1. Kusisanaho n’Omukama Daudi kikaguzo ki abamu ekibasobora kwekaguza?

ITWENA tugonza kwikara omu bwomeezi obuteekaine kandi oburumu obusinge. Busaho muntu agonza kwikara ayetuntwire. Baitu obwire obumu nitusobora okwetuntura muno. Kandi nk’Omukama Daudi, abamu h’abaheereza ba Ruhanga nibasobora kwekaguza bati: “Ndihikya nkaha okuhanura omu mutima gwange, nintuntura omu mutima gwange okuiza obuire?”—Zab. 13:2.

2. Biki ebiturukugenda kubazaaho omu kicweka kinu?

² N’obukiraaba ngu titurukusobora kwikara tutetuntwire, haroho ebitusobora kukora kukukehya. Omu kicweka kinu, nitwija kubanza kubazaaho ebintu ebimu ebisobora kutuletera kwetuntura. Hanyuma nitwija kubazaaho ebintu mukaaga ebitusobora kukora kusobora kwikara tutekaine obuturukuba nitugumira ebizibu byaitu.

3. Bintu ki ebisobora kutuletera kwetuntura, kandi nitusobora kubitanga?

³ Haroho ebintu bingi ebisobora kutuletera kwetuntura. Kandi ebimu titusobora kubitanga kubaho. Ekyokurorraho, titusobora kutanga emihendo y’ebyokulya, emihendo y’engoye, hamu n’amaju g’okupangisa kutemba buli mwaka, rundi titusobora kutanga abantu abatukora nabo, rundi abatusoma nabo kwikara nibatusonasona kukora ekintu ekitali ky’obwesigwa, rundi kwejumbira omu busihani. Kandi titusobora kutanga abantu ab’omu kiikaro kyaitu kuleka kucwa ebiragiro. Tuhikwaho  ebizibu binu habwokuba nitwikara omu nsi nambere abantu abarukukira obwingi tibaine entekereza erukusigikirra ha misingi ya Baibuli. Kandi Sitaani ruhanga ow’ensi enu, akimanyire ngu abantu abamu nibaija kulemwa kuheereza Yahwe habwokuba ‘okutabana okw’ensi’ kubaletera kwetuntura muno. (Mat. 13:22; 1 Yoh. 5:19) Nahabweki eki, tikirukuhuniriza kurora ensi ijwiremu ebizibu ebiretera abantu kwetuntura muno!

4. Kiki ekisobora kubaho kakuba twetuntura ekihinguraine?

⁴ Nitusobora kwetuntura ekihinguraine habw’ebizibu kandi tukaleka kutekerezaaho ekintu ekindi kyona. Ekyokurorraho, nitusobora kweralikirra ngu titurukwija kusobora kukora sente ezirukumara ez’okutunga ebyetaago byaitu, rundi ngu nitwija kurwara tulemwe kugenda kukora rundi tufeerwe omulimo gwaitu. Nitusobora n’okweralikirra ngu titurukwija kusobora kworobera ebiragiro bya Ruhanga. Omu kasumi akatali kahara, Sitaani naija kukozesa abantu abaarukulema kutahirra abantu ba Ruhanga, nahabweki nitusobora kweralikirra omulingo tulyetwazaamu omu kasumi ako. Nitusobora n’okwekaguza, ‘Mali kibi nyowe kweralikirra ebintu nk’ebi?’

5. Yesu akaba namanyisa ki obuyagambire ngu: ‘Mutalituntura’?

⁵ Tukimanyire ngu Yesu akagambira abahondezi be ati: ‘Mutalituntura.’ (Mat. 6:25) Hati tugambe ngu natunihirramu kutetuntura nakake? Nangwa! Ijuka ngu abamu h’abaheereza ba Ruhanga abakara nabo baketuntura baitu baikara bali b’omuhendo omu maiso ge. * (1 Bakam. 19:4; Zab. 6:3) Yesu akaba n’atuhuumuza. Akaba atarukugonza twetuntule ekihinguraine habw’ebintu turukwetaaga tukahika n’okuleka kwebembeza kuheereza Yahwe omu bwomeezi bwaitu. Hati kiki ekitusobora kukora kakuba twetuntura?—Rora akasanduuko “ Omulingo gw’Okukikoramu.”

6. Kusigikirra ha Abafiripi 4:6, 7, kiki ekisobora kutukonyera kuteekana obuturukuba twetuntwire?

⁶ (1) Ikara nosaba. Obworukuba oyetuntwire muno habw’ekizibu, nosobora kusaba Yahwe akukonyere. (1 Pet. 5:7) Yahwe nasobora kugarukamu esaara zaawe kurabira omu kukuha ‘obusinge bwa Ruhanga oburukukira okumanywa kwona.’ (Soma Abafiripi 4:6, 7.) Yahwe naija kukozesa omwoyo gwe ogurukwera kukuha obusinge obu.—Bag. 5:22.

