1. Okugonza kwa Ruhanga kukuletera kwehurra ota?

OMUKWENDA Yohana akahandiika ati: “Ruhanga nukwo kugonza.” (1 Yoh. 4:8) Ebigambo ebi nibitwijukya amananu ganu: Ruhanga nuwe Ndugirro y’obwomeezi, kandi nuwe Ndugirro y’okugonza. Yahwe n’atugonza muno! Kandi habwokuba n’atugonza kituletera kwehurra twine obulinzi, okusemererwa, hamu n’okumarwa.

2. Kusigikirra ha Matayo 22:37-40, biragiro ki ebibiri ebirukukirayo obukuru, kandi habwaki nikisobora kutugumira kworobera ekiragiro ekyakabiri?

² Abakristaayo boona nibateekwa kwoleka okugonza. Okugonza kiragiro. (Soma Matayo 22:37-40.) Obutumanya Yahwe kurungi, nikisobora kutwanguhira kworobera ekiragiro eky’okubanza. Yahwe ahikiriire nahabweki atufaaho kandi atutwaza omu mulingo ogw’embabazi. Baitu nikisobora kutugumira kworobera ekiragiro ekyabiri. Habwaki? Habwokuba ab’oruganda na banyaanya itwe, abali bamu h’abataahi baitu ab’okubanza tibahikiriire. Obwire obumu nibasobora kutubaliza rundi kutukora ebintu ebituletera kwehurra ngu tibarukutufaaho kandi tibatwolekere embabazi. Yahwe akaba akimanyire ngu nitwija kuhikwaho ekizibu kinu, nahabweki akakozesa abahandiiki abamu aba Baibuli kuhandiika obuhabuzi obw’embaganiza oburukwoleka ensonga habwaki tusemeriire kwoleka okugonza kandi n’omulingo tusemeriire kukwolekamu. Omu h’abahandiiki abo akaba ali Yohana.—1 Yoh. 3:11, 12.

3. Kiki Yohana ekiyakizire kubazaaho?

³ Omu bihandiiko bye, Yohana akakyoleka emirundi nyingi ngu Abakristaayo basemeriire kwolekangana okugonza.  Kandi obuyahandiikireho obwomeezi bwa Yesu, Yohana akakozesa ebigambo “okugonza” emirundi nyingi kukira abahandiiki abandi abasatu ab’ebitabu eby’Enjiri. Yohana akaba aine emyaka nka kikumi nambere yahandikiire ekitabu kye eky’Enjiri hamu n’ebbaruha ze isatu. Ebitabu ebyo ebya Baibuli, nibitwegesa ngu ebintu byona ebitukora bisemeriire kusigikirra ha kugonza. (1 Yoh. 4:10, 11) Baitu kikatwarra Yohana akasumi kwega isomo eri.

4. Yohana yayolekaga abantu okugonza obwire bwona?

⁴ Yohana obwakaba akyali musigazi, obwire obumu tiyayolekaga abandi okugonza. Ekyokurorraho, kiro kimu Yesu hamu n’abegeswa be obubakaba nibagenda Yerusalemu bakaraba omu Samaliya. Abantu ab’omu kyaro ekimu ekya Samaliya bakanga kubatangirra. Kiki Yohana ekiyakozere? Uwe na mugenzi we Yakobo bakasaba Yesu abaikirize kweta omurro kuruga omu iguru guhwerekereze abantu boona ab’omu kyaro eki! (Luk. 9:52-56) Na ha murundi ogundi, Yohana akalemwa kwoleka abakwenda bagenzi be okugonza. Nikizooka ngu uwe na mugenzi we Yakobo bakasoonasoona nyinabo kusaba Yesu abahe ebiikaro eby’amaani omu Obukama. Abakwenda abandi obubayetegeriize ekintu Yohana na mugenzi bakaba bakozere, bakabiihirwa muno! (Mat. 20:20, 21, 24) Nobukiraaba ngu Yohana akakora ensobi zinu zoona, Yesu yamugonzaaga muno.—Yoh. 21:7.

