1. Orubazo orw’ahairwe ha rusorrokano orukooto omu 1935 rukakwataho ruta omusigazi omu?

OMUSIGAZI omu akaba aine emyaka 18 nambere yabatiriziibwe omu 1926. Bazaire be bakaba bali Beegi ba Baibuli, eri niryo likaba ibara ly’Abakaiso ba Yahwe omu kasumi ako. Bakaba baine aboojo basatu hamu n’abaisiki babiri, kandi boona bakabatendeka kuheereza Yahwe hamu n’okuhondera ekyokurorraho kya Yesu Kristo. Nk’oku Abeegi ba Baibuli boona bakoraga omu kasumi ako, n’omusigazi onu omwesigwa yalyaga ha mugaati kandi anywa na viino buli mwaka, ha mukoro ogw’Ekiihuro kya Mukama Waitu. Baitu okunihira kwe habw’akasumi ak’omu maiso kukahinduka obuyahuliire orubazo orw’amaani orwali rwine omutwe “Ekitebe Kingi.” Orubazo oru rukaheebwa Ow’oruganda J. F. Rutherford omu 1935 ha rusorrokano orukooto orw’abaire omu Washington, D.C., omu Amerika. Kiki Abeegi ba Baibuli ekibayegere omu rusorrokano orukooto oru?

2. Mananu ki ag’Ow’oruganda Rutherford y’ayolekere omu rubazo rwe?

² Omu rubazo rwe, Ow’oruganda Rutherford akooleka bantu ki abali omu “ekitebe kingi” ekirukubazibwaho omu Okusuku’rwa 7:9. Kuhikira kimu omu kasumi ako, Abeegi ba Baibuli batekerezaaga ngu ekitebe ekingi, kyali ky’abantu abandi abakungezere omu iguru baitu abali batali besigwa kwingana abaseserweho amagita. Ow’oruganda Rutherford akakozesa Ebyahandiikirwe kusoborra ngu abantu ab’ekitebe ekingi tibakomerwe kugenda omu iguru, baitu bali ntaama za Kristo ezindi * eziraraba “omu muhito omwingi” kandi bakomeera ebiro  n’ebiro omu nsi. (Kus. 7:14) Yesu akaraganiza ati: “Nyina entama ezindi ezitali zomu isibiko linu: nazo kinsemeriire okuzireta, zirihurra iraka lyange; kandi ziriba igana limu; omulisa omu.” (Yoh. 10:16) “Entama ezindi” zinu nizimanyisa Abakaiso ba Yahwe abesigwa abaine okunihira okw’okwikara omu Rugonjo orurungi omu nsi habw’ebiro n’ebiro. (Mat. 25:31-33, 46) Leka tubazeeho omulingo enyetegereza enu empyaka y’ahindwire obwomeezi bw’abantu ba Yahwe baingi, otwaliremu n’ow’oruganda outubalizeehoga ow’emyaka 18.—Zab. 97:11; Nfu. 4:18.

3-4. Ha rusorrokano orukooto omu 1935, kiki enkumi n’enkumi ez’Abakristaayo eki bayetegeriize?

³ Hakabaho okusemererwa kwingi ha rusorrokano orukooto, ow’arukuha orubazo obuyagambiire abantu ati: “Ninsaba abo boona abaine okunihira okw’okwikara omu nsi ebiro n’ebiro kwemerra.” Ow’oruganda omu ow’akaba ali ha rusorrokano oru nagamba ngu akarora abantu nka 10,000 h’abantu nka 20,000 abakaba bali ha rusorrokano oru, nibemerra. Nubwo Ow’oruganda Rutherford yarangiriire ati: “Dora! Ekitebe Ekingi!” Hanyuma, buli omu wena akatokera haiguru n’okusemererwa. Abo abayemeriire bakakyetegereza ngu Yahwe akaba atabakomere kugenda kwikara omu iguru. Bakakyetegereza kurungi [omu 1935] ngu Ruhanga akaba atabasesereho amagita. Ha kiro ekyayongireho eky’orusorrokano oru, abantu 840 nubo babatiziibwe bafooka Abakaiso ba Yahwe, kandi abarukukira obwingi bakaba ab’entaama ezindi.