7. Kiki ekitusemeriire kwikara nitwijuka obuturaaba nitusaba hali Ruhanga?

⁷ Obworaaba nosaba hali Yahwe, mugambire ekiri ha mutima gwawe. Kandi mugambire ekizibu kyonyini kandi omusoborre omulingo orukwehurramu ha kizibu eki. Obuharaaba haroho eky’osobora kukora kumaraho ekizibu eki, musabe akuhe amagezi omanye eky’okukora hamu n’amaani ag’okukikora. Obworaaba otaine omulingo gwona ogw’okumaraho ekizibu eki, saba Yahwe akukonyere nukwo oteralikirra ekihinguraine. Omu saara zaawe, obw’oragambira Yahwe kiki kyonyini ekyorukwetaaga, nikiija kukurahukira kurora omulingo azigarukiremu. Kakuba atakugarukamu aho naaho, otaleka kusaba. Yahwe nagonza otagarukira ha kumusaba eki kyonyini ekyorukwetaaga, baitu nagonza oikale n’omusaba otarukuleka.—Luk. 11:8-10.

8. Kiki ekitutasemeriire kwebwa omu saara zaitu?

⁸ Obworaaba n’onagira Yahwe okwetuntura kwawe, oteebwa kumusiima. Kirungi kutekerezaaho ebintu byona ebirungi ebitwine,  n’obutuba twine ebizibu bingi. Baitu, kiki eky’osemeriire kukora kakuba oba otamanyire nk’oku osobora kusoborra Yahwe omulingo orukwehurra? Ijuka ngu Yahwe naija kugarukamu okusaba kwawe, n’obukiraaba ngu nosobora kugamba kwonka oti ‘Caali nkonyera!’—2 Byom. 18:31; Bar. 8:26.

9. Nitusobora tuta kutunga obulinzi bwonyini?

⁹ (2) Wesige amagezi ga Yahwe, hatali agaawe. Omu kasumi ka nabbi Isaya, abantu Bayuda bakitiina muno ngu Abasura bakaba nibagenda kubatahirra. Abantu Bayuda bakaba batarukugonza Abasura kubasingura, nahabweki bakasaba Abamisiri kubakonyera. (Is. 30:1, 2) Yahwe akabahabura ngu kwesiga Abamisiri kyali nikigenda kubarugiramu akabi. (Is. 30:7, 12, 13) Kurabira omuli nabbi Isaya, Yahwe akabagambira nk’oku bakaba nibasobora kutunga obulinzi bwonyini. Akagamba ati: “Omu [kutekaana] nomu kwesiga nuho haliba amani ganyu.”—Is. 30:15b.

10. Nyikara ki ezimu nambere tusobora kwoleka ngu nitwesiga Yahwe?

¹⁰ Nitusobora tuta kwoleka ngu nitwesiga Yahwe? Tekerezaaho ebyokurorraho binu. Kiki ekyorakora, kakuba otunga omulimo ogurukusasura sente nyingi, baitu ogurukwija kukwetaagisa kukora obwire bwingi, kandi ogurukwija kukulemesa kuheereza Yahwe nk’oku orukukora hati? Orakora ki, kakuba omuntu ow’okora na uwe ha mulimo akwegomba kandi kunu tali muheereza wa Yahwe ow’abatiziibwe? Rundi teramu akasisani omunyabuzaale ow’orukugonza muno akugambiire ati: “Nyowe na Ruhanga wawe okomeho omu.” Omu nyikara zinu zoona nikiija kukwetaagisa kukora encwamu ey’egumire, baitu omu buli nyikara yoona Yahwe naija kukuha oburagirizi obworukwetaaga. (Mat. 6:33; 10:37; 1 Kol. 7:39) Baitu ekikaguzo kiri, orayesiga Yahwe kandi oyorobere oburagirizi bwe?