5. Kiki ekiturukwija kwegaho omu kicweka kinu?

⁵ Omu kicweka kinu, nitwija kubazaaho ekyokurorraho kya Yohana hamu n’ebintu ebimu ebiyahandiikire ha kugonza. Obuturaaba nitubazaaho ekyokurorraho kye, nitwija kurora omulingo naitwe tusobora kwolekamu ab’oruganda na banyaanya itwe okugonza. Kandi nitwija kwega n’omulingo omukuru nyineeka asobora kwolekamu ab’omu ka ye okugonza.

6. Kiki Yahwe ekiyakozere kutwoleka ngu n’atugonza?

⁶ Nitusobora kutekereza ngu kusobora kugonza abantu, ekintu kyonka ekitusemeriire kukora nukwo kuba n’enyehurra enungi halibo rundi kubabaliza ebigambo ebirungi. Baitu obuturaaba nitubagonza kwo mali, tusemeriire kubooleka ngu nitubagonza kuraba omu kubakorra ebikorwa eby’embabazi. (Lengesaniza Yakobo 2:17, 26.) Ekyokurorraho, Yahwe atugonza muno. (1 Yoh. 4:19) Kandi atugambira ngu natugonza kurabira omu ebigambo ebirungi ebiri omu Baibuli. (Zab. 25:10; Bar. 8:38, 39) Baitu tukimanyire ngu Ruhanga atugonza hatali omu bigambo bye byonka baitu n’omu bikorwa bye. Yohana akahandiika ati: “Numwo hamanyisiibwemu okugonza kwa Ruhanga namberetuli, ngu Ruhanga akatuma  omwanawe ayazairwe omu wenka omu nsi, tube abomezi habwe.” (1 Yoh. 4:9) Yahwe akaikiriza Omwana we omugonzebwa kubonabona n’okutufeera. (Yoh. 3:16) Nahabweki nitukigumiza kimu ngu Yahwe n’atugonza muno.

7. Kiki Yesu ekiyakozere kukigumya ngu n’atugonza?

⁷ Yesu akagambira abegeswa be ngu n’abagonza muno. (Yoh. 13:1; 15:15) Kurabira omu bigambo bye hamu n’omu bikorwa bye akakigumya ngu mali nabagonza kandi naitwe n’atugonza muno. Yesu akabagambira ati: “Busaho anyakuina okugonza kwingi okurukukira kunu, omuntu okuhayo obwomezibwe habwenganjanize.” (Yoh. 15:13) Obututekerezaaho ebintu Yahwe na Yesu ebibatukoliire, eki kisemeriire kutuletera kukora ki?

8. Kusigikirra ha 1 Yohana 3:18 kiki ekitusemeriire kukora?

⁸ Obutworobera Yahwe na Yesu tukigumya ngu nitubagonza. (Yoh. 14:15; 1 Yoh. 5:3) Kandi Yesu akaturagira kugonzanga. (Yoh. 13:34, 35) Titusemeriire kwoleka okugonza hali ab’oruganda na banyaanya itwe omu bigambo byonka baitu kurabira n’omu bikorwa byaitu. (Soma 1 Yohana 3:18.) Bintu ki ebimu ebitusobora kukora kubooleka ngu nitubagonza?