⁴ Hanyuma y’orubazo, ow’oruganda omuto outubalizeehoga hamu n’enkumi n’enkumi ez’Abakristaayo abandi bakaleka kulya ha mugaati hamu n’okunywa ha viino ha Kiihuro kya Mukama Waitu. Baingi bakehurra nk’ow’oruganda omu omwebundaazi ayagambire ati: “Ekiijukyo ekya 1935 nikyo n’amaliriire kulya ha mugaati hamu n’okunywa ha viino. Nkakyetegereza ngu Yahwe akaba atakozeseze omwoyo gwe ogurukwera kumpa okunihira okw’okugenda okwikara omu iguru. Oihireho nkaba nyine okunihira okw’okwikara omu nsi kandi n’okugifoora orugonjo orurungi.” (Bar. 8:16, 17; 2 Kol. 1:21, 22) Kuruga obu ab’ekitebe ekingi beyongiire muno kandi baikaire nibakorra hamu n’abaseserweho amagita abasigaireho. *

5. Yahwe arora ata abo abalekere kulya ha mugaati n’okunywa ha viino eby’Ekiijukyo?

⁵ Yahwe arora ata abo abaalekere kulya ha mugaati hamu n’okunywa ha viino hanyuma ya 1935? Kandi Yahwe arora ata Omukristaayo ow’omu kasumi kanu ow’abaire nalya ha mugaati kandi nanywa ha viino ha Kiijukyo habw’okutekereza ngu aseserweho amagita, baitu ow’ahika akakyetegereza ngu mali taseserweho amagita? (1 Kol. 11:28) Abamu bakalya ha mugaati kandi banywa ha viino habwokuba baketegereza kubi okunihira kwabo. Baitu kakuba baikiriza ensobi yabo, bakaleka kulya omugaati hamu n’okunywa ha viino, kandi bakagumizaamu nibaheereza Yahwe n’obwesigwa, mali Yahwe naija kubabara omu b’entaama ezindi. Nobukiraaba ngu tibalya ha mugaati kandi tibanywa ha viino, babaho ha Kiijukyo habwokuba nibasiima muno Yahwe hamu na Yesu ekibabakoliire.

6. Yesu aragiire bamalaika kukora ki?

⁶ Omuhito omwingi nk’oku guli haihi muno kuhika, kyakubaire kirungi tubazeeho  ebintu ebindi Okusuku’rwa esuura 7 ebyerukubazaaho Abakristaayo abaseserweho amagita hamu n’Abakristaayo ab’entaama ezindi. Yesu aragira bamalaika kugumizaamu bakwasire embeho ina ezirukuhwerekereza. Tibasemeriire kulekera embeho ezi zikatera ensi kuhikya Abakristaayo boona abaseserweho amagita obubaratekwaho akokurorraho, ekirukumanyisa ngu Yahwe acwiremu ngu besigwa. (Kus. 7:1-4) Habw’okulinda obwesigwa bw’abo, bagenzi ba Kristo abaseserweho amagita nibaija kutunga empeera ey’okufooka bakama kandi banyakatagara na Kristo omu iguru. (Kus. 20:6) Yahwe, Yesu, hamu na bamalaika nibaija kusemererwa muno kurora abasererweho amagita 144,000 nibatunga empeera y’abo ey’omu iguru.

7. Nk’oku kyolekerwe omu Okusuku’rwa 7:9, 10, nibaha Yohana abayarozere omu kwolekwa, kandi bakaba nibakora ki? (Rora ekisisani ekiri ha kyesweko.)

⁷ Hanyuma y’okubazaaho 144,000 abali bakama kandi banyakatagara, Yohana arora ekintu ekirukusemeza muno, arora “ekitebe kingi” ekikira Haramagedoni. Kwahukanaho na guurupu ey’okubanza, ekitebe kinu ekyakabiri kikooto muno kandi n’omuhendo gwakyo tigumanyirwe. (Soma Okusuku’rwa 7:9, 10.) “Bajwaire ebyokujwara ebirukwera,” ekirukwoleka ngu berinzire “okutabaho akamogo” kuruga omu nsi ya Sitaani kandi baikaire bali besigwa hali Ruhanga hamu na Kristo. (Yak. 1:27) Nibamirra ngu ebintu Yahwe hamu na Yesu Omwana Gwentaama ogwa Ruhanga ebibakozere nibyo bibaletiire kujunwa. Ekindi, bakwasire amataagi g’ekindo, ekirukwoleka ngu nibaikiriza Yesu nk’Omukama, Yahwe ow’akomere.—Lengesaniza na Yohana 12:12, 13.

