumu, Daudi yahurraga ayetuntwire habw’ebizibu byona eby’akaba narabamu. (Zab. 18:​4-6) Baitu, okugonza Yahwe okwakaba namwoleka hamu n’okumufaaho bikamuhuumuza. Yahwe yayebemberaga munywani we ow’akaba ajwahire hali ‘obunyansi obuto’ na hali “amaizi agokuhumura.” Eki kikakonyera Daudi kugarukwamu amaani n’okugumizaamu n’aheereza Yahwe asemeriirwe.—Zab. 18:​28-32.

16. Okugonza Yahwe okw’akwiniire kukuhuumwize kuta?

¹⁶ N’omu kasumi kanu, okugonza kwa Yahwe okutalekera kutukonyera kugumira ebizibu ebitutunga. (Emp. 3:22; Bak. 1:11) Tekerezaaho ekyokurorraho kya Rachel. Akahwamu muno amaani iba obuyamulekereho kandi yaleka n’okuheereza Yahwe omu kasumi ka Korona. Yahwe akamukonyera ata? N’agamba ati: “Yahwe akaikara nanyoleka okugonza. Akampa abanywani abarungi abaamaraga nanyowe obwire, nibandetera ebyokulya, nibansindikira obutumwa oburumu ebyahandiikirwe ebirukugarramu amaani, kandi baikara nibanyijukya ngu Yahwe nandolerra. Nyikara ninsiima Yahwe habw’okumpa eka ey’erumu abantu baingi abarukungonza.”

17. Habwaki Daudi ataratiinire “akabi kona”?

¹⁷ ‘Tinditiina akabi kona; baitu iwe oli nanyowe.’ Obwomeezi bwa Daudi bwaikaraga omu kabi, kandi akaba aine abanyanzigwa baingi ab’amaani. Baitu okugonza Yahwe okw’akaba amwiniire kwamuleeteraga kwehurra aine obulinzi. Daudi akaikara atarukutiina habwokuba akaba nakigumya ngu Yahwe naija kumukonyera omu buli nyikara. Nahabweki akagamba ati omu kizina: “[Yahwe] yanjuna omu kutina kwange kwona.” (Zab. 34:4) N’obukiraaba ngu obwire obumu Daudi yatiinaga, akasingura okutiina oku habwokuba akaba nakigumya ngu Yahwe namugonza.

18. Okugonza Yahwe okw’akwiniire nikusobora kuta kukugumya obworukuba otiinire?

¹⁸ Kukimanya ngu Yahwe n’atugonza kitukonyera kita obutuba omu nyikara ezirukutiinisa? Munyaanya itwe Susi ow’arukuheereza nka payoniya abazaaho omulingo uwe hamu na iba  bayehuliire hanyuma ya mutabani wabo kweyita. N’agamba ati: “Ekintu ekibi obukibaho kikuleetera kwehurra kubi kandi oyetuntura. Baitu kukiijuka ngu Yahwe n’atugonza kandi natufaaho kituletiire kwehurra ngu twine obulinzi.” Rachel, outusangwirwe tubalizeeho, n’agamba ati: “Kiro kimu omu bwire bw’ekiro nkahurra obusaasi bw’amaani omu mutima, nayetuntura muno kandi natiina. Baitu nkatandika kurra ninsaba Yahwe. Ahonaaho Yahwe akampumuza nk’oku omuzaire ahuumuza omwana kandi hanyuma nkagwijagira. Nyikara ninyijuka nk’oku Yahwe yankonyiire.” Omugurusi w’ekitebe arukwetwa Tasos akamara emyaka ena omu nkomo habwokwanga kutaaha amahe. Akakirora ata ngu Yahwe namugonza kandi namufaaho? N’agamba ati: “Yahwe akampa ebintu ebirukukira ebinkaba ninyetaaga. Kinu kikankonyera kweyongera kumwesigira kimu. Ekindi, akampa omwoyo ogurukwera ogwankonyiire kutunga okusemererwa n’obukiraaba ngu enyikara omu nkomo ekaba etanguhire. Kinu kikankonyera kukigumya ngu obunyeyongera kwesiga Yahwe, nyeyongera kukirora ngu n’angonza. Nahabweki nkatandika kuheereza nka payoniya ow’akasumi koona obunkaba ndi omu nkomo.”

IRRA HAIHI NA RUHANGA WAAWE OW’OKUGONZA

19. (a) Kukimanya ngu Ruhanga natugonza kikwataho kita esaara zaitu? (b) Byahandiikirwe ki ebirukubazaaho okugonza kwa Yahwe ebikizireyo kukukwataho? (Rora akasanduuko “ Enkarra Ezitukonyera Kukimanya ngu Yahwe Natugonza.”)

¹⁹ Ebyokurorraho ebitubalizeeho omu kicweka kinu nibyoleka ngu Yahwe, “Ruhanga owokugonza,” ali naitwe. (2 Kol. 13:11) Afaaho buli omu haliitwe. Kandi nitukigumya ngu okugonza kwe okutalekera kutwehinguliriza. (Zab. 32:10) Obutwecumiitirizaaho omulingo atwolekere okugonza, tweyongera kurora ngu natufaaho kandi tweyongera kumwirra haihi. Nitusobora kumusaba tutarukutiina, nitumugambira ngu nitwetaaga okugonza kwe. Nitusobora kumugambira byona ebirukutweralikiriza nitukigumya ngu naija kutwetegereza kandi ngu ayetekaniize kutukonyera.—Zab. 145:​18, 19.

20. Okugonza kwa Yahwe kutwiriza kuta haluwe?

²⁰ Nk’oku tugonza kwirra haihi n’omurro omu bwire obw’obufuki, tugonza kwirra haihi na Yahwe habw’okugonza okwingi okwatwoleka. Okugonza kwa Yahwe kw’amaani muno. Nahabweki, ikiriza Yahwe akukonyere. Leka itwena twoleke ngu nitumugonza obu nitugamba ngu ‘ningonza Yahwe’!—Zab. 116:1.