9. Okugonza kukaletera Yohana kukora ki?

⁹ Yohana akaba nasobora kwikara na ise kandi akekorra sente omu mulimo ogw’eka yabo ogw’okusoha encu. Baitu akacwamu kukozesa bwomeezi bwe bwona kukonyera abantu kwega amananu agarukukwata hali Yahwe na Yesu. Obwomeezi Yohana yacwiremu kuhondera bwali butanguhire. Akahiganizibwa, kandi nka ha kumalirra okw’ekyasa eky’okubanza obwakaba agurusire akahambirizibwa kugenda omu ihanga erindi. (Eng. 3:1; 4:1-3; 5:18; Kus. 1:9) N’obwakaba atairwe omu nkomo habw’okutebeza amakuru amarungi agarukukwata hali Yesu, Yohana akakyolekera kimu ngu natekerezaaho abantu abandi. Ekyokurorraho, obwakaba ali ha kizinga kya Patimo, akahandiika ekitabu eky’Okusuku’rwa yakisindikira ebitebe nukwo bisobole kumanya ebintu ebikaba nibigenda kubaho omu kasumi akatali kahara. (Kus. 1:1) Nikizooka ngu hanyuma y’okulekerwa kuruga ha kizinga kya Patimo nubwo yahandiikire Enjiri ye erukukwata ha bwomeezi n’obuheereza bwa Yesu. Kandi akahandiika n’ebbaruha isatu nukwo asobole kugumya n’okugarramu amaani Abakristaayo bagenzi be. Nosobora ota kwegera ha kyokurorraho kya Yohana eky’okwefeereza?

10. Nosobora kwoleka ota ngu nogonza abantu?

¹⁰ Nosobora kwoleka ngu nogonza abantu kurabira omu mulingo ocwamu kukozesa obwomeezi bwawe. Ensi ya Sitaani n’egonza obwire n’amaani gaawe goona obimarre ha kwefaaho wenka, nolengaho kuserra sente rundi kwekorra ibara. Baitu Abakristaayo omu nsi yoona bamara obwire bwingi nk’oku barukusobora omu kutebeza, hamu n’omu kukonyera abantu kwirra haihi na Yahwe. Abamu batebeza kandi begesa obwire bwona.

11. Abatebezi baingi abesigwa boolekere bata ngu nibagonza Yahwe, hamu n’Abakristaayo bagenzi baabo?

¹¹ Abakristaayo baingi baine kukora obwire bwona kusobora kwerolerra hamu n’okurolerra ab’omu maka gaabo. Eki nobukiraaba nukwo kiri, abatebezi banu abesigwa basagika ekitebe kya Yahwe omu mulingo gwona ogubarukusobora. Ekyokurorraho, abamu basoboire kukonyera abo abahikirweho ebigwererezi, omu kwombeka ebyombeko by’Obukama, kandi buli omu wena n’asobora kuhayo sente kusagika omulimo ogw’ensi yoona. Bakora ebintu binu habwokuba nibagonza Yahwe hamu n’abantu abandi. Obutugenda omu nsorrokano buli wiiki kandi tukazejumbiramu, twoleka  ngu nitugonza ab’oruganda na banyaanya itwe. N’obukiraaba ngu nitusobora kuba tujwahire, tugenda omu nsorrokano. Nobukiraaba ngu obundi twine ensoni, tugarukamu omu nsorrokano. Kandi nobukiraaba ngu naitwe twine ebizibu, tugarramu abandi amaani ensorrokano zitakatandikire kandi na hanyuma y’okuhwa. (Baheb. 10:24, 25) Mali nitusiima muno habw’omulimo ab’oruganda na banyaanya itwe bakora!

12. Mulingo ki ogundi Yohana oguyayolekeremu ngu n’agonza Abakristaayo bagenzi be?

¹² Yohana akooleka ngu n’agonza Abakristaayo bagenzi hatali omu kubasiima kwonka, baitu n’omu kubaha obuhabuzi. Ekyokurorraho, omu bbaruha ze, Yohana akasiima Abakristaayo bagenzi be habw’okwikiriza kwabo n’ebikorwa byabo ebirungi, baitu akabaha n’obuhabuzi oburukukwata ha kibi. (1 Yoh. 1:8–2:1, 13, 14) Omu mulingo nugwo gumu, tusemeriire kusiima ab’oruganda na banyaanya itwe habw’ebintu ebirungi ebibarukukora. Baitu kakuba omuntu atandika kuba n’entekereza embi rundi omuze omubi, nitusobora kumwoleka ngu nitumugonza kuraba omu kumuhabura omu mulingo ogw’amagezi. Obumanzi nibwetaagisibwa kusobora kuhana omunywani, baitu Baibuli negamba ngu abanywani abarungi batekerangana rundi bahaburangana.—Nfu. 27:17.