11. Byahandiikirwe ki ebitusobora kusoma ebiratukonyera kwikara tutekaine obuturahiganizibwa?

¹¹ (3) Yegera ha byokurorraho ebirungi hamu n’ebibi. Baibuli erumu ebyahandiikirwe bingi ebirukwoleka obukuru obw’okwikara tutekaine kandi n’okuteeka obwesige bwaitu omuli Yahwe. Obworaaba nosoma ebyahandiikirwe ebi, wetegereze kiki ekyakonyire abaheereza ba Ruhanga kwikara batekaine n’obukiraaba ngu baali nibaraba omu kuhiganizibwa okw’amaani. Ekyokurorraho, kooti enkuru ey’Ekiyudaaya obuyaragiire abakwenda kuleka kutebeza, abakwenda batatiine. Oihireho, bakagamba batarukutiina bati: “Kituhikiriire okuhurra Ruhanga okukira abantu.” (Eng. 5:29) Abakwenda batatiine na hanyuma y’okuteerwa. Habwaki? Habwokuba bakaba bakimanyire ngu Yahwe n’abasagika. Kandi n’asiima ebibarukukora. Nahabweki bakagumizaamu nibatebeza amakuru amarungi. (Eng. 5:40-42) N’omwegeswa Sitefano obwakaba ali haihi kwitwa, akaikara atekaine muno kandi aine obusinge eky’aletiire amaiso ge ‘kusisana nka ga malaika.’ (Eng. 6:12-15) Habwaki? Habwokuba akaba akimanyire ngu Yahwe n’amusiima.

12. Kusigikirra ha 1 Petero 3:14 hamu na 4:14, habwaki nitusobora kwikara tusemeriirwe n’obukiraaba ngu nituhiganizibwa?

¹² Abakwenda baali baine obwakaiso oburukugumya ngu Yahwe akaba n’abasagika. Akaba abahaire amaani ag’okukora ebyamahano. (Eng. 5:12-16; 6:8) Omu kasumi kanu Yahwe tatuha amaani ag’okukora ebyamahano. Baitu kurabira omu Kigambo kye, Yahwe atugambira ngu obutuhiganizibwa habw’okuhikirra, tumusemeza kandi n’omwoyo gwe guba guli naitwe. (Soma 1 Petero 3:14; 4:14.) Nahabweki, titusemeriire kweralikirra ekitulikora obutulihiganizibwa omu kasumi ak’omu maiso. Baitu tukole kyona ekirukusoboka kugumya obwesige bwaitu omuli Yahwe ngu nasobora kutusagika  kandi n’okutujuna. Nk’oku abageswa abaakara bakozere, naitwe tusemeriire kwesiga omurago gwa Yesu ogurukugamba ngu: “Ndibaha akanwa namagezi abanyanzigwa banyu bona agabatalisobora okwemera nobukwakuba okuganga.” Yesu akaturaganiza ati: “Omu kuguma kwanyu numwo murakizaga obwomezi bwanyu.” (Luk. 21:12-19) Kandi oikale okimanyire ngu Yahwe aikara n’aijuka n’akantu akataito muno akarukukwata h’abaheereza be abafa bali besigwa hali uwe. Kandi naija kusigikirra ha kumanya kunu kubahumbuura.

13. Nitusobora tuta kugasirwa obutwegaho ebyokurorraho by’abantu abaalemerwe kwikara batekaine kandi besigwa hali Yahwe?

¹³ Nitusobora n’okwegera ha byokurorraho byabo abaalemerwe kwikara batekaine kandi abatarayesigire Yahwe. Kwegaho ebyokurorraho ebi ebibi nikiija kutukonyera kweriinda kukora ensobi ezi bakozere. Ekyokurorraho, Asa obuyafookere omukama wa Yuda, ihe erikooto likaija kumurwanisa baitu akesiga Yahwe, kandi Yahwe akamukonyera kusingura obulemu obu. (2 Byom. 14:9-12) Baitu ihe eritaito ery’Omukama Baasa owa Isaleri obulyaizire kumurwanisa, Omukama Asa akasasura ihe ly’Abaaramu kwija kumukonyera omu kiikaro ky’okuserra obukonyezi kuruga hali Yahwe nk’oku yakozere kara. (2 Byom. 16:1-3) Kandi obwakaba arwaire muno ali haihi kufa, ateesige Yahwe kumukonyera.—2 Byom. 16:12.

14. Kiki ekitusobora kwegera ha nsobi za Asa?

¹⁴ Ha kubanza, Asa akaserra obukonyezi kuruga hali Yahwe obuyatungire ebizibu. Baitu hanyuma akacwamu kwekwatiramu ensonga yalemwa kwesiga Yahwe kumukonyera. Ha kubanza encwamu ya Asa ey’okugenda hali Abaaramu kuserra obukonyezi, ekazooka nk’ey’amagezi. Baitu ihanga lya Yuda litatunge obusinge kumara akasumi kaingi. Yahwe akamugambira kurabira omu nabbi ati: “Baitu okesiga omukama wa Aramu, kunu otesige [Yahwe] Ruhanga wawe, nikyo ihe eryomukama wa Aramu likizire omukono gwawe.” (2 Byom. 16:7) Tusemeriire kwerinda kuteekereza ngu nitusobora kugonjorra ebizibu byaitu tutabandize kuserra obuhabuzi kuruga hali Yahwe kurabira omu Kigambo kye. N’obukyetaagisa kukora encwamu eya bwangu bwangu, tusemeriire kutekaana, tukesiga Yahwe habwokuba naija kutukonyera kukora encwamu ey’ehikire.