8. Ekyahandiikirwe ekiri omu Okusuku’rwa 7:11, 12 nikitugambira ki ha ka ya Yahwe ey’omu iguru?

⁸ Soma Okusuku’rwa 7:11, 12. Kiki ekyabaireho abo abali omu iguru obubarozere ekitebe ekingi? Yohana akarora boona abali omu iguru basemeriirwe kandi nibakugiza Ruhanga obubarozere ekitebe ekingi. Eka ya Yahwe ey’omu iguru niija kusemererwa muno kurora okwolekwa kunu nikuhikirra, ekitebe ekingi obukirakiraho omuhito omwingi.

9. Kusigikirra ha Okusuku’rwa 7:13-15, ab’ekitebe ekingi nibakora ki omu kasumi kanu?

⁹ Soma Okusuku’rwa 7:13-15. Yohana ahandiika nagamba ngu ab’ekitebe ekingi ‘boogeze eby’okujwara byabu, babyeza omu sagama Ey’omwana Gwentaama.’ Kinu nikimanyisa ngu baine omuntu ow’omunda omurungi kandi bahikiriire omu maiso ga Yahwe. (Is. 1:18) Bali Bakristaayo abehaireyo hali Yahwe, ababatiziibwe, abaine okwikiriza okw’amaani omu kihongwa Yesu yahaireyo kandi abaine enkoragana enungi na Yahwe. (Yoh. 3:36; 1 Pet. 3:21) Egi niyo nsonga habwaki Ruhanga abasiima kandi abaikiriza ‘kumukorra nyamusana n’ekiro’ hanu omu nsi. Omu kasumi kanu, nibekamba muno, kandi nubo bakora omulimo ogurukukira obukooto ogw’okutebeza ha Bukama hamu n’okufoora abantu abegeswa habwokuba Obukama bwa Ruhanga nikyo kintu ekirukukira obukuru omu bwomeezi bwabo.—Mat. 6:33; 24:14; 28:19, 20.

10. Kiki ab’ekitebe ekingi ekibarukugumya kandi kiki ekibalindiriire kurora nikihikirra?

¹⁰ Ab’ekitebe ekingi abararuga omu muhito omwingi nibakigumya ngu Ruhanga naija kugumizaamu n’abarolerra, habwokuba ‘Ogu ow’aikalire ha kitebe ky’Obukama alibasiikiriza n’eheema ye.’ Omurago ab’entaama ezindi ogubataaha balindiriire nigwija kuhikirra, ogurukugamba ngu: “[Ruhanga] alisusura amaizi gona ha maiso gabu; kandi tihakiroho okufa; nobukwakuba okutera empamo, nobukwakuba okurra, nobukwakuba okusasa tibikiroho.”—Kus. 21:3, 4.

11-12. (a) Nk’oku kyolekerwe omu Okusuku’rwa 7:16, 17, ab’ekitebe ekingi balindiriire migisa ki? (b) Kiki ab’entaama ezindi ekibasobora kukora ha Kiijukyo, kandi kiki ekibaletera kukikora?

 ¹¹ Soma Okusuku’rwa 7:16, 17. Omu kasumi kanu, abamu h’abaheereza ba Yahwe nibabonabona habw’enjara habwokuba eby’entahya tibiri birungi rundi habw’obwimukirro n’obulemu. Abandi batairwe omu nkomo habw’okwikiriza kw’abo. Baitu, ab’ekitebe ekingi baine okusemererwa kwingi habwokuba bakimanyire ngu hanyuma y’okukira okuhwerekerra okw’ensi enu embi, nibaija kwikaraga baine ebyokulya eby’omubiri hamu n’eby’omwoyo omu bwingi. Yahwe obw’arahwerekereza ensi ya Sitaani, naija kukigumya ngu ab’ekitebe ekingi balinzirwe nukwo batahikwaho ekiniga kya Yahwe ekirukusisana “okubaba.” Hanyuma y’omuhito omwingi kuhwa, Yesu naija kwebembera abantu abaraaba basigaireho omu nsi abatwale hali “ensoro zamaizi agobwomezi [obutahwaho].” Kitekerezeeho: Ab’ekitebe ekingi baine okunihira okw’embaganiza. Omu buhumbe n’obuhumbe obw’abantu abaakomeera, ab’ekitebe ekingi nubo bonka abasobora kutafa n’akake!—Yoh. 11:26.