13. Kiki ekitusemeriire kwerinda kukora?

¹³ Obwire obumu, nitusobora kwoleka ngu nitugonza ab’oruganda na banyaanya itwe obutwerinda kukora ebintu ebimu. Ekyokurorraho, twerinda kubihirwa bwangu habw’ebintu babalize. Tekerezaaho ekyabaireho Yesu obwakaba ali haihi kufa. Akagambira abegeswa be ngu kusobora kutunga obwomeezi bakaba baine kulya omubiri gwe hamu n’okunywa esagama ye. (Yoh. 6:53-57) Ebigambo ebi bikabihiza abegeswa be baingi kandi ky’abaletera n’okumurugaho. Baitu banywani be bonyini otwaliiremu na Yohana, batamurugeho. Nabo batetegereze Yesu ekyakaba agambire, kandi ebigambo binu nibisobora kuba by’abahuniriize. Baitu, Banywani be abesigwa batatekereze ngu Yesu ebyakaba abalize bigwire kandi bitababiihize. Oihireho bakamwesiga, habwokuba bakaba bakimanyire ngu abaza amananu. (Yoh. 6:60, 66-69) Mali kikuru muno twerinde kurahuka kubiihirwa habw’ebintu banywani baitu babaza! Oihireho, tubaleke batusoborre ekibamanyisize.—Nfu. 18:13; Mug. 7:9.

14. Habwaki tutasemeriire kunoba ab’oruganda na banyaanya itwe?

 ¹⁴ Yohana akongera y’atutererra ngu titusemeriire kunoba ab’oruganda na banyaanya itwe. Kakuba tulemwa kworobera obuhabuzi obu, Sitaani n’asobora kutuhabisa. (1 Yoh. 2:11; 3:15) Kinu kikahikaho abantu abamu ha kumalirra kw’ekyasa eky’okubanza C.E. Omu kasumi ako, Sitaani akalengaho muno kuletera abaheereza ba Ruhanga kunobangana n’okwebaganizaamu. Omu kasumi nambere Yohana yahandiikire ebbaruha ze, abasaija abakaba baine omwoyo nk’ogwa Sitaani bakaba bamazire kutaaha omu kitebe. Ekyokurorraho, omu kitebe ekimu, Diyoterefe akaba naletera ab’oruganda kwebaganizaamu. (3 Yoh. 9, 10) Akaba atarukutamu ekitinisa ab’oruganda ababaga batumirwe akatebe akalemi. Kandi akalengaho n’okubinga omu kitebe ab’oruganda abakuniraga abantu abayabaga anobere. Akakora ekintu kibi muno! Sitaani na hati nakyalengaho muno kubaganizaamu abantu ba Ruhanga. Tutaliikiriza enobi kutuletera kwebaganizaamu n’okuleka kukonyera ab’oruganda.

15. Kiki nyineeka eky’asemeriire kwikara naijuka?

¹⁵ Omulingo gumu omukuru nyineka ayoleka ngu nagonza eka ye, nugwo ogw’okuha ab’omu ka ye ebyetaago eby’omubiri. (1 Tim. 5:8) Baitu kandi asemeriire kukiijuka ngu ekirukukira obukuru nikyo kukonyera eka ye kutunga enkoragana enungi na Yahwe. (Mat. 5:3) Wetegereze ekyokurorraho Yesu yateriireho banyineeka. Kusigikirra ha kitabu eky’Enjiri ya Yohana, Yesu obwakaba ali ha muti ahanikirwe akaba nakyatekerezaaho ab’omu ka ye. Yohana akaba ayemeriire na Malyamu nyina Yesu, omu kiikaro nambere baali nibaitira Yesu. Nobukiraaba ngu Yesu akaba ali omu busaasi obw’amaani, akasaba Yohana kurolerra Malyamu. (Yoh. 19:26, 27) Yesu akaba aine bagenzi be abakaba nibasobora kurolerra Malyamu omu byetaago bye eby’omubiri, baitu nikizooka ngu busaho n’omu halibo ow’akaba yakafookere mwegeswa wa Yesu. Nahabweki Yesu akaba nagonza Malyamu arolererwe omu by’omubiri hamu n’omu by’omwoyo.