15. Kiki ekitusobora kukora obuturukuba nitusoma Baibuli?

¹⁵ (4) Kwata Ebyahandiikirwe omu mutwe. Obwosoma Ebyahandiikirwe omu Baibuli ebirukwoleka nk’oku kiri kikuru kuteekana kandi n’okwesiga Yahwe, lengaho kubikwata omu mutwe. Kusobora kubikwata omu mutwe, nikisobora kukwetaagisa kusoma omu iraka erikuhulirwa rundi kubihandiika kandi okaikara nobirabamu. Yahwe akaragira Yosuha kusoma ekitabu eky’Ebiragiro obutoosa omu iraka erya hansi nukwo asobole kukora encwamu ez’amagezi. Kandi ebi ebiyabaga asomere omu Kitabu eky’Ebiragiro bikaba nibiija n’okumukonyera kutatiina baitu kutunga obumanzi obw’okwebembera abantu ba Ruhanga. (Yos. 1:8, 9) Enkarra nyingi omu Baibuli nizisobora kukukonyera kuteekana omu nyikara ezikira kukuletera kwetuntura rundi kutiina.—Zab. 27:1-3; Nfu. 3:25, 26.

16. Yahwe akozesa ata ekitebe kutukonyera kwikara tutekaine kandi nitumwesiga?

¹⁶ (5) Mara obwire bwawe n’abantu ba Yahwe. Yahwe akozesa ab’oruganda na banyaanya itwe kutukonyera kuteekana n’okumwesiga. Omu nsorrokano, tugasirwa omu mbazo, omu by’okugarukamu eby’ab’oruganda na banyaanya itwe, kandi tugarukwamu amaani obutumara obwire nitubaza nabo. (Baheb. 10: 24, 25) Kandi nitusobora kugarukwamu muno amaani kakuba tugambiraho banywani baitu ab’omu kitebe abaturukwesiga ebintu ebirukutweralikiriza. “Ekigambo ekirungi” kuruga ha munywani nikisibora kutukonyera kwetuura omugugu ogw’amaani ogw’okwetuntura.—Nfu. 12:25.

17. Kusigikirra ha Abaheburaniya 6:19, okunihira kwaitu okurukukwata ha Bukama nikusobora kuta kutugumya omu nyikara ezigumire?

¹⁷ (6) Okunihira kwawe kwikaze kugumire. Okunihira kwaitu okurukukwata ha Bukama bwa Ruhanga nikusisana “nkekyokusibika omutima,” ekitukonyera kwikara tugumire n’obuturaaba tuli omu nyikara ezigumire rundi twetuntwire. (Soma Abaheburaniya 6:19.) Wecumitirizeeho emirago ya Yahwe ey’omu kasumi ak’omu maiso. Omu kasumi ako busaho muntu aliba aine ekintu kyona ekirukumweralikiriza. (Is. 65:17) Teramu akasisani oli omu nsi empyaka ey’obusinge nambere hataliba ebintu ebirukutuntuza. (Mik. 4:4) Kandi noija kugumya okunihira kwawe kakuba ogambiraho abandi ha nsi empyaka. Wekambe omu kukora omulimo ogw’okutebeza n’okufoora abantu abegeswa. Obworakora oti, noija ‘okwetegerereza kimu okunihira okuhika ha mpero.’—Baheb. 6:11.

18. Kiki ekisobora kubaho omu kasumi ak’omu maiso, kandi kiki ekitusobora kukora?

¹⁸ Nk’oku ensi enu eri haihi kuhwaho, nitwija kweyongera kutunga ebizibu ebisobora kutuletera kwetuntura. Ekyahandiikirwe kyaitu eky’omwaka 2021 nikisobora kutukonyera kugumira ebizibu ebi kandi tukaikara tutekaine, hatali habw’amaani gaitu, baitu habw’okwesiga Yahwe. Omu mwaka gunu, leka twoleke omu bikorwa byaitu ngu nitwikiririza omu murago gwa Yahwe gunu: “Omu [kutekaana] nomu kwesiga nuho haliba amani ganyu.”—Is. 30:15.