¹² Ab’entaama ezindi baine okunihira okurungi okubarukusiimira Yahwe hamu na Yesu! Nobukiraaba ngu Yahwe atabakome kugenda kwikara omu iguru, n’abagonza muno nk’oku arukugonza abaseserweho amagita. Abaseserweho amagita hamu na b’entaama ezindi nibasobora kukugiza Ruhanga hamu na Kristo. Gumu ha miringo bakikoramu nugwo ogw’okubaho ha Kiihuro kya Mukama Waitu.

13-14. Habwaki buli omu wena asemeriire kubaho ha Kiijukyo ky’okufa kwa Kristo?

¹³ Omu myaka ey’ehingwireho, nikiteberezebwa ngu omu bantu 1,000 abaija ha Kiijukyo omuntu 1 nuwe alya ha mugaati kandi akanywa ha viino. Omu bitebe ebirukukira obwingi omu nsi tihabamu muntu wena ow’alya ha mugaati rundi ow’anywa ha viino ha Kiijukyo. Abantu abarukukira obwingi ababaho ha Kiijukyo baine okunihira okw’okwikara omu nsi. Hati habwaki babaho ha Kiihuro kya Mukama Waitu? Ensonga ey’ebaletera kubaho n’esisana n’ensonga ey’eretera abantu kugenda ha mukoro gwa munywani wabo ow’aba nagaitwa. Abanywani banu babaho kwoleka ngu nibagonza kandi nibasagika abarukugenda kugaitwa. Omu mulingo nugwo gumu, ab’entaama ezindi babaho ha Kiikukyo kwoleka ngu  nibagonza kandi nibasagika Kristo hamu n’abaseserweho amagita. Ekindi, babaho kwoleka ngu nibasiima habw’ekihongwa Yesu y’ahaireyo, ekirukwija kubasobozesa kwikara omu nsi habw’ebiro n’ebiro.

¹⁴ Ensonga endi enkuru ey’ebaletera kubaho ha Kiijukyo eri y’okworobera ekiragiro kya Yesu. Yesu obuyatandikireho ekiihuro eki eky’embaganiza ali n’abakwenda be abesigwa, akabagambira ati: “Kinu mukikolege okunyijukaga nyowe.” (1 Kol. 11:23-26) Nahabweki ab’entaama ezindi nibaija kugumizaamu nibabaho ha Kiihuro kya Mukama Waitu, abaseserweho amagita abamu obubaraaba bakyali omu nsi. Kandi ab’entaama ezindi baraliza n’abantu boona kubeteranizaaho ha Kiijukyo.

15. Kiki ekitusobora kukora kusobora kukugiza Ruhanga na Kristo ha Kiijukyo?

¹⁵ Ha Kiijukyo, tutunga omugisa ogw’okukugiza Ruhanga na Kristo omu kuzina n’okusaba. Orubazo oruraheebwa mwaka gunu Rwine omutwe “Siima Ruhanga Na Yesu Kristo Habw’Ebibakukoliire!” Nirwija kutuletera kweyongera kusiima Yahwe hamu na Kristo. Nahabweki omugaati n’eviino obubiraaba nibirabibwamu, itwe abaraaba bali ha kiijukyo nitwija kwijukibwa ekibirukumanyisa, kandi eki nikyo omubiri n’esagama ya Yesu. Kandi nitwija kutekerezaaho okugonza Yahwe y’atwolekere obuyaikirize Omwana we kufa nukwo tusobole kutunga obwomeezi. (Mat. 20:28) Buli omu wena arukugonza Isiitwe omu iguru hamu n’Omwana we n’aija kugonza kubaho ha Kiijukyo.

16. Abaseserweho amagita hamu n’ab’entaama ezindi nibasisana omu miringo ki?

¹⁶ Embaganiza ey’eri hagati y’abaseserweho amagita hamu n’ab’entaama ezindi teri ngu ekitebe ekimu ky’omuhendo muno hali Ruhanga kukira ekindi. Ebitebe binu bibiri byona by’omuhendo hali uwe. Kinu tukimanyire habwokuba akasasura omuhendo gumu, ogw’obwomeezi bw’Omwana we omugonzebwa kusobora kugura abaseserweho amagita hamu n’ab’entaama ezindi. Embaganiza hagati y’ebitebe binu bibiri eri ha kunihira okubaine. Baitu ebitebe binu byona bisemeriire kwikara biri byesigwa hali Ruhanga na Kristo. (Zab. 31:23) Kandi oijuke ngu Yahwe aha buli muntu wena omwoyo ogurukwera kusigikirra ha bwetaago bwe, kaabe aseserweho amagita rundi ali w’entaama ezindi.

17. Abaseserweho amagita abasigaireho baine ekihika kya ki?

¹⁷ Abakristaayo abaseserweho amagita tibazarwa n’okunihira okw’okugenda omu iguru. Ruhanga nuwe abaha okunihira oku. Batekerezaaho okunihira kwabo, bakusabaho, kandi baine ekihika eky’okutunga empeera yabo omu iguru. Tibamanyire omulingo omubiri gwabo  gulisisanamu omu iguru. (Baf. 3:20, 21; 1 Yoh. 3:2) Eki nobukiraaba nukwo kiri, baine ekihika eky’okutangatangana, Yahwe, Yesu, bamalaika, hamu n’abaseserweho amagita abandi. Baine n’ekihika eky’okutunga ekiikaro ky’abo omu Bukama obw’omu iguru.

18. Bintu ki ab’entaama ezindi ebibalindiriire n’ekihika?

¹⁸ Ab’entaama ezindi baine okunihira abantu boona okubazaaho nakwo, okw’okwomeera omu nsi ebiro n’ebiro. (Mug. 3:11) Balindiriire n’ekihika ekiro ekibalikonyera omu kufoora ensi yoona orugonjo orurungi. Balindiriire n’ekihika ekiro ekibalisobora kwombeka amaju gaabo habwabo, kubyara emisiri ey’abo habwabo, kandi begondeze omu bwomeezi oburungi bali n’abaana baabo. (Is. 65:21-23) Baine ekihika eky’okugenda omu bicweka bingi eby’ensi, kurora ensozi, ebibira, hamu n’enyanja, kandi n’okwegaho ebintu byona Yahwe ebiyahangire. Baitu ekirukukira kubasemeza nukwo kumanya ngu enkoragana yabo na Yahwe niija kweyongera kusemerra kimu.

19. Ekiijukyo nikituha mugisa ki itwena, kandi Ekiijukyo nikiija kubaho di mwaka gunu?

¹⁹ Yahwe ahaire buli muheereza we ay’ayehaireyo hali uwe okunihira okurungi. (Yer. 29:11) Ekiijukyo eky’okufa kwa Kristo kiha buli omu omulitwe omugisa gw’embaganiza ogw’okukugiza Ruhanga hamu na Kristo habw’ebi byona ebibatukoliire nukwo tusobole kutunga obwomeezi obutahwaho. Ekiijukyo nurwo rusorrokano orurukukirayo obukuru Abakristaayo ab’amananu orubatunga buli mwaka. Ekiijukyo nikiija kubaho Kyamukaaga, Maaci 27, 2021 hanyuma y’izooba kugwa. Abantu baingi nibaikara omu biikaro nambere baine obugabe obw’okubaho ha rusorrokano runu. Abandi nibaija kubaho nobubaraaba nibahiganizibwa. Abandi nibaija kutungira Ekiijukyo omu nkomo. Omu nyikara yoona eyoraaba orumu, leka itwena twijuke ngu Yahwe, Yesu, hamu n’ekicweka ky’eka ya Ruhanga eky’omu iguru, nibarora. Kandi nitugondeza buli kitebe, guruupu, hamu na buli omu Ekiijukyo ekirungi!