16. Bujunanizibwa ki Yohana obw’akaba aine?

¹⁶ Yohana akaba aine obujunanizibwa obw’emiringo nyingi. Nk’omu h’abakwenda akaba aine obujunanizibwa obw’okwebembera omu mulimo ogw’okutebeza. Kandi nasobora kuba akaba aswire, nahabweki akaba aine kuhikyaho eka ye ebyetaago eby’omubiri hamu n’eby’omwoyo.  (1 Kol. 9:5) Kinu nikyegesa ki banyineeka ab’omu kasumi kanu?

17. Habwaki kiri kikuru nyineeka kuhikyaho eka ye ebyetaago eby’omwoyo?

¹⁷ Ow’oruganda anyakuli nyineeka nasobora kuba aine obujunanizibwa bwingi obw’amaani. Ekyokurorraho, asemeriire kwekamba muno ha mulimo gwe, nukwo enyetwaza ye etajumisa ibara lya Yahwe. (Bef. 6:5, 6; Tit 2:9, 10) Kandi nasobora kuba aine obujunanizibwa omu kitebe, nk’okurolerra entaama za Yahwe hamu n’okwebembera omu mulimo ogw’okutebeza. Kandi ha murundi nugwo gumu asemeriire kuba nasoma Baibuli butoosa na mukazi we hamu n’abaana baabo. Ab’omu ka ye nibaija kumusiima muno habw’okubarolerra omu by’omubiri, kubaikaza basemeriirwe, kandi n’okubakonyera kwikara nibaheereza Yahwe.—Bef. 5:28, 29; 6:4.

18. Kintu ki Yohana ekyakaba nagumya?

¹⁸ Yohana akahangaara emyaka nyingi kandi akarora ebirungi bingi. Akahikwaho ebizibu bingi ebikaba nibisobora kucekya okwikiriza kwe. Baitu yakoraga kyona ekirukusoboka kworobera ebiragiro bya Yesu otwaliiremu n’ekiragiro eky’okugonza Abakristaayo bagenzi be. Ekyarugiremu, Yohana akigumiza kimu ngu Yahwe na Yesu bakaba nibamugonza, kandi bakaba nibagenda kumuha amaani ag’okugumira ekirengo kyona. (Yoh. 14:15-17; 15:10; 1 Yoh. 4:16) Sitaani n’ensi ye bakaba batasobora kutanga Yohana kugonza Abakristaayo bagenzi be kandi n’okumutanga kukuboleka omu bigambo n’ebikorwa bye.

19. Orukarra oruli omu 1 Yohana 4:7 nirututererra kukora ki, kandi habwaki?

¹⁹ Nka Yohana, nitwikara omu nsi erukulemwa Sitaani, ruhanga ow’obusinge bunu anyakwijwire enobi. (1 Yoh. 3:1, 10) Sitaani nagonza tunobe ab’oruganda na banyaanya itwe, baitu tasobora kutuhambiriza kukikora rundi buli niitwe tumwikirize atuletere kukikora. Leka tucweremu kimu kwoleka ab’oruganda n’abanyaanya itwe okugonza kurabira omu bigambo n’ebikorwa byaitu. Obutarayoleka okugonza nk’oku, nitwija kutunga okusemererwa habwokuba kicweka ky’eka ya Yahwe kandi nitwija kutunga obwomeezi oburungi.—Soma 1 Yohana 4